1-2. (a) Mukonda dyahi ki tu sasumuka dingi se a fidisa o ubhezelu wetu? (b) Ihi i twa-nda dilonga mu milongi yiyi?

KU MUVU wa 2018, o aboki a njimbu yambote a tungile mu jixi mwa fidisile o ikalakalu yetu, a tenesa 223.000 a aboki ndenge. Ki tu sasumuka dingi ni maka yá. Kala ki twa di longo mu milongi ya bhiti, o Jikidistá ja kidi a kinga kwa zukutisa. (2 Tim. 3:12) Kabasa kididi ku twa tungu, o jinguvulu ji tena ku tu fidisa kubheza o Nzambi yetu ya henda Jihova, ni lusolo.

² Se mu kididi bhu wa tungu o jinguvulu ji sola kufidisa kubheza Jihova, u tena ku di bhanga o ibhwidisu ya kayela: ‘O kwila o izukutisu ilombolola kwila Jihova ka xikina dingi o ubhezelu wetu? O kwila ki tu tena dingi kubheza Jihova kyoso kya fidisa o kikalakalu kyetu? O kwila nga tokala kuya mu ixi yengi, phala kubheza Nzambi ni ufôlo?’ O milongi yiyi ya-nda tambwijila o ibhwidisu yiyi. Twa-nda dilonga we kyebhi ki tu tena kusuluka mu kubheza Jihova, se o kikalakalu kyetu a ki fidisa ni ihi i twa tokala kudituna o kubhanga.

3. Kala kilondekesa 2 Kolindu 11:23-27, izukutisu yebhi ya bhiti na-yu poxolo Phawulu? Ihi i tu dilonga mu phangu ya Phawulu?

³ Se o jinguvulu a mu fidisa o kikalakalu kyetu, o kwila twa-nda banza ni lusolo lwoso kuma Jihova ka mu tu besowala dingi? Lembalala kuma, o izukutisu i bhita n’etu ki ilombolola kwila, Jihova ka sanguluka n’etu. Xinganeka mu phangu ya poxolo Phawulu. Mu kidi, Nzambi wa sangulukile ni mwene. Mwene wexile ni ujitu wa kusoneka 14 kya mikanda Ikôla ya  Ngeleku, wexile we poxolo ya akwa jixi jengi. Maji né kiki, wa di bhanene ni izukutisu yavulu. (Tanga 2 Kolindu 11:23-27.) O musoso wa poxolo Phawulu u tu longa kwila, Jihova wehela o jiselevende jê ja fiyele, ku a zukutisa.

4. O mundu wa tu zembe mukonda dyahi?

⁴ Jezú wa jimbulula se mukonda dyahi tweji kinga ku tu zukutisa. Mwene wambe kwila, eji tu zemba mukonda ki tu bhange mbandu ya mundu. (Nzwá 15:18, 19) Se a mu tu zukutisa, ki kulombolola kwila, ki twala dingi ni mabesá a Jihova. Mu veji dya kiki, kulombolola kwila twa mu bhanga o kima kya tokala!

5. O kwila o athu ala ni kutena kwa kuta disukilu ku ubhezelu wa Jihova? Jimbulula.

⁵ O athu a zembe o kidi, ka tena kuta disukilu ku ubhezelu wa Nzambi muteni-a-yoso Jihova. Avulu a fikisa kubhanga kiki, maji a lweza. Xinganeka ya bhitile mu kithangana kya Ita ya kayadi ya bhiti ku Mundu woso. Mu thembu yoyó, o jinguvulu ja jixi javulu, a bandekesa dingi o izukutisu yâ ku mundu wa Nzambi. O kikalakalu kya Jimbangi ja Jihova, ka ki fidisile ngó ku nguvulu ya akwa Nazi ku Alemanha, maji a ki fidisile we ku jinguvulu ja Austrália, ja Canadá ni ja jixi jengi. Maji tala ya bhiti. Kyoso kya mateka o ita ku muvu wa 1939, kwexile 72.475 a aboki ku mundu woso. Ku disukilu dya ita ku muvu wa 1945, kwexile kyá 156.299 a aboki, kiki kya bhiti mukonda Jihova wexile mu besowala o mundu wê. O aboki a di bandekesele kyavulu, kya matekene o ita ndenge!

6. Mu veji dya ku tu kwatesa wôma, ihi i tena kubhita mukonda dya izukutisu? Bhana phangu.

⁶ Mu veji dya ku tu kwatesa wôma, o izukutisu i tena ku tu swinisa kukolokota dingi ni kubheza Jihova. Mu kifika, sayi dikaza dya kexile ni mona umoxi, dya tungile mu ixi mwa fidisile o ubhezelu wetu ku jinguvulu. Mu veji dya kukala ni wôma ni kusosolola o sidivisu yâ kwa Jihova, ene a kituka aboki a thembu yoso. O muhatu, wa xisa o salu yê mwa kexile mu mu futa kitadi kyavulu. O diyala wambe kwila, o kufidisa o kikalakalu kyetu, kwa bhangesa athu kubhanga ibhwidisu yavulu ya lungu ni Jimbangi ja Jihova. Mukonda dya kiki, ki kwa bhonzele kumateka ku a longa o Bibidya. O kifidisu kiki, kya bhekela mbote yengi ku athu. Sayi kafunga mu ixi yenyoyo, wambe  kwila, avulu ka kexile mu sidivila dingi Jihova, a mateka kuya dingi mu yônge ni kuboka.

7. (a) Ihi i tu dilonga mu divulu dya Ijila 26:36, 37? (b) Ihi i wa-nda bhanga se a fidisa o ubhezelu wetu?

⁷ Kyoso jinguma kya fidisa o ubhezelu wetu, ene a mesena ku tu kwatesa wôma wa kubheza Jihova. Ene ka fidisa ngó o ubhezelu wetu, a mwanga we misoso ya makutu ya lungu n’etu. A tumikisa a xiku dya ngoji phala kusota ima mu jinzo jetu, a tu jijidika kuya mu jinzo ja kufundisa, amoxi mu dyetu a ambata mu kaleya. Ene a mesena kwila, etu tu kala ni wôma wavulu, mukonda ejiya kuma, a tena kuta amoxi mu dyetu mu kaleya. Se tu a ehela ku tu teketesa ni wôma, tu tena kuxisa o ubhezelu wetu kwa Jihova bhofele-bhofele. Ki twa mesena kukala kala yó a a tange mu divulu dya Ijila 26:36, 37. (Tanga.) Ki twa-nda kwehela kwila, o wôma u tu fidisa kubheza Jihova. Etu twa dyelela kwa Jihova ni kidi kyoso, ki twala ni wôma. (Jisá. 27:1) Tu samba mu kubhinga o itendelesu ya Jihova. Etu twejiya kwila, ni kikwatekesu kya Nzambi né mwene nguvulu yala ni kutena kwavulu, ka tena ku tu fidisa kubheza o Nzambi yetu ni ufiyele woso.—Jihe. 13:6.

8-9. (a) Ihi ya tokala kusola o kubhanga kala mutwameni wa mwiji mba Kidistá woso-woso? (b) Ihi ya-nda kwatekesa o muthu kusola ni unjimu?

⁸ Se nguvulu mu dyembu bhu wa tungu a fidisa o ubhezelu wetu, nange u dibhwidisa se wa tokala kuya mu ixi yengi bhu u tena kubheza Jihova ni ufôlo. Kala muthu mudyetu mwéne wa tokala kusola se ihi ya-nda bhanga. Se-ku muthu wa tokala kusola mu kididi kyê. Sayi yá a tena kusanga kikwatekesu mu kudilonga ya lungu ni ima ya bhiti ni Jikidistá mu hama ya dyanga, kyoso kya a zukutisile. Kyoso o jinguma kya jibha Xitevá ni matadi, o maxibulu akexile mu Jeluzaleme, a lengela ku Judeya ni ku Samádya. Amoxi a lengela katé ku Fenisya, ku Xipele ni ku Andiyokya. (Mat. 10:23; Ika. 8:1; 11:19) Maji amukwá, kyoso kya dilonga ya lungu ni izukutisu yengi ya tatesa o Jikidistá ku hama ya dyanga, a mona kwila, poxolo Phawulu ka xisa o ididi mwa fidisile o kikalakalu kya kuboka. Mu veji dya kiki, mwene wa te o mwenyu wê mu kilwezu phala kuboka o njimbu yambote ni kukolokotesa o jiphange mu jimbanza mwa kexile izukutisu yavulu.—Ika. 14:19-23.

⁹ Ihi i tu longa o musoso yú? Kala mutwameni wa mwiji mwéne wa tokala kusola mudyé se wa-ndaya mu kididi kyengi mba kana. Ande dya kusola, wa tokala kusamba ni kuxinganeka kyambote ku mwiji wê. Wa tokala we kuxinganeka se o kuya mu kididi kyengi, kwa-nda ku a kwatekesa mba kana. Kala Kidistá wa tokala “wambata o kimbamba kyê,” mu maka yá. (Nga. 6:5) Ki tu tokala kufundisa akwetu mu ima ya sola o kubhanga.

10. Itendelesu yebhi ya-nda bhana o jiphange ku filiyale ni tufunga?

¹⁰ Kyebhi ki u tena kusuluka ni kubheza Jihova sumbala a fidisa o kikalakalu kyetu? O jiphange ja filiyale ja-nda bhana itendelesu ni jindunge ku tufunga twa kilunga kyé. O itendelesu yiyi, ya lungu ni kyebhi kya-nda tambula o kudya mu nzumbi, kyebhi kya-nda dyongeka, ni kyebhi kya-nda boka o njimbu yambote. Se O jiphange mu filiyale ka tena kutumikisa itendelesu ni jindunge ku tufunga, o tufunga twa-nda kwatekesa eye ni jiphange joso mu kilunga kusuluka ni kubheza Jihova. Ene a-nda twendesa bhu kaxi ka Bibidya ni milongi ya madivulu metu.—Mat. 28:19, 20; Ika. 5:29; Jihe. 10:24, 25.

11. Mukonda dyahi u tena kudyelela kwila, kwa-nda kala jinga milongi i wa bhindamena phala kukolesa o kixikanu kyé? Ihi i u tena kubhanga phala kulanga kyambote o Bibidya ni madivulu amukwá?

 ¹¹ Jihova wa kanena kwila o jiselevende jê eji dya kyambote mu nzumbi. (Iza. 65:13, 14; Luka 12:42-44) Mu kiki, u tena kudyelela ni kididi kyoso kwila, o kilunga kyé kya-nda kubhana o ima yoso i wa bhindamena phala kukolokota mu ufiyele. Ihi i u tena kubhanga? Kyoso kya fidisa o kikalakalu kyetu, sota kididi kya tokala phala kusweka o Bibidya ni madivulu amukwá u wala na-u. Aluka, kana kuxisa o ima yiyi ya valolo, ki kale madivulu mba mitelembe mwala o milongi yetu mu kididi bwa tena ku i sanga ni lusolo. Kala muthu mu dyetu wa tokala kusota jindunge phala kusuluka ni kukolesa o kixikanu.

12. Kyebhi o tufunga kya-nda sokejeka o yônge phala o jinguma ka kijiye?

¹² Ihi ya-nda bhita ni yônge yetu? O tufunga a-nda sota kubhanga o yônge mu kaswekele. O athu a tu zukutisa ka-nda kijiya. Nange ene a-nda bhanga o yônge mu ibuka yofele. A-nda lungulula o ola ni kididi bhwene mu bhita o yônge. Kana kuzwela ni dízwi dya swina, mu kuya ni mu kutunda mu yônge. Se u bhanga kiki, wa-nda kwatekesa kulanga o jiphange. Nange wa bhingi we kuzwata kala wala kubhata.

13. Ihi i tu tena kudilonga ni jiphange jetu ku antiga União Soviética?

¹³ Mu kuzwela ya lungu ni sidivisu ya kuboka, o ima ki idifu mu ididi yoso. Kuma twa zolo Jihova, etu twa mesena we kutangela akwetu ya lungu ni Utuminu, twa-nda sota ndunge phala kuboka. (Luka 8:1; Ika. 4:29) Ya lungu ni kikalakalu kya kuboka kya Jimbangi ja Jihova, ku antiga União Soviética, o mukwa musoso Emily B. Baran wambe: “Kyoso o nguvulu kyambela o Jimbangi ja Jihova kwila ka tokalele dingi kuboka, ene a mateka kuzwela ni jivizinyu, jikoleka ja salu ni makamba. Kyoso kya ambatele mu kaleya mukonda dya kuboka, ene a bokela o athu a kexile na-u mu kaleya.” Sumbala o kikalakalu a ki fidisile, o jiphange jetu ku antiga União Soviética, a suluka ni kuboka. Eye u tena kukayela o phangu yâ se o kikalakalu kya kuboka a ki fidisa mu dyembu dyé!

14. Salámu 39:1, i tena ku tu langa ku mubhetu webhi?

¹⁴ Dilange ni ima i wa-nda zwela kwa akwenu. Kyoso kya fidisa o kikalakalu kyetu, twa tokala kwijiya o “kithangana kya ku di xibha.” (Ndo. 3:7) Ki twa tokala kuzwela o majina a jiphange jetu. Ki tu tokala kuzwela o kididi bhwala. Ki tu tena kuzwela kyebhi ki tu boka ni kyebhi ki tu tambula o kudya mu nzumbi. Ki tu tokala kutangela o maka yá ku athu a kalakala ni jinguvulu. Ki tu mesena we ku a tangela makamba metu, jindandu ja tungu mu ixi yetu, né mwene ja tungu mu ixi yengi.  Se tu bhanga kiki, tu tena kuta o mwenyu wa jiphange jetu mu kilwezu.—Tanga Sálamu 39:1.

15. Ihi ya-nda sota ku tu bhanga Satanaji? Kyebhi ki tu tena kulenga o mubhetu yú?

¹⁵ Kana kwehela maka ofele ku tu bhangesa ku di mwanga. Satanaji wejiya kwila, o athu a tungu dibhata dimoxi, se a di lungulukila, dibhata dyódyo ki di tena kwimana. (Mar. 3:24, 25) Mwene wa-nda sota kubhanga yoso ni yoso phala ku tu mwanga. Mu kiki, mwene u kinga kwila, tu zoka mu dyetu mu veji dya kuzoka ni mwene.

16. Phangu yebhi yambote ya tu xila Phange Gertrud Poetzinger?

¹⁶ Né mwene o Jikidistá ja kulu mu nzumbi, a bhingi ku di langa phala ka dibhale ku mubhetu yú. Tala o phangu ya jiphange jiyadi ja ahatu a undile. Phange Gertrud Poetzinger ni phange Elfriede Löhr. Ene a a tele mu kaleya kumoxi ni phange ya mukwá ya muhatu mu kibende kya akwa Nazi. Phange Gertrud wa mateka kukala ni njinda ya phange Elfriede, mukonda dya kuswinisa o jiphange ja mukwá ja ahatu akexile mu kibende. Ku pholo dya kwenda, Gertrud jisonyi ja mu kwata, wa bhingi kikwatekesu kwa Jihova. Mwene wa soneka: “Se akwetu ala dingi ni uhete wa kubhanga kima, etu ndenge, twa bhingi kudilonga kuxikina.” Kyebhi kya tolola o njinda yê? Gertrud wa di kwatenena mu idifwa yambote ya Elfriede, ni mu ukexilu wê wa kudibhana kyambote ni athu. Mu kubhanga kiki, mwene wa kituka dingi dikamba dya Elfriede. Kiyadi kyâ a tundu ku kibende ni mwenyu. Ene a suluka mu kusidivila Jihova, katé ku disukilu dya myenyu yâ mu ixi. Se tu bhanga yoso phala kubatula o maka ni jiphange jetu, ki twa-nda kwehela kima ku tu mwanga.—Kol. 3:13, 14.

17. Mukonda dyahi twa tokala kukayela o itendelesu i bhana o kilunga kya Jihova, mu ithangana yoso?

¹⁷ Kayela o itendelesu ithangana yoso. Se tu kayela o itendelesu i bhana o jiphange ala ku pholo, twa-nda lenga o ilwezu. (1 Phe. 5:5) Mu kifika, sayi ixi mwa fidisa o kikalakalu kyetu, o jiphange ala kupholo a tendelesele o aboki phala ka bhane madivulu mu ukunji. Maji sayi phange ya diyala muboki wa thembu yoso, ka kayela o kitendelesu kiki. Wa bhana mwene madivulu. Ihi ya bhitile? Ki kubhitile ithangana yavulu kyoso mwene ni jiphange ja mukwá kya zubhile kubhana umbangi kyoso ki kwa monekene kithangana, a a bhangele ibhwidisu kwa a xiku dya ngoji. Ene nange exile mu a kayela. A xiku dya ngoji a tena kubhongolola o madivulu a bhanene o jiphange. Ihi i tu dilonga ku musoso yú? Twa bhingi kukayela o itendelesu né mwene se ki tu i xikina. Jihova u  sanguluka ithangana yoso, kyoso ki tu belesela o jiphange jala kupholo bhu kaxi ketu.—Jihe. 13:7, 17.

18. Mukonda dyahi twa tokala kudituna kubhana ijila i tunda mu kixinganeku kyetu?

¹⁸ Kana kubhana ijila ya tundu mu kixinganeku kyé. Se tufunga tu bhana ijila ya tundu mu ixinganeku yâ, a-nda bhonzesa dingi o ima phala o jiphange. Phange Juraj Kaminský wa lembalala ya bhitile kyoso kya fidisile o kikalakalu ku antiga Tchecoslováquia: “Kuma a kutile jiphange javulu a kexile kupholo ni tufunga, sayi jiphange a kexile kupholo maji ka a kutile, a mateka kubhana itendelesu ku aboki ya tundile mu ixinganeku yâ. A a tangela o ima ya tokalele kubhanga ni ima ka tokalele ku i bhanga.” Jihova ka tu bhana o ujitu wa kubhana ijila ku jiphange jetu. O muthu u bhana ijila ya tundu mu kilunji kyê, ka mu langa kyambote o jiphange. Wa mu sota kukala ngana ya kixikanu kya jiphange jê.—2 Kol. 1:24.

19. Kala ki londekesa o divulu dya 2 Malunda 32:7, 8, mukonda dyahi tu tena kuswina né mwene ni ima yene mu bhanga Satanaji?

¹⁹ O nguma yetu ya dikota Satanaji o Dyabhu, ka-nda bhwila mu kuzukutisa o jiselevende ja fiyele ja Jihova. (1 Phe. 5:8; Dij. 2:10) Satanaji ni akayedi yê, a-nda sota ku tu fidisa kubheza Jihova. Maji sé-ku kima kya-nda tu fidisa kusidivila Jihova! (Mate. 7:21) Jihova wala ku mbandu yetu. Mwene wa-nda suluka ni ku tu kwatekesa, né mwene se a fidisa o kikalakalu kyetu.—Tanga 2 Malunda 32:7, 8.

20. Ihi i wa mesena kubhanga?

²⁰ Tu kale ni kixinganeku kya kexile na-kyu o jiphange jetu ku hama ya dyanga, ambele ku jinguvulu mu izuwa yâ: “Enu-enu xinganekenu kyoso kya yuka-bhu bhu pholo ya Nzambi: O ku m’ívwa enu, mba kwívwa Nzambi? Tongololenu-kyu! Kuma etu ki tu tena kufula kutanga o ima yoso i twa mono, i tu evu.”—Ika. 4:19, 20.