1-2. (a) Morwasinke nayi dilira kututetukisa nsene epangero li silika sirugana setu? (b) Yisinke natu ka lironga mosirongwa esi?

MOMVHURA 2018, vazuvhisi wokupitakana 223 000 kwa tungire moyirongo omu va silikire ukareli wetu ndi yirugana yetu yimwe. Eyi kapi ayi tu tetukisa. Ngomu ka tu yi lirongere mosirongwa sa ka pita, Vakriste wousili kuyindindira asi ngava va hepeka. (2 Tim. 3:12) Yi kare asi kupi twa tunga, mapangero kuvhura ga tu hagekese kukarera Karunga gwetu geharo, Jehova, twa hana kuyindindira.

² Nsene epangero li hagekesa po ukareli wetu, ove nampo kuvhura o lipure asi: ‘Ngoso mahepeko kulikida asi Karunga kapi hena ana tu hafere ndi? Ngoso kapi hena ngatu karera Jehova ndi? Kuvhura ni dirukire kosirongo sapeke oku nani ka karera Karunga nemanguruko ndi?’ Mapuro aga, tatu ka ga limburura mosirongwa esi. Tatu ka lironga hena omu natu twikira kukarera Jehova nsene sirugana setu vana si silike ntani neyi twa hepa kunyokera po kurugana.

3. Kuliza no-2 Vakolinte 11:23-27, mahepeko musinke ga ligwanekerere nago mupositoli Paurusa ntani yisinke tuna kulirongera ko kosihorokwa sendi?

³ Nsene epangero li hagekesa po ukareli wetu, kuvhura tu gazare epuko asi Karunga kapi ana tu hafere. Nye diworoka asi mahepeko kapi aga likida asi Jehova kapi ana tu hafere. Pasihonena, gazadara ko kuhamena mupositoli Paurusa. Karunga kwa mu haferere. Age kwa tjenge nombilive 14 domoMatjangwa goRugereka ntani age kwa kere mupositoli govapagani.  Nye nampili ngomu Karunga ga mu haferere, age kwa ligwanekerere nomahepeko gomanene. (Resa 2 Vakolinte 11:23-27.) Eyi ya horokerere Paurusa kuna kuturonga asi Jehova kupulisira vakareli vendi wovalimburukwi vava hepeke.

4. Morwasinke wa tu nyengera uzuni?

⁴ Jesus kwa fatwilire konda zeyi natu yi ndindilira asi ngatu ligwanekera nomahepeko. Age kwa tente asi ngava tu nyenga morwa kapi twa hamena kouzuni ou. (Joh. 15:18, 19) Nsene kuna kutuhepeka, ayo kapi ayi tanta asi Jehova kapi ana kutuvatera. Nye ayo kulikida asi ose kuna kurugana yoyiwa.

5. Vantu kuvhura va hagekese po ukareli waJehova ndi? Faturura.

⁵ Vantu ava ava tu rwanesa kapi tava vhuru kutuhagekesa kukarera Karunga gwetu, Jehova. Wovanzi va yi heteka nye kapi ya va tompoka. Koneka eyi ya horokere posiruwo soYita yaUvali yoUzuni. Posiruwo oso, mapangero gomoyirongo yoyinzi kwa hepekere unene vantu vaKarunga. Mbunga zaNazi zomoNdovesiranda nepangero lyomoAustralia neli lyomoKanada ntani noyirongo yimwe kwa silikire yirugana yoNombangi daJehova. Nye koneka eyi ya horokere. Apa yita ya tamekere 1939, mouzuni mudima kwa kere mo vazuvhisi wokusika 72 475. Nye apa ya hege yita 1945, sivaro sovazuvhisi kwa ka sikire 156 299 morwa Jehova kwa tungikire vakareli vendi. Sivaro sovazuvhisi kwa li gwedererere kupitakana pwaruvali.

6. Yininke musinke yoyiwa ayi horoka nsene kuna kutuhepeka? Gava sihonena.

⁶ Mevango lyokututjilisa, mahepeko kuvhura kutuvatera tu tokomene kukarera Jehova. Pasihonena, valikwali vamwe ava va kere namunwawo gomumati kwa tungire mosirongo omu epangero lya tokwere kusilika ukareli wetu. Mevango lyokukara nowoma, valikwali owo kwa tamekere uzuvhisi wokukarerera. Mukadi kwa hagekere hena yirugana yendi yokufuta yimaliwa yoyinzi. Ano mugara kwa tente asi esiliko eli kwa ninkisire vantu va kare nomapuro kuhamena Nombangi daJehova. Ngoyitundwamo, ayo ngayi mu rerupire kutameka kuronga vantu Bibeli. Esiliko eli kwa retere hena yitundwamo yoyiwa. Mukuronambunga gumwe gomosirongo oso kwa tanta asi  vantu wovanzi ava va hagekere kukarera Jehova va ya tamekere kuza komapongo nomokuzuvhisa.

7. (a) Yisinke tuna lirongere ko ketjangwa lyomwaLevitikus 26:36, 37? (b) Yisinke ngo rugana apa ngava silika ukareli wetu?

⁷ Apa nonkore detu adi hagekesa po ukareli wetu, awo kwa hara tu kare nowoma yipo tu hageke kukarera Jehova. Kugusa ko kusilika sirugana setu, nonkore kuvhura di hanese nombudi doyimpempa kutuhamena ntani kuvhura va tume ko vamwe va ya homone momambo getu nokutusininika tu ze konompanguro ndi kutura vanavazinyetu vamwe modorongo. Awo kugazara asi natu kara nowoma morwa vana tura vamwe modorongo. Nye nsene tu va tjira, eyi kuvhura yi tu ninkise tu hageke kukarera Jehova. Kapi tuna hara kufana ngwendi vantu ava va tumbura mwaLevitikus 26:36, 37. (Resa.) Ose kapi ngatu pulisira woma u tu ninkise tu hageke kukarera Jehova. Ose kwa huguvara unene mwaJehova ntani ngatu nyokera po kukara nowoma. (Jes. 28:16) Ose ngatu kanderera kwaJehova yipo ngatu dive eyi natu rugana. Mokumona asi Karunga gwetu kutuvatera, eyi kutupa mukumo asi kwato epangero eli nali tu hagekesa kukarera Karunga gwetu.—Heb. 13:6.

8-9. (a) Etokoro musinke ga hepa kutura po nkenye Mukriste ndi nkenye nturagumbo? (b) Yisinke nayi vatera muntu a ture po etokoro lyewa?

⁸ Nsene epangero lyomosirongo seni li hagekesa po ukareli wetu, ove nampo kuvhura o lipure nsene kuvhura o dirukire kosirongo sapeke oku ngo ka karera Jehova noumanguruki. Eli kuna kara etokoro eli no tura po nyamoge. Komeho vamwe va ture po etokoro awo kugazadara ko eyi va rugene Vakriste womosiruwo sovapositoli apa va ligwanekerere nomahepeko. Apa Sitefanesa va mu dipagere nomamanya, varongwa ava va kere moJerusarema kwa tjwayukilire moJudeya nomoSamaliya ntani awo kwa zire hena dogoro koFonisiya nokoKipurusi ntani koAntiyokiya. (Mat. 10:23; Yirug. 8:1; 11:19) Nye vamwe kuvhura va honene eyi ga rugene Paurusa apa sa kere ko hena siruwo somahepeko. Age kwa tokwere kukara komavango oku vantu ngava rwanesa sirugana sokuzuvhisa nampili ngomu ya kere siponga. Age kwa tulire eparu lyendi mosiponga morwa kwa here kuzuvhisa mbudi zongwa nokukorangeda vapuli vakwawo ava va kere moyitata omu mwa kere mahepeko gomanene.—Yirug. 14:19-23.

⁹ Yisinke natu lirongera ko koyihorokwa eyi? Nkenye nturagumbo ga hepa kutura po etokoro lyamwene nsene kuvhura va diruke ndi hawe. Komeho a diruke, ga hepa kukanderera nokugazadara ko nawa kuhamena ukaro wepata lyendi ntani nomauwa nomaudona ga kara mo mokudiruka. Moukaro wangesi, nkenye Mukriste ga hepa “kusimba mudigo gwamwene.” (Gar. 6:5) Kapisi tu pangure wopeke komatokoro aga vana kutura po.

10. Mavyukiso musinke ngazi gava Beteli novakuronambunga?

¹⁰ Ngapi omu no twikira kukarera Jehova nsene sirugana setu vana si hagekesa po? Beteli ngazi gava mavyukiso kovakuronambunga kuhamena omu nomu gwana nondya dopampepo nomu nomu ponga kumwe ntani nomu nomu zuvhisa mbudi zongwa. Nsene Beteli kapi zina gwanekere simpe novakuronambunga, vakuronambunga ngava ku vatera ntani nava womombungakriste  zeni yipo mu twikire kukarera Jehova. Awo ngava gava mavyukiso gokutunda moBibeli nomoyimbapiratjangwa yetu.—Mat. 28:19, 20; Yirug. 5:29; Heb. 10:24, 25.

11. Morwasinke no karera nehuguvaro asi ngo gwana nondya dopampepo? Ntani yisinke no rugana yipo o popere Bibeli zoge noyimbapiratjangwa yoge?

¹¹ Jehova kwa tumbwidira vakareli vendi asi ngava kutika pampepo. (Jes. 65:13, 14; Ruk. 12:42-44) Yipo nye, kuvhura o kare nehuguvaro asi mbunga zendi ngazi ku pa nkenye eyi wa hepa yipo o twikire kulimburukwa Jehova. Nye koyili eyi wa hepa kurugana nove. Nsene ukareli wetu vana u silike, papara evango lyewa oku no horeka Bibeli zoge noyimbapiratjangwa yimwe. Wa ha siga yininke oyo yomulyo poruzera apa nava vhura kuyigwana usimbu. Nkenye gumwe gwetu ga hepa kurugana ko yuma yipo a kare ana koro mepuro nsene sirugana setu vana si silike.

12. Ngapi omu vakuronambunga nava wapaika mapongo monkedi ezi nazi ninkisa vantu va dire kudiva eyi tuna kurugana?

¹² Ngapi kuhamena mapongo getu? Vakuronambunga ngava wapaika mapongo monkedi ezi ngava dira kuyidimburura varwanesi. Awo kuvhura va mu tantere mu ponge motumbungagona ntani kuvhura va rundurure nkenye apa siruwo sepongo ntani nokutjindja mavango oku nomu pongera. Ove kuvhura o popere vapuli vakweni pokuuyunga nakauke nsene kuna kuza ndi kuna kupwaga kepongo. Ntani kuvhura o dware yikoverero eyi nayi dira kuninkisa vantu va dimburure asi kepongo ono kuza.

13. Yisinke natu lirongera ko kovanavazinyetu ava va parukire posiruwo apa Rusia noyirongo eyi ya mu kwatesere ko ya pangerere?

¹³ Kombinga zosirugana sokuzuvhisa, eyi kwa korera koukaro womomukunda gweni. Mokumona asi ose twa hara Jehova ntani kuhafera kutantera ko wopeke kuhamena Uhompa wendi, ose ngatu papara mpito yipo tu zuvhise. (Ruk. 8:1; Yirug. 4:29) Munahistoli Emily B. Baran kwa uyungire kuhamena sirugana sokuzuvhisa soNombangi daJehova mosiruwo apa Rusia noyirongo eyi ngayi mu kwatesa ko ngayi pangere. Age kwa tente asi: “Apa epangero lya tanterere Nombangi daJehova di hageke kuzuvhisira vantu, Nombangi kwa tamekere kuzogera novamusinda vawo novarugani vakwawo ntani novakaume vawo. Apa Nombangi va di twere modorongo, awo kwa twikilire kuzuvhisira ko vanadorongo vakwawo.” Nampili ngomu sirugana setu va si silikire, vanavazinyetu kwa twikilire kuzuvhisa. Nsene sirugana setu ngava si silika mosirongo seni, twikira kuhonena vanavazinyetu owo.

14. Yisinke ava tu rondora mEpisarome 39:1?

¹⁴ Takamesa eyi o tantere wopeke.  Posiruwo apa ngava silika sirugana setu, twa hepa kudiva asi ‘siruwo musinke sokumwena.’ (Muud. 3:7) Kapisi tu uyunge mauzera aga ga hepa kukara mehoramo, pasihonena, madina govanavazinyetu nomavango aga atu pongere nomu atu zuvhisa ntani monkedi omu atu gwana nondya dopampepo. Mauzera gangesi kapisi tu ga tantere vantu ava ava rugana mepangero ndi vakaume vetu novanekoro ava va tunga mosirongo setu ndi moyirongo yapeke. Nsene tu yi rugana, ose ngatu tura vanavazinyetu mosiponga.—Resa Episarome 39:1.

15. Yisinke nga hetekera ko Satana kurugana, nye ose yisinke twa hepa kurugana?

¹⁵ Wa ha pulisira maudigu gomanunu ga tu gaunune. Satana ga yi diva asi embo eli lya lilimba lyene nalyene nokukara po si. (Mar. 3:24, 25) Age nga hetekera ko nkenye apa kutugaununa. Monkedi zangoso, age kugazara asi ose ngatu tameka kulirwanesa nyamwetu mevango lyokumurwanesa.

16. Sihonena musinke sosiwa ga tulire po munazinyetu Gertrud Poetzinger?

¹⁶ Nampili Vakriste ava va kura pampepo, va hepa kutakamesa yipo va dire kugwira mosiraha esi. Koneka sihonena sovanavazinyetu wovakadi vavali wovagwavekwa, Gertrud Poetzinger naElfriede Löhr. Awo kwa kere kumwe mokamba zounkwate zaNazi novanavazinyetukadi vamwe. Gertrud kwa fililire mfudu Elfriede apa nga gava yiuyungwa yoyiwa kovapuli vakwawo wovakadi ava va kere mokamba. Konyima, Gertrud kwa lifire nomuga makura yipo ga kanderere kwaJehova a mu vatere. Age kwa tjenge asi: “Twa hepa kuyitambura nsene vakwetu va kara noyitumbukira yoyinene kutupitakana ose.” Yisinke ya mu vaterere a nyokere po sikara esi somfudu? Gertrud kwa demenenene koyikara yaElfriede yoyiwa. Monkedi zangesi, age ga ya tengwidilire po ukaume wendi naElfriede. Navenye ya va tompokere kupwaga mokamba ntani awo kwa ya karererere Jehova noulimburukwi dogoro apa va ya dogorokere. Nsene tu rugana unene tu funde po madiro kulizuvha novanavazinyetu, kapi ngatu pulisira nkenye eyi yi tu gaunune.—Koros. 3:13, 14.

17. Morwasinke ya karera nomulyo tu kwame nkenye apa mavyukiso aga aga tundu kombunga zaJehova?

¹⁷ Nyokera po kulinenepeka. Nsene tu kwama mavyukiso aga atu gwana kovanavazinyetu ava ava tu pitisire, ose ngatu nyokera po maudigu. (1 Pet. 5:5) Pasihonena, mosirongo simwe omu va silikire sirugana setu, vanavazinyetu ava ava pitisire kwa tanterere vazuvhisi va dire kugava yimbapiratjangwa mokuzuvhisa. Nye munazinyetu gumwe gomugara gomosirongo  oso, kapi ga kweme egano olyo, age nga gava yimbapiratjangwa mokuzuvhisa. Yitundwamo musinke ya kere? Konyima tupu zapa va zuvhisire novakwawo, vaporosi tava va gwana nokuvapuragera. Ayo kumoneka asi vaporosi kwava kweme nokusimba yimbapiratjangwa eyi va hanesere. Yisinke natu lirongera ko kosihorokwa esi? Twa hepa kukwama mapukururo nampili tu lizuvhe asi ose twa diva yoyinzi. Jehova kuhafa apa atu ruganene kumwe novanavazinyetu ava ga horowora va tu pitisire.—Heb. 13:7, 17.

18. Morwasinke natu dilira kutura po noveta da hana hepero?

¹⁸ Wa ha tura po noveta da hana hepero. Nsene vakuronambunga va tura po noveta da hana hepero, ayo ngayi retera vanavazinyetu udigu. Munazinyetu Juraj Kaminský kudiworoka eyi ya horokere moCzechoslovakia apa va silikire sirugana setu. Age kwa tanta asi: “Konyima zapa vanavazinyetu vamwe ava ngava pitisire novakuronambunga wovanzi vava kwete, vanavazinyetu wovakuronambunga ava va dilire kukwata kwa tamekere kutura po noveta davene kuhamena vazuvhisi, awo hena kwa tanterere vazuvhisi eyi nava rugana neyi nava dira kurugana.” Jehova kapi ga tu pa nonkondo dokutulira po vakwetetu matokoro. Muntu ogu a tura po noveta da hana hepero, age ngoso kuna kuhetekera ko kupangera mukwawo.—2 Kol. 1:24.

19. Kuliza no-2 Histoli 32:7, 8, morwasinke natu dilira kukara nowoma?

¹⁹ Nkore zetu zonene, Satana Muzonaguli, nga twikira kuhepeka vakareli vaJehova. (1 Pet. 5:8; Ehor. 2:10) Satana nava ava mu kwatesa ko ngava hetekera ko kusilika ukareli wetu. Nye kapisi yi tu tjilise. (Deut. 7:21) Jehova nose ana kara ntani nga twikira kutuvatera nampili yi kare asi sirugana setu vana si silike.—Resa 2 Histoli 32:7, 8.

20. Yisinke ono tokomene kurugana?

²⁰ Tu tokomeneni kukara ngwendi vapuli vakwetetu womosiruwo sanare ava va tanterere vapangeli womosiruwo sawo asi: “Nyamweni nyone nomu tokora, asi siwa po kombinga zaKarunga, sokulimburukwa kweni ndi kwaKarunga? Yeeyi ose ko nokuwapa si asi tu dire kuuyunga yokuhamena eyi twa zuvha neyi twa mona.”—Yirug. 4:19, 20.