1-2. (a) Ino nceebonshi tatweelete kukankamana na kulambila kwesu kwakashikwa? (b) Ino tutokwiiya nshi mumutwi uyu?

Mumwaaka wa 2018, beshikushimikila beendilila 223,000 bakalinga kukala mushishi ncito yesu moyakakashikwa. Makani aya taatukankamiki. Bweenka mbuli mbotwakeeya mumutwi wa nsondo yamana, mbuli Beneklistu bancine tulalangila kupenshekwa. (2 Timo. 3:12) Kuli koonse nkotukala, inga twalangila ncito yesu yakulambila Lesa wesu Yehova, kukashikwa amfulumeende paciindi cili coonse.

² Na mfulumeende yakasha ncito yesu kumusena nkomukala, mpashi inga mwatalika kuliipusha ayi: ‘Sa kupenshekwa ncitondesho cakwaamba ayi Lesa taatusuniiwo? Sa uku nkokumana kwakupaila kwesu? Sa inga ndalongela kucishi kumwi ncito yesu nkoitana kukashikwa?’ Tutobandika shikumbulo kumiipusho iyi mumutwi uyu. Tutokwiiya ansheenga twaciita kwaamba ayi tutolelele kulambila kwesu Yehova nabi incito yesu ndyeyakashikwa, atoose ntotweelete kuleya.

3. Kweelana a 2 Bene Kolinto 11:23-27, ino nkupenshekwa kwa mushobo nshi Paulo nkwakeendaamo alimwi, ino nciinshi ncetutokwiiya kuswa kucakubonenaako cakwe?

³ Na kulambila kwesu kwakashikwa amfulumeende, mpashi inga twatalika kuyeeya ayi Lesa taatusuniiwo. Sombi teshi mbocibete ubo. Atuyeeye cakubonenaako ca mutumwi Paulo. Inga tatutoonshi kwaamba ayi Lesa wakalinga anguwe. Wakapekwa coolwe ca kulemba makalata 14 a Malembo aBeneklistu amuci Giliki, alimwi wakalinga ngumutumwi kushishi shipusenepusene.  Nacibi boobo, wakapenshekwa abuumbi. (Amubelenge 2 Bene Kolinto 11:23-27.) Cakubonenaako cakwe Paulo cilatwiisha kwaamba ayi Yehova alasuminisha basebenshi bakwe bashomeka kupenshekwa.

4. Ino nceebonshi bantu bamucishi balitupatite?

⁴ Yesu wakasansulula mulandu ncotweelete kulangila kupenshekwa. Wakaamba ayi balaakutupata ceebo cakwaamba ayi tatubete lubasu lwa cishi. (Joni 15:18, 19) Kupenshekwa tacaambi ayi tatucitewo coolwe cakwe Yehova. Sombi ncitondesho cakwaamba ayi tutoocita shiluleme!

5. Sa bantubo inga bacikonsha kukasha ncito yakulambila Yehova cakumaninina? Amusansulule

⁵ Bantu nabi batupikishe buyani, inga tabacikoonshi kutukasha cakumaninina kupaila Lesa Shinkusu shoonse Yehova. Baanji bakeeleshaawo sombi bakaalilwa. Amuyeeye shakacitika ciindi ca Nkondo Yacishi Coonse Yabili. Paciindi cilya mfulumeende mushishi shiinji shakalinga kupensha bantu bakwe Yehova abuumbi. Teshibo ba Nazi beenka mucishi ca Germany bakalinga bakasha ncito ya Bakamboni bakwe Yehova, sombi amfulumeende ya Australia, Canada, alimwi ashishi shimwi. Ano amunyumfwe shakacitika. Inkondo ndyeyakatalika mumwaaka wa 1939, beshikushimikila nsengwe yoonse bakalinga 72,475. Ano kumamanino ankondo mumwaaka wa 1945, kwiinda mucoolwe cakwe Yehova, beshikushimikila bakashika 156,299. Namba ya beshikushimikila yakaya panembo kwiinda ciindi inkondo ndyeyakatalika!

6. Ino nshintu nshi shibotu shiswaamo ndyetutoopenshekwa? Amwaambe cakubonenaako.

⁶ Muciindi cakutukonga, kupikishikwa inga kwatuyuminisha kusebensela Yehova cakushinisha alimwi cakutaloonda muntu. Kucakubonenaako, beebene bamwi bakalinga kucite mwaana muniini bakalinga kukala mucishi incito yesu moyakakashikwa. Muciindi cakuboolela mwisule ceebo cakuloonda, beebene aba bakatalika bupainiya bwaciindi coonse. Nankashi wakacileka anciito njaakalinga kufola maali aanji kwaamba ayi batalike bupainiya. Mukwesu wakaamba ayi kukashikwa kwa Bakamboni bakwe Yehova mucishi cilya, kwakapa kwaamba ayi bantu baanji basune kushiba shiinji. Aboobo cakaba cuubu abuumbi kutalika shiiyo sha Baibo. Kuli ashimwi shibotu shakaswaamo. Munene umwi wa mulibungano wakaamba ayi bamakwesu baanji bakalinga bacileka kusebensela Yehova, bakatalika kucanika kumabungano akushimikila alimwi.

7. (a) Ino tutokwiiya nshi kuswa kulilembo lya bene Lefi 26:36, 37? (b) Ino mulaakucita buyani na incito yesu ikakashikwe?

 ⁷ Balwani besu balisuni kukasha ncito yesu kwaamba ayi tunoloonda kusebensela Yehova. Kwiilikaawo pakukasha ncito yesu, cimwi ciindi balaya caambilisha makani akubeca pali ndiswe, kutuma bakapokola ayi bese mukuseca maanda esu, kututola kumakooti, na kututola kujeele. Balayeeya ayi inga batukonga ceebo cakwaamba ayi bacata bamwi baniini akubabika mujeele. Na aswebo twabaloonda akuloonda nsheenga besa mukutucita, inga twaboolela mwisule akucileka kusebensela Yehova. Tatusuni kuba anga mbaabo bakaambwa palilembo lya bene Lefi 26:36, 37. (Amubelenge.) Tatusuniiwo kuboolela mwisule na kucileka kusebensela Yehova ceebo ca boowa. Tulishomete muli Yehova amyoyo yesu yoonse, aboobo teshi tukaloondewo. (Isa. 28:16) Tulasenga butanjilishi kuli Yehova kwiinda mumupailo. Mukwiinga Yehova ali andiswe, tulicishi kwaamba ayi taakuwo mfulumeende ya muntu nabi icite nkusu buyani yeshi ikatukaashe kusebensela Lesa wesu cakushomeka.—Ebu. 13:6.

8-9. (a) Ino Mwineklistu uli woonse alyeelete kusalila mukwashi na kulisalila kucita nshi? (b) Ino nciinshi ceenga cacafwa muntu kusala ca busongo?

⁸ Na mfulumeende yakasha ncito yesu kucishi nkomukala, mpashi inga mwatalika kuyeeya ayi ndongelebo kucishi kumwi nkweenga ndacikonsha kusebensela Yehova cakwaanguluka. Aya ngamakani ngomweelete kusalawo nobeene. Kamutana kusala cakucita, mpashi inga mwataanguna kuyeeya Beneklistu bamuciindi ca batumwi mbobakacita ndyebakalinga kupenshekwa. Pesule lyakwaamba ayi Sitifini wacaikwa, Beneklistu bakaswa ku Jelusalemu akupalanganina ku Judeya, ku Samaliya, kufonisha, Saipulasi, aku Antyoki. (Mate. 10:23; Milimo 8:1; 11:19) Nacibi boobo, bamwi inga bayeeya mutumwi Paulo mbwakacita Beneklistu bamuciindi ca batumwi ndyebakalinga kupenshekwa, wakasalawo kutolelela kukala kumusena bantu nkobakalinga kupikisha ncito yakushimikila. Wakabika buumi bwakwe mumapensho kwiinda mukutolelela kwaambilisha makani abotu akuyuminisha bamakwesu mumisena mobakalinga kupenshekwa abuumbi.—Milimo 14:19-23.

⁹ Ino makani aya alatwiisha nshi? Mutwi wa mukwashi uli woonse alyeelete kulisalila mwiine pamakani akulonga. Alyeelete kutaanguna kupaila akuyeeya cakubikila maano pabukaalo bwa mukwashi akubona mbweenga kulonga uko kwakuma mukwashi. Pamakani aya, Mwineklistu uli woonse alyeelete ‘kulinyamwita mukuli wakwe.’ (Gala. 6:5) Tatweelete kupikisha bamwi ceebo ca sheesho nshobasala.

10. Ino nshiinshi nsheshi ofesi yamusampi abamanene bakamulwiite?

¹⁰ Ino inga mwacita buyani kwaamba ayi mutolelele kulambila Yehova nabi ncito yesu ndyeyakashikwa? Bamanene bamulibungano lya kumishaanu balaakulwitikwa shakucita kuswa ku ofesi yamusampi, sha mbweenga batambula shakulya shakumushimu, bwakucita mabungano, abwakushimikila makani abotu. Na ofesi yamusampi yaalilwa kubandika abamanene, nkokwaamba ayi bamanene balaakumucafwa noonse mulibungano kwaamba ayi mutolelele kulambila Yehova. Balaakumutanjilila kweelana abutanjilishi mbotucana mu Baibo amumabuku esu.—Mate. 28:19, 20; Milimo 5:29; Ebu. 10:24, 25.

11. Ino nceebonshi nceenga twashomena cakutatoonsha ayi tulaakunooba ashakulya shakumushimu lyoonse, alimwi ino nshiinshi nsheenga mwaciita kwaamba ayi mushitilishe Baibo yanu amabuku esu amwi?

¹¹ Yehova wakashomesha ayi basebenshi bakwe  balaakuba ashoonse nshebayandika kwaamba ayi babe alushomo luyumu. (Isa. 65:13, 14; Luka 12:42-44) Aboobo inga mwashoma ayi libunga lilaakucita shoonse shikonsheka kwaamba ayi mukanooba anshomuyandika lwakumushimu. Ano amwebo kuli comwi ncomweelete kucita. Na kulambila kwesu kwakashikwa, amucane nkweenga mwasisa Baibo amabuku ali woonse ngeenga mwabaawo. Muteeleshi kushiya mabuku ayo pamusena mpweenga muntu waabona, inga aba mabuku akapulintwa na ayo ngotucana pa webusaiti yesu. Womwi awomwi wandiswe alyeelete kucita shoonse nsheenga wacikonsha kwaamba ayi atolelele kuba muyumu lwakumushimu.

12. Ino bamanene inga bacita buyani kwaamba ayi bantu batashibi ayi tutoocita mabungano?

¹² Ino tulaakunoocita buyani mabungano ansondo ansondo? Bamanene balaakushiba bwakucita kwaamba ayi mukanoocita mabungano batootupensha kwakubula kushiba. Mpashi inga bamulwiita ayi munobungana mutukoto tukoto, alimwi mpashi ciindi aciindi inga bacinja ciindi amusena kwakubunganina. Amubandike cakutepeta ndyemutooya na kuswa kumabungano, mukwiinga kucita boobo inga kwacafwa kushitilisha bamakwesu. Mpashi inga mwayandika kufwala shakufwala sheenga shapa bantu kutashiba ayi mutooya kumabungano.

13. Ino nshiinshi nshetutokwiiya kuswa kucakubonenaako ca bamakwesu bakucishi cakalinga kwiitwa ayi Soviet Union kale kale?

¹³ Nsheshi tukanoocita kwaamba ayi tushimikile, shili pusenepusene kweelana abukaalo bwakumusena nkotukala. Ano mukwiinga tulisuni Yehova akushimikila bamwi sha Bwaami bwakwe, tulaakucana nshila mbweenga twashimikila. (Luka 8:1; Milimo 4:29) Shikulemba makani akale kale Emily B. Baran wakalemba makani aBakamboni bakwe Yehova mbobakalinga kucita kwaamba ayi bashimikile makani abotu mucishi cakalinga kwiitwa ayi Soviet Union, wakaamba ayi: “Mfulumeende ndyeyakakasha incito ya Bakamboni bakwe Yehova, Bakamboni bakatalika kushimikila baabo mbobakalinga kubambenaabo, bantu mbobakalinga kusebensaabo, abeshicibusa. Ndyebakatalika kubacata akubatola nkobapenshesha ceebo cakushimikila, Bakamboni bakatalika kushimikila baabo mbobakalingaabo mumisena yakupenshesha.” Nabi kwaamba ayi incito yabo yakalinga yakashikwa, bamakwesu mucishi ici bakatolelela kushimikila. Na cacitika ayi incito yesu yakashikwa kumusena nkomukala, amukakonkele cakubonenaako ca bamakwesu aba!

14. Ino Kulumbaisha 39:1 ilatucafwa kuleya nshi?

¹⁴ Amucenjele amakani ngomutoolwiita bamwi. Na incito yesu yakashikwa, tulyeelete kushiba ciindi “cakuumuna.” (Shi. 3:7) Tatweelete kuyubulula makani mbuli, meena abamakwesu abenankashi, musena nkotucitila mabungano, mbotushimikila, ambotutambula shakulya shakumushimu. Tatweelete kuyubulula makani aya kubeendeleshi; nabi kulwiitaako beshicibusa  na beshikamukowa mbotukalaabo na abo bekala kushishi shimwi. Mukwiinga kucita boobo inga kwabika buumi bwa bamakwesu mumapensho.—Amubelenge Kulumbaisha 39:1.

15. Ino Satana alaakweelesha kutucita buyani, alimwi ino inga twacita buyani kwaamba ayi tuleye koose aka?

¹⁵ Tatweelete kucileka kunyumfwana ceebo ca tuntu tuniini. Satana alicishi kwaamba ayi ncuubu kupwaya mukwashi na taucatene. (Maako 3:24, 25) Aboobo alaakutolelela kuleta mapensho akutupansanya. Alicishi kwaamba ayi na wacita boobo, tulaakutalika kulwana bamakwesu muciindi cakulwana nguwe.

16. Ino nankashi Gertrud Poetzinger wakatondesha buyani cakubonenaako cibotu?

¹⁶ Beneklistu bashimpite lwakumushimu abalo balyeelete kucenjela akoose aka. Amuyeeye cakubonenaako ca benankashi bobilo bakalinga bananikitwe, nankashi Gertrud Poetzinger anankashi Elfriede Löhr. Bakaangwa pomwi abenankashi bamwi kumusena nkobakalinga kupenshesha ba Nazi. Nankashi Gertrud wakatalika kunyumfwila munyono nankashi Elfriede ceebo cakwaamba ayi wakalinga kwaamba makani akalinga kuyuminisha benankashi bamwi. Mukuya kwaciindi, nankashi Gertrud wakalinyumfwa cibiibi abuumbi akusenga Yehova kwaamba ayi amucaafwe. Wakalemba ayi: “Tatweelete kunyumfwila bamwi munyono na balicite coolwe swebo ncotutacite.” Ino wakacita buyani kwaamba ayi akome lipenshi ili? Wakatalika kubikila maano kumibo ibotu yakwe nankashi Elfriede. Kucita boobo kwakamucafwa kutolelela kunyumfwana anankashi Elfriede. Boonse bobilo bakacikonsha kuliyumya akutolelela kusebensela Yehova cakushomeka, kushikila ndyebakamanisha buumi bwabo bwa pacishi ca panshi. Na soonse katusebensa cankusu kukoma mapensho eenga aleta kutanyumfwana, tulaakutolelela kuba bantu bacatene.—Kolo. 3:13, 14.

17. Ino nciinshi ncotweelete kukonkela butanjilishi buswa kulibunga lyakwe Yehova?

¹⁷ Amukonkele butanjilishi lyoonse. Kukonkela butanjilishi buswa kubaabo bakapekwa nkusu shakutanjilila, kulaakutucafwa kuleya mapensho. (1 Pita 5:5) Kucakubonenaako, kucishi comwi incito yesu nkoyakakashikwa, bamanene bakapa butanjilishi bwakwaamba ayi beshikushimikila tabeelete kwaabila mabuku ndyebatooshimikila. Ano mukwesu umwi painiya taakwe kukonkela butanjilishi ubu, aboobo wakatalika kwaabila mabuku. Ano ino nciinshi cakacitika? Ndipakeendabo ciindi ciniini pesule lyakushimikila munshila yakubandikabo, bakapokola bakesa akutalika kubeepusha miipusho. Citoboneka ayi anu bakapokola abo bakalinga kusa cibakonkela mwisule, aboobo bakanyaya mabuku ayo ngobakalinga kwaabila. Ino tutokwiiyawo nshi? Tulyeelete kukonkela butanjilishi kuswa kubamanene nabi katubona ayi tulishi kabotu. Yehova alatupa shoolwe lyoonse na  katunyumfwila bamakwesu bakapekwa mukuli wakututanjilila.—Ebu. 13:7, 17.

18. Ino nceebonshi tatweelete kubikila bamakwesu milawo iteelete?

¹⁸ Amuleye kubika milawo iteelete. Na bamanene kababika milawo iteelete, nkokwaamba ayi bamwi cilaakubayumina. Mukwesu Juraj Kaminský atokwaamba shakacitika incito yesu ndyeyakakashikwa kucishi kale kale cakalinga kwiitwa ayi Czechoslovakia: “Bamanene baanji abaabo bakalinga kutanjilila ndyebakacatwa, bamakwesu bamwi bakalinga kutanjilila mulibungano abamatanjilili balubasu, bakatalika kubika milawo ya nshobakalinga kweelete anshobatakalinga kweelete kucita beshikushimikila.” Yehova taakwe kutupa nkusu sha kubikila bamakwesu milawo. Muntu ubikila bamwi milawo iteelete nkokwaamba ayi taatobashitilisha alimwi alisuni kuba kapitawo wa lushomo lwabamakwesu.—2 Koli. 1:24.

19. Kweelana a 2 Makani 32:7, 8 ino nciinshi nceenga twabeta bataloondi nabi Satana acite sha mushobo nshi?

¹⁹ Mulwani wesu munene Satana, teshi akacileeke kupensha basebenshi bakwe Lesa bashomeka. (1 Pita 5:8; Ciyu. 2:10) Satana abaabo bali kulubasu lwakwe balaakutolelela kutukasha kulambila Yehova. Nacibi boobo, aswebo teshi tukacileeke kusebensela Yehova nabi batuloondesha buyani! (Duto. 7:21) Yehova ali andiswe, alimwi alaakutolelela kutucafwa nabi incito yesu yakashikwa.—Amubelenge 2 Makani 32:7, 8.

20.Ino nciinshi ncomushinishite kucita?

²⁰ Aswebo atube bashinishite bweenka mbuli bamakwesu bamuciindi ca batumwi mbobakacita, abo bakalwiita beendeleshi bapaciindi cilya ayi: “Na cili luleme pameenso akwe Lesa kunyumfwila ndimwe muciindi cakunyumfwila Lesa, mwebo nobeene amulisalile. Mukwiinga swebo inga tatucilekiiwo kwaamba shintu nshetwakalinga kubona akunyumfwa sobeene.”—Milimo 4:19, 20.