1-2. (a) Tae-i ǃaroma da buru tide sida sîsenni ga ǀūǃgâsib ǃnâ mâǃoahe o? (b) Tae-e da nē ǁkhāǁkhāǃâs ǃnâ nî ǃhoaǃgao?

2018ǁÎ kurib ǃnâ î ge 223 000 xa ǃnāsa ǃgâiǂhôas aoǁnâ-aona ge hâ i ǂgui ǃhūgu ǃnâ ge aoǁnâsa ǂkhā-e hâ īna. Nēs ge buru kai da tama hâ. ǂOa goro ǁkhāǁkhāǃâs ǃnâ da go mû khamin ge Xristeǁîna nî mâǃoa-e. (2Tim. 3:12) Hâ da ra ǃkhais hoas tawab ge ǂhanuba sida ǃoabas Jehovab ǃoa-ai da ūhâsa a mâǃoa ǁkhā.

² Sadu ra hâǃnâ ǃhūb di ǂhanub ga sada sîsenga mâǃoa o, o da ge a dîsen ǁkhā: ‘Mâǃoade ra ǂâibasen Elob ge sida ǃnâ ǃgâiǃgâibasensa ūhâ tama hâ di? Nē mâǃoade Jehovaba nî ǃoaba ǀû kai da? ǀNî hâ ǃhūba ǃoa ta nî doe î ta Eloba ǃnōrasase ǃoaba ǁkhā?’ Nē ǁkhāǁkhāǃâs ǃnâ da ge ǁnā dîde nî ǃhoaǃgao. Tsî da ge nî mû mati da Jehovaba nî ǃoaba ǀgarasa mâǃoa-e da ga xawes tsîna tsî tae-e xu da nî ǂgōsensa.

3. 2 Korinteǁîn 11:23-27 ǃoagub ge apostel Pauluba mâ mâǃoade gere hōǃâ tsî Paulub aiǁgausa xu da tae-e ra ǁkhāǁkhāsen?

³ ǂHanub ga sida sîsenga mâǃoa o, o da ge a ǂâi ǁkhā Elob ǀkhaeba da ge ūhâ tama hâ di. ǂÂis ǃnâ ūhâ re mâǃoa-e da ra ǃkhais ge ǂâibasen tama Jehovab ge  sida ǃnâ ǃgâiǃgâibasensa ūhâ tama hâ di. Apostel Paulub aiǁgaus xa ǂâi re. Elob ge ǁîb ǀkha ge ǂkhîǂâixa i. ǁÎb ge aiǂhanuba ge ūhâ i 14 sîǂkhanidi Grike Xoadi dide xoasa tsîb ge ǁîba ge hoaǁaedi apostel kai. Xaweb ge noxoba gere mâǃoahe. (Khomai re 2 Korinteǁîn 11:23-27.) Apostel Paulub aiǁgausa xu da ge ra ǁkhāǁkhāsen Jehovab ǁîb ǂgomǂgomsa ǃoaba-aona mâǃoahesa ra mā-amsa.

4. Tae-i ǃaroman ǃhūbaib khoena ǃhuisa da?

⁴ Jesub ge ge ǁguiǃā tae-i ǃaroma da mâǃoahesa nî ǃâubasensa. ǁÎb ge ge mî nē ǃhūbaib ǃâ tama da hâ amaga da ge nî mâǃoahe di. (Jhn. 15:18, 19) Mâǃoahe da ra ǃkhais ge ǂâibasen tama hâ Jehovab ǀkhaeba da ge hō tide di. Xawe ra ǁgau ǂhanu xū-e da ra dīsa.

5. Khoena ǀgaiba ūhâ Jehovaba ǃoaba ǀû kai dasa? ǁGuiǃā re.

⁵ Khoesib ge hoaǀgaixa Elob, Jehovab di sîsena a ǀam kai ǁoa. ǂGuin ge ge dītsâ xawe ge dan tama i. ǀGamǁî torob ǃnâ ge ī xū-e ǃoa kō re. ǁNā ǁaeb ǃnâ gu ge ǂgui ǂhanuga Jehovab khoena ǀgaisase gere mâǃoa. Jehovab di ǀHûǀguitimî-aon sîsenni ge Nazis xa ǀgui Duitsǃhūb ǃnâ ge ǀam kaihe tama hâ i xawe Australiab, Kanadab tsî ǀnî hâ ǃhūgu ǃnâs tsîna. Kō re tae-i ge īsa. 1939ǁÎ kurib ǃnâb ge toroba a tsoatsoa o, o i ge 72 475 aoǁnâ-aona ǃhūbaib ǂhawase ge hâ i. Torob ǀams ai 1945ǁî kurib ǃnâ i ge Jehovab ǀkhaeb ǀkha 156 299 aoǁnâ-aona ge hâ i. Aoǁnâ-aon di ǃgôab ge ge ǀarosen.

6. Mâ ǃgâi xūna a ī ǁkhā mâǃoa-e da ga o? Aiǁgau-e mā re.

⁶ Mâǃoadi ge nî ǂkhâǃnâ da Jehovaba ǀoasase ǃoabasa. Aiǁgause, ǀgôaba ge ūhâ i ǃgâsara ge sida sîsengu ge ǂkhāsa i ǃhūb ǃnâ gere hâ. Xawe ra ge ǃao tama i tsî ge aimâba-ao kai. Taras ge ǁîs sîsenni hîna ge ǀgapi mari-e gere matare-e ge xu. Aob ge ra mî, nēs ge ǂgui khoena Jehovab di ǀHûǀguitimî-aon xa dîna ge dî tsoatsoa kai. Nēs  ǀkhab ge khoena Elobmîsa ge ǁkhāǁkhā tsoatsoa. ǀNî hâ ǀgaub ǃnâs tsînan ge khoena ge tsâǀkhāhe. ǀHaohâb ǃûi-aob ǁnā ǃhūb ǃnâ hâb ge ra mî ǂguin hîna ge Jehovaba a ǃoaba ǀûn ge ǀhaode ǁkhawa hâǃnâ tsî ge aoǁnâ tsoatsoa.

7. (a) Levitikus 26:36, 37 sa xu da tae-e ra ǁkhāǁkhāsen? (b) Sada sîsenni ga mâǃoahe o, o da tae-e nî dī?

⁷ Sida khākhoen ga sida sîsenga mâǃoa o, on ge ra ǃao kai da Jehovaba ǃoabasa. Sida sîsenga ǂkhās ǂam-ain ge ǀapaǃnamga a sî ǁkhā îgu sida omde ôaǃnâ, ǀgoraǃgâ ǃkhaiba ǃoa ī ū da tamas ka io ǃkhōsis ǃnâs tsîna a ū da ǁkhā. ǁÎn ge ra ǂâi ǃao da nî di sida ǃgâsanan ǃkhōsis ǃnâ ra ū amaga. ǁÎna da ga ǃao o, o da ge Jehovaba a ǃoaba ǀû ǁkhā. ǁNān hîna Levitikus 26:36, 37 tawa ra ǁguiǃāhen khami da ge ī ǂgao tama hâ. (Khomai re.) ǃAoba da ge mā-am tide Jehovaba ǃoaba ǀû kai dasa. Jehovab ai da ge hoase ra ǂgomaiǂnûi tsî ǃaoba xu ra ǂgōsen. (Jes. 28:16) ǀGore hâse da ge Jehovab daoǁgausa ra ôa. ǂAn da ge a Jehovab huib ǀkha gu ǂhanuga Jehovaba ǃoaba ǀû kai da tidesa.—Heb. 13:6.

8-9. (a) Mâ omaris danab hoaba tae-i mîǁguiga nî dī? (b) Tae-e khoe-e nî hui ǃgâi mîǁguiba dīsa?

⁸ Sada ǃhūb ǂhanub ga sada sîsenna a mâǃoa o, o da ge ǀnîse ǀnî ǃhūba ǃoa a doe ǂgao ǁkhā î da Jehovaba ǁnāba sî ǃnōrasase ǃoaba. Nē mîmâisa i ge mâ khoe-i hoa-e nî dī ǀnî ǃgâsa i ge nēsa a dība da ǁoa. Nēsan nî dīs aiǃân ge ǀnîna ôaǃnâsa a dī ǁkhā ǂguroǁaeb Xristeǁîn nē ǃnôa ǁhōgu ǃnâ mâ mîmâina ge a dīsa. Stefanub ge ǃgamhes khaoǃgâ gu ge ǁkhāǁkhāsabegu hîna ge Jerusalems ǃnâ hâ î ga Judeab tsî Samariab ǃnâ gere sarimâ, Fenisiab, Siprus tsî Antioxias kōse. (Mat. 10:23; ǃNǃkh. 8:1; 11:19) ǀNîn ge ge mûǂan ǂguro ǁaeb Xristeǁîn ge mâǃoahe tsoatsoa o, ob ge apostel Pauluba a mîǁguisa aoǁnâ sîsenni ra mâǃoahe ǃādi ǃnâ hâsa. Nēsab ge ge dī îb ǃgâiǂhôasa aoǁnâ ǁkhā tsî ǁnā ǃādi ǃnâ hâ ǃgâsana ǀgaisa mâǃoade xu ǁkhauba.—ǃNǃkh. 14:19-23.

⁹ Tae-e da nēsa xu ra ǁkhāǁkhāsen? Mâ omaris danab hoab ge mîǁguiga nî dī does tawa i ga hā o. Mîǁguigab nî dīs aiǃâb ge aibe ǀgore tsî ǂōrisase ǁîb omaris mâsiga nî ǃgaoǃgâ tsî does mâ ǀamǂoasa ǁîb omaris ai nî ūhâs tsîna nî ôaǃnâ. Nēs ǃnâ i ge mâ Xristeǁi-i hoa-e ǁî-i “ǃgommi ǂûba nî tani.” (Gal. 6:5) Nau ǃgâsan di mîǁguiga da ge tā nî ǀgoraǃgâ.

10. ǁNâub beros tsî ǀhaohâb ǃûi-aogu tsîna mâ daoǁgaude nî mā?

¹⁰ Mati da Jehovaba nî ǃoaba ǀgara mâǃoahe da ga xawe? ǁNâub beros ge ǀhaohâb ǃûi-aoga daoǁgausa nî mā, mati gu gagasi ǂû-e nî ǃkhōǃoas, ǀhaode gu nî dī ǀgaus tsî mati gu ǃgâiǂhôasa nî aoǁnâ ǀgaus tsîn xa. ǁNâub beros ga ǀhaohâb ǃûi-aogu ǀkha ǃhoa hō tama io, o gu ge ǀhaohâb ǃûi-aoga sadu tsî sadu omaris tsîna nî hui Jehovaba ǃoaba ǀgarasa. ǁÎgu ge Elobmîs tsî Elobmîs ai ǃgaoǃgaosa ǂkhanin ǃoagu hâ daoǁgaude  nî mā.—Mat. 28:19, 20; ǃNǃkh. 5:29; Heb. 10:24, 25.

11. Tae-i ǃaroma da a ǂgomǃgâ ǁkhā gagasi ǂû-e da gagasise ǀgaiǀgaisens ǃaroma hoaǁae nî hōsa tsî tae-e da nî dī nē gagasi ǂû-e ǁkhaubas ǃaroma?

¹¹ Jehovab ge ge mîǁgui ǁîb ǃoaba-aonab gagasise nî kōǃgâsa. (Jes. 65:13, 14; Luk. 12:42-44) Nēs ǃaroma da ge ǂgomǃgâ ǁkhā Jehovab ǀapeǂhumis hoa xūna nî dīsa gagasi ǂkhâǃnâsa mā das ǃnâ. Tae-e da nî dī? Aoǁnâsa da ga ǂkhā-e o, o da ge sada di Elobmîs tsî gagasi ǂkhanin tsîna nî sâu. ǂAnbasen ǂgao da ge ra î da sada di gagasi ǂkhanina supusen a hō-e ǁkhā ǃkhain ai tā ǁgui mâ. Hoa da ge sada ǂgomsa ǀgaisase nî ūhâ ǀgara.

12. ǀHaohâb ǃûi-aoga mati ǀhaode nî dī în sada mâǃoa-aona nēs xa tā ǂgae-e?

¹² Sada ǀhaodi ǀkha i tae-e nî hā? ǀHaohâb ǃûi-aogu ge mati di ǀhaode nî dī-esa nî mîba da în sada mâǃoa-aona da nēsa ǂanǂui. ǁÎgu ge a mîba da ǁkhā î da ǀoro ǃgôab ǃnâ ǀhao tsî gu ge ǁaegu ǀhaodi nî hâ ga ǁaeba xu ǁaeb ǀkha a dawa ǁkhā. Nēs ǀkha du ge a hui ǁkhā ǂause ǃhoas ǃnâ-ū ǀkhī du ra ǁaeb tsî oa du ra ǁaeb ǃnâ. Sada sara anas tsîn ǃoa da ge ra kō ǂgao în sada mâǃoa-aona tā ǁnās xas tsîna ǂgae-e.

13. Tae-e da sida ǃgâsan hîna ge Soviet Unions ǃnâ hâ īna xu a ǁkhāǁkhāsen ǁkhā?

¹³ Aoǁnâ sîsenni tawa i ga hā o, os ge nēsa ǂharisa xu ǂharis ǀkha nî ǀkhara. Xawe da ge Jehovaba kaise a ǀnam tsî ǀgauna nî ôa aoǁnâ sîsenni ǀkha aiǃgûsa. (Luk. 8:1; ǃNǃkh. 4:29) Sada aoǁnâ sîsenni hîna Soviet Unions ǃnâ ge hâ ib xab ge Emily B. Barana ge mî: “ǂHanub ge ǀHûǀguitimî-aona a mîba o aoǁnân ge tide di, on ge ǁîn ǁanǁare-aon, sîsenǀhao-aon tsî ǀhōsan tsîna gere aoǁnâba. ǃKhōsisa ǃoan ge nēs ǃgao a sîhe o, on ge ǀHûǀguitimî-aona nau khoen hîna ǃkhōsis ǃnâ hâna gere aoǁnâba.” Sida sîsenni ge ǂkhā-e xawen ge ǃgâsan hîna ge Soviet Unions ǃnâ hâ īna ge aoǁnâ ǀû tama hâ i. Sida tsîn ge ǁnā aiǁgausa a ǁgae ǁkhā sida sîsenni ga mâǃoahe o.

14. Psalmdi 39:1 sa tae-i ǀkha a huida ǁkhā?

¹⁴ Nau khoena da ra mîba xūna da ge nî ǂanbasen. Sida sîsenni ga mâǃoa-e ǁaeb ǃnâ da ge nî ǂan mâǁaeb ai da nî ‘ǃnōsa.’ (Aoǁn. 3:7) Sida ǃgâsan ǀondi, ǃoabas ǃgao da ra ǀhao ǃkhaidi, aoǁnâ sîsen-e da ra dī ǀgaub tsî gagasi ǂû-e da ra hō ǀgaub tsîna da ge nî ǁkhauba.  Nē ǃnāsa ǃgāsasiba da ge ǂhanub, sida ǀhōsan tsî ǀnî hâ khoen tsîna mîba tide. Nēsa da ga dī o, o da ge sida ǃgâsana ǁkhōǁkhōsasib ǃnâ ra mâi.—Khomai re Psalmdi 39:1.

15. ǁGâuaba tae-e sida nî dī tsî nēsa xu da mati nî ǂgōsen?

¹⁵ Tā ǂkhari ǃgomsina mā-am re în ǀgorasa sada ǁaegu hao-ū. ǁGâuab ge a ǂan ǀgorasa oms a mâhō ǁoa ǃkhaisa. (Mrk. 3:24, 25) ǁÎb ge hoaǁae ǃgomsina sada ǁaegu nî ǃaroma. Nē ǀgaub ǃnâb ge ra ǂgao î da sida ǁaegu ǃkham tsî tā ǁîb ǃoagu ǃkham.

16. ǃGâsas Gertrud Poetzingersa mâ ǃgâi aiǁgausa ge ǁgau da?

¹⁶ ǂAnsa ūhâ Xristeǁîn tsîn ge nî ǂan în tā nēs xa ǃkhō-e. ǀGam ǂkhauhesa ǃgâsara aiǁgaura xa ǂâi re Gertrud Poetzingers tsî Elfriede Löhrs. ǁÎra ge ǃkhōsis ǃnâ ǀnî hâ Xristeǁî ǃgâsadi ǀkha ge hâ i, Nazi kamps ǃnâ. Gertruds ge gere suri Elfriedes ge omkhâi ra ǃhoade gere mā o. Egas ge Gertrudsa gere tao tsî Jehovaba gere ǀkhomma is ǀûbahe. ǁÎs ge ge xoa, “khoen ga sida xa ǀgapi ǂharodi tamas ka io ǁkhāsiba ūhâ o, o da ge nēsa nî ūǃoa.” ǁÎs surib tsâsigas ge mati sîsenǂam? Gertruds ge Elfriedes ǃgâi ǀgaugu ai gere kō. ǁNā ǀgaub ǃnâs ge ǁîs ǃgâi ǀhōsagusisa Elfriedes ǀkha ǁkhawa ge hō-oa. ǃGarise da ga ǁgūtsâ o sida ǃgâsan ǀkha da ūhâ ǁnâusāgude sîsenǂamsa, o da ge ǀgorasa ūhâ tide.—Kol. 3:13, 14.

17. Tae-i ǃaroma da Jehovab ǀapeǂhumisa xu da ra hō daoǁgaude nî sao?

¹⁷ Hoaǁae māsa ǁgaraga sao re. ǂGomǂgomsa ǃgâsaga xu da ra hō daoǁgaude da ga sao o, o da ge ǃgomsina xu nî ǂgōsen. (1Pet. 5:5) Aiǁgause, aoǁnâ sîsenni a ǂkhāsa ǃhūb ǃnâ gu ge ǃgâsaga ǃgâsana ra mîba în tā ǂkhanina khoena mā. Aimâba-ao ǃgâsab ge ǁgaraga ge sao tama hâ i tsî khoena ǂkhanina gere mā. Tae-e ge ī? ǁÎb tsî nau ǃgâsan tsîn ge aoǁnâ toas khaoǃgân ge ǀapaǃnamgu xa gere dîǃnâ-e. ǀApaǃnamgu ge ǁîna gere sao tsî ǁîn gere māǂui ǂkhanina ge ū-oa. Tae-e da nē aiǁgausa xu ra ǁkhāǁkhāsen? Mā-e da ra daoǁgaude da ga ǁnâuǃā tama i xawe da ge nē daoǁgaude nî sao. Jehovab ge sida ǃgâsagu hînab ge ǁîba a ǁgaumâigu ǀkha da ga sîsenǀhao o, o ra ǀkhae da.—Heb. 13:7, 17.

18. Tae-i ǃaroma da ǂhâbasa tama hâ ǁgaraga dī tide?

 ¹⁸ Tā ǂhâbasa tama hâ ǁgaraga dī re. ǀHaohâb ǃûi-aogu ga ǂhâbasa tama ǁgaraga dī o, o gu ge xūna nau khoena ra ǃgomba kai. ǃGâsab Juraj Kaminskýb ge ra ǂâi-oa tae-i ge īsa Czechoslovakiab ǃnân ge mâǃoahe o: “ǁGaumâide ūhâ ǃgâsagu tsî ǀhaohâb ǃûi-aogu tsîn ge ǃkhōsis ǃnâ a ūhēs khaoǃgâ gu ge ǀnî ǃgâsagu hîna ge ǁgaumâisa î ga ǃgâsana ǁgaraga gere mā.” Jehovab ge nau khoena mîǁguiga dības ǁgaumâisa mā da tama hâ. Khoe-i hîna ǂhâbasa tama hâ ǁgaraga ra dī-i ge ǁî-i ǃgâsana ǁkhōǁkhōsasib ǃnâ ra mâi.—2Kor. 1:24.

19. ǁGâuab ra mâǃoa da xawe da mâ ǂgomǃgâsiba 2 Kroniks 32:7, 8 tawa ra hō?

¹⁹ ǁGâuab ge Jehovab ǂgomǂgomsa ǃoaba-aona mâǃoasa ǀû tide. (1Pet. 5:8; J.ǂHa. 2:10) ǁGâuab tsî ǁîba ra ǂkhâǃnâ khoen tsîn ge sida Jehovaba ǃoabasa xu nî ūbē. ǃAo da ga xawes tsîna da ge Jehovaba ǃoaba ǀû tide. (Deu. 7:21) Jehovab ge sida ǀkha hâ tsî nî ǂkhâǃnâ da sida sîsenni ga mâǃoa-e xawe.—Khomai re 2 Kroniks 32:7, 8.

20. Tae-e da nî mîǁgui dīsa?

²⁰ ǂGuroǁaeb Xristeǁîn hîna ge ǁnā ǁaeb ǂgaeǂgui-aoga sao ra-e a mîban xa ǂâi re: “Aitsama ǀgora, ise i Elob aiǃâ a ǂhanu ǃkhaisa, sago Elob ǂamai nî ǁnâuǀnamsa? ǀÛ ǁoa khom kom ao, mû tsî khom ge ǁnâun xa ǃhoasa.”—ǃNǃkh. 4:19, 20.