1, 2. 1) ¿Kenke amo kinamiki timosentlachilisej tlaj tekichiuanij amo techkauasej ma tijueyichiuakaj Jehová? 2) ¿Tlake moixtomas ipan ni tlamachtili?

IPAN 2018, kipano 223,000 tlajtolmoyauanij itstoyaj kampa tekichiuanij amo kinkauaj ma tlajtolmoyauakaj yon ma monechikokaj. Tijmajtoyaj kiampa panoskia, pampa kej tikitakej ipan tlamachtili 27, Cristo itokilijkauaj kintlatsakuiltiskiaj (2 Tim. 3:12). Uelis se tonali, tlanauatianij katli tekichiuaj kampa tiitstokej sanima techiljuisej ayokmo ma tijueyichiuakaj Jehová.

² Tlaj tekichiuanij ayokmo techkauasej ma tijtekipanokaj toTeotsij, uelis timotlajtlaniskiaj ni: “¿Ayokmo kuali techita toTeotsij uan yeka techtlatsakuiltiaj? ¿Ayokmo kema tijueyichiuasej Jehová? ¿Kualtiaskia nias seyok altepetl kampa kena uelis nijueyichiuas Jehová?”. Ni tlajtlanili tijnankilisej ipan ni tlamachtili. Nojkia tikitasej kenijkatsa nojua uelis tijtekipanojtosej Jehová maske tekichiuanij amo techkauasej, uan tlake tlamantli amo kinamiki tijchiuasej.

3. Kej kiijtoua 2 Corintios 11:23-27, ¿tlake kipanok Pablo, uan tlake techmachtia?

³ Tlaj ayokmo techkauasej ma titlaueyichiuakaj, ueliskia timoiljuisej toTeotsij ayokmo kuali techita. Nopa amo nelia. Ma tikitakaj tlen kipanok apóstol Pablo. Jehová nelia kiteochiuayaya, yeka kikajki ma kiijkuilo 14 amatlajkuiloli tlen nama eltok ipan Escrituras Griegas Cristianas, uan tlajtolmoyajki ipan miak altepemej. Maske kichijki nochi nopa tlamantli, ya tlauel kitlatsakuiltijkej (xijpoua 2 Corintios 11:23-27). Tlen kipanok kinextia Jehová kikaua itekipanojkauaj ma kintlatsakuiltikaj.

4. ¿Kenke maseualmej techkualankaitaj?

 ⁴ Jesús kiijtok kenke kinamiki tijmajtosej se tonali techtlatsakuiltisej. Kiijtok techkualankaitaskiaj pampa tojuantij amo tielij iaxkauaj ni Tlaltipaktli (Juan 15:18, 19). Kema techtlatsakuiltiaj amo kiijtosneki toTeotsij ayokmo techteochiua. Kema techpano nopa, kinextia nelia tijchiuaj tlen kuali.

5. Xikixtoma tlaj maseualmej uelis kichiuasej ayokmo ma tijueyichiuakaj toTeotsij.

⁵ Maseualmej amo kema uelis kichiuasej ayokmo ma tijueyichiuakaj toTeotsij, katli kipia miak chikaualistli. Miakej ikualankaitakauaj Jehová kiyejyekojtokej kichiuasej nopa, uan san tlapik nochi tlen kichijtokej. Ma tikilnamikikaj tlake panok ipan nopa Ompa Ueyi Tlauilankayotl. Tekichiuanij tlen miakej altepemej tlauel kintlatsakuiltijkej toikniuaj. Amo san nazis kichijkej nopa, tekichiuanij tlen Australia, Canadá uan sekinok altepemej nojkia amo kinkajkej toikniuaj ma kitekipanokaj toTeotsij. Maske kichijkej nopa, panok seyok tlamantli tlen kinextik kenijkatsa Jehová kinteochiuayaya itekipanojkauaj. Ipan 1939, kema pejki tlauilankayotl, itstoyaj 72,475 toikniuaj ipan nochi Tlaltipaktli. Uan kema tlanki nopa tlauilankayotl ipan 1945, tlauel momiakilijtoyaj pampa nama itstoyaj 156,299 toikniuaj.

6. ¿Tlake kuajkuali tlamantli pano kema amo techkauaj ma titlaueyichiuakaj? Xikijto se neskayotl.

⁶ Tlen kichiuaj katli techtlatsakuiltiaj techyololinia nojua ma tijnekikaj tijtekipanojtosej Jehová uan amo techmajmatiaj. Ma tikitakaj tlen kichijki se toikni iuaya isiua, katli kipixtoyaj se pilokichpiltsi. Maske inijuantij itstoyaj kampa tekichiuanij amo kinkauayayaj ma kitekipanokaj Jehová, inijuantij amo majmajkej uan mosentlalijkej tlatekipanosej kej precursores regulares. Toikni kiijtok pampa ayokmo kinkauayayaj ma tlaueyichiuakaj, kichijki miakej maseualmej ma kinekikaj kinixmatisej Jehová itlajtoltemakauaj. Yeka, amo ouij kimatiyaya kipeualtis momachtis ininuaya. Tlen kinpanok toikniuaj nojkia kinpaleuik sekinok. Se ueuejtlakatl tlen nopa altepetl kiijtok miakej katli kitlauelkajtoyaj Jehová sampa pejkej mosentiliaj ipan tlanechikoli uan pejkej tlajtolmoyauaj.

7. 1) ¿Tlake techmachtia Levítico 26:36, 37? 2) ¿Tlake tijchiuas tlaj tekichiuanij ayokmo mitskauasej xijtekipano toTeotsij?

 ⁷ Katli techkualankaitaj ayokmo techkauaj ma titlaueyichiuakaj pampa kinekij ma timajmauikaj uan ayokmo ma tijtekipanokaj Jehová. Uelis peuas kiijtosej tlen amo melauak, kintitlanisej policías ma tlatejtemotij tochaj, techteljuisej ika tekichiuanij o kintsakuasej sekij toikniuaj. Kinekij techmajmatisej kema kintsakuaj sekij toikniuaj. Tlaj tijkauaskiaj ma techmajmatikaj, uajka kejuak tojuantij toselti timotsakuiliskiaj pampa ayokmo tijueyichiuaskiaj Jehová. Tojuantij amo tijnekij tielisej kej maseualmej katli kiijtoua Levítico 26:36, 37 (xijpoua). Amo tijkauasej majmajtli ma kichiua ayokmo tlauel ma tijtekipanokaj Jehová o ma tijtlauelkauakaj. Tojuantij tlauel timotemachiaj ipan ya uan amo tijnekij yon se tlamantli ma techmajmati (Is. 28:16). Tikiljuiaj Jehová ma techyakana. Tijmatij ika itlapaleuil, yon se tekichijketl, maske kipia miak tlanauatijkayotl, uelis kichiuas ayokmo ma tijtekipanokaj Jehová (Heb. 13:6).

8, 9. 1) ¿Tlake tlamantli moneki kitlapejpenisej sejse toikniuaj o se toikni tlakatl katli kinpia ichampoyouaj? 2) ¿Tlake techpaleuis kuali ma tijtlapejpenikaj tlake tijchiuasej?

⁸ Tlaj amo techkauasej ma tijtekipanokaj toTeotsij, uelis timoiljuisej tlaj kinamiki tiasej ipan seyok altepetl kampa kena uelis titlaueyichiuasej. Ni tlamantli san tojuantij kinamiki tijtlapejpenisej. Uelis sekij toikniuaj tlauel kinpaleuis tlaj kiompauisej tlen kichijkej Cristo itokilijkauaj tlen achtoui siglo kema kintlatsakuiltijkej. Teipa kema katli kinkualankaitayayaj toikniuaj kitetemijkej o kitepachojkej Esteban, miakej Cristo itokilijkauaj kistejkej tlen Jerusalén uan kampa ueli yajkej, sekij ipan sekinok pilaltepetsitsij tlen Judea uan Samaria, uan sekinok yajkej Fenicia, Chipre uan Antioquía (Mat. 10:23; Hech. 8:1; 11:19). Uan uelis sekinok toikniuaj kinekisej kichiuasej sanse kej Pablo. Ya mokajki pampa kinekiyaya tlajtolmoyauas uan kinyolchikauas toikniuaj katli mokajtoyaj ipan nopa altepetl kampa tlauel kitlaijiyouiltiyayaj (Hech. 14:19-23).

⁹ ¿Tlake techmachtia? Sejse toikni moneki kitlapejpenis tlake kichiuas ininuaya ichampoyouaj. Kema kichiuas nopa, achtoui moneki momaijtos uan kuali kiitas tlake kinpaleuis ichampoyouaj kuali ma itstokaj, uan nojkia kuali moiljuis tlake kinpanos tlaj yasej ipan seyok altepetl. Kema panos ni, nochi moneki tikilnamikisej “sejse tojuantij tijpiaj toteki para tijmokuitlauisej tlen tojuantij tonemilis” (Gál. 6:5). Uan amo kinamiki tikijilnamikisej se akajya ika tlen kitlapejpenis kichiuas.

10. ¿Kenijkatsa techyakanasej toikniuaj tlen Betel uan ueuejtlakamej?

¹⁰ ¿Kenijkatsa uelis nojua tijueyichijtosej Jehová maske tekichiuanij amo techkauasej? Toikniuaj tlen kali Betel kiniljuisej ueuejtlakamej tlen totlanechikol tlake kinamiki kichiuasej uan kiampa uelis nojua tijselisej amatlajkuiloli, uelis timosentilisej uan titlajtolmoyauasej. ¿Uan tlaj toikniuaj tlen Betel amo uelis kinnojnotsasej ueuejtlakamej? Uajka, ueuejtlakamej techiljuisej tlake uelis tijchiuasej uan kiampa nojua tijtekipanojtosej Jehová, uan tlen techiljuisej mokixtis ipan tlen Biblia tetlajtolmaka uan ipan amatlajkuiloli (Mat. 28:19, 20; Hech. 5:29; Heb. 10:24, 25).

11. ¿Kenke uelis timotemachisej amo kema techpolos tlen ika timomachtisej, uan kenijkatsa uelis tijmokuitlauisej?

¹¹ Jehová kitenkajtok nochipa kinmakas itekipanojkauaj tlen ika momachtisej (Is. 65: 13, 14; Luc. 12:42-44). Uajka, uelis timotemachisej itlanechikol nochipa techmakas tlen ika timomachtisej uan kiampa amo kema tijtlauelkauasej. Uan tojuantij nojkia kinamiki tijchiuasej se tlamantli. Kema tekichiuanij amo techkauasej ma tijtekipanokaj toTeotsij, moneki tijtemosej kanke uelis kuali tijtlatisej Biblia uan amatlajkuiloli. Tlaj tijpixtokej ipan amatl, ipan teléfono o ipan tableta, amo ma tijtlalikaj kampa nima uelis kipantisej. Nochi moneki tikitasej tlake uelis tijchiuasej uan kiampa nojua tijpiasej tlen techpaleuis kuali ma titlaneltokatokaj.

12. ¿Kenijkatsa ueuejtlakamej uelis kichiuasej tlanechikoli?

¹² ¿Uan tlake panos ika tlanechikoli tlen mochiua sejse chikueyi? Ueuejtlakamej kiitasej kenijkatsa kichiuasej uan kiampa amo nesis tlaj timosentiliaj. Uelis techiljuisej monekis timoxejxelosej uan kampa ueli timonechikosej san se keskij, uan nojkia uelis kipajpatlatiasej hora uan tonali kampa timosentilisej. ¿Tlake uelis tijchiuasej tlaj tijnekij tikinmokuitlauisej nochi katli itstosej ipan tlanechikoli? Moneki amo chikauak tikamanaltisej kema tiasisej uan kema tiasej, uan uelis ayokmo timoyoyontisej kej ipa tiauij.

13. ¿Tlake techmachtia tlen kichijkej toikniuaj tlen Unión Soviética?

¹³ ¿Uan kenijkatsa titlajtolmoyauasej? Maske amo mochiuas sanse tlamantli ipan sejse tlanechikoli, tijtejtemolisej kenijkatsa titlajtolmoyauasej pampa tikikneliaj Jehová uan techpaktia tijmoyauasej nopa kuali tlamachtili tlen toTeotsij iTlanauatijkayo (Luc. 8:1; Hech. 4:29). Emily Baran, se siuatl katli momachtia tlen panok uejkajkia, kiijtoua kenijkatsa tlajtolmoyajkej toikniuaj ipan Unión Soviética: “Kema ipan ininaltepe kiniljuijkej ayokmo ma kiniljuikaj sekinok tlen inijuantij kineltokaj, Jehová itlajtoltemakauaj pejkej kinkamanaljuiaj ininkalnechkauaj, katli ininuaya tekitiyayaj uan ininuampoyouaj. Uan kema kinuikakej kampa kinchiualtiyayaj ma tekitikaj pampa kichijkej nopa, pejkej kinkamanaljuiaj sekinok katli nopaya tsaktoyaj”. Toikniuaj tlen Unión Soviética nochipa tlajtolmoyajkej maske amo kinkauayayaj. Nojkia kiampa ma tijchiuakaj tlaj se tonali ayokmo techkauasej ma titlajtolmoyauakaj kampa tiitstokej.

14. ¿Tlake amo tijchiuasej tlaj tijneltokaj tlen techtlajtolmaka Salmo 39:1?

¹⁴ Kuali ma tikitakaj tlake tikiniljuiaj sekinok. Kema amo techkauasej ma tijtekipanokaj toTeotsij, moneki kuali tijmatisej kema kinamikis ‘timokamatsakuasej’ (Ecl. 3:7). Moneki amo tikijtosej tlen amo kinamiki, kej inintoka toikniuaj, kanke timosentiliaj, kenijkatsa titlajtolmoyauaj o kenijkatsa tijseliaj amatlajkuiloli. Amo kinamiki tikiniljuisej tekichiuanij ni tlamantli, yon tikiniljuisej touampoyouaj o  touikaljuaj katli itstokej ipan toaltepe o ipan sekinok altepemej. Tlaj tijchiuaskiaj, toikniuaj ueliskia kinpanos tlen amo kuali (xijpoua Salmo 39:1).

15. ¿Tlake kinekis kichiuas Satanás, uan tlake techpaleuis amo ma tijchiuakaj tlen ya kineki?

¹⁵ Amo ma tijkauakaj kuesoli ma techxelo. Satanás kimati kema ipan se kali mokualaniaj, ayokmo itstokej sansejko (Mar. 3:24, 25). Yeka, nochipa kitemolia kenijkatsa techxelos. Kiampa kichiua pampa kineki tojuantij kejuak ma timoteuijtokaj uan amo ya ma tijteuikaj.

16. ¿Tlake kuali tlamantli techmachtia tlen kichijki Gertrud Poetzinger?

¹⁶ Uan maske sekij toikniuaj kuali tlaneltokaj, nojkia uelis kinpanos ni tlamantli. Ma tikitakaj tlen kinpanok tosiuaikniuaj Gertrud Poetzinger uan Elfriede Löhr, katli kintlapejpenijtoyaj yasej iluikak. Inijuantij kintsajkej ininuaya sekinok tosiuaikniuaj kampa nazis kinchiualtiyayaj ma tekitikaj. Gertrud pejki kikokolia toikni Elfriede pampa ya yejyektsi kamanaltiyaya kema kinyolchikauayaya nopa sekinok tosiuaikniuaj. Teipa ixpinajki pampa kiampa kiyolmatiyaya uan kiiljuik Jehová ma kipaleui. Ya kiijkuilok: “Moneki tijmajtosej sekinok uelij kuali kichiuaj miak tlamantli uan kipiaj miak tekitl, uan uelis tojuantij amo tielij kej inijuantij”. ¿Tlake kipaleuik ayokmo ma kikokoli? Mosentlalik ipan kuajkuali tlamantli tlen kinextiyaya Elfriede uan kenijkatsa kipixtoya kuali iyolo. Yeka, sampa kuali mouikak iuaya. Omej kiskej kampa kintsaktoyaj uan amo kema kitlauelkajkej Jehová, kiampa kichijkej kema itstoyaj ipan Tlaltipaktli. Tlaj tijchiuaj kampeka tijsenkauasej kuesoli tlen tijpiaj ika se toikni, titlapaleuisej nochi ma itstokaj sansejko uan amo ma timoxelokaj (Col. 3:13, 14).

17. ¿Kenke moneki nochipa tijneltokasej tlen techiljuisej katli techyakanaj?

¹⁷ Nochipa ma tijneltokakaj tlen techiljuiaj. Tlaj tijchiuaj tlen techiljuiaj toikniuaj katli kintekimakatokej uan katli elij temachmej, techpaleuis amo ma tijpiakaj kuesoli (1 Ped. 5:5). Ma tikitakaj tlen kipanok se toikni. Ipan se altepetl kampa amo techkauaj ma tijtekipanokaj Jehová, kiniljuijkej toikniuaj amo ma temakakaj amatlajkuiloli kema tlajtolmoyauaskiaj. Se precursor moiljuik ya kuali kichiuayaya se keski tlamantli, yeka amo tlakajki. ¿Tlake panok teipa? Se tonali, kema ipan ojtli tlajtolmoyauayayaj, policías pejkej kitlajtlaniaj ya uan sekinok toikniuaj se keski tlamantli. Inijuantij kinpijpiayayaj uan kisentilijtoyaj nochi amatlajkuiloli tlen temakatoyaj. ¿Tlake techmachtia? Moneki nochipa tijneltokasej tlen techiljuiaj toikniuaj katli techyakanaj maske timoiljuiaj tojuantij kuali tijmatij kenijkatsa tijchiuasej se keski tlamantli. Jehová  techteochiuas tlaj tikinneltokaj toikniuaj katli kintekimakatok ma techyakanakaj (Heb. 13:7, 17).

18. ¿Kenke amo kinamiki tijtlalisej tlanauatili tlen amo moneki?

¹⁸ Amo ma tijtlalikaj tlanauatili tlen amo moneki. Tlaj ueuejtlakamej kichiuasej ni, toikniuaj ouij kimatisej kichiuasej se keski tlamantli. Toikni Juraj Kaminský kiijtok tlake panok kema amo kinkajkej ma kitekipanokaj toTeotsij ipan Checoslovaquia: “Kema kinitskijkej katli techyakanayayaj uan miakej ueuejtlakamej, sekij katli kiyakankej tlanechikoli uan circuitos pejkej kiijtouaj kenijkatsa kinamikiyaya monejnemiltisej toikniuaj. Kiijkuilojkej tlake monekiyaya kichiuasej uan tlake amo”. Jehová amo technauatijtok tojuantij ma tijtlapejpenikaj tlake kichiuasej sekinok. Katli kitlalia tlanauatili ipan tlanechikoli amo kinmokuitlauia toikniuaj, uan kinextia yaya kineki kiyakanas inintlaneltokilis (2 Cor. 1:24).

19. Kej kiijtoua 2 Crónicas 32:7, 8, ¿kenke kinamiki timotemachijtosej maske Satanás techtlatsakuiltis?

¹⁹ Tokualankaitaka Satanás nochipa kinekis kintlatsakuiltis Jehová itekipanojkauaj (1 Ped. 5:8; Apoc. [Rev.] 2:10). Maske ya uan katli kipaleuiaj kinekisej techtsakuilisej uan kiampa ayokmo tijtekipanosej Jehová, amo kinamiki timomajmatisej yon se kentsi (Deut. 7:21). Jehová itstok touaya uan nojua techpaleuijtos maske tekichiuanij amo techkauasej ma tijtekipanokaj (xijpoua 2 Crónicas 32:7, 8).

20. ¿Tlake timosentlalijtok tijchiuas?

²⁰ Ma timosentlalijtokaj kej toikniuaj tlen achtoui siglo, katli kiniljuijkej tlanauatianij: “Ximoyoliljuikaj tlaj kuali para tiinmechneltokasej o tlaj achi más kuali tijneltokasej toTeko. Pero para tojuantij axtiuelij tijkauasej tikinpouilisej tlakamej tlen tikitstokej uan tlen tijkaktokej” (Hech. 4:19, 20).