1-2. (a) Omolwashike okwiindikwa kwiilonga yetu itaaku tu kumitha? (b) Oshike tatu ka kundathana moshitopolwa shika?

MO 2018, aauvithi yonkundana ombwanawa ye vulithe po 223 000, oya kala miilongo moka iilonga yetu ya li yi indikwa nenge ya ngambekwa. Shika itashi tu kumitha. Ngaashi twi ilonga moshitopolwa sha tetekele, Aakriste yashili oya tegelela ya hepekwe. (2 Tim. 3:12) Kutya nduno otu li peni, otashi vulika omapangelo ge tu indike kaatu longele Kalunga ketu omunahole, Jehova, inaatu shi tegelela.

² Ngele epangelo moshilongo sheni olya tokola oku mu indika kaamu longele we Jehova, otashi vulika wu ipule omapulo ngaashi: ‘Mbela okuhepekwa otaku ti kutya Kalunga ine tu hokwa we? Mbela okwiindikwa kwiilonga yetu otaku ke tu ethitha po okulongela Jehova? Mbela nandi tembukile koshilongo hoka tandi vulu okulongela Kalunga nda manguluka?’ Omapulo ngoka otatu ke ga kundathana moshitopolwa shika. Otatu ka kundathana wo nkene tatu vulu okutsikila okulongela Jehova, uuna iilonga yetu yi indikwa nosho wo oomwigo ndhoka tu na okuyanda.

3. Shi ikolelela kAakorinto aatiyali 11:23-27, omashongo geni omuyapostoli omudhiginini Paulus a li a tsakaneke, noshike tatu ilongo koshiholelwa she?

³ Ngele epangelo olyi indike iilonga yetu, otashi vulika tu thike pehulithodhiladhilo lya puka kutya Kalunga ine tu hokwa. Ihe dhimbulukwa kutya okuhepekwa itaku ti kutya Jehova ine tu nyanyukilwa. Natu taleni koshiholelwa shomuyapostoli Paulus. Odhoshili kutya okwa li a hokiwa kuJehova. Okwa li e na uuthembahenda  wokunyola oontumwafo 14 dhOmanyolo gopaKriste gOshigreka nokwa li omutumwa kiigwana. Nonando ongawo, okwa li i iyadha momahepeko ga kwata miiti. (Lesha 2 Aakorinto 11:23-27.) Moshimoniwa shomuyapostoli Paulus, otatu ilongo mo kutya Jehova oha etha aapiya ye aadhiginini ya hepekwe.

4. Omolwashike tu tondike kuuyuni?

⁴ Jesus okwa yelitha kutya omolwashike tu na okutegelela omahepeko. Okwa ti kutya otatu ka tondika, molwaashoka katu shi oshitopolwa shuuyuni. (Joh. 15:18, 19) Okuhepekwa itaku ti kutya Jehova ine tu hokwa. Pehala lyaashono, ohaku ulike kutya otatu longo shoka sha uka.

5. Mbela aapataneki yopantu otaya vulu oku tu ethitha po okulongela Jehova? Shi yelitha.

⁵ Aapataneki yopantu, itaya vulu oku tu ethitha po okulongela Kalunga ketu omunankondoawike, Jehova. Oyendji oya kambadhala, ihe inaya pondola. Natu tale kwaashoka sha ningwa po pethimbo lyIita Iitiyali yUuyuni. Pethimbo ndyoka, omapangelo miilongo oyindji oga li ga hepeke noonkondo oshigwana shaKalunga. Iilonga yOonzapo dhaJehova kaya li owala yi indikwa kongundu yaNazi moNdowishi, ihe nokomapangelo wo moAustralia, moKanada nomiilongo yilwe. Oshike sha li sha ningwa po? Mo 1939, sho iita ya tameke, aauvithi oya li 72 475 muuyuni awuhe. Oolopota otadhi ulike kutya sho iita ya ka hula mo 1945, kekwatho lyaJehova aauvithi oya li 156 299. Omwaalu gwaauvithi ogwa li gwa londo pombanda noonkondo!

6. Omapataneko ohage tu kwathele tu ninge shike, pehala lyoku tu tilitha? Gandja oshiholelwa.

⁶ Omapataneko ohage tu kwathele tu kale twa tokola toko okulongela Jehova, pehala lyokukala twa tila. Pashiholelwa, aaihokani yamwe mboka ya li ye na okanona okashona, oya li moshilongo moka iilonga yetu ya li yi indikwa. Pehala lyokushuna omutse miipeta, oya kutha uukokolindjila wondjigilile. Omukadhi okwa li a etha po nokuli iilonga ye mbyoka ya li hayi futu nawa. Omusamane gwe okwa ti kutya okwiindikwa kwiilonga yetu hoka, okwa li kwa ningitha aantu oyendji ya kale ye na omaipulo kombinga yOonzapo dhaJehova. Shoka oshe shi ningitha oshipu kuye a tameke omakonakonombiimbeli. Okwiindikwa kwiilonga yetu hoka, okwa li wo kwa etele yalwe uuwanawa. Omukuluntugongalo gumwe moshilongo moka, okwa ti kutya oyendji mboka ya li ya etha po okulongela Jehova, oya tameke okuya kokugongala nokukutha ombinga ishewe mokuuvitha.

7. (a) Oshike tatu ilongo muLevitikus 26:36, 37? (b) Oto ka ninga po shike, uuna iilonga yetu yi indikwa?

 ⁷ Uuna aatondi yetu taya indike iilonga yetu, elalakano lyawo oku tu tilitha owala kaatu longele we Jehova. Kakele kokwiindika iilonga yetu, ohashi vulika wo ya taandeleke iifundja kombinga yetu, ya tume aanambelewa ye ye ya hadhe momagumbo getu, ye tu fale kompangu nenge nokuli ye tu tule mondholongo. Ohaya kala ye na einekelo kutya otatu ka kwatwa kuumbanda, molwaashoka oya vula okutula aamwatate naamwameme yontumba mondholongo. Ngele otwa etha tu kwatwe kuumbanda, otashi vulika nokuli shi tu ningithe tu shune monima nenge tu ethe po okulongela Jehova. Inatu hala tu kale twa fa mboka ya popiwa muLevitikus 26:36, 37. (Lesha.) Itatu ka etha uumbanda wu tu ningithe tu shune monima nenge tu ethe po okulongela Jehova. Otwi inekela muJehova thiluthilu noinatu tila. (Jes. 28:16) Ohatu galikana Jehova e tu wilike. Otu shi shi kutya kekwatho lye, kapu na epangelo lyopantu tali vulu oku tu keelela tu mu longele nuudhiginini. — Heb. 13:6.

8-9. (a) Etokolo lyopaumwene lini Omukriste nenge omitse dhomaukwanegumbo dha pumbwa okuninga? (b) Oshike tashi ka kwathela omuntu a ninge etokolo li li pandunge?

⁸ Ngele epangelo moshilongo sheni olyi indike iilonga yetu, otashi vulika wu dhiladhile kutya owa pumbwa okutembukila koshilongo hoka to vulu okulongela Jehova wa manguluka. Ndyoka etokolo lyopaumwene. Yamwe otashi vulika ye shi mone shi li ekwatho enene okutala kutya Aakriste yomethelemimvo lyotango oya li ya ningi po shike, sho ya li taya hepekwa. Konima sho aatondi ya dhipaga Stefanus nomamanya, aalongwa muJerusalem oya li ya tembukile muJudea nomuSamaria nosho wo nokuli kuFoinikia, kuKipro nokuAntiokia. (Mat. 10:23; Iil. 8:1; 11:19) Nonando ongawo, yalwe otashi vulika ye shi ndhindhilika kutya omathimbo gamwe sho Aakriste yomethelemimvo lyotango ya kala taya hepekwa, omuyapostoli Paulus okwa li a tokola kaa tembuke mo miitopolwa moka iilonga yokuuvitha ya li tayi patanekwa. Okwa li a tokola a taandelithe onkundana ombwanawa nokutsa omukumo aamwatate mboka ya li miilando moka mwa li omahepeko. — Iil. 14:19-23.

⁹ Oshike tatu ilongo komahokololo ngoka? Omutse gwuukwanegumbo kehe oku na okuninga etokolo kombinga yokutembuka. Manga inaa tokola, oku na okugalikana nokudhiladhila nuukeka kombinga yonkalo yaanegumbo lye nosho wo omauwanawa nomauwinayi ngoka tashi vulika ya ka mone, ngele oya tembuka. Moshinima shika, kehe Omukriste oku na “okuhumbata ye mwene omutenge gwe.” (Gal. 6:5) Katu na okupangula yalwe, omolwomatokolo gawo.

10. Omalombwelo geni oshitayimbelewa nosho wo aakuluntugongalo taya ka gandja?

¹⁰ Ongiini tatu vulu okutsikila okulongela Jehova, nonando iilonga yetu oyi indikwa? Oshitayimbelewa otashi ka gandja kaakuluntugongalo omalombwelo nomayele taga longo, kombinga yankene tatu vulu okumona iikulya yopambepo, nkene tatu vulu okugongala nankene tatu vulu okuuvitha onkundana ombwanawa. Ngele oshitayimbelewa itashi vulu okukwatathana naakuluntugongalo, aakuluntugongalo otaye ke mu kwathela amuhe megongalo mu tsikile okulongela Jehova. Otaya ka gandja omalombwelo ngoka ge li metsokumwe newiliko ndyoka tali adhika mOmbiimbeli nomiileshomwa yetu. — Mat. 28:19, 20; Iil. 5:29; Heb. 10:24, 25.

11. Omolwashike to vulu okukala nuushili kutya oto ka kala wu na ashihe shoka wa pumbwa, wu kale neitaalo lya kola, noshike to vulu okuninga, wu gamene Ombiimbeli yoye niileshomwa yoye?

¹¹ Jehova okwa uvaneka kutya aapiya ye otaya  ka kala ye na ashihe shoka ya pumbwa ya kaleke eitaalo lyawo lya kola. (Jes. 65:13, 14; Luk. 12:42-44) Onkee ano, oto vulu okukala nuushili kutya ehangano lye otali ka ninga ngaashi tali vulu li ku pe shoka wa pumbwa, opo wu tsikile okukala omudhiginini. Oshike to vulu okuninga po? Uuna iilonga yetu ya indikwa, mona ehala ewanawa mpoka to vulu okuholeka Ombiimbeli yoye niileshomwa yilwe. Kotoka iinima mbyoka kutya nduno oya pilintwa nenge oyi li moshikwaelektronika, kuu yi thige mehala moka tashi vulika yi monike nuupu. Kehe gumwe gwomutse na katuke oonkatu ndhoka tadhi mu kwathele a tsikile okukala e na eitaalo lya kola.

12. Aakuluntugongalo otaya vulu ngiini okuunganeka okugongala momukalo moka aantu itaaya vulu okudhimbulula shoka tatu ningi?

¹² Ongiini kombinga yokugongala kwetu kwomokati koshiwike? Aakuluntugongalo otaya ka ninga omalongekidho, opo tu vule okugongala momukalo moka aapataneki yetu itaaya vulu okunongela. Otashi vulika ye tu lombwele tu gongale muungundu uushona, notashi vulika ya ka kale taya lundulula olundji omathimbo nomahala gokugongalela. Oto vulu okugamena ooitaali ooyakweni mboka hamu gongala pamwe nayo, mokupopila pevi uuna mwe ya pokugongala nuuna kwa pu. Oto ka pumbwa wo okuzala momukalo moka aantu itaaya dhimbulula kutya oto yi nenge oto zi kokugongala.

13. Oshike tatu vulu okwiilonga koshiholelwa shaamwatate yomoSoviet Union shonale?

¹³ Shi na ko nasha niilonga yokuuvitha, oonkalo itadhi ka kala dha faathana miitopolwa niitopolwa. Ihe molwaashoka otu hole Jehova nosho wo okulombwela yalwe kombinga yUukwaniilwa we, otatu ka mona po omukalo moka tatu vulu okuuvitha. (Luk. 8:1; Iil. 4:29) Omunandjokonona Emily B. Baran, okwa popi kombinga yokuuvitha kwOonzapo dhaJehova moSoviet Union shonale. Okwa ti: “Sho epangelo lya lombwele Oonzapo kutya itadhi vulu okuuvithila yalwe kombinga yeitaalo lyadho, odha tameke okuuvithila aashiinda shadho, aalongi pamwe nadho nookuume. Sho dha tulwa mondholongo omolwokuninga ngawo, odha tameke okuuvithila aanadholongo ooyakwawo.” Nonando aamwatate moSoviet Union shonale, oya li ya indikwa kaaya uvithe, kaya li ya etha po okuuvitha. Ngele iilonga yokuuvitha oya indikwa moshilongo sheni, onawa wu holele aamwatate mboka!

14. Episalomi 39:1 otali tu kwathele tu yande omwigo guni?

¹⁴ Kotokela okutaandelitha uuyelele. Uuna iilonga yetu ya indikwa, natu kale tu shi “ethimbo lyokumwena.” (Omuuv. 3:7) Otu na okugamena uuyelele mboka wu li oshiholekwa, ngaashi omadhina gaamwatate naamwameme, omahala mpoka hatu gongalele, nkene hatu uvitha nankene hatu pewa iikulya yopambepo. Uuyelele mboka katu na oku wu lombwela aakwanepangelo, ookuume nenge aakwanezimo yomoshilongo shetu nenge yokiilongo yilwe. Ngele otwe wu ya  lombwele, otatu ka tula aamwatate moshiponga. — Lesha Episalomi 39:1.

15. Satana ota ka kambadhala okuninga shike, nongiini tatu vulu okuyanda omwigo ngoka?

¹⁵ Ino etha uunima uushona wu tu topole. Satana oku shi kutya egumbo ngele tali itsile ondumbo, nena egumbo ndyoka itali vulu okukala po. (Mark. 3:24, 25) Ota ka kambadhala neitulomo a ete omatopoko mokati ketu. Kungawo, oha kala e na einekelo kutya otatu ka tameka okukondjithathana, pehala lyoku mu kondjitha.

16. Omumwameme Gertrud Poetzinger okwe tu tulila po oshiholelwa oshiwanawa shini?

¹⁶ Aakriste mboka ya pyokoka nayo nokuli oya pumbwa okukala ya tonata, opo kaaya gwile momwigo ngoka. Natu taleni koshiholelwa shaamwameme yaali aagwayekwa, Gertrud Poetzinger naElfriede Löhr. Oya li mondholongo pamwe naamwameme ooyakwawo mokamba yoonkwatwa yaNazi. Omumwameme Gertrud okwa li a tsile ondumbo omumwameme Elfriede, sho a kala ta gandja iipopiwa tayi tsu omukumo aamwameme yalwe mokamba. Lwanima omumwameme Gertrud okwa li a sa ohoni, e ta galikana kuJehova e mu kwathele. Okwa nyola a ti: “Otu na okwiilonga oku shi taamba ko kutya yalwe oye na uunongo wu vule wetu nenge kutya oye na iinakugwanithwa oyindji yi vule yetu.” Okwe shi ende ngiini opo a kale kee na we ondumbo? Omumwameme Gertrud okwa li a gandja eitulomo komaukwatya omawanawa gomumwameme Elfriede nokiikala ye iiwanawa. Momukalo nguka, okwa vulu ishewe okukala nekwatathano ewanawa naElfriede. Ayehe oya li ya vulu okwiidhidhimikila mokamba ndjoka nokulongela Jehova nuudhiginini, sigo ya mana oondjenda dhawo dhokombanda yevi. Ngele otwa longo nuudhiginini tu kondjithe uupyakadhi mboka tu na pokati ketu naamwatate, otatu ka yanda omwigo gwokukala twa topoka. — Kol. 3:13, 14.

17. Omolwashike tu na okuyanda einenepeko?

¹⁷ Yanda einenepeko. Ngele otwa landula ewiliko ndyoka tatu pewa kaamwatate yoshinakugwanithwa naainekelwa, otatu ka yanda omaupyakadhi. (1 Pet. 5:5) Pashiholelwa, moshilongo shimwe moka iilonga yetu ya indikwa, aamwatate yoshinakugwanithwa oya li ya lombwele aauvithi kaaya thigile aantu muukalele iileshomwa. Ihe omumwatate gumwe omukokolindjila gwomoshilongo moka, okwa tsu mo dhe e ta gandja iileshomwa. Oshizemo? Nziya konima sho ye nooitaali ooyakwawo yamwe ya mana okugandja uunzapo wontukuluka, oya li ya pulwapulwa kaapolisi. Aapolisi aniwa oya li ye ya landula noya li ya vulu okukutha ko kaantu iileshomwa mbyoka ya pewa. Oshike tatu ilongo koshimoniwa shoka? Otwa pumbwa okukala hatu landula ewiliko nokuli nonando katu uvite ko iinima yontumba nawa. Jehova ohe tu yambeke aluhe, uuna tatu longele kumwe naamwatate mboka a langeka po ye tu kwatele komeho. — Heb. 13:7, 17.

18. Omolwashike tu na okuyanda okutulila po yalwe oompango inaadhi pumbiwa?

 ¹⁸ Ino tula po oompango inaadhi pumbiwa. Ngele aakuluntugongalo oya tula po oompango inaadhi pumbiwa, otashi ka kala omutenge kaamwatate naamwameme. Omumwatate Juraj Kaminský ota dhimbulukwa shoka sha li sha ningwa po, pethimbo iilonga yetu ya li yi indikwa moCzechoslovakia shonale. Okwa ti: “Konima sho aamwatate yiinakugwanithwa nosho wo aakuluntugongalo oyendji ya mangwa po, yamwe mboka ya li taya kwatele komeho momagongalo nomiikandjo, oya tameke okutulila po aauvithi oompango dhaashoka ye na okuninga naashoka kaaye na okuninga.” Jehova ine tu pa uuthemba wokuningila ooyakwetu omatokolo. Omuntu ngoka ha tulile po yalwe oompango inaadhi pumbiwa, ke lile po oku ya gamena, ihe ota kambadhala oku ya thiminikila shoka ye na okwiitaala. — 2 Kor. 1:24.

19. Shi ikolelela kOndjalulo ontiyali 32:7, 8, omolwashike tatu vulu okukala neinekelo nenge nuulaadhi, nonando Satana oku kambadhale shi thike peni?

¹⁹ Omutondi gwetu omunene, Satana Ondiyapoli, ita ka etha po okukambadhala okuhepeka aapiya yaJehova aadhiginini. (1 Pet. 5:8; Eh. 2:10) Satana naakalelipo ye, otaya ka kambadhala oku tu ethitha po okulongela Jehova. Nonando ongawo, inatu etha tu sindwe kuumbanda! (Deut. 7:21) Jehova oku li pamwe natse, nota ka tsikila oku tu kwathela, nonando iilonga yetu oyi indikwe. — Lesha 2 Ondjalulo 32:7, 8.

20. Owa tokola toko okuninga shike?

²⁰ Natu kale twa tokola toko ngaashi aamwatate yomethelemimvo lyotango, mboka ya li ya lombwele aapangeli yopethimbo lyawo ya ti: “Tokoleni ne yene kutya oshini po shu uka koshipala shaKalunga. Otu na okuvulika kune nenge otu na okuvulika kuKalunga? Oshoka itatu vulu okumwena, tu kale ando itaatu hokolola shoka tse twe shi mono notwe shi uvu.” — Iil. 4:19, 20.