1-2. (a) Hana wa lö tokea ita na lö latehegö ira samatörö halöwö nifaluada? (b) Hadia nitutunöda ba wamahaʼö daʼa?

ME DÖFI 2018, töra 223.000 sanuriaigö turia somuso dödö si toröi ba soi si lö manehegö ösa mazui fefu halöwö ba wamati. Lö tokea ita daʼa. Simane si no tatutunö ba wamahaʼö migu silalö, hasambalö göna folohi ira niha Keriso sindruhu. (2 Tim. 3:12) Gofu hezo toröi ita, tola manö ba zi lö tadöna-döna wa lö latehegö khöda ira samatörö ba wamosumange Lowalangida sebua faʼomasi, Yehowa.

² Na ira samatörö ba zi toröi ndraʼugö lahalö gangetula wa lö latehegö ba wamosumange Yehowa, tola manö manofu-nofu ndraʼugö, ’Na göna ita folohi, hadia daʼö zangoromaʼö wa lö omuso dödö Lowalangi khöda? Börö me lö latehegö halöwö nifaluada, hadia tebai saʼae tafosumange Yehowa? Hadia moguna findra ndraʼo ba soi sanehegö halöwö nifaluada?’ Ba wamahaʼö daʼa, tatutunö wanofu-nofu daʼa. Tatutunö göi hewisa enaʼö lö taböhöli ba wamosumange Yehowa ba ginötö lö latehegö halöwö nifaluada, ba hadia manö zi tebai tafalua.

3. Moloʼö 2 Korindro 11:23-27, hadia wolohi nitaögö Waulo ba hadia wamahaʼö si tola tahalö moroi ba duma-dumania?

³ Na lö latehegö khöda ira samatörö ba wamosumange Yehowa, tola manö so ba wangera-ngerada wa lö saʼae omuso dödö Lowalangi khöda. Hizaʼi, törö tödömö wa ba ginötö göna ita folohi, tenga daʼö geluahania wa lö omuso dödö Yehowa khöda. Duma-dumania, lö tebulö omuso dödö Yehowa khö zinenge sotöi Faulo. Itema halöwö si tohude ba wanura 14 zura si so ba Mbuku Niʼamoniʼö Yunani Niha Keriso, ba yaʼia samösa sinenge nifatenge ba soi böʼö. Hewaʼae simanö, göna ia  folohi sabölö-bölö. (Baso 2 Korindro 11:23-27.) Tola tahalö khöda wamahaʼö moroi ba zalua khö Waulo, wa itehegö Yehowa ba nono mbanuania si lö faröi ba wanaögö folohi.

4. Hana wa fatuwu gulidanö khöda?

⁴ Itutunö Yesu hana wa göna ita fanandraigö. Iwaʼö wa fatuwu dödöra khöda börö me tenga tana khö niha gulidanö ita. (Yoh. 15:18, 19) Tobali na göna ita folohi, tenga daʼö geluahania wa lö saʼae omuso dödö Yehowa khöda. Hizaʼi, daʼa zangoromaʼö wa satulö nifaluada!

5. Hadia tola labatogö niha gulidanö famosumange khö Yehowa? Tutunö.

⁵ Tebai labatogö niha famosumangeda khö Yehowa, Lowalangi fondrege zabölö. Ato zotandraigö hizaʼi lö mofozu. Angeragö hadia zalua sagötö Fasuwöta Gulidanö II. Me luo daʼö, göna folohi sabölö-bölö nono mbanua Lowalangi moroi khö ndra samatörö ba ngawalö soi. Tenga ha partai Nazi ba Jerman si lö manehegö halöwö nifalua ndra Samaduhuʼö Yehowa, hizaʼi lö latehegö göi daʼö ira samatörö ba Australia, Kanada hegöi soi tanö böʼö. Hewaʼae simanö, nehegö hadia zalua andre. Me alua wasuwöta ba ndröfi 1939, so 72.475 sanuriaigö ba zi sagörö ulidanö. Ba ginötö tebato wasuwöta me döfi 1945, moloʼö angombakhata wa so 156.299 sanuriaigö, börö me ifahowuʼö nono mbanuania Yehowa. Faʼato ndra sanuriaigö töra dua winaeta!

6. Hadia mbua si sökhi salua ba ginötö göna ita folohi? Beʼe duma-duma.

⁶ Ba ginötö so wolohi, tola manö so khöda waʼataʼu, ba no si toʼölö na alua daʼö khöda. Hizaʼi, folohi zi tobali fanolo khöda enaʼö itugu anau gölöda ba wamosumange Yehowa. Duma-dumania, so sambua fongambatö sangokhögö samösa iraono side-ide, toröi ira ba soi si lö manehegö halöwö nifaluada. Hizaʼi, lö khöra faʼataʼu ba labörögö lahalö perintis biasa. Ibato wohalöwö foʼomo ira alawe hewaʼae ebua gazinia. Itutunö foʼomo ira matua wa sagötö lö latehegö halöwö nifaluada, ato niha somasi mangila sanandrösa khö ndra Samaduhuʼö Yehowa. Buania, itugu aoha khönia ba wamörögö famahaʼö ba Zura Niʼamoniʼö. Ba so göi mbua si sökhi tanö böʼö. Ifatunö samösa zatua sokubaloi si so ba soi daʼö, wa ato zi no mamöhöli wamosumange  Yehowa, labörögö laʼondrasi gangowuloa ba lafuli zui manuriaigö.

7. (a) Hadia wamahaʼö nihalöda moroi ba 3 Moze 26:36, 37? (b) Hadia nifaluamö ba ginötö lö latehegö ira samatörö halöwö nifaluada?

⁷ Ba ginötö lö latehegö nudu halöwö nifaluada, omasi ira na so khöda faʼataʼu ba wamosumange Yehowa. Baero nasa lö latehegö halöwö nifaluada, ladunö-dunö göi misa zi lö duhu sanandrösa ba khöda, lafatenge niha sohalöwö ba wamareta ba wamareso nomoda, laʼohe ita föna pengadilan, mazui so ba gotaluada nibeʼe ba gurunga. Latötöna enaʼö so khöda waʼataʼu börö me so ösa moroi ba gotaluada nibeʼe ba gurunga. Na tatehegö mofozu ira ba wametaʼu yaʼita, tola manö awuwu ita mazui tabato ba wamosumange Yehowa. Tatu lö omasi ita simane niha nitutunö ba 3 Moze 26:36, 37. (Baso.) Böi tatehegö waʼataʼuda si möi fangawuwu mazui taböhöli halöwö ba wamati. Moguna sindruhu-ndruhu faduhu dödöda khö Yehowa ba tatimbagö faʼataʼu. (Yes. 28:16) Talau mangandrö soroi ba dödö ba wangalui fanuturu lala moroi khö Yehowa. Börö me itolo ita, faduhu dödöda wa gofu hewisa waʼabölö ira samatörö, tebai labatogö waʼalöfaröida ba wamosumange Lowalangi.​—Heb. 13:6.

8-9. (a) Hadia gangetula sinangea ihalö ero samösa högö yomo ba nomo mazui si samösa niha? (b) Hadia zanolo yaʼita ba wangai angetula si tefaudu?

⁸ Na ira samatörö si so ba soimö lö latehegö halöwö nifaluada, tola manö manofu-nofu ndraʼugö hadia moguna findra ba soi böʼö sanehegö ba wamosumange Yehowa. Ha yaʼugö si tola mangai angetula daʼa tenga niha böʼö. Fatua lö tahalö gangetula, moguna tahalö wamahaʼö moroi ba duma-duma niha Keriso me abad siföföna ba ginötö göna ira folohi. Me no aefa latebu kara Sitefano ira nudu irugi mate, ira nifahaʼö ba Yeruzalema findra ira ba zi sagörö Yudea hegöi Samaria irugi Wenisia, Sifirusi, ba Andriokhia. (Mat. 10:23; Hal. 8:1; 11:19) Hewaʼae simanö, tola tafahaʼö ita moroi ba nifalua Waulo me ifuli göna folohi ira niha Keriso ba abad siföföna. Ihalö gangetula Waulo toröi ba nahia si lö manehegö halöwö fanuriaigö, hewaʼae daʼö möi famaʼala waʼaurinia. Ifalua daʼö, börö me omasi ituriaigö turia somuso dödö ba iʼabölöʼö ndra talifusö si göna folohi si so ba mbanua daʼö.​—Hal. 14:19-23.

⁹ Hadia wamahaʼö si tola tahalö moroi ba zalua andrö? Ero samösa högö yomo ba nomo moguna ihalö gangetula hadia findra mazui löʼö. Fatua lö ihalö gangetula, moguna mangandrö ia soroi ba dödö ba ihaogö iʼangeragö zalua ba nösi nomonia, hadia sökhi lua-luania dania mazui löʼö na findra ira. Ba zalua daʼa, ero samösa niha Keriso moguna ”iluʼi-luʼi sa noronia zamösana”. (Gal. 6:5) Lö moguna tahuku niha böʼö ba gangetula nihalöra.

10. Hadia wanuturu lala nibeʼe gödo ndraha dania hegöi ira satua sokubaloi?

¹⁰ Hewisa enaʼö lö öböhöli ba wamosumange Yehowa na lö latehegö halöwö nifaluada? Ibeʼe dania gödo ndraha wanuturu lala hegöi hadia zinangea lafalua ira satua sokubaloi ba mbanua niha Keriso sanandrösa ba wanemaʼö gö ba wamati, ba wamalua gangowuloa hegöi ba wanuriaigö turia somuso dödö. Na tebai gödo ndraha ba wohubungi ira satua sokubaloi, tola latolo ndraʼugö ira satua sokubaloi hegöi fefu zi so ba mbanua niha Keriso enaʼö lö öböhöli ba wamosumange Yehowa. Labeʼe wanuturu lala si teʼodane-dane ba Zura Niʼamoniʼö hegöi publikasida.​—Mat. 28:19, 20; Hal. 5:29; Heb. 10:24, 25.

11. Hana wa faduhu dödömö wa tebönökhi gö ba wamati ba hadia zinangea öfalua ba wolumöʼö Zura Niʼamoniʼö hegöi publikasi niʼokhögömö?

 ¹¹ No ifabuʼu Yehowa ba nono mbanuania wa hasambalö ibönökhi gö ba wamati. (Yes. 65:13, 14; Luk. 12:42-44) Tobali, moguna faduhu dödömö ba organisasinia wa hasambalö labönökhi soguna ba wamati enaʼö lö faröi ndraʼugö. Hizaʼi, so zinangea öfalua. Ba ginötö lö latehegö halöwö nifaluada, alui nahia si tebai lasöndra niha böʼö ba wombiniʼö Zura Niʼamoniʼömö hegöi publikasi tanö böʼö niʼokhögömö, hewaʼae nicetak mazui si so ba perangkat elektronik. Böi iröʼö gö ba wamati sebua böli andrö ba nahia salio musöndra. Yaʼita zamösana moguna sindruhu-ndruhu taforege enaʼö aro ita ba wamati.

12. Hadia nifalua ndra satua sokubaloi sanandrösa ba gangowuloa enaʼö lö möi fondrönisi dödö niha ba nifaluada?

¹² Hadia dania zalua sanandrösa ba gangowuloada? Lahaogö ba wangalui lala ira satua sokubaloi sanandrösa ba gangowuloa enaʼö lö möi fondrönisi dödö niha ba nifaluada. Ladöniaʼö ita enaʼö owulo ba zi sambua gangowuloa side-ide, ba tola manö asese labulöʼö ginötö hegöi nahia waʼowulo. Tola fao ndraʼugö ba wolumöʼö ndra talifusö na öʼide-ideʼö limö fahuhuo na awena örugi mazui öröi gangowuloa. Moguna göi öʼogunaʼö nukha si lö möi fondrönisi dödö niha.

13. Hadia wamahaʼö nihalöda khö ndra talifusöda ba soi si no irai farahu ba Uni Soviet?

¹³ Sanandrösa ba halöwö fanuriaigö, tola manö faböʼö-böʼö ba zi sambua nahia. So soi sanehegö ba wamalua fanuriaigö, hizaʼi so göi zamini-miniʼö yaʼira ba wamalua yaʼia. Hizaʼi, börö me taʼomasiʼö Yehowa ba omasi fahuhuo ita ba niha böʼö sanandrösa ba Wamatörönia, hasambalö tasöndra lala ba wamalua fanuriaigö. (Luk. 8:1; Hal. 4:29) Imane sejarawan sotöi Emily B. Baran sanandrösa ba wanuriaigö nifalua ndra Samaduhuʼö Yehowa ba soi si no irai farahu ba Uni Soviet, ”Me lawaʼö ira samatörö wa tebai manuriaigö ira Samaduhuʼö Yehowa ba niha böʼö, manuriaigö ira Samaduhuʼö ba zi falazi omo khöra, ba nahia wohalöwöra, hegöi khö ndra awö-awöra. Lua-luania, labeʼe ira ba gurunga. Me labeʼe ba gurunga ira Samaduhuʼö, manuriaigö ira ba niha böʼö si so ba gurunga.” Hewaʼae lö latehegö halöwö nifaluada, ira talifusöda ba soi si no irai farahu ba Uni Soviet, lö labato ba wamalua fanuriaigö. Na samuza inötö lö latehegö halöwö fanuriaigö ba soimö, tola öʼoʼö duma-dumara!

14. Moloʼö Zinunö 39:2, hadia wamangelama nibeʼenia khöda?

¹⁴ Moguna mangelama ndraʼugö ba wamatunö informasi. Ba ginötö lö latehegö halöwö nifaluada, moguna taʼila hawaʼara ’lö hede-hededa’. (Zango. 3:7) Moguna böi tafatunö informasi si tebai muʼombakhaʼö, simane töi ndra talifusöda, hezo mufalua gangowuloa, hewisa lalada wamalua halöwö  fanuriaigö, ba hewisa lalada wanemaʼö gö ba wamati. Böi tafatunö daʼö khö ndra samatörö mazui khö ndra awö-awöda, hegöi ba nösi nomoda si toröi ba soida mazui ba soi böʼö, hewaʼae lö hadöi ohitö dödöra ba wamalua si lö sökhi. Na tafatunö fefu daʼa, tola teʼala waʼauri ndra talifusöda.​—Baso Zinunö 39:2.

15. Hadia niforege Zatana khöda, ba hadia zinangea tafalua?

¹⁵ Böi tehegö aboto wahasara dödöda börö gabula dödö side-ide. Aboto ba dödö Zatana wa tola adudu nomo na lö aro. (Mrk. 3:24, 25) Lö tebulö ia wamorege enaʼö lö khöda fahasara dödö. Ifalua daʼa börö me itötöna enaʼö faoma talawa nawöda, tenga ba wolawa yaʼia.

16. Hadia duma-duma si sökhi niforomaʼö dalifusöda Gertrud Poetzinger?

¹⁶ Moguna göi ba niha Keriso saro ba wamati enaʼö mangelama. Angeragö duma-duma ndra talifusöda ira alawe si darua si no mubayoini sotöi Gertrud Poetzinger hegöi Elfriede Löhr. Labeʼe ira ba gurunga si fao khö ndra talifusöda ira alawe tanö böʼö ba zi sambua kamp kosentrasi Nazi. Ibörögö so waʼafakhö dödö khö Gertrud ba ginötö ibeʼe Elfriede huhuo sebua si möi famarou dödö ndra talifusöda ira alawe tanö böʼö si so ba gurunga. Ba gafuriata, aila Gertrud ba iʼandrö wanolo khö Yehowa. Imane ba wanurania, ”Moguna tafahaʼö ita ba wanemaʼö, na abölö atua-tua niha böʼö moroi khöda mazui na abölö oya halöwö nibeʼe khönia.” Hewisa wangehetania faʼafökhö dödönia? Iʼosambuaʼö dödönia Gertrud ba mbua-bua si sökhi niʼokhögö Elfriede hegöi fahuwu ia ba niha. Daʼa zanolo yaʼia irege tola ifuli fahuwu khö Elfriede. Yaʼira si darua laʼefasi moroi ba kamp konsentrasi ba lö faröi ira khö Yehowa irugi faʼamatera. Na taforege ba wangasiwai gabula dödöda khö ndra talifusöda, tola so khöda wahasara dödö.​—Kol. 3:13, 14.

17. Hana wa moguna enaʼö lö tebulö taʼoʼö wanuturu lala moroi ba organisasi Yehowa?

¹⁷ Böi tebulö ba woloʼö fanuturu lala. Na taʼoʼö wanuturu lala nibeʼe ndra satua sokubaloi, tola tatimbagö abula dödö. (1 Fet. 5:5) Duma-dumania, ba soi si lö manehegö halöwö nifaluada, labeʼe wanuturu lala ira satua sokubaloi khö ndra sanuriaigö enaʼö ha lafalua wanuriaigö si lö resmi ba böi labeʼe ba niha publikasi. Hizaʼi, samösa dalifusöda perintis ira matua, lö iʼoʼö wanuturu lala ba ibeʼe ba niha publikasi. Hadia lua-luania? Lö ara me no aefa lafalua wanuriaigö si lö resmi, manofu khöra wolisi. Sindruhunia, so samösa zohalöwö ba zamatörö sogoʼö-goʼö yaʼira moroi furi ba lahalö publikasi si no labeʼe ba niha. Hadia wamahaʼö si tola tahalö ba zalua andrö? Moguna taʼoʼö wanuturu lala hewaʼae na lö fao dödöda ba daʼö. Lö tebulö ifahowuʼö ita Yehowa na falulu fohalöwö  ita khö ndra talifusöda si no mutuyu ba wondröniaʼö yaʼita.​—Heb. 13:7, 17.

18. Hana wa moguna tatimbagö wamazökhi amakhoita si lö moguna?

¹⁸ Böi fazökhi amakhoita si lö moguna. Na lafazökhi ira satua sokubaloi amakhoita si lö moguna, tola tobali noro dödö daʼö khö ndra talifusö tanö böʼö. Imane dalifusöda ira matua sotöi Juraj Kaminský ba wanutunö si no alua ba ginötö lö latehegö halöwö nifaluada ba soi si no irai farahu ba Cekoslovakia, ”Börö me ato ndra satua sokubaloi niraʼu, ira talifusöda si toröi ba wondröniaʼö banua niha Keriso hegöi wilayah, labörögö labeʼe amakhoita hadia zinangea lafalua hegöi si tebai lafalua.” Lö irai ibeʼe khöda Yehowa kuaso, ba wangai angetula ba niha böʼö. Na so samösa zamazökhi amakhoita si lö moguna khö ndra talifusönia, sindruhunia no iforege ba wamatörö famatira. (2 Kor. 1:24) Daʼö tenga lala si tefaudu ba wolumöʼö yaʼira.

19. Moloʼö 2 Ngaʼötö 32:7, 8, hana wa so khöda waʼabarani gofu hadia ia nifalua Zatana?

¹⁹ Nududa si oföna sibai yaʼia daʼö, Afökha Satana. Lö irai ibato ba wolohi ono mbanua Yehowa si lö faröi. (1 Fet. 5:8; Fam. 2:10) Satana hegöi si fao khönia, laforege enaʼö lö latehegö halöwö nifaluada ba wamosumange Yehowa. Hizaʼi, hewaʼae na so khöda waʼataʼu, lö irai taböhöli wamosumange Yehowa! (5 Moz. 7:21) Fao khöda Yehowa ba lö iböhöli wotuhini yaʼita, hewaʼae na lö latehegö halöwö nifaluada.​—Baso 2 Ngaʼötö 32:7, 8.

20. Hadia gangetula nihalöda?

²⁰ Datahalö gangetula simane nifalua ndra talifusöda ba abad siföföna, sangumaʼö khö zamatörö ba götöra, ”Yaʼami zangai angetula hezo zatulö ba wamaigi Lowalangi: Khömi niʼoʼö mazui khö Lowalangi. Na yaʼaga, tebai mabato wangombakha sanandrösa ba zi no maʼila hegöi si no marongo.”​—Hal. 4:19, 20.