1-2. (a) Ahabw’enki tutashemereire kutangaara omurimo gwaitu gwazibirwa? (b) Nituza kugaaniira ahari ki omu kicweka eki?

OMU 2018, ababuurizi b’amakuru marungi abarikurenga omu 223,000 bakaba nibatuura omu mahanga ahu omurimo gwaitu gurikuzibirwa nari ahu batarikwikiriza Abajurizi ba Yehova kugira obugabe bw’okukora buri kimwe. Eki tikirikutangaaza. Nk’oku twegire omu kicweka ekihwaire, Abakristaayo abaabuzima nibamanya ngu nibaija kuhiiganisibwa. (2 Tim. 3:12) Hoona ahu barikutuura, ab’obushoboorozi nibabaasa kubazibira kuramya Ruhanga waabo owa rukundo kitaraariire kandi ahonaaho.

² Ahu orikutuura gavumenti yaacwamu kuzibira abantu kuramya Yehova, noobaasa kwebuuza ebibuuzo nk’ebi: ‘Mbwenu shi okuhiiganisibwa nikimanyisa ngu Ruhanga tarikutusiima? Okuzibirwa shi nikuturemesa kuramya Yehova? Nshemereire kuza omu ihanga ahu ndikubaasa kuramya Ruhanga hatariho orikunteera aha mukono?’ Omu kicweka eki nituza kugaaniira aha bibuuzo ebyo. Nituza kureeba oku turikubaasa kugumizamu nituramya Yehova omurimo gwaitu gwaba guzibiirwe n’ebi tushemereire kwetantara kukora.

3. Kurugiirira aha 2 Abakorinso 11:23-27, entumwa Paulo akahikwaho kuhiiganisibwa ki, kandi ekyo nitukyegyeraho ki?

³ Gavumenti yaayemereza omurimo gwaitu, nitubaasa kwohibwa kuteekateeka ngu Ruhanga takituha migisha. Kwonka ijuka ngu okuhiiganisibwa tikirikumanyisa ngu Yehova tarikutusiima. Teekateeka aha ky’okureeberaho ky’entumwa Paulo. Buzima akaba naasiimwa Ruhanga. Akatunga omugisha gw’okuhandiika  amabaruha 14 g’Ebyahandiikirwe by’Ekikristaayo eby’Orugriika, kandi akaba entumwa aha banyamahanga. Kwonka akahiiganisibwa munonga. (Shoma 2 Abakorinso 11:23-27.) Nitwegyera aha byahikire aha ntumwa Paulo ngu Yehova akaba naikiriza abaheereza be abeesigwa kuhiiganisibwa.

4. Ahabw’enki ensi neetwanga?

⁴ Yesu akashoboorora ahabw’enki twine kumanya ngu nitwija kuhiiganisibwa. Akagira ngu nitwija kwangwa ahakuba tituri b’ensi. (Yoh. 15:18, 19) Okuhiiganisibwa tikirikumanyisa ngu titwine migisha ya Yehova. Kureka nikimanyisa ngu nitukora ekintu ekihikire!

5. Mbwenu shi abantu-buntu nibabaasa kuturemesa kuramya Yehova? Shoboorora.

⁵ Abantu-buntu tibarikubaasa kuturemeseza kimwe kuramya Yehova Ruhanga ow’Obushoboorozi Bwona. Abantu baingi bateireho kwonka baaremwa. Teekateeka aha kyabaireho omu Rutaro rw’Ensi Yoona II. Omu bwire obwo, gavumenti omu mahanga maingi zikahiiganisa munonga abaheereza ba Ruhanga. Abanazi bakeemereza omurimo gw’Abajurizi ba Yehova omuri Germany, n’omuri Australia, Canada, n’omu mahanga agandi. Kwonka yetegyereze ekyabaireho. Omuri 1939 orutaro ku rwatandikire, hakaba hariho ababuurizi 72,475 omu nsi yoona. Amakuru gakooreka ngu orutaro ku rwagiire kuhendera omuri 1945, ahabw’emigisha ya Yehova, hakaba hariho ababuurizi 156,299 omu nsi yoona. Omuhendo gw’ababuurizi gukaba gubarizemu emirundi erengire ahari ebiri!

6. Okuhiiganisibwa nikubaasa kurugamu birungi ki, omu mwanya gw’okututiinisa? Ha eky’okureeberaho.

⁶ Okuhiiganisibwa omu mwanya gw’okututiinisa, nikubaasa kutuhiga kwongyera kuheereza Yehova omu bwijwire. Nk’eky’okureeberaho, omushaija n’omukazi we abaabaire baine omwana muto bakaba nibatuura omu ihanga ahu okuramya kwaitu kurikuzibirwa. Kwonka omu mwanya gw’okugaruka enyima ahabw’okutiina, bombi bakaba baapayoniya ab’obutwire. Nangwa n’omukazi akareka omurimo gwe ogwabaire nigumubaasisa kutunga esente nyingi kubaasa kuba payoniya. Iba akagira ngu abantu baingi bakagira ekihika ky’okwenda kumanya ebirikukwata aha Bajurizi ba Yehova. N’ekyarugiremu, kikaba nikimworobera kutandika kwegyesa abantu Baibuli. Okuzibirwa okwo kukakwata n’aha bandi omu muringo murungi.  Omureeberezi omu ihanga niryo rimwe akagira ngu baingi abaabaire barekyeire aho kuheereza Yehova, bakatandika kwija omu nteerane, reero baagaruka baatandika kubuurira.

7. (a) Nitwega ki omu Abaleevi 26:36, 37? (b) Noija kukora ki okuramya kwaitu kwazibirwa?

⁷ Abazigu baitu baazibira okuramya kwaitu, nibaba baine amatsiko g’okuturemesa kuheereza Yehova. Okwongyera aha kutuzibira, nibabaasa n’okujanjaaza ebishuba, boohereze abaserukare kushwijuma amaka gaitu, batutware omu macwero g’emanja, nari batute n’omu bihome. Nibaba baine amatsiko ngu nitwija kugira obwoba ahabw’okugira ngu babaasize kuta bakye ahariitwe omu kihome. Twabaikiriza kuta obwoba omu mitima yaitu, nitubaasa n’okutandika “kwezibira” kuramya Yehova. Nituba tutarikwenda kuba nk’abarikugambwaho omu Abaleevi 26:36, 37. (Kishome.) Titurikwija kwikiriza okutiina kutureetera kutuubya aha buheereza bwaitu nari kurekyera aho kuheereza. Nituba twine kwesiga Yehova reero twangye kurahuka kugira obwoba. (Isa. 28:16) Nitushaba Yehova kutuha obuhabuzi. Nitumanya ngu yaatushagika, na gavumenti z’amaani tizirikwija kuturemesa kumuramya omu bwesigwa.—Heb. 13:6.

8-9. (a) Ni nshonga ki ei buri mutwe gw’eka nari buri muntu aine kwecweramu ahabwe? (b) Niki ekirikwija kuhwera omuntu kucwamu gye?

⁸ Gavumenti y’ahu orikutuura yaazibira okuramya kwaitu, noobaasa kwebuuza yaaba oine kuza omu ihanga ahu orikubaasa kuheereza Yehova omu busingye. Eki n’ekyawe kwecweramu tihaine orikubaasa kukucweramu. Abamwe nibashanga kiri eky’obwengye kuteekateeka aha ki Abakristaayo omu kyasha ky’okubanza baakozire obu baahiiganisibwa. Bwanyima y’abazigu kuteera Stefano amabaare bakamwita, abeegi ba Yesu omuri Yerusaalemu bakaza omuri Buyudaaya yoona na Samaria nangwa na Foiniike, Kupuro n’omuri Antiokia. (Mat. 10:23; Byak. 8:1; 11:19) Kwonka abandi nibabaasa kugira ngu Abakristaayo omu kyasha ky’okubanza ku baahiiganisiibwe, entumwa Paulo akacwamu kutaruga omu mwanya ahu omurimo gw’okubuurira gwabaire niguzibirwa. Omu mwanya gw’ekyo, akooga amagara ge kujanjaaza amakuru marungi n’okugumya ab’eishe-emwe omu ndembo ezaabaire zirimu okuhiiganisibwa.—Byak. 14:19-23.

⁹ Ebi byona nitubyegyeraho ki? Buri mutwe gw’eka aine kucwamu aha bikwatiraine n’okufuruka. Atakacwiremu, aine kushaba kandi akateekateeka aha mbeera y’eka ye omu bwegyendesereza, akateekateeka aha birungi n’ebibi ebirikubaasa kurugamu. Omu nshonga egi, buri Mukristaayo aine ‘kwekorera omutwaro gwe wenka.’ (Gal. 6:5) Titushemereire kucwera abandi orubanja ahabw’okucwamu kwabo.

10. Ofiisi y’eitaagi n’abareeberezi nibabaasa kutuha buhabuzi ki?

¹⁰ Noobaasa kugumizamu ota nooheereza Yehova omurimo gwaitu gwaba niguzibirwa? Ofiisi y’eitaagi neija kuha abareeberezi obuhabuzi aha bikwatiraine n’okutunga eby’okurya by’omwoyo, okweteeranira hamwe kuramya, n’okubuurira amakuru marungi. Ofiisi y’eitaagi yaaba etarikubaasa kuhurizana n’abareeberezi, obwo abareeberezi nibaija kukuhwera n’abandi omu kibiina kugumizamu nimuramya Yehova. Nibaija kubaha eby’okukuratira kuhikaana n’obuhabuzi oburi omu Baibuli n’ebitabo byaitu eby’Ekikristaayo.—Mat. 28:19, 20; Byak. 5:29; Heb. 10:24, 25.

11. Ahabw’enki orikubaasa kuhamya ngu nitwija kuguma nitutunga eby’okurya by’omwoyo, kandi noobaasa kubirinda gye ota?

¹¹ Yehova naaraganisa ngu abaheereza be nibaija  kuguma nibariisibwa gye omu by’omwoyo. (Isa. 65:13, 14; Luk. 12:42-44) N’ahabw’ekyo noobaasa kugira obuhame ngu ekibiina kye nikiija kukora buri kimwe ekirikubaasika kukugumya omu by’omwoyo. Noobaasa kukora ki? Haaba hariho okuzibirwa, tunga omwanya murungi gw’okusherekamu Baibuli yaawe n’ebindi by’okurya by’omwoyo ebi orikubaasa kuba oine. Yegyendesereze ebintu nk’ebyo eby’omuhendo yaaba biteirwe nari ebiri aha byoma kutabireka ahu birikubaasa kurahuka kubonwa. Buri omwe ahariitwe ashemereire kuteeraho kuguma ahami omu by’omwoyo.

12. Abareeberezi nibabaasa kutebeekanisa bata enteerane kutareetera abantu kutwerarikirira?

¹² Kandi shi enteerane zaitu eza buri saabiiti? Abareeberezi nibaija kutebeekanisa kugira ngu oze omu nteerane omu muringo ogutaraareetere abazigu baitu kukimanya. Abareeberezi nibabaasa kubagira ngu mugire enteerane z’abantu bakye, kandi ngu muhindure obwire bw’enteerane n’emyanya yaazo. Noobaasa kuhwera omu kurinda ab’eishe-emwe orikugamba mpora waaba nooza omu nteerane na waaba noorugayo. Noobaasa n’okujwara omu muringo ogutarikureetera abantu kukwerarikirira.

13. Nitubaasa kwegyera ki aha b’eishe-emwe omuri Soviet Union eya ira?

¹³ Aha bikwatiraine n’omurimo gw’okubuurira, embeera nizitaana kurugiirira aha kicweka. Kwonka nitukunda Yehova, kandi nitushemererwa kugambira abandi ebirikukwata aha Bukama bwe, n’ahabw’ekyo nitwija kusherura oburyo bw’okubuurira. (Luk. 8:1; Byak. 4:29) Omunyabyafaayo omuri Soviet Union eya ira, orikwetwa Emily B. Baran arikugamba aha kubuurira kw’Abajurizi ba Yehova akagira ati: “Gavumenti ku yaagambiire Abajurizi ba Yehova ngu tibarikubaasa kugambira abandi aha kwikiriza kwabo, bakatandika kugaaniira na bataahi baabo, abakozi bagyenzi baabo, na banywani baabo. Ebikorwa ebi ku byareeteire Abajurizi ba Yehova kutwarwa omu nkambi, bakasherura ab’okuhindura omu bu baabaire bakomirwe nabo.” N’obu haraabe haabaire hariho okuzibirwa omuri Soviet Union eya ira, ab’eishe-emwe tibararekyeire aho kubuurira. Omurimo gw’okubuurira gwaba gwazibiirwe ahu turikutuura, ka tuteereho kugira okumariirira nk’okwo!

14. Zaaburi 39:1 nihaturabura kwetantara bintu ki?

¹⁴ Yegyendesereze ebi orikugambira abandi. Omu bwire bw’okuzibirwa kw’okuramya kwaitu, twine kumanya obwire “bw’okuhunama.” (Mub. 3:7) Twine kumanya ebi tutashemereire kugambira abandi, nk’amaziina g’ab’eishe-emwe na banyaanyazi-itwe, ahu turikugirira enteerane, oku turikubuurira, n’oku turikutunga eby’okurya by’omwoyo. Titurikubaasa kugambira ab’obushoboorozi enshonga ezi; kandi titurikubaasa kuzigambira na banywani baitu n’abanyabuzaare omu ihanga ryaitu nari  aheeru yaaryo. Twagwa omu mutego ogu, nituba twata ab’eishe-emwe bagyenzi baitu omu kabi.—Shoma Zaaburi 39:1.

15. Sitaane naija kuteeraho kukora ki, kandi nitubaasa kwetantara tuta omutego gwe?

¹⁵ Otaikiriza obushonga bukye kutubaganisamu. Sitaane naamanya ngu enju yaayebaganisamu terikubaasa kugumaho eyemereire. (Mak. 3:24, 25) Naija kuguma naateeraho kureetaho okwebaganisamu. Omu muringo ogwo, naamanya ngu nitwija kutandika kurwanagana omu mwanya gw’okumurwanisa.

16. Munyaanyazi-itwe Gertrud Poetzinger akataho ky’okureeberaho ki ekirungi?

¹⁶ Nangwa n’Abakristaayo abakuzire omu by’omwoyo baine kwegyendesereza kutagwa omu mutego ogu. Teekateeka aha ky’okureeberaho kya banyaanyazi-itwe babiri abashukirweho amajuta, Gertrud Poetzinger na Elfriede Löhr. Bakaba bakomirwe hamwe na banyaanyazi-itwe abandi omu nkambi ya Nazi. Gertrud akaba agirira eihari Elfriede ku yaabaire aha embazo zirikugaruramu amaani banyaanyazi-itwe abandi omu nkambi. Bwanyima, Gertrud akahemuka yaayeshengyereza Yehova kumuhwera. Akahandiika ati: “Twine kwega kwikiriza amazima, abandi baaba baine obujunaanizibwa bw’amaani nari baaba nibakundwa munonga.” Gertrud akasingura ata eihari rye? Akata omutima aha mitwarize mirungi ya Elfriede n’okuba omuntu murungi. Omu muringo ogu, akagaruka yaagira omukago murungi na Elfriede. Bombi bakahonokaho omu nkambi, kandi bakaheereza Yehova omu bwesigwa kuhitsya obu baahendera obuheereza bwabo omu nsi. Twateeraho kusingura obutaikirizana n’ab’eishe-emwe, nitwija kwetantara omutego gw’okwebaganisamu.—Kol. 3:13, 14.

17. Ahabw’enki tushemereire kwetantara omweragiiro?

¹⁷ Yetantare omweragiiro. Twagyendera aha buhabuzi bw’ab’eishe-emwe abarikwesigwa abaine obujunaanizibwa, nitwija kwetantara oburemeezi. (1 Pet. 5:5) Nk’eky’okureeberaho, omu ihanga rimwe ahu omurimo gwaitu gwazibiirwe, ab’eishe-emwe abaine obujunaanizibwa bakagambira ababuurizi kutaha abantu ebitabo ebiteirwe omu kubuurira. Kwonka, payoniya omwe omu kicweka ekyo akateekateeka ngu we naayetegyereza gye, kandi yaaha abantu ebitabo. Hakarugamu ki? Bwanyima y’akaanya kakye we n’abandi b’eishe-emwe kuheza kubuurira kitaraariire, poriisi ekababuuza kana na kataano. Obu baabaire nibabuurira, abaporiisi bakagyenda babakuratiire barikwiha aha bantu ebitabo ebi baabahaire. Nitwegyera ki aha ky’okureeberaho eki? Twine kukuratira obuhabuzi n’obu twakuba nituteekateeka ngu nitumanya gye. Yehova butoosha naatuha emigisha twakwatanisa n’ab’eishe-emwe abu atooraine kutureeberera.—Heb. 13:7, 17.

18. Ahabw’enki twine kwetantara kutaho ebiragiro ebitarikwetengyesa?

 ¹⁸ Reka kutaho ebiragiro ebitarikwetengyesa. Abareeberezi baataho ebiragiro ebitarikwetengyesa, nibata omugugu aha bandi. Ow’eishe-emwe Juraj Kaminský naijuka ekyabaireho obu haabaire hariho okuzibirwa omuri Czechoslovakia eya ira. Naagira ati: “Bwanyima y’ab’eishe-emwe abaine obujunaanizibwa n’abareeberezi baingi kukomwa, bamwe abaabaire nibareeberera ebibiina n’abarikutaayaayira ebibiina bakatandika kutaho ebiragiro aha ku ababuurizi baine kutwaza, n’omushororongo gw’ebiine kukorwa n’ebitaine kukorwa.” Yehova tatuhaire obushoboorozi bw’okucweramu abandi. Omuntu orikutaho ebiragiro bitarikwetengyesa naaba atarikurinda ab’eishe-emwe bagyenzi be, kureka naaba naateeraho kutegyeka okwikiriza kwabo.—2 Kor. 1:24.

19. Kurugiirira aha 2 Obusingye 32:7, 8, ahabw’enki turikubaasa kugira obumanzi n’obu Sitaane yaakukora ki?

¹⁹ Omuzigu waitu omukuru Sitaane Omuregi, tarikwija kurekyera aho kuhiiganisa abaheereza ba Yehova abeesigwa obunaku obu. (1 Pet. 5:8; Kush. 2:10) Sitaane n’abarikumushagika nibaija kuguma nibateeraho kutuzibira kuramya Yehova. Kwonka, tihaine ekishemereire kutureetera kutiina tukarekyera aho kuheereza Yehova! (Bir. 7:21) Yehova ari aha rubaju rwaitu, kandi naija kugumizamu naatushagika n’obu omurimo gwaitu gwakuzibirwa.—Shoma 2 Obusingye 32:7, 8.

20. Omaririire kukora ki?

²⁰ Naitwe ka tuteereho kugira okumariirira nk’okw’ab’eishe-emwe omu kyasha ky’okubanza, abaagambiire abategyeki baabo bati: “Ku kiraabe kihikire omu maisho ga Ruhanga kuhurira imwe okukira Ruhanga, naimwe mukireebe; kwonka itwe titurikubaasa kuhunama kutagamba ebi twareebire, n’ebi twahuriire.”—Byak. 4:19, 20.