1-2. (a) Mukunda natshi tuajiyilego guyituga gula mafumu a leta atunyisa mudimo wetu? (b) Itshi tuza muzuelela mu longo edi?

MU 2018, Matemue gubalega 223 000 akhalele mujinga mu ifutshi mudimo wetu wana gutunyishiwa, nu mu ifutshi yana gutunyisa ndaga jiko jia gikombelelo gietu. Ndaga yene ishigo gutuyitugisa. Luholo tuayimonyi mu longo dia balega, Aklisto a giamatshidia ana gujiya egi adi naye gumonesewa lamba. (2 Tim. 3:12) Fundo diagasue muana gujinga, jiyenu egi mafumu a leta ajiya gututunyisa ha gukombelela Yehowa Nzambi wetu wa guzumba.

² Gula fundo wana gujinga mafumu a leta azula desizio dia gutunyisa gikombelelo gia Yehowa, wajiya gudihula mihu eyi yalandula: ‘Malamba tudi mutagana nawo adi mumonesa egi Nzambi ganago gusuanguluga nu esue ba? Mbatubemba gukombelela Yehowa handaga adi mutunyisa mudimo wetu ba? Ngajiya guya mu gifutshi giko ba?’ Tuza muzuelela mihu eyi mu longo edi. Tuza luko mumona luholo tuajiya gulandula gukombelela Yehowa ngatshima mudimo wetu watunishiwa, nu ndaga tushigo naye gutshita.

3. Ha gutadila 2 Kolinto 11:23-27, malamba atshi mupostolo Phaula watanele nawo, nu gifezegeselo gienji gidi gutulongesa itshi?

³ Gula mafumu a leta atunyisa gikombelelo gietu, tuajiya gutangiza egi Nzambi gashigo luko musuanguluga nu esue. Uvi jiyenu egi, usageshi ushigo mukotelesa egi Yehowa wanago luko gusuanguluga nu esue. Tuzule gifezegeselo gia mupostolo Phaula. Nzambi wakhalele musuanguluga nenji.  Wakhalele nu luendu lua gusonega mikanda ya Biblia 14 mu Écritures grecques chrétiennes, wakhalele nji mupostolo wa athu akhalelego enya Yuda. Uvi, wataganele nu malamba akola. (Tanga 2 Kolinto 11:23-27.) Ndaga yataganele naye mupostolo Phaula yana gumonesa egi Yehowa wana guhana njila egi akombeledi enji a gujinginyina amonesewe lamba.

4. Mukunda natshi athu a ha mavu ana gututuna?

⁴ Yesu wamonesele gishina Aklisto adi naye gumonesewa lamba. Wazuelele egi athu mbaatutuna handaga tuanago gudinginyisa mu ndaga jia ha mavu. (Yone 15:18, 19) Gula athu atusagesa, ishigo mukotelesa egi Yehowa ganago gutuzumba. Uvi yana gumonesa egi tuana gukalagala ndaga jiabonga!

5. Athu a ha mavu awa ajiya gutukanga njila ha gukombelela Yehowa ba? Kotelesa.

⁵ Athu a ha mavu awa ajiyilego gutukanga njila ha gukombelela Yehowa Nzambi wetu wa ngolo jiagasue. Avula mukatshi diawo alolele gale uvi akukilego. Tutadile ndaga jiabuile mu tangua dia Ita ya Mbadi ya ha Mavu Agasue. Mu tangua diene, mafumu a leta a mu ifutshi yavula asagesele akombeledi a Nzambi muavula. Mudimo wa Matemue a Yehowa watunyishiwe gu Allemagne mu parti Nazi nu gu Australie nu gu Canada nu mu ifutshi iko. Uvi, tala ndaga yabuile gungima. Hasendesele ita mu 1939, Matemue a Yehowa akhalele 72 475 ha mavu agasue. Rapore jiamonesele egi hahuile ita mu 1945, Matemue a Yehowa abuile 156 299. Mutango wa Matemue a Yehowa wadivudishile mahugo mbadi!

6. Ha fundo dia guvua woma, gubonga gutshi usageshi wana gutubatela? Hana gifezegeselo.

⁶ Usageshi wajiyilego gutuhana woma, uvi wana gukolesa desizio dietu dia gukombelela Yehowa. Tuzuelele gifezegeselo gia fami imoshi yakhalele mujinga nu mun’awo mu gifutshi atunyishile gikombelelo gietu. Ha fundo dia guvua woma, ene asendesele mudimo wa muvundji wa njila wa tangua diagasue. Mukhetu wabembele mudimo wa mbongo jiavula ha gubua pionye. Yala wazuelele egi luholo atunyishile mudimo wetu, athu avula akhalele gudihula mihu mukunda nu Matemune  a Yehowa. Ngenyi yakhalelego lamba ha gualongesa Biblia. Gutunyisa mudimo wetu guana gubata gubonga guko. Mukulu mumoshi wa mu gifutshi giene wazuelele egi, athu avula abembele gukombelela Yehowa asendesele luko guya mu gudibungisa nu gulongesa.

7. (a) Longo ditshi tudi muzula mu Levi 26:36, 37? (b) Itshi mbawutshita tangua mbaatunyisa gikombelelo gia Yehowa?

⁷ Tangua mbalagaji jiana gutunyisa gikombelelo gietu, ana gutshigina gutuhana woma hagula tubembe gukombelela Yehowa. Luko, ajiya gutumbila mambo, nga gutuma ba policier gumbo dietu ha gutukuata, ajiya gututuma gu tribinale nga gumba aphangi’etu ako mu bologo. Ana gutangiza egi ajiya gutuhana woma luholo adi mumba aphangi etu ako mu bologo. Gula tuava woma mukunda nu ndaga ajiya gutukalagala, tuajiya ‘gubemba’ gukombelela Yehowa mage-mage. Tushigo naye gubua gifua athu adi muzuelewa mu Levi 26:36, 37. (Tanga.) Tuajiyilego gubemba egi woma utulebese nga ututume ha gubemba gukombelela Yehowa. Tuana gushila Yehowa mutshima nu tuanago gudigita nu woma ndo. (Yesh. 28:16) Tudi naye gukamba utuameji wa Yehowa mu gisambu. Tuana gujiya egi gushigo nga gima, ikhale mafumu akoma a leta ajiyilego gutukanga njila ha gukombelela Nzambi nu gujinginyina guagasue.—Heb. 13:6.

8-9. (a) Desizio ditshi Muklisto wagasue udi naye guzula mukunda nu muene hakhenji nga mukunda nu fami yenji? (b) Itshi yajiya gukuatesa muthu ha guzula desizio diabonga?

⁸ Gula fundo wana gujinga mafumu a leta adi mutunyisa gikombelelo gietu, wajiya gudihula gula udi naye guya mu gifutshi giko ha gukombelela Yehowa mu guhuima. Didi desizio diaye hakhaye. Athu ako ajiya gutadila ndaga Aklisto a mu siekle ya thomo akalegele tangua atagenele nu umbalagaji. Tangua mbalagaji jiashiyile Etiene, alandudi a gu Yelusalema alengele gu Yudea nu gu Samaliya nu mu mafundo a gualeha a gu Fenisia, nu gu Shipre nu gu Antiokia. (Mat. 10:23; Makal. 8:1; 11:19) Uvi, athu ako ajiya guzuela egi tangua Aklisto ene atagenele luko nu umbalagaji, mupostolo Phaula gakatugilego fundo mbalagaji jiakhalele mutunyisa mudimo wa gulongesa. Washile lujingu luenji mu gingonza ha gulongesa lukuma luabonga nu guhana gikhesa gudi aphangi a mu membo akhalele mu umbalagaji wakola.—Makal. 14:19-23.

⁹ Longo ditshi tuajiya guzula mu mene eji? Mu fami, muthu udi naye guzula desizio dia guya mu gifutshi giko udi tata. Gutuama dia guzula desizio diene, udi naye gutshita gisambu nu gutadila lujingu lua fami yenji, nu gubonga nga malamba ajiya guabuila gula aya mu gifutshi giko. Mu ndaga ya luholo elu, Muklisto wagasue udi naye “gudibatela ginemo gienji.” (Gal. 6:5) Tushigo naye gumona gubola mukunda nu desizio athu ako azudi.

10. Malongo tshi biro ya filiale nu akulu mbaahana?

¹⁰ Luholo lutshi wajiya gulandula gukombelela Yehowa gula atunyisa mudimo wetu? Biro ya filiale mbayihana akulu a mu hungu dienu malongo nu mbaawambela ndaga adi naye gutshita ha guheta mikanda nu luholo muajiya gudibungisa nu gulongesa lukuma luabonga. Gula Biro ya filiale yawambelelego akulu nga gima, akulu mbaamikuatesa mukut’enu  agasue ha gulandula gukombelela Yehowa. Mbamihana utuameji mu njila ya Biblia nu ya mikanda yetu.—Mat. 28:19, 20; Makal. 5:29; Heb. 10:24, 25.

11. Itshi idi gugutshiginyisa egi mbawuheta ima mbawukhala nayo funu ha gukolesa gutshigina guaye, nu itshi udi naye gutshita ha gubamba Biblia nu mikanda yaye iko?

¹¹ Yehowa walayile egi akombeledi enji mbaaheta ima yagasue mbakhala nayo funu ha gulandula gukolesa gutshigina guawo. (Yesh. 65:13, 14; Luka 12:42-44) Ngenyi wajiya gutshigina egi organizasio wenji mbawutshita yagasue ha gumihana ima mudi nayo funu ha gusala yagujinginyina. Itshi wajiya gutshita? Gula mudimo wetu watunyishiwa kamba fundo diabonga dia guhaga Biblia yaye nu mikanda yaye iko udi nayo. Ubembigo mikanda yetu ya ndando ikhale ya papier nga ya mu Internet ha fundo athu ajiya guyimona. Muthu wagasue mukatshi dietu udi naye gutshita ngolo ha gukhala nu gutshigina guakola.

12. Luholo lutshi akulu adi naye gulondega ndaga hagula athu ajiyigo ndaga jiatadila gudibungisa?

¹² Itshi tuajiya guzuela mukunda nu gudibungisa gua mukatshi dia phoso? Akulu mbalondega ndaga hagula mukhale gudibungisa mu luholo athu ako ajiyilego gumimona. Ajiya gugutoga ha gudibungisa nu ga hunji gazonda, ajiya nji gusombegesa mbala jiavula tangua nu mafundo a gudibungisa. Wajiya gukuatesa aphangi ha gudibamba, gula udi muzuela nu gutema guagasue tangua mudi muya nga muvutuga mu gudibungisa. Wajiya nji gusudiga mu luholo luajiyilego gutuma athu ako ha gumijiya.

13. Ndaga aphangi ataganele najio gu ex-Union soviétique jidi gutulongesa itshi?

¹³ Mukunda nu mudimo wa gulongesa, athu nu athu adi naye gutshita ndaga ha gutadila fundo adi mujinga. Mbatukamba ba okazio a gulongesa lukuma lua Ufumu handaga tuana guzumba Yehowa nu athu n’akuetu. (Luka 8:1; Makal. 4:29) Emily B. Baran, wasonegele mukunda nu Matemue a Yehowa a gu ex-Union soviétique egi: “Tangua mafumu a leta akhalele mutunyisa mudimo wa gulongesa, Matemue a Yehowa akhalele mulongesa gudi bavuaze, mafuta a mudimo nu mafuta awo ako. Tangua akhalele guamba mu bologo, akhalele mulongesa enya bologo ako.” Ikhale tangua mudimo wetu watunyishiwe, aphangi etu a gu ex-Union soviétique abembelego gulongesa. Wajiya gulandula khadilo dia aphangi awa, gula mudimo wetu watunyishiwa fundo wana gujinga!

14. Ngimbo 39:1 idi gutukuatesa ha gutuna gutshita itshi?

¹⁴ Monesa gutema mu ndaga udi muzuela. Gula mudimo wetu watunyishiwa, tudi naye gujiya egi gudi nu ‘tangua dia  guhuena tedie.’ (Mulo. 3:7) Tushigo naye guzuela ndaga jia gisuegi, gifua majina a aphangi nu fundo tuana gudibungisa, luholo tuana gulongesa nu luholo tuana guheta mikanda. Tushigo naye guwambela mafumu a leta ndaga eji; nga gujiwambela mafuta etu nga enya fami yetu adi mujinga mu gifutshi gietu nga mu gifutshi giko. Gula tuaawambela najio, na tuamba aphangi mu gingonza.—Tanga Ngimbo 39:1.

15. Ndaga itshi Satana mbawulola gututshita, luholo lutshi tuajiya gulenga muheto wenji?

¹⁵ Tubembigo egi ndaga jiazonda-zonda jitukaphumune. Satana wana gujiya egi inzo yagasue yana gudikapha yanago gujinga. (Mako 3:24, 25) Mbawulandula gulola gutukhaphumuna. Wana gutshigina egi tusendese gudiluisa ha fundo dia gumuluisa muene.

16. Gifezegeselo gitshi giabonga phangi Gertrud Poetzinger wabembele?

¹⁶ Ikhale Aklisto agukula mu nyuma adi naye gutema hagula abuigo mu muheto owu. Tutadile gifezegeselo gia aphangi a akhetu mbadi ambiwe maji mu nyuma, Gertrud Poetzinger nu Elfriede Löhr. Ambiwe mu bologo nu Aklisto ako mu camp de concentration Nazi. Gertrud wavuile giphi tangua Elfriede wakhalele mutela akhetu ako maga a mu nyuma ha guahana gikhesa. Gungima, Gertrud wavile musonyi nu watogele ukuateshi gudi Yehowa. Wasonegele egi: “Gula athu ako adi nu ndunge jia gutshita ndaga nga ndo adi nu inemo yavula gutubalega, tuajiyilego guavila ginjongo.” Luholo lutshi Gertrud wabembele khadilo dia giphi? Wasendesele gutala phamba makalegelo abonga akhalele nawo Elfriede. Gutshita ngenyi guamukuatesele ha gubamba ufuta wabonga nu Elfriede. Khungi awo agasue mbadi azogele mu camp de concentration nu alandudile gukombelela Yehowa uu nu tangua afile. Gula tuatshita ngolo ha gumanesela ndaga tudi najio nu aphangi, gushigo nga gima mbagitukhaphumuna.—Kol. 3:13, 14.

17. Mukunda natshi tudi naye gulandula utuameji udi gutuhanewa?

¹⁷ Landula tangua diagasue utuameji udi guguhanewa. Gula tudi mulandula utuameji aphangi adi nu imemo adi gutuhana, mbatushigo mubua mu milonga. (1 Phet. 5:5) Ha gufezegesa, mu gifutshi gimoshi ana gutunyisa mudimo wetu, aphangi adi nu inemo awambelele alongeshi egi ashigo naye guhana mikanda mu mudimo wa gulongesa. Uvi, phangi mumoshi wa pionye watunyile gulandula utuameji wene, nu wahanele mikanda. Ndaga itshi yabuile gungima? Tangua phangi muene nu aphangi ako amanesele gulongesa, maphulushi a akuatele. Idi mumonega gifua, fumu wa masuta  muene wakhalele muya nu gualandula gungima nu gutambula mikanda akhalele muhana athu. Longo ditshi tuajiya guzula mu lumene elu? Tudi naye gulandula ndaga adi gutuwambela, ikhale jishigo gutusuanguluisa. Yehowa wana gutushimbiga gula tudi mutumagela athu atombele muene ha gututuameza.—Heb. 13:7, 17.

18. Mukunda natshi tushigo naye guhaga mikhuala ishigo nu ndando?

¹⁸ Uhagigo mikhuala ishigo nu ndando. Gula akulu adi muhaga mikhuala ishigo nu ndando, mbayihana aphangi lamba. Phangi Juraj Kaminský udi mutangiza ndaga jiakalegewe tangua atunyishile mudimo wetu gu gifutshi giakhalele mutamegewa thomo egi Tchécoslovaquie wazuelele egi: “Tangua akuatele akulu avula, akulu anyi asalele nu atadi awendji asendesele guhaga mikhuala yawo alongeshi akhalele naye gulandula nu akhalele guawambela ndaga adi naye gutshita nga ndo.” Yehowa gatuhanelego ginemo gia guhagela athu ako mikhuala. Muthu udi muhaga mikhua ishigo nu ndando gashigo mubamba aphangi uvi udi mukamba gubua fumu yawo.—2 Kol. 1:24.

19. Ha gutadila 2 Gudilanduluila 32:7, 8 mukunda natshi tudi naye gukhala nu gikhesa ikhale Satana udi mutshita ngolo ha gutuluisa?

¹⁹ Satana Diabulu mbalagaji wetu wakoma, mbagashigo mubemba gusagesa akombeledi a gujinginyina a Yehowa. (1 Phet. 5:8; Yat. 2:10) Satana nu athu enji mbaalola gutunyisa gikombelelo gia Yehowa. Uvi, mbatushigo mubemba gukombelela Yehowa! (Mikh. 7:21) Yehowa udi nu esue, nu mbawulandula gutukuatesa ikhale mudimo wetu watunyishiwa.—Tanga 2 Gudilanduluila 32:7, 8.

20. Desizio ditshi wazula?

²⁰ Tudi naye guzula desizio dia luholo lumoshi nu aphangi a mu siekle ya thomo, awambelele mafumu a mu tangua diawo egi: ‘Ndaga itshi idi nu ndando gu meso a Nzambi, gumivuila enue nga Nzambi, enue batulenu hakhenu. Uvi esue, tuajiyilego gubemba guzuela ndaga tuamonele nu jinyi tuavuile.’—Makal. 4:19, 20.