1, 2. a) ¿Gobiernocuna Diosta sirvichun jarcajpica imamantataj mana mancharina canchij? b) ¿Cai yachaipica imatataj yachashun?

HUATA 2018-pajca 223 mil yalli publicadorcunami Diosmanta huillachun mana saquij llajtacunapi causacurcacuna. Yachai 27-pi ricushca shinaca Diosta sirvijcunata llaquichina cashcataca ñami yacharcanchij. Chaimantami mana mancharina canchij (2 Timoteo 3:12). Maijan llajtapi causacujpipish autoridadcunaca Jehová Diosta ama sirvichunmi ñapish jarcai tucuncuna.

² Gobiernocuna Diosta sirvichun jarcajpica: “¿Dios ñucanchijmanta caruyajpichu llaquichicun? ¿Jehová Diosta sirvi tucushunchu? ¿Diosta tranquilo sirvingapajca shujtaj llajtamanchu rina canchij?” nishpachari tapurishun. Cai yachaipimi cai tapuicunata cutichishun. Shinallataj predicachun mana saquijpipish Diosta ima shina sirvishpa catinatami yachashun. Huaquin trampacunapi ama urmangapajpish imata ruranatami yachashun.

3. a) 2 Corintios 11:23 al 27-pi nishca shinaca ¿apóstol Pabloca ima llaquicunatataj chꞌimbapurarca? b) ¿Pablopaj causaimantaca imatataj yachanchij?

³ Diosmanta ama huillachun nijpica Diosca ñucanchijtaca ña mana ayudacunchu nishpachari yuyashun. Pero mana chashnachu can. Apóstol Pablopi yuyashun. Jehová Dios ayudajpimi Mushuj Testamentopi tiyaj 14 cartacunata escribirca. Achca llajtacunapipish Diosmantami huillarca. Chashna rurajpipish paitaca catirashpami llaquichircacuna (2 Corintios  11:23-27-ta liyipai). Apóstol Pablopaj causaimanta yachashpami Jehová Dios paita sirvijcunata llaquichichun saquishcata intindinchij.

4. ¿Diosta sirvijcunataca imamantataj pꞌiñancuna?

⁴ Cai pachapaj ruraicunapi mana chagrurishcamanta shujtajcuna pꞌiñana cashcatami Jesusca huillarca (Juan 15:18, 19). Shujtajcuna llaquichijpipish Jehová Diosca mana ayudacunchu nishpaca mana yuyanachu canchij. Chaipaj randica allita ruracushcamanta llaquichicushcatami yuyarina canchij.

5. ¿Gentecunaca Diosta sirvijcunata jarcai tucuncunachu? Shuj ejemplomanta parlai.

⁵ Contracunaca Diosta sirvijcunata jarcasha nishpapish imata mana rurai tucushcacunachu. Segunda Guerra Mundialpi ima tucushcata yuyarishun. Diosta sirvijcunataca achca llajtacunapimi gobiernocunaca manchanaita llaquichircacuna. Alemania, Australia, Canadá, shujtaj llajtacunapipish Diosmanta huillachunmi jarcasha nircacuna. Shina cajpipish chai tiempopica Diosta catijcunaca ashtahuanmi mirarca. 1939 huatapi guerra callarijpica 72.475 publicadorcunami muyundij Allpapi tiyarca. Pero 1945 huatapi guerra tucurishca huashaca 156.299 publicadorcunami tiyarca.

6. Diosmanta huillachun jarcajpica ¿imamantataj alli canga? Shuj ejemplomanta parlai.

⁶ Diosmanta huillachun jarcajpica mana manchashpami Diosta sirvishpa catina canchij. Shuj huauquica paipaj huarmindij churindijmi predicachun mana saquij llajtapi causarcacuna. Chashnapish cai huauqui paipaj huarmipish precursorcunami tucurcacuna. Huarmica precursoradota japingapajca alli trabajotami saquirca. Cusaca: “Gobiernocuna Diosta sirvichun jarcashcamantami achca gentecunaca testigo de Jehovacunamanta ashtahuan yachasha nirca. Chaimantami achca gentecunaman Bibliamanta yachachi callarircanchij” nircami. Chai llajtallapitaj causaj shuj ancianoca: “Gobiernocuna Diosta sirvichun jarcashcamantami Diosmanta caruyashcacunapish cutin tandanacuicunaman rircacuna, huillanamanpish cutin llujshi callarircacuna” nircami.

7. a) ¿Levítico 26:36, 37-mantaca imatataj yachanchij? b) ¿Diosta sirvichun jarcajpica imatataj rurana canchij?

⁷ Contracunaca Diosta sirvinata manchachunmi huaquin jarcaicunata churancuna. Chaimantami paicunaca ñucanchijmanta  llullacunata ningacuna, autoridadcunatapish huasipi imalla charishcata revisachun cachangacuna. Shinallataj autoridadcunapaj ñaupajmanpishmi apangacuna. Maijan huauqui panicunatacarin carcelpimi churangacuna. Caita ricushpa mancharichunmi chashna rurangacuna. Pero manchaita charishpaca paicuna munashca shinami Diosta sirvinata saquishun. Shinapish Levítico 26:36, 37-pi parlashca gentecuna shinaca mana casha ninchijchu (Levítico 26:36, 37-ta liyipai). Manchaimanta Diosta sirvinataca manataj saquinachu canchij. Diospimi tucui shunguhuan confiana canchij (Isaías 28:16). Jehová Dios ayudachunmi mañana canchij. Pai ayudajpica gobiernocunapish Diosta sirvichunca manataj jarcai tucungacunachu (Hebreos 13:6).

8, 9. a) ¿Cusaca ima decisioncunatataj agllana can? b) ¿Alli decisiontaca ima shinataj agllai tucunchij?

⁸ Diosta sirvichun mana saquijpica ¿shujtaj llajtamanchu rina canchij? Chaitaca cada unomi decidina can. Ñaupa tiempopi Jesusta catijcuna imata rurashcata yuyarishun. Estebanta contracuna rumicunahuan huañuchishca huashaca Jerusalenmantami Jesusta catijcunaca shujtaj ladocunaman rircacuna. Paicunaca Judea, Samaria, Fenicia, Chipre, Antioquía llajtacunamanmi rircacuna (Mateo 10:23; Hechos 8:1; 11:19). Cutin maijan huauqui panicunaca Pablopaj ejemplotami cati tucuncuna. Pablopaj punllacunapipish huaquin lugarcunapica gentecunaca Diosmanta huillachunmi jarcarcacuna. Chai lugarcunapi huillanaca peligroso cajpipish Pabloca Diosmanta huillashpa, huauqui panicunata animashpami saquirirca (Hechos 14:19-23).

⁹ ¿Caimantaca imatataj yachanchij? Cusami paipaj familiahuan shujtaj llajtaman rinata o mana rinata decidina can. Pero manaraj imatapish decidishpami Jehová Dios ayudachun mañana can. Shinallataj paica: “Shujtaj llajtaman rishpaca ¿allichu causashun? ¿Llaquicunatachu charishun?” nishpami yuyarina can. Maijanpish pai yuyashca shina decidijpica mana juzganachu canchij. Gálatas 6:5-pica: ‘Paicuna imata rurashcamantaca, cada cualmi chasquingacuna’ ninmi.

10. ¿Sucursalmanta huauquicunapish, ancianocunapish ima shinataj ñucanchijta ayudangacuna?

¹⁰ Diosta sirvichun jarcasha nijpipish ¿ima shinataj paita sirvishpa catishun? Sucursalmanta huauquicunami publicacioncunata ima shina chasquinataca ancianocunaman huillangacuna. Shinallataj tandanacuicunata ima shina ruranata, ima shina predicanatami huillangacuna. Pero, ¿sucursalmanta huauquicuna ancianocunahuan mana parlai tucujpica? Ancianocunaca Bibliahuan, publicacioncunahuanmi huauqui panicunata Diosta sirvishpa catichun ayudangacuna (Mateo 28:19, 20; Hechos 5:29; Hebreos 10:24, 25).

11. a) ¿Diosca paipi tucui shunguhuan crichunca ima shinataj ayudanga? b) ¿Publicacioncunata, Bibliata ama quichuchunca imatataj rurana canchij?

¹¹ Jehová Diosmanta yachashpa catichunca paillatajmi ñucanchijmanca tucuita cushpa ayudanga (Isaías 65:13, 14; Lucas 12:42-44). Chaimantami pushaj huauquicuna Diosta alli sirvichun ayudanata crina canchij. Pero ñucanchijpish Diosmanta yachashpa catingapaj imata ruranatami ricuna canchij. Por ejemplo, gobiernocuna Diosta sirvichun jarcasha nijpica Bibliata, publicacioncunatami maipi alli pacanata mashcana canchij. Shinallataj tabletpi o celularpi publicacioncunata charishpaca chaicunatapish mana tucuitachu aliripi saquina canchij. Chashnami contracunaca  publicacioncunata mana quichui tucungacuna.

12. ¿Tandanacuicunaman ricushcata ama pi cuenta japichun ancianocunaca imatataj rurangacuna?

¹² ¿Huauqui panicunahuan tandanacuchun gobiernocuna jarcajpica imatataj rurana canchij? Contracuna ñucanchijcuna maipi tandanacushcata ama yachachunmi ancianocunaca asha ashapura tandanacuchun tal vez mandangacuna. Shinallataj chꞌican chꞌican horascunapi, lugarcunapi tandanacuchunmi agllangacuna. Chai punllacunapi ñucanchijpish huauqui panicunata cuidangapajca ¿imatataj rurashun? Tandanacuicunaman chayacushpa, o tandanacuimanta llujshicushpapish allillachari parlana tucunga. Churanacunatapish tandanacuicunaman ricuj shinaca manachari churarishun.

13. ¿Unión Sovieticapi causaj huauqui panicunamantaca imatataj yachai tucunchij?

¹³ ¿Diosmanta huillachun gobiernocuna jarcajpica imatataj rurana canchij? Diosmanta huillanaca cada lugarcunapimi chꞌican chꞌican canga. Pero Jehová Diosta cꞌuyashcamanta, huillanatapish munashcamantami paimanta parlanataca manataj saquishun (Lucas 8:1; Hechos 4:29). Emily Baran huarmica Unión Sovieticapi sirvij testigo de Jehovacuna ima shina huillashcatami parlarca. Paica: “Testigocunata gobiernocuna huillachun jarcajpica paicunaca vecinocunahuan, trabajopi compañerocunahuan, amigocunahuanmi Diosmanta parlai callarircacuna. Chaita rurashcamantami paicunataca prezuman aparcacuna. Chashna jahuapish prezupi cajcunamanpish huillashpami catircacuna” nircami. Unión Sovieticapi causaj huauqui panicunaca Diosta sirvichun jarcajpipish huillanataca manataj saquircacunachu. Ñucanchijpish Diosmanta huillachun jarcajpica paicuna shinallatajmi huillashpa catina canchij.

14. Salmo 39:1-pi nishcataca ¿imamantataj pajtachina canchij?

¹⁴ Manaraj imatapish nishpa alli yuyarishunchij. Diosta sirvichun jarcacuj punllacunapica huaquinpica upallachari saquirina canga (Eclesiastés 3:7). Huauqui panicunapaj shuticunata, maipi tandanacucushcata, publicacioncunata ima shina chasquicushcata, ima shina huillacushcata autoridadcunamanca mana parlanachu canchij. Shinallataj vecinocunaman, ñucanchij llajtapi o shujtaj llajtapi causaj familiacunaman, amigocunamanpish imata mana ninachu canchij. Ñucanchij huauqui panicunamanta shujtajcunaman parlashpaca paicunapaj causaitami peligropi churashun (Salmo 39:1-ta liyipai).

15. ¿Diabloca huauqui panicunapura ima shina causachuntaj munan?

¹⁵ Huauqui panicunamanta amataj separarishunchij. Jesusca: ‘Shuj huasipi causajcunapish paicunapurallataj pꞌiñanacushpa  chaupirinacujpica, chai huasi familiaca chingaringallami’ nircami (Marcos 3:24, 25). Caita yachashpami Diabloca paihuan macanacunapaj randica, ñucanchijpurallataj pꞌiñanacushpa causachun munan. Paica huauqui panicunamanta chꞌicanyarichunca tucuitami rurasha nin.

16. ¿Pani Gertrudpaj ejemplomantaca imatataj yachanchij?

¹⁶ Diosta achca huatacunata alli sirvicushpapish mana cuidarishpaca Diablopaj trampacunapimi urmashun. Gertrud Poetzinger y Elfriede Löhr panicunapaj causaimanta ricushun. Cai ishqui panicunaca ungidacunami carca. Paicunaca Diosta sirvishcamantami shujtaj panicunahuan Alemania llajtapi achca huatacunata carcelpi carcacuna. Pani Elfriedeca caishuj panicunamanmi animaj discursocunata cuj carca. Pani Gertrudca chaita ricushpami envidiai callarirca. Tiempo huashaca pani Gertrudca pani Elfriedeta envidiashcamantami mana alli sintirirca. Chaimantami ama chashna sintiringapaj Jehová Diosta ayudahuai nishpa mañarca. Paica: “Shujtajcuna ñucanchijtapish yalli imatapish alli rurai tucujpica mana envidianachu canchij” nircami. ¿Ña mana envidiangapajca paica imatataj rurarca? Pani Elfriede Diosta alli sirvij cashcata, shujtajcunahuan alli apanacuj cashcatami pani Gertrudca ricui callarirca. Chashna rurashpami paihuanca cutin alli apanacurca. Cai ishqui panicunaca carcelmanta llujshingacamami llaquicunatapish ahuantarcacuna. Huañungacamami Jehová Diosta sirvishpa catircacuna. Ñucanchijcunapish huauqui panicunahuan alli apanacungapaj esforzarishpaca, paicunamantaca manataj separarishunchu (Colosenses 3:13, 14).

17. ¿Ñaupajman pushaj huauquicunataca imamantataj cazuna canchij?

¹⁷ Ñaupajman pushaj huauquicunata cazushunchij. Paicunata cazushpaca llaquicunapi mana urmashunchu (1 Pedro 5:5). Diosmanta huillachun jarcacuj llajtapi ima tucushcata ricushun. Pushaj huauquicunaca chai llajtapi causaj huauqui panicunataca, “huillacushpa revistacunata, tratadocunatapish ña mana saquinachu canguichij” nishpami huillarcacuna. Pero shuj precursorca pai yuyashcata rurasha nishpami mana cazurca. Paica shujtaj gentecunamanmi revistacunata saquirca. Chaita ricushpami policiacunaca precursor saquishca revistacunata tandai callarircacuna. Chai huashaca, imamanta chaita ruracushcata yachangapajmi policiacunaca precursortapish, shujtaj huauqui panicunatapish cayarcacuna. ¿Caimantaca imatataj yachanchij? Ñucanchijca tucuitami yachanchij nishpa yuyanapaj randica pushaj huauquicunatami siempre cazuna canchij. Chaita rurajpica  Jehová Diosmi bendicianga (Hebreos 13:7, 17).

18. ¿Huauqui panicunataca imamantataj “caitami chaitami ruranataj cangui” mana nina canchij?

¹⁸ Huauqui panicunata “caitami chaitami ruranataj cangui” ama nishunchij. Ancianocuna chaita rurajpica huauqui panicunapaj cazunaca sinchimi canga. Huauqui Juraj Kaminský shutica Checoslovaquia llajtapimi causarca. Chai llajtapica Diosta sirvichunca mana saquircacunachu. Paica: “Huaquin ancianocunata autoridadcuna prezuman apajpica, saquirij huauquicunaca paicuna munashca shinami huaquin leycunata churarcacuna. Paicunaca imata ruranata o imata mana ruranatapish shuj listata rurashpami churarcacuna” nircami. Jehová Diosca shujtajcunamanta decisionta agllachunca mana munanchu. Pushajcunaca paicuna munashca shina Diosta sirvichun mandashpaca, huauqui panicunamanca mana cꞌuyaita ricuchincunachu (2 Corintios 1:24).

19. 2 Crónicas 32:7, 8-pi nishca shinaca, ¿Diablo llaquichisha nijpipish imamantataj mana manchana canchij?

¹⁹ Pꞌiñaj Diabloca ñucanchijta catirashpami llaquichisha ninga (1 Pedro 5:8; Apocalipsis 2:10). Diablota apoyajcunapish Diosta sirvichunmi jarcasha ningacuna. Pero manchaita charishpapish Jehová Diosta sirvinataca manataj saquinachu canchij (Deuteronomio 7:21). Diosca paimanta huillachun gobiernocuna jarcajpipish cuidashpami catinga (2 Crónicas 32:7, 8-ta liyipai).

20. ¿Ñaupa tiempopi Jesusta catijcunapaj ejemplotaca ima shinataj catishun?

²⁰ Ñaupa tiempopi Jesusta catijcunapaj ejemplota catishunchij. Paicunaca chai punllacunapi causaj gobiernocunamanca: “Taita Diosta cazunapaj randica ¿cancunata cazunachu alli? Chaitaca cancunallataj Taita Diospaj ñaupajpi alli yuyarichij. Ñucanchij imallata ricushcata, uyashcata huillanataca mana saqui tucunchijchu” nircacunami (Hechos 4:19, 20).