1-2. а) Соске на сием изненадиме ако несави пхув забранинела амаре активностија? б) Со ка дикха ки акаја статија?

КО 2018 берш, повише таро 223.000 објавителија живинѓе ко пхувја коте со амаре активностија сине забраниме или ограничиме. Адава ни најхари на изненадинела амен. Сар со дикхлем ки англуни статија, о чачутне христијања џанена кај ка овен прогониме (2. Тим. 3:12). Бизи разлика коте живинаја, о властија шај таро јекх пути те забранинен амаре активностија.

² Ако случинела пе нешто асавко ко тхан коте со живинеа, шај пучеа тут: „Дали о прогонство значинела кај о Јехова нане задоволно амендар? Дали и забрана ка чхинавел амен те служина е Јеховаске? Дали те селинав ман ки јавер пхув коте со шај слободно те служинав е Јеховаске?“ Ки акаја статија ка дикха о одговорија таро акала пучиба. Освен адава, ка дикха сар шај понадари да те служина е Јеховаске кеда иси забрана, хем таро кола стапице ваљани те пазина амен.

3. Спрема 2. Коринќаните 11:23-27, саво прогонство доживинѓа о Павле хем со сикљоваја таро лескоро пример?

³ Ако о властија забранинена амаре активностија, шај ка мислина кај о Девел на поддржинела амен више. Ама, важно тано те на бистра кај адава со сием прогониме ни најхари на значинела кај о Јехова нане задоволно амендар. На пример, размислин башо апостол Павле. Јасно тано кај о Јехова сине задоволно лестар. Ле сине ле чест те пишинел 14 писмија кола со уле дело таро Христијанска  грчка списија, хем сине апостоли бичхалдо ко јавера народија. Ама, доживинѓа сурово прогонство. (Читин 2. Коринќаните 11:23-27.) Таро е Павлескоро пример сикљоваја кај о Јехова шај те дозволинел лескере верна слуге те овен прогониме.

4. Соске мрзинела амен о свето?

⁴ О Исус објаснинѓа соске ваљани те аџикера о јавера те противинен пе аменге. Ов вакерѓа кај о мануша ка мрзинен амен адалеске со на сием дело таро акава свето (Јован 15:18, 19). О прогонство на значинела кај нане амен е Јеховаскоро берекети, него сикавела кај постапинаја исправно.

5. Дали е манушен иси лен сила те чхинавен амен те служина е Јеховаске? Објаснин.

⁵ Е противникон нане лен сила те чхинавен амен те служина е Семоќно Девлеске, е Јеховаске. Бут џене пробинѓе, ама на успејнѓе. Размислин со случинѓа пе џикоте трајнела сине и Дујто светско војна. Ко адава време, е Девлескоро народо сине бут прогонимо таро властија ко бут пхувја. О активностија е Јеховаскере сведоконгере сине забраниме на само тари нацистичко партија ки Германија него исто аѓаар таро властија ки Австралија, Канада хем јавера пхувја. Ама, приметин со случинѓа пе. Ко 1939 берш, кеда почминѓа и војна, ко цело свето сине 72.475 објавителија. Ама ко 1945 берш, кеда завршинѓа и војна, сине 156.299 објавителија. Акава јасно сикавела кај о Јехова денѓа берекети пле народоске — о број таро објавителија барило повише таро дупло!

6. Кола позитивна резултатија шај те овен кеда иси прогонствија? Вакер пример.

⁶ Наместо те даравкерел амен, о прогонство шај те поттикнинел амен панда поодлучно те служина е Јеховаске. На пример, јекх брачно пари хем ленгоро тикно чхаво живинена ки пхув коте со о властија забранинѓе амаре активностија. Наместо те даран хем те керен похари ки служба башо Јехова, о брачно пари почминѓа е општо пионерско службаја. И пхен чак мукхља пли шукар платими бути баши служба, а о пхрал вакерела кај, адалеске со иси забрана, бут мануша мангена те џанен нешто повише башо е Јеховаскере сведокија. Адалеске, шај полокхесте те почминел библиска курсија е манушенцар. И забрана анѓа јавера да шукар резултатија. Јекх старешина тари исто пхув вакерѓа кај бут џене со на сине активна почминѓе палем те авен ко состанокија хем те џан ки служба.

7. а) Со сикљоваја тари 3. Мојсеева 26:36, 37? б) Со ка кере ако забранинена амаре активностија?

 ⁷ Кеда о душмања ка забранинен амаре активностија, ола надинена пе кај аѓаар ка даравен амен хем кај ка чхинава те служина е Јеховаске. Освен и забрана, ола шај те ширинен ховајба баши аменде, те бичхален службеникон те претресинен амаре кхера, те ингарен амен ко судо, па чак те пханден несавен амендар. Ола мислинена кај ка даравен амен адалеске со успејнѓе те чхивен некоборе џенен амендар ко затвор. Ако почминаја те дара лендар или таро адава со шај те керен аменге, шај те почмина коркори те чхива аменге „забрана“ ки амари служба башо Јехова. Ама, сигурно кај на мангаја те ова сар о мануша сој тане опишиме ки 3. Мојсеева 26:36, 37. (Читин.) Нане те дозволина и дар те тикњарел или те чхинавел амари служба башо Јехова. Амен иси амен целосно доверба ко Јехова хем на ваздаја паника (Иса. 28:16). Освен адава, понадари да молинаја е Јехова те дел амен водство. Адалеске со о Јехова тано тари амари страна, увериме сием кај чак ни и најсилно манушикани влада нашти те чхинавел амен понадари да верно те служина леске (Евр. 13:6).

8-9. а) Сави одлука ваљани те анел секова христијани баши песте или баши пли фамилија? б) Со ка поможинел аменге те ана мудро одлука?

⁸ Ако о властија забранинена амаре активностија ко тхан коте со живинеа, шај ка размислине дали те селине тут ки јавер пхув коте со ка шај слободно те служине е Јеховаске. Адаја тани одлука која со секој лично ваљани те анел ла. Англедер те одлучине со ка кере, шај ка манге те проучине башо адава сар постапинѓе о христијања таро прво веко кеда сине лен прогонство. Откеда о душмања мударѓе е Стефане баренцар, о ученикија таро Ерусалим почминѓе те селинен пе ки цело Јудеја хем Самарија, па чак џи ки Феникија, Кипар хем Антиохија (Мат. 10:23; Дела 8:1; 11:19). Тари јавер страна, шај те овел корисно исто аѓаар ако проучинеа башо адава со керѓа о апостол Павле кеда ки јекх јавер прилика сине прогонство. Иако лескоро живото сине ки опасност, ов одлучинѓа те ачховел ко тхана коте со о мануша противинена пе сине башо проповедибе. Адава керѓа адалеске со сине ле силно желба те проповединел о шукар хабери хем те поможинел е пхраленге кола со живинена сине ко дизја коте со сине баро прогонство (Дела 14:19-23).

⁹ Со сикљоваја таро акала примерија? Секова поглавари ки фамилија мора те одлучинел дали ов хем лескири фамилија ка селинен пе или на. Англедер те одлучинел, ов ваљани те молинел пе башо адава, шукар те размислинел башо околностија пле фамилијакере хем башо адава кола шај те овен о позитивна хем о негативна стране ако селинена пе. Баши акаја бути, секова христијани ваљани „те пхиравел пло товар“ (Гал. 6:5). На смејнаја те судина е јаверенге баши одлука со анена ла.

10. Саве упатствија ка ден и подружница хем о старешине?

¹⁰ Сар шај понадари да те служине е Јеховаске кеда иси забрана? И подружница ка дел е старешиненге таро тло собрание упатствија хем практична предлогија башо адава сар те добинен духовно храна, сар те икерен состанокија хем сар те проповединен о шукар хабери. Ако и подружница нашти контактиринела е старешиненцар, тегани о старешине ка поможинен туке хем сариненге таро собрание понадари да те служинен е Јеховаске. Ола ка ден упатствија кола со ка овен ко склад е Библијаја хем амаре публикациенцар (Мат. 28:19, 20; Дела 5:29; Евр. 10:24, 25).

11. Соске шај те ове уверимо кај секогаш ка овел тут духовно храна, хем сар шај те заштитине тли Библија хем о јавера публикацие?

 ¹¹ О Јехова денѓа лафи кај лескере слуген секогаш ка овел лен духовно храна (Иса. 65:13, 14; Лука 12:42-44). Адалеске, шај те ове уверимо кај лескири организација ка керел са со ваљани те шај те ачхове верно. Ама, со шај ту те кере? Ако амаре активностија сар Сведокија тане забраниме, аракх шукар тхан коте со ка шај те гараве тли Библија или о јавера публикацие со шај ка овен тут. Ола тане бут скапоцена хем адалеске бизи разлика дали тане ко печатимо или електронско облик, пазин никогаш ма те мукхе лен ко тхана коте со шај локхе те аракхен пе. Секова јекх амендар ваљани те керел са со шај те ачховел духовно зорало.

12. Сар шај о старешине те организиринен о состанокија ко начин со нане те привлечинен внимание?

¹² А сар ка овел амаре состаноконцар? О старешине ка организиринен о состанокија ко асавко начин те шај окола со противинена пе аменге те на приметинен кај кхедаја амен. Шај ка ден упатствија те кхеда амен ко потикне групе хем веројатно често ка менинен о време хем о тхан коте со ка икерен пе о состанокија. Ту да шај те поможине ко адава те пхраља те ове безбедна аѓаар со нане те кере галама кеда ка аве хем ка џа туке таро состанокија. Освен адава, шај ка ваљани те ураве шеја коленцар со нане те привлечине е јаверенгоро внимание.

13. Со шај те сикљова таро амаре пхраља таро пурано Советско Сојуз?

¹³ Адалеске со о околностија тари пхув ки пхув тане различна, шај ко несаве тхана ка шај послободно те проповедина, а ко јавера тхана шај ка ваљани повише те пазина. Ама, било сар те овел, амен ка аракха начин те проповедина адалеске со мангаја е Јехова хем мангаја те вакера е јаверенге башо лескоро Царство (Лука 8:1; Дела 4:29). Башо проповедибе е Јеховаскере сведоконгоро ко пурано Советско Сојуз, и историчарка Емили Беран вакерѓа: „Кеда о властија забранинѓе е Јеховаскере сведоконге те проповединен пли вера, ола почминѓе те керен лафи пле комшиенцар, колегенцар хем амаленцар. Кеда башо адава сине ингарде ко работничка логорија, ола почминѓе те проповединен е јавере затворениконге“. Иако амаре активностија сине забраниме, амаре пхраља таро пурано Советско Сојуз на чхинавѓе те проповединен. Ако некогаш забранинена пе амаре активностија ко тхан коте со живинеа ту, ов решимо те џа пало шукар пример акале пхраленгоро!

14. Спрема Псалм 39:1, ко со ваљани те пазина?

¹⁴ Пазин саве информацие вакереа. Џикоте трајнела и забрана, ваљани те проценина кеда тано „време те трајнел пе“ (Проп. 3:7). На смејнаја те открина важна информацие, сар на пример о анава амаре  пхраленгере хем пхењенгере, о тхана коте со кхедаја амен, о начин сар кераја амари служба хем сар добинаја духовно храна. Асавке буќа нане те вакера лен е световна властенге, несаве амаленге со иси лен шукар намера или амаре фамилијаке, бизи разлика дали живинена аменцар ки исто пхув или јавертхе. Ако на пазинаја ки акаја стапица шај те ана ки опасност амаре пхрален. (Читин Псалм 39:1.)

15. Со трудинела пе о Сатана те керел, хем сар шај те избегина адаја стапица?

¹⁵ Ма мукх тикне проблемија те керен поделбе. О Сатана џанела кај „јекх кхер нане те ачховел заедно ако о мануша сој ки лесте марена пе машкар песте“ (Мар. 3:24, 25). Ов стално ка трудинел пе те керел поделбе машкар аменде. Ов надинела пе кај ка почмина те борина амен машкар аменде наместо те борина амен против лесте.

16. Саво шукар пример мукхља аменге и пхен Гертруд Пецингер?

¹⁶ Чак о зрела христијања мора те пазинен те на перен ки адаја стапица. Те дикха о пример е дује пхењенгоро кола со сине помазиме, и Гертруд Пецингер хем и Елфриде Лер. Ола сине пханле ко нацистичко концентрационо логори заедно јавере пхењенцар. И Гертруд ули љубоморно адалеске со и Елфриде икерела сине охрабрувачка говорија е јавере пхењенге ко логори. Покасно, и Гертруд лаџандили башо адава хем таро вило молинѓа е Јехова те поможинел лаке. Ој пишинѓа: „Мора те сикљова те прифатина кеда дикхаја кај о јавера тане пошукар амендар ко нешто или добинена повише одговорностија“. Сар успејнѓа те боринел пе е љубомораја? И Гертруд концентриринѓа пе ко шуже особине со сине е Елфрида хем ко лакоро шукар карактер. Аѓаар, ој палем сине ко шукар односија е Елфридаја. О солдуј џене преживинѓе ко концентрационо логори хем ачхиле верна е Јеховаске са џи ко крајо таро пло живото ки Пхув. Ако трудинаја амен те накхава о проблемија хем о разлике машкар аменде хем амаре пхраља хем пхења, нане те мукха те авел џи ко поделбе (Кол. 3:13, 14).

17. Соске ваљани секогаш те икера амен ко упатствија со дела е Јеховаскири организација?

¹⁷ Секогаш икер тут ко упатствија. Ка избегина бут проблемија ако икераја амен ко упатствија со добинаја лен таро одговорна пхраља (1. Пет. 5:5). На пример, ки јекх пхув коте со амаре активностија тане забраниме, о одговорна пхраља денѓе упатство кај о објавителија на ваљани те мукхен литература е манушенге ки служба. Ама, јекх пионери постапинѓа јавер чхане. Саво сине о резултати? Кратко откеда ов хем јавера објавителија сведочинѓе неформално, сине испрашиме тари полиција. Несаве службеникија пратинѓе лен хем аракхле и литература со денѓе е манушенге. Со сикљоваја таро акава?  Ваљани те икера амен ко упатствија чак ако мислинаја кај амен џанаја пошукар. О Јехова секогаш тано бахтало кеда соработинаја е пхраленцар колен со чхивѓа те предводинен (Евр. 13:7, 17).

18. Соске на ваљани те чхива непотребна правилија?

¹⁸ Ма чхив непотребна правилија. Ако о старешине чхивена пле правилија, ка керен бут попхаро те овел е јаверенге. О пхрал Јурај Камински вакерѓа со случинѓа пе џикоте трајнела сине и забрана ки пурани Чехословачка: „Откеда бут старешине сине пханле, несаве таро јавера пхраља со предводинена сине ко собранија хем ко покраине почминѓе те чхивен е објавителенге правилија башо адава сар ваљани те понашинен пе хем со ваљани те керен, а со на“. Кеда керела пе лафи башо лична буќа, о Јехова на денѓа амен право те ана одлуке е јаверенге ко тхан. Некој со чхивела непотребна правилија на заштитинела пле пхрален, него пробинела те овел господари ленгере веракоро (2. Кор. 1:24).

19. Спрема 2. Летописи 32:7, 8, соске шај те ова храбра бизи разлика со ка керел о Сатана?

¹⁹ Амаро најбаро душмани о Сатана нане те чхинавел те прогонинел е Јеховаскере верна слуген (1. Пет. 5:8; Отк. 2:10). О Сатана хем окола сој тане тари лескири страна ка пробинен те чхинавен амен те служина е Јеховаске. Ама, чак те дара, амен понадари да ка служина е Јеховаске (5. Мој. 7:21). О Јехова тано секогаш аменцар хем понадари да ка поддржинел амен чак ако амаре активностија тане забраниме. (Читин 2. Летописи 32:7, 8.)

20. Со сиан одлучно те кере?

²⁰ Кеда сине англо членија таро Судско совет, амаре пхраља таро прво веко вакерѓе ленге: „Судинен коркори дали тано праведно англо Девел те шуна тумен, а на е Девле! Амен нашти те на кера лафи башо адава со дикхлем хем шунѓем“ (Дела 4:19, 20). Амен да те ова одлучна исто сар ленде.