1-2. (a) Thangwi yanji nee tisafunika kudzudzumika basa yathu ingakhondeswa? (b) Tinapfundzanji mu nsolo uno?

MU CAKA 2018, amwazi mphangwa akupiringana 223.000 akakhala m’madziko akuti basa yathu ikhakhondeswa peno kutcingwa kakamwe. Pyenepi nee ndi pyakudzumatirisa. Ninga tapfundza mu nsolo udamala, Akristu andimomwene asadziwa kuti anadzatcingwa. (2 Tim. 3:12) Mwakukhonda tsalakana kunakhala ife, mautongi anakwanisa kutikhondesa kulambira Mulungu wathu waufuni, Yahova, mu ndzidzi wakuti nee tisaudikhira.

² Khala kunakhala imwe utongi usakhondesa kulambira Yahova, panango munacitika mibvundzo ninga iyi: ‘Kodi kutcingwa kweneku kusabveka kuti ife taluza nkhombo za Mulungu? Kutcingwa kweneku kunaticitisa kusiya kutumikira Yahova? Kodi ndisafunika kufuluka toera kuenda ku dziko yakuti ndinakwanisa kulambira Mulungu mwaufulu?’ Mu nsolo uno, tinaona matawiro a mibvundzo ineyi. Tinaonambo kuti tinapitiriza tani kutumikira Yahova basa yathu ingakhondeswa, pontho ndi misampha ipi inafunika ife kucalira.

3. Mwakubverana na 2 Akorinto 11:23-27, ndi nyatwa zipi zidathimbana na mpostolo Paulu maseze akhali ntumiki wakukhulupirika, pontho tisapfundzanji na citsandzo cace?

³ Utongi ungatikhondesa kulambira Yahova, panango tinanyerezera kuti Mulungu nee asakomerwa na ife. Mbwenye kumbukani kuti kutcingwa nee kusabveka kuti Yahova nkhabe komerwa na ife. Onani citsandzo ca mpostolo Paulu. Mwandimomwene  Mulungu akhakomerwa na iye. Iye akhala na mwai wakulemba matsamba 14 a Malemba Acigerego Acikristu, pontho akhali mpostolo adatumwa kuna anthu a madzindza anango. Ngakhale tenepo, iye atcingwa kakamwe. (Lerini 2 Akorinto 11:23-27.) Pidacitikira mpostolo Paulu pisatipfundzisa kuti Yahova anakwanisa kutawirisa atumiki ace akukhulupirika kutcingwa.

4. Thangwi yanji ife tisaidiwa na dziko?

⁴ Yezu afokotoza kuti thangwi yanji ife tisadikhira kutcingwa. Iye alonga kuti ife tinadzatcingwa thangwi nee tisacita khundu ya dziko. (Juw. 15:18, 19) Kutcingwa nee kusapangiza kuti ife taluza nkhombo za Yahova. Mbwenye kusapangiza kuti tikucita pinthu pyadidi!

5. Kodi anthu anakwanisa kumalisa ulambiri wa Yahova? Fokotozani.

⁵ Anthu nkhabe mphambvu zakumalisa ulambiri wa Mulungu wamphambvu zonsene, Yahova. Azinji ayesera, mbwenye acimwana. Onani pidacitika mu ndzidzi wa Nkhondo Yaciwiri Ya Dziko Yonsene Yapantsi. Mu ndzidzi unoyu, mautongi a m’madziko mazinji akhatcinga kakamwe atumiki a Mulungu. Basa ya Mboni za Yahova nee ikhakhondeswa basi ene na nsoka wa Nazi ku Alemanya, mbwenye ikhakhondeswambo na mautongi a ku Australya, Kanadha na madziko anango. Mbwenye onani pidacitika. Pidatoma nkhondo mu caka 1939, pa dziko yonsene pakhali na amwazi mphangwa akukwana 72.475. Mbwenye pidamala nkhondo mu caka 1945, lipoti yapangiza kuti pa dziko yonsene pakhali na amwazi mphangwa akukwana 156.299. Na nkhombo za Yahova, numero ya amwazi mphangwa yathimizirika kakamwe.

6. M’mbuto mwa kutigopesa, kutcingwa kunatikulumiza toera kucitanji? Perekani citsandzo.

⁶ M’mbuto mwa kutigopesa, kutcingwa kunatikulumiza toera kutumikira Yahova mwakukwana. Onani citsandzo ca banja ibodzi yakuti ikhali na mwana wang’ono. Iyo ikakhala mu dziko yakuti utongi ukhakhondesa basa yathu. M’mbuto mwakugopa, banja ineyi yatoma kutumikira ninga apainiya a ndzidzi onsene. Nkazi asiya basa yakuti ikhalipa kobiri izinji. Mamuna alonga kuti kutcingwa kukhacitisa anthu kucita mibvundzo mizinji thangwi ya Mboni za Yahova. Natenepa pikhali pyakukhonda nentsa kwa iye kutomesa mapfundziro a Bhibhlya. Kutcingwa kunakwanisambo kubweresa maphindu munjira zinango. Nkulu wa mpingo wa dziko  ibodzi ene alonga kuti azinji akhadasiya kutumikira Yahova atoma pontho kugumanika pa misonkhano na kumwaza mphangwa.

7. (a) Kodi tisapfundzanji kubulukira mu lemba ya Levitiko 26:36, 37? (b) Munacitanji mungakhondeswa kulambira Yahova?

⁷ Anyamalwa athu angatikhondesa kulambira, iwo asafuna kutigopesa toera tisiye kutumikira Yahova. Kusiyapo pyenepi, panango iwo anamwaza uthambi thangwi ya ife, kutuma apolixa toera kudzafufudza n’nyumba zathu, kutiendesa ku thando yakutongera miseru, ngakhale kuikha nkaidi anango a ife. Iwo asanyerezera kuti anakwanisa kutigopesa angafungira abale athu nkaidi. Ife tingaagopa thangwi ya pinacita iwo kuna ife, tinatoma kubwerera nduli, ngakhale kusiya kutumikira Yahova. Ife nee tisafuna kukhala ninga ale analongwa pa Levitiko 26:36, 37. (Lerini.) Ife nee tinatawirisa kuti kugopa kuticitise kubwerera nduli, peno kusiya kutumikira Yahova. Ife tisanyindira Yahova mwakukwana, mbatikhonda kudzudzumika. (Iza. 28:16) Ndzidzi onsene tisafunika kuphemba kuna Yahova na kusaka citsogolero cace. Thangwi tisadziwa kuti na ciphedzo ca Mulungu, utongi wa anthu nkhabe kwanisa kuticimwanisa kutumikira Mulungu wathu mwakukhulupirika.—Aheb. 13:6.

8-9. (a) Ndi cisankhulo cipi cakuti nsolo wa banja usafunika kucicita kuna iye na kuna banjace? (b) Ninji pinafuna kuphedza munthu toera kucita cisankhulo cadidi?

⁸ Utongi ungakukhondesani kulambira, panango munanyerezera kufuluka toera kuenda kakhala ku dziko yakuti munakwanisa kutumikira Yahova mwaufulu. Ceneci ndi cisankhulo ca munthu paekha. Anango asaona kuti mbadzati kucita cisankhulo, mphyadidi kupfundza pidacita Akristu a mu ndzidzi wa apostolo pikhatcingwa iwo. Pidamala anyamalwa kupha Estevau na miyala, anyakupfundza afuluka mbaenda ku Yudeya na Samariya, ngakhale kupisa pyakutali ninga Fenisya, Xipre na Antyokiya. (Mat. 10:23; Mabasa 8:1; 11:19) Mbwenye Bhibhlya isalongambo kuti ndzidzi unango udatcingwa Akristu a mu ndzidzi wa apostolo, mpostolo Paulu apitiriza kukhala m’mbuto zenezi zikhatcingwa basa yakumwaza mphangwa. Iye aikha umaso wace pangozwi toera kumwaza mphangwa na kuwangisa abale akakhala m’mizinda yakuti basa yakumwaza mphangwa ikhatcingwa kakamwe.—Mabasa 14:19-23.

⁹ Tisapfundzanji na pinthu pyenepi? Misolo ya banja isafunika kucita cisankhulo khala asafunika kufuluka peno nkhabe. Mbadzati kucita cisankhulo, asafunika kucita phembero na kunyerezera mwadidi makhaliro a banjace, pontho asafunika kuona kuti pyenepi pinakhuya tani banjace. Pa nkhani ineyi, Nkristu onsene asafunika ‘kuthukula ntolo wace.’ (Agal. 6:5) Ife nee tisafunika kutonga anango thangwi ya pisankhulo pinacita iwo.

10. Ndi pitsogolero pipi pinafuna kudzapereka bheteli na akulu a mpingo?

¹⁰ Munakwanisa tani kupitiriza kulambira Yahova mungatcingwa? Bheteli inadzapereka pitsogolero kuna akulu a mpingo na maonero akufunika akuti anakwanisa tani kutambira cakudya cauzimu, kusonkhana na kumwaza mphangwa zadidi. Bheteli ingacimwana kupita ncibverano na akulu a mpingo, akulu a mpingo anaphedza imwe na abale onsene mu mpingo toera kupitiriza kulambira Yahova. Iwo anadzapereka pitsogolero mwakubverana na pitsogolero pinagumanika m’Bhibhlya na m’mabukhu athu.—Mat. 28:19, 20; Mabasa 5:29; Aheb. 10:24, 25.

11. Thangwi yanji munakwanisa kukhala na cinyindiro cakuti nee munadzasowa cakudya cauzimu, pontho musafunika kucitanji toera kutsidzikiza Bhibhlya yanu na mabukhu anu?

 ¹¹ Yahova apikira kuti atumiki ace nee anadzasowa cakudya cauzimu. (Iza. 65:13, 14; Luka 12:42-44) Natenepa, khalani na cinyindiro cakuti gulu yace inadzacita pyonsene toera kukupasani cakudya cauzimu toera mupitirize kukhala akukhulupirika. Mbwenye pana cinthu cinango cakuti munakwanisa kucicita. Mungatcingwa, sakani mbuto yadidi toera kubisa Bhibhlya yanu na mabukhu anango ali na imwe. Citani mphole-mphole toera mukhonde kusiya pinthu pyenepi pyakufunika pa mbuto yakuti pinaoniwa mwakucimbiza. M’bodzi na m’bodzi wa ife asafunika kuwangisira toera apitirize kukhala wakuwanga mwauzimu.

12. Akulu a mpingo anacita tani masasanyiro toera misonkhano ikhonde kudzindikirwa na anyamalwa athu?

¹² Ndiye tani pya misonkhano ya pakati pasumana? Akulu a mpingo anadzacita masasanyiro toera mukwanise kusonkhana anyamalwa athu mbakhonda kupidziwa. Panango iwo anakupangani toera musonkhane m’misoka ming’ono, pontho kazinji kene iwo anadzacinja ndzidzi wa misonkhano na mbuto. Toera kutsidzikiza abale anu, nee musafunika kulonga mwakugaluza mungafika peno mungakotoka misonkhano. Pontho musafunika kubvala nguwo zakuti nee zinapangiza kuti muli kuenda kumisonkhano.

13. Kodi pinthu pidacitika kuna abale ku União Soviética, pisatipfundzisanji?

¹³ Ndiye tani pya basa yakumwaza mphangwa? Makhaliro anadzacinja mwakubverana na mbuto. Nakuti ife tisafuna Yahova, pontho tisakomerwa kupanga anango pya Umambo wace, tinadzasaka njira toera kumwaza mphangwa. (Luka 8:1; Mabasa 4:29) Mukulonga pya basa yakumwaza mphangwa ya Mboni za Yahova ku União Soviética, nyakulemba mbiri Emily B. Baran alonga: “Pidalonga utongi kuti Mboni za Yahova nee zisafunikabve kumwaza mphangwa, iwo atoma kulonga pinakhulupira iwo kuna andzawo apacisa, akubasa na axamwali awo. Pidaendeswa Mboni zenezi ku mazunde ninga mabitcu, zatoma kulonga pinakhulupira iwo kuna anyakaidi andzawo.” Mwakukhonda tsalakana kukhondeswa, abale athu ku União Soviética nee asiya kumwaza mphangwa. Khala basa yakumwaza mphangwa isakhondeswa kunakhala imwe, munakwanisa kutowezera citsandzo ca abale anewa!

14. Mwakubverana na Masalmo 39:1, ndi cinthu cipi cinafunika ife kucalira?

¹⁴ Citani mphole-mphole na pinthu pinafuna kulonga imwe. Mu ndzidzi wakutcingwa, tisafunika kudzindikira kuti pana “ndzidzi wakumatama.” (Koel. 3:7) Ife nee tisafunika kulonga mphangwa zinango, ninga madzina a abale na alongo athu, mbuto zinasonkhana ife, tisamwaza tani mphangwa na tisatambira tani mabukhu  athu. Ife nkhabe funika kulonga pyenepi kuna atongi, axamwali peno acibale anakhala n’dziko yathu peno m’madziko anango. Tingakhonda kucita pyenepi, tinadzaikha pangozwi abale athu.—Lerini Masalmo 39:1.

15. Kodi Sathani anadzayesera kucitanji na ife, pontho tisafunika kucitanji?

¹⁵ Nee tisafunika kutawirisa kuti pinthu ping’ono piticitise kukhala akugawana. Sathani asadziwa kuti nyumba yakugawika isafudzika. (Marko 3:24, 25) Iye anadzayesera kucita pyonsene toera tikhale akugawana. Thangwi iye asafuna kuti tithimbane unango na ndzace, m’mbuto mwakuthimbana na iye.

16. Tisapfundzanji kubulukira mu citsandzo ca Mulongo Gertrud Poetzinger?

¹⁶ Ngakhale Akristu akukola asafunika kucita mphole-mphole toera akhonde kugwa mu nsampha unoyu. Onani citsandzo ca alongo awiri akudzodzwa, Gertrud Poetzinger na Elfriede Löhr. Iwo akhadafungirwa nkaidi pabodzi na alongo anango ku mazunde a Nazi. Gertrud akhala na bibvu mu ndzidzi ukhacita Elfriede nkhani toera kuwangisa alongo anango akhali na iwo nkaidi. Mukupita kwa ndzidzi, Gertrud adzakhala na manyadzo thangwi ya pyenepi mbadembetera Yahova toera am’phedze. Iye alemba: “Ife tisafunika kupfundza kutawira anango angakhala na maluso mazinji peno mabasa mazinji kupiringana ife.” Kodi iye akwanisa tani kumalisa bibvu? Gertrud akhaikha manyerezero ku makhaliro adidi a Elfriede na nkhaliro wace wauxamwali. Natenepa, iye adzakhala pontho na uxamwali wadidi na Elfriede. Uwiri wawo adzabuluswa nkaidi ku mazunde mbatumikira Yahova mwakukhulupirika mpaka kumalisa umaso wawo pa dziko yapantsi. Tingawangisira toera kumalisa kukhonda bverana na abale athu, pinatiphedza toera kukhala akuphatana.—Akol. 3:13, 14.

17. Thangwi yanji tisafunika kubvera pitsogolero?

¹⁷ Bverani pitsogolero. Tingabvera pitsogolero pinatambira ife kubulukira ku bheteli peno kuna akulu a mpingo, tinadzacalira nyatwa zizinji. (1 Ped. 5:5) Mwacitsandzo, m’madziko akuti basa yathu isakhondeswa, abale anatsogolera akhapanga abale na alongo toera akhonde kugawira mabukhu akudhindwa pakumwaza mphangwa. Mbwenye m’bale unango akhatumikira ninga mpainiya akhonda kubvera pitsogolero pyenepi, mbapitiriza kugawira mabukhu. Ninji pidacitika? Ntsiku inango, pidamala iye kupereka umboni wantsusukano na abale anango, iwo acitwa mibvundzo na apolixa. Pisaoneka kuti apolixa anewa akhatowera abale mu ndzidzi ukhamwaza iwo mphangwa mbakwanisa kukwata mabukhu akhagawira iwo. Tisapfundzanji na citsandzo ceneci? Tisafunika kubvera pitsogolero pinatambira ife, maseze nee tisakomerwa napyo. Ndzidzi onsene Yahova anatipasa nkhombo  tingabvera abale adakhazikisa iye toera kutitsogolera.—Aheb. 13:7, 17.

18. Thangwi yanji tisafunika kucalira kukhazikisa mitemo yakusowa basa?

¹⁸ Lekani kukhazikisa mitemo yakusowa basa. Akulu a mpingo angakhazikisa mitemo yakusowa basa, pinakhala pyakunentsa kuna abale toera kubvera. M’bale Juraj Kaminský asakumbuka pidacitika mu ndzidzi ukhakhondeswa basa yathu ku Tchecoslováquia: “Pidamala kufungirwa nkaidi akulu a mpingo azinji, anango mwa ale akhatsogolera mipingo na pisa atoma kukhazikisa mitemo yawo kuna amwazi mphangwa thangwi ya pinthu pikhafunika iwo kucita na pikhafunika iwo kucalira.” Yahova nee atipasa cidzo cakucitira pisankhulo abale athu. Ule anakhazikisa mitemo yakusowa basa nee asatsidzikiza abale ace, thangwi asayesera kutonga cikhulupiro ca abale ace.—2 Akor. 1:24.

19. Mwakubverana na 2 Pya dziko ya Israele 32:7, 8, thangwi yanji tisafunika kukhala acipapo mwakukhonda tsalakana pinacita Sathani?

¹⁹ Nyamalwa wathu wankulu, Sathani Dyabo, nee anasiya kutcinga atumiki akukhulupirika a Yahova. (1 Ped. 5:8; Apok. 2:10) Sathani na ale anam’phedzera anapitiriza kuyesera kutikhondesa kulambira Yahova. Mbwenye nee tisafunika kutawirisa kuti kugopa kuticimwanise kutumikira Yahova. (Deut. 7:21) Yahova ali kukhundu yathu, pontho iye anapitiriza kutiphedza maseze basa yathu ikhondeswe.—Lerini 2 Pya dziko ya Israele 32:7, 8.

20. Kodi muli wakutonga toera kucitanji?

²⁰ Natenepa, tonsene tisafunika kukhala akutonga ninga pidacita abale a mu ndzidzi wa apostolo, pidapanga iwo mautongi kuti: “Longani ndimwe khala mphyakuthema pamaso pa Mulungu kubvera imwe mbatikhonda kubvera Mulungu. Mbwenye ife nee tinasiya kulonga pinthu pidaona ife na pidabva ife.”—Mabasa 4:19, 20.