1-2. (a) Gashshaano loosonke agabburo tini dhagge ikkitannonkekkihu mayiraati? (b) Konni birxichira maa xiinxallineemmo?

AYYAANAAMITTETE loosonke agamboonni woy woˈmunni woˈma hoolloonni gobbuwara heedhannoti halashshaanote kiiro 2018nni 223,000 saˈanno. Tini dhagge diˈˈikkitannonke. Sai birxichira ronsummonte gede, addu Kiristaanira dartu iillannonsati egennantinote. (2 Xim. 3:12) Heeˈneemmowi ikkiwanno ikkiro, gashshaano baxillaancho Maganonke Yihowa magansiˈneemmokki gede hedeweelcho agabbankera dandiitanno.

² Heeˈnoommo gobba gashshooti loosonke agambanni gede murinoha ikkiro, togo yine hendeemmoha ikkara dandaanno: ‘Dartu iillinonkehu Yihowa dadillinsoommo daafiraatini? Gashshaano loosonke agawansa Yihowa magansiˈneemmota hooltannonke? Magano faajjetenni magansiˈrate loosonke agamboonnikki gobba haˈra hasiissannoe?’ Konni birxichira, kuri xaˈmuwara dawaro afiˈneemmo. Qoleno gashshaano loosonke agabbanno woyite Yihowa magansiˈra agura hoogate assa hasiissannonkerenna hasiissannonkekkire ronseemmo.

3. Layinki Qorontoosi 11:23-27 kultanno garinni, ammanamino soqqamaasinchi Phaawuloosira iillinosi darti maati?

³ Gashshaano loosonke agabburo, Magano hagiirsiisa hoongoommo yine hendeemmoha ikkara dandaanno; hatto yee heda kayinni soˈrote. Dartu iillannonkehu Yihowa dadillinsoommo daafira diˈˈikkino. Hanni soqqamaasinchu Phaawuloosi lawishsha hedi. Isi Magano hagiirsiissinoti huluullissannota  diˈˈikkitino. Phaawuloosi Giriikete Afiite Qullaawa Borro giddo 14 sokka borreessate qoosso afiˈrino; qoleno isi dagate soqqamaanchooti. Ikkirono isira buutote darti iillinosi. (2 Qorontoosi 11:23-27 nabbawi.) Phaawuloosi lawishshinni, Yihowa ammanantino soqqamaasinesira dartu iillannonsa gede fajjanno woyiti noota ronseemmo.

4. Alame gibbannonkehu mayiraati?

⁴ Yesuusi dartu iillannonkehu mayiraatiro xawisino. Isi alamete wido ikkinoommokki daafira, gimbanninketa coyiˈrino. (Yoh. 15:18, 19) Dartu iillannonkehu Yihowa atoote hoongoommo daafira diˈˈikkino. Hatteentenni, tini gara ikkino coye assinanni heeˈnoommota leellishshanno.

5. Mannu ooso Yihowa magansiˈneemmota hooltankera dandiitanno? Xawisi.

⁵ Mannu ooso Woˈmanka Dandaanno Magano Yihowa magansiˈneemmota hooltankera didandiitanno. Batinyu manni hatto assate woˈnaalinoha ikkirono diqiniinonsa. Hanni Layinkihu Alamete Oli yannara ikkinore hedi. Hatte yannara batinye gobbara gashshaano Maganu manna baasa xiibbino. Yihowa Farciˈraasine looso agawinohu Jarmanete gobbahu Naazi gashshoote calla diˈˈikkino; Awustiraaliyu, Kanaadunna wole gobbuwa gashshootino hatto assino. Hatte yannara mayi ikkiyya? Olu 1939nni hanafi yannara, alamete doyichora noo halashshaano 72,475 ikkitanno. Ikkollana 1945nni olu uurri yannara, halashshaanote kiiro 156,299 ikkitino; tini Yihowa mannasi maassiˈrinota leellishshanno. Halashshaanote kiiro erote aleenni lexxitino!

6. Dartu hiikkonne dancha guma abbara dandaanno? Lawishsha kuli.

⁶ Dartu waajjine qece yineemmo gede diassannonke; hatteentenni albinni roore Yihowara woˈma giddonni soqqammeemmo gede assankera dandaanno. Hanni gashshaano loosonke agabbino gobbara heeˈrinori mitto qaaqqo afiˈrino minaanninna minaama lawishsha laˈno. Kuri minaanninna minaama waajje badhera higa agure, woˈma yanna suwisaano ikke soqqama hanafino. Minaama isinni woˈma yanna suwisaancho ikke soqqamate yite lowo damooza baantannise looso facci assite agurtino. Minaanni, gashshaano loosonke hooltuta batinyu manni Yihowa Farciˈraasine daafira afa hasiˈrinota coyiˈrino. Tini manna Qullaawu  Maxaafi xiinxallo hanafisiisanno gede kaaˈlitinosi. Qoleno gashshaano loosonke agawansa woleno dancha guma abbitino. Mittu hattee gobbankura heeˈranno cimeessi, batinyu Yihowara soqqama agurino roduuwi wirro gambooshshe daanna sabbaka hanafinota coyiˈrino.

7. (a) Leewaawoota 26:36, 37 maa ronseemmo? (b) Gashshaano loosonke agabbanno woyite maa assatto?

⁷ Diinnanke loosonke agabbannohu, waajjine Yihowa magansiˈra agurreemmoha laweennansaati. Tenneno agurranna, insa ninke daafira totao naqqara, minenke qorqorranni gede assitara, yoote minira massitankera, wole agurina usursiissankera nafa dandiitanno. Hasattonsa mereerinkenni boode manna usurte ninke waajjine huxiˈneemmo gede assate. Tini manse qece yineemmo gede assitankera wodhinummoro, Yihowara soqqama agurrammora dandiineemmo. Leewaawoota 26:36, 37te kulloonni manni gede ikka dihasiˈneemmo. (Qummeeshsha nabbawi.) Waajjine ayyaanaamittete loosinkera diinaggaawa woy woˈmunni woˈma loosa diagurreemmo. Woˈmunni woˈma Yihowa addaxxineemmo, hattono waajjine dihuxiˈneemmo. (Isa. 28:16) Biddishsha aannonke gede Yihowa huucciˈneemmo. Yihowa ledonke noo daafira, lowo wolqa afidhino gashshaano nafa isira ammanamme soqqammeemmokki gede assitankera didandiitanno.—Ibi. 13:6.

8-9. (a) Mittu mittunku maatete umi woy mittu mittunku manchi maa doodha hasiissannosi? (b) Loosonke agambanni woyite wole gobba haˈra woy haˈra hooga lainohunni dancha doorsha doodhate mayi kaaˈlannonke?

⁸ Heeˈratto gobba gashshooti loosonke agawanno woyite, ‘Yihowara faajjetenni soqqamate wole gobba haˈronso hiikko?’ yite hedattoha ikkara dandaanno. Kuni ate doorsha ikkino daafira, ayi manchino haˈri woy hadhooti yaahera didandaanno. Mitootu umi xibbi diro heeˈrino Kiristaani dartu iillinsa yannara assinore xiinxallansa kaaˈlitinonsa. Diinna Isxifaanoosi shitu gedensaanni, Yerusaalamete heedhanno rosaano Yihudanna Samaariya, hattono Finqe, Qophiroosinna Antsookiya hadhino. (Mat. 10:23; Soq. 8:1; 11:19) Ikkollana umi xibbi diri Kiristaanira wole yannara dartu iillinsa woyite, soqqamaasinchu Phaawuloosi hakko qooxeessinni agure dihaˈrino. Isi shinasira nafa dandiinannita afinoha ikkirono, dancha duduwo duduwatenna buutote darti iillinonsa roduuwa jawaachishate yee hakko keeshshino.—Soq. 14:19-23.

⁹ Tenne xaggenni maa ronseemmo? Mittu mittunku maatete umi, wole gobba haˈratenna haˈra hoogate daafira mura hasiissannosi. Hatto assara albaanni, maatesi noo garanna wole gobba haˈransa kaaˈlitansara woy gawajjitansara dandiitannohu hiittoonniitiro huuccatto assiˈre seekke heda hasiissannosi. Tenne hajo lainohunni mittu mittunku Kiristaanchi “umisi duha duqqa hasiissannosi.” (Gal. 6:5) Togoo woyite mannu doodhireno doodhiro, bushiisha dihasiissannonke.

10. Sinu biironna cimeeyye songote mayi biddishsha uyitanno?

¹⁰ Gashshaano loosonke agabbanno woyite, Yihowa magansiˈra agurreemmokki gede mayi kaaˈlannonke? Sinu biiro songote cimeeyyera ayyaanaamittete sagale afiˈnanni gara, gambooshshe assiˈra dandiinanni garanna dancha duduwo duduwa dandiinanni gara kulanno biddishsha uyitanno. Sinu biiro cimeeyyete ledo xaada hoogguro, cimeeyye atino ikko baalanti songote miilla Yihowa magansiˈra dandiitinanni gede kaaˈlitannoˈne. Insa Qullaawu Maxaafinna Kiristaanu borro aana xintamino  biddishsha uyitanno.—Mat. 28:19, 20; Soq. 5:29; Ibi. 10:24, 25.

11. Ayyaanaamittete sagale hoogattokkita addaxxa dandaattohu mayiraati? Qullaawa Maxaafanna Kiristaanu borronke agadhate maa assa dandiineemmo?

¹¹ Yihowa soqqamaasinesira ammanansa kaajjishshannota ayyaanaamittete sagale aannota kule qaale eino. (Isa. 65:13, 14; Luq. 12:42-44) Hakko daafira, Yihowa dirijjite hasiissannonketa ayyaanaamittete jawaante uyitannonketa addaxxa dandiineemmo. Ikkina ati maa assa dandaatto? Loosonke agambanni woyite, Qullaawa Maxaafakkinna wole ayyaanaamittete sagale maaxiˈrattoha dancha bayicho xaanni hedi. Attammoonnitano ikko elekitiroonikisetenni qixxeessinoonnita ayyaanaamittete sagale hawa gede assite wodhitooti! Ayyaanaamittetenni jawaate heeˈrate, mittu mittunku dandiinummore assa hasiissannonke.

12. Songote cimeeyye gambooshshe gibbannonkeri affannokki garinni qineessa dandiitannohu hiittoonniiti?

¹² Hattee yannara lamalate gambooshshe ma garinni assiˈneemmoyya? Songote cimeeyye, gibbannonkeri affannokki garinni gambooshshe assiˈra dandiineemmo gede qineessitanno. Insa gambooshshe gaamo gaamo ikkitine, babbaxxitino saateranna basera assidhinanni gede kultaˈnera dandiitanno. Gambooshshe hadhinanninna higginanni woyite huuroˈne naggi assitinikki coyiˈraˈne, wolu roduuwi gawajjantannokki gede assitanno. Qoleno gambooshshe hadhinanni woyite holgi uddano uddiˈra hoogginiro danchaho.

13. Alba Sooviyeti Yuniyenete heeˈrino roduuwi lawishshinni maa ronseemmo?

¹³ Sabbankeemmo doogo qooxeessu qooxeessu garinni babbaxxitara dandiitanno. Ikkollana, Yihowa banxeemmohuranna Mangistesire mannaho kula hagiirsiissannonke daafira, sabbankeemmo faro hasiˈneemmo. (Luq. 8:1; Soq. 4:29) Sooviyeti Yuniyenete gashshooti yannara Yihowa Farciˈraasine sabbakkino gara lainohunni Emiliyii Bereni yinannihu xaggete borreessaanchi togo yiino: “Gashshaano Yihowa Farciˈraasine sabbakkannota hooltu yannara, insa kayinni olliichinsara, ledonsa loossannoriranna jaallansa farciˈra diagurtino. Konninni kainohunni wolqate looso loonsanni kaampe massininsata, insa hakkiichono ledonsa usuramino mannira sabbakkino.” Hakkawaro gashshaano loosonke hooltinoha ikkirono, Sooviyeti Yuniyenete heeˈranno roduuwinke sabbaka diagurino. Ati heeˈratto gobbarano gashshaano sabbakate loosonke hoolturo, hakko roduuwi lawishsha harunsate murciˈri!

14. Faarso 39:1 maa qorophineemmo gede kaaˈlitannonke?

¹⁴ Wolootaho kulleemmore qorophino. Loosonke hoollanni woyite ‘sammi yaate yanna noota’ qaaga hasiissannonke. (Ros. 3:7)  Shaaˈˈa ikkinokkire lawishshaho, roduuwinke suˈma, gambooshshe assiˈneemmo base, sabbankeemmo doogga, hattono ayyaanaamittete sagale afiˈneemmo gara hawa gede kula dihasiissannonke. Konne coye gashshaanote, hattono ninke gobbara woy wole gobbara heedhanno jaallankera woy fiixinkera kula dihasiissannonke. Tini, roduuwinkera qarru iillannonsa gede assitara dandiitanno.—Faarso 39:1 nabbawi.

15. Sheexaanu maa assate woˈnaalanno? Tenne woshshaado qoropha dandiineemmohu hiittoonniiti?

¹⁵ Tidhinokkiri mittimmanke hunara wodhinoonke. Sheexaanu, mittu mini manni mimmitu ledo giwamannoha ikkiro, billaallannota afino. (Maq. 3:24, 25) Isi mereeronke babbadooshshe kalaqate giidhe galanno. Sheexaanu hatto assannohu, isi ledo gaarama agurre mimmitu ledo gaarammammora hasiˈranno daafiraati.

16. Rodoo Gertiruudi Potintsigeri dancha lawishsha ikkitinonkehu hiittoonniiti?

¹⁶ Ayyaanaamittetenni gikki yiino Kiristaani nafa, tini woshshaado amaddannonsakki gede qoropha hasiissannonsa. Hanni Gertiruudi Potintsigerinna Elfiriidi Leerii yinanniri buuramino roduuwi lawishsha laˈno. Insa wolu roduuwi ledo Naazite usuranyu kaampera usuramino. Elfiriidi wolu meya roduuwira jawaachishshanno lallawo shiqishshino daafira, rodoo Gertiruudi hinaassino. Gedensoonni Gertiruudi saalu amadeennase Yihowa kaaˈlannose gede huuccidhino. Ise “Wolu manni ninkenni roore worba ikkiro woy ninketenni roortino qoosso heedhunsaro tenne ammane adha rosa hasiissannonke” yite borreessitino. Ise hinaasa agurtanno gede mayi kaaˈlinose? Gertiruudi, Elfiriidita dancha akatta illachishshino. Tini, jaaloominsa wirro kaajjanno gede assitino. Lamenti usuranyu kaampenni fule, uulla heeshshonsa jeefisa geeshsha Yihowara ammaname soqqamino. Roduuwinke ledo kawa kaˈaa higinonke coye tirate sharrammeemmoha ikkiro, mittimmanke kaajjite heedhanno.—Qol. 3:13, 14.

17. Uyinanninke biddishsha harunsa hasiissannonkehu mayiraati?

¹⁷ Woˈmante yannara biddishsha harunsino. Shoomantino roduuwi uyitannonke biddishsha harunsanke lowo qarra gatissanno. (1 Phe. 5:5) Lawishshaho, konni albaanni gashshaano loosonke hooltino gobbara shoomantino roduuwi halashshaano attammoonni borro eltannokki gede kultino. Ikkollana, mittu hattee gobbara heeˈranno suwisaanchi konne biddishsha harunsa giwe borro elino. Tini mayi qarra abbituyya? Isinna wole halashshaano uminsa hajora fultino widoonni farcidhe higganni heedheenna polise amaddinonsa.  Polise insa illaallissukki digattino, hattono polise kuri roduuwi eltino borro adhi mannuwiinni haadhino. Konni woˈnaalshinni maa ronseemmo? Uyinoonninke biddishshi gara lawa hooginkero nafa, hajajama hasiissannonke. Yihowa mereeronke albisa ikkite soqqantara shoomino roduuwi ledo buusammeemmoha ikkiro, woˈmante yannara maassiˈrannonke.—Ibi. 13:7, 17.

18. Hasiissannokki wodho fushsha gara ikkitinokkihu mayiraati?

¹⁸ Hasiissannokki wodho fushshinoonke. Cimeeyye hasiissannokki wodho fushshitannoha ikkiro, mannaho duha leddanno. Yurayi Kaminiski yinanni rodii alba Chekosilovakiya yinanni gobbara loosonke hoolli yannara ikkinore xawisanni togo yiino: “Shoomantino roduuwanna batinye cimeeyye usurrita, songotenna woradaho albisa ikkite soqqantannori halashshaano konne asse konne assitinoonte yitanni hasiissannokki wodho fushshitino.” Manni hajo giddora eˈne biddishsha fushshate Yihowa silxaane diuyinonke. Hasiissannokki wodho fushshanno manchi, rodoosi gawajjotenni agaranni nooha ikkikkinni, rodiisi ammana aana duha ledanni no.—2 Qor. 1:24.

19. Sheexaanu aye geeshsha sharramirono, 2 Duduwo 32:7, 8 kultanno garinni waajjineemmokki gede assannonkeri maati?

¹⁹ Buutaamu diininke Sheexaanu Daawuloosi, ammanantinoti Yihowa soqqamaasine darantanno gede assa diaguranno. (1 Phe. 5:8; Aju. 2:10) Sheexaanunna garosi Yihowa magansiˈneemmota hoolate woˈnaaltanno. Ikkirono, waajjine qece yineemmo gede assannonkeri dino! (Mar. 7:21) Yihowa ledonke no; qoleno isi loosonke hoolliro nafa ninke irkisa diaguranno.—2 Duduwo 32:7, 8 nabbawi.

20. Maa assate murciˈrootto?

²⁰ Ninke baalunku umi xibbi diri Kiristaani faale haˈrate murciˈno; insa hatte yanna gashshaanora togo yitino: “Maganoho hajajama agurre kiˈnera hajajama Maganu albaanni dancha coyetini? Hanni kiˈnenni yiiyye.”—Soq. 4:19, 20.