1-2. (a) Faandi mbei an musu bigi da u poi te lanti tapa di wooko fuu? (b) Andi woo luku a di woto aki?

A DI jaa 2018, möön leki 223.000 peleikima bi ta libi a köndë ka de bi tapa di wooko fuu. Di soni aki an ta bigi da u poi. Kumafa u bi lei a di woto di pasa, nöö tuutuu Keesitu sëmbë sabi taa sëmbë o du ku de (2 Tim. 3:12). Aluwasi ka u ta libi, u musu hoi a pakisei taa lanti sa tapa di wooko fuu hiniwan ten.

² Ee dee tiima u di köndë ka i ta libi tapa di wooko fuu, nöö kandë i sa ta hakisi iseei dee soni aki: ’A sa dë taa Jehovah hën na dë ku u möön u? Di soni aki o mbei wa o sa dini Jehovah möön u? Mi musu foloisi go a wan woto köndë ka mi sa dini Gadu fiifii ö?’ A di woto aki, woo taki u dee soni aki. Woo luku tu unfa u sa dini Jehovah go dou, aluwasi lanti tapa di wooko fuu, söseei woo luku tu andi wa musu du a di pisiten dë.

3. Andi bi miti apösutu Paulosu te u luku di soni di sikifi a 2 Kolenti 11:23-27, nöö andi u ta lei a di woto fëën?

³ Ee lanti tapa di wooko fuu, nöö kandë u sa ko ta pakisei taa Gadu an dë ku u möön. Ma hoi a pakisei taa di du di sëmbë ta du ku u an kë taki taa Jehovah an dë ku u möön. Pakisei di woto u apösutu Paulosu. Wë a dë gbelingbelin u si taa Jehovah bi ta wai ku ën. Jehovah bi mbei a sikifi 14 u dee biifi dee dë a dee Giiki pisi u Bëibel, söseei a bi dë wan sëmbë di Gadu bi tei u peleiki da dee sëmbë dee an bi dë Dju. Ma tökuseei sëmbë bi du ku ën gaanfa seei. (Lesi 2 Kolenti 11:23-27.)  Di woto u Paulosu ta lei u taa Jehovah ta da pasi u sëmbë du ku dee dinima fëën.

4. Faandi mbei dee sëmbë u di goonliba aki ta buuse u?

⁴ Jesosi bi taki faandi mbei u musu ta dë ku di mëni taa sëmbë o du ku u. A bi taki taa dee sëmbë dee an ta dini Gadu bi o ta buuse u, u di wa dë ku de a wan së (Joh. 15:18, 19). Na te sëmbë ta du ku u, hën da Jehovah an dë ku u möön. Ma di du di sëmbë ta du ku u ta lei taa u ta du soni a wan fasi di ta kai ku Jehovah!

5. Libisëmbë sa tapa sëmbë u de an dini Jehovah möön u? Konda wan woto.

⁵ Libisëmbë an sa mbei sëmbë an dini Jehovah Gadu möön. Sömëni pasi sëmbë bi pooba u du di soni aki, ma de an bi sa du ën. Pakisei di soni di bi pasa a di u Tu Goonliba Feti. A di pisiten dë, dee tiima u sömëni köndë bi ta du ku dee sëmbë u Gadu gaanfa. Na dee Nazi sodati u Alumanköndë nöö bi tapa di wooko u dee Kotoigi u Jehovah, ma dee tiima u Ösutualia, dee u Kanada, ku dee u woto köndë seei bi du di soni aki tu. Ma luku andi bi pasa bakaten. A di jaa 1939 di di u Tu Goonliba Feti bi bigi, nöö söwan 72.475 peleikima bi dë a goonliba. Ma a kaba pisiten u di u Tu Goonliba Feti a di jaa 1945, hën Jehovah bi mbei u ko dë 156.299 peleikima. Dee peleikima bi ko dë tu toon möön hia!

6. Un bunu soni sa pasa te de ta du ku u? Konda wan woto.

⁶ Di du di sëmbë ta du ku u an ta mbei u fëëë, ma a ta möön heepi u fuu dini Jehovah go dou. Wan baaa ku hën mujëë bi abi wan womi mii, nöö de bi ta libi a wan köndë ka lanti tapa di wooko fuu. Ka u di soni aki mbei de fëëë, hën de bigi ta du di kowoonu pioniliwooko. Di sisa bi ta du wan wooko ka a bi ta kisi hia möni. Ma a bi disa di wooko fëën faa bi sa du di pioniliwooko. Di baaa bi taki taa di tapa di de bi tapa di wooko fuu bi mbei sömëni sëmbë bi kë ko sabi soni u dee Jehovah Kotoigi. Di soni aki bi mbei a bi ta möön feni sëmbë faa ta lei soni u Bëibel. Di tapa di de bi tapa di wooko fuu, bi mbei soni waka bunu a wan woto fasi tu. Wan gaanwomi di bi ta libi a di wan seei köndë dë bi taki taa sömëni u dee sëmbë dee an bi ta dini Jehovah möön, bi bigi ko a dee komakandi baka, söseei de bi bigi ta du di peleikiwooko baka.

7. (a) Andi u ta lei a Leifitiki 26:36, 37? (b) Andi joo du te lanti tapa di wooko fuu?

 ⁷ Dee felantima fuu ta tapa di wooko fuu, u di de kë fuu fëëë, nöö u disa di dini di u ta dini Jehovah. Boiti di tapa di de ta tapa di wooko fuu, de sa ta mindi soni da u tu. So juu de sa ta manda siköutu ko a u pisi, de sa ta tja u go a kuutu, nasö de sa söötö u buta a dunguwosu. De ta mëni taa woo fëëë te u jei taa de söötö wantu u dee baaa ku dee sisa fuu buta a dunguwosu. Ee u ko ta fëëë taa de o du soni ku u, nöö useei sa bia disa di dini di u ta dini Jehovah. Wa bi o kë ko dë kuma dee sëmbë di di Bëibel ta taki soni u de a Leifitiki 26:36, 37. (Lesi ën.) Wa o fëëë tee taa u disa di dini di u musu ta dini Jehovah. U ta futoou Jehovah ku hii u hati. Fëën mbei wa o ta dë pantapanta (Jes. 28:16). Ma woo ta begi Jehovah faa heepi u. U sabi taa te a dë ku u, nöö na wan tiima o sa tapa u fuu dini ën.​—Heb. 13:6.

8-9. (a) Andi hiniwan hedima u wosudendu musu luku ee a o du? (b) Andi o heepi wan sëmbë faa du soni a wan köni fasi?

⁸ Ee dee tiima u di köndë ka i ta libi, tapa di wooko fuu, nöö kandë joo ta hakisi iseei ee i musu foloisi go a wan woto köndë ka joo sa dini Jehovah fiifii. A dë wan soni di iseei musu luku andi joo du. So sëmbë sa feni taa de o luku fosu andi dee fesiten Keesitu sëmbë bi du, di sëmbë bi ta du ku de. Baka di sëmbë bi naki Sitefani ku sitonu kii, hën dee bakama u Jesosi dee bi dë a Jelusalen, bi lowe go libi a Judea ku Samalia. Wotowan bi go seei te a Finisia, a Sipuusi, ku Antiokia (Mat. 10:23; Tjab. 8:1; 11:19). Ma so sëmbë sa taki tu taa di sëmbë bi toona du ku dee fesiten Keesitu sëmbë, nöö apösutu Paulosu an bi fusi go a wan woto köndë, ma a bi ta peleiki go dou hii fa a bi sa lasi hën libi. Söseei a bi nango ta da dee baaa ku dee sisa taanga a kamian ka de bi ta du ku de gaanfa seei.​—Tjab. 14:19-23.

⁹ Andi u ta lei a dee soni aki? Hiniwan hedima u wosudendu musu luku ee hën ku dee sëmbë fëën o foloisi go a wan woto köndë. Ma ufö a buta taa a o foloisi, nöö a musu begi, söseei a musu luku unfa soni dë da dee sëmbë fëën wosudendu ku unfa soni o ko dë da de ee de ko foloisi. Te a nama a dee soni aki, nöö hiniwan Keesitu sëmbë „musu piki Gadu hënseei a dee soni dee a ta du” (Gal. 6:5). Wa musu kuutu wotowan a dee soni di de buta taa de o du.

10. Andi ku andi di bëikantoo ku dee gaanwomi o piki u?

¹⁰ Unfa i sa dini Jehovah go dou te de tapa di wooko fuu? Di bëikantoo u di köndë ka i ta dë, o piki dee gaanwomi unfa de musu heepi dee baaa ku dee sisa u de sa ta lei soni u Jehovah go dou, unfa de musu ta hoi komakandi, söseei unfa de musu ta du di peleikiwooko. Ee di bëikantoo an sa feni pasi u piki dee gaanwomi andi de musu du, nöö dee gaanwomi o heepi i ku dee woto baaa ku sisa a di kemeente fuun sa ta dini Jehovah go dou. De o piki unu soni di kumutu a di Bëibel, nasö di kumutu a dee woto buku fuu.​—Mat. 28:19, 20; Tjab. 5:29; Heb. 10:24, 25.

11. Faandi mbei i sa dë seiki taa hii juu joo ta feni soni u mbei di biibi fii ko möön taanga, nöö unfa i sa tjubi di Bëibel fii ku dee woto buku fuu?

¹¹ Jehovah paamusi dee dinima fëën taa hii juu de o ta feni soni u heepi de u di biibi u de ko möön taanga (Jes. 65:13, 14; Luk. 12:42-44). Fëën mbei i sa dë seiki taa di ölganisaasi fëën o mbei hii möiti fii sa ta feni dee soni dee i abi fanöudu u mbei di biibi fii ko möön taanga. Ma wan soni dë di i sa du tu u di biibi fii ko möön taanga. Te de tapa di wooko fuu, nöö  i musu suku wan bunu kamian ka i sa tjubi di Bëibel fii ku dee woto buku fuu. Köni be ja buta dee soni aki a wan kamian ka sëmbë sa feni de hesihesi, aluwasi ee a tëlëfön nasö a woto soni. Hiniwan fuu musu du soni a wan köni fasi u di biibi fuu an ko suwaki.

12. Unfa dee gaanwomi sa seti soni fuu ta hoi komakandi söndö u sëmbë sabi?

¹² Unfa a dë ku dee komakandi dee u ta hoi hiniwan wiki? Wë dee gaanwomi o seti soni fii sa nango a dee komakandi a wan fasi di an o mbei dee felantima fuu buta pakisei a u. Dee gaanwomi sa piki i fii ta ko makandi ku wotowan a wan piki kulupu, nöö kandë hii juu de o ta tooka di juu ku di kamian ka woo ta ko makandi. Joo sa tjubi dee baaa ku dee sisa fii u hogi an miti de, te joo ta fan saapi te i nango a dee komakandi, nasö te i ta kumutu a dee komakandi. I sa ta bisi tu a wan fasi di an o mbei sëmbë si i sabi taa i nango a komakandi.

13. Andi u sa lei a dee baaa ku dee sisa fuu dee bi ta libi a Sovyet-Unie?

¹³ Na a hii köndë woo ta du di peleikiwooko a di wan fasi. Ma u di u lobi Jehovah, söseei u di u ta wai te u ta konda soni u di Könuköndë fëën da wotowan, mbei woo feni wan fasi fuu sa ta peleiki (Luk. 8:1; Tjab. 4:29). Wan sëmbë di bi ta sikifi soni fu awooten, de ta kai Emily B. Baran, bi taki wan soni u di fasi fa dee Jehovah Kotoigi bi ta peleiki a Sovyet-Unie. A bi taki taa: „Di lanti u di köndë bi piki dee Kotoigi taa de an musu ta peleiki möön, hën de bi ta peleiki da dee sëmbë dee bi ta libi a de bandja, dee sëmbë di de ku de bi ta wooko a di wan kamian, ku dee mati u de. Di lanti bi ko söötö de u di soni aki hedi, hën de bi bigi ta peleiki da dee sëmbë di de ku de bi dë a dunguwosu.” Hii fa de bi tapa di wooko fuu, tökuseei dee baaa ku dee sisa fuu dee bi dë a Sovyet-Unie, an bi disa di peleiki di de bi ta peleiki. Ee a ko pasa taa de tapa di peleikiwooko a di köndë ka i ta libi tu, nöö i sa djeesi dee baaa ku dee sisa aki a di fasi fa de bi peleiki go dou!

14. Ku andi u musu ta köni, te u luku Psalöm 39:1?

¹⁴ Köni ku dee soni dee i ta konda da wotowan. Te de tapa di wooko fuu, nöö u musu sabi taa a dë wan ten ka u musu ta köni ku dee soni dee u ta taki (Peleik. 3:7). Wa musu taki so soni a dee pisiten dë. Dee soni aki sa dë dee në u dee baaa ku dee sisa fuu, dee kamian ka u ta ko makandi, di fasi fa u ta du di peleikiwooko fuu, ku di fasi fa u ta feni soni di ta taanga di biibi fuu. Wa musu piki lanti u di köndë dee soni aki, söseei wa musu piki dee mati fuu, nasö dee famii fuu dee ta libi a di köndë ka u dë, nasö dee ta libi a woto köndë. Ee hën u du di soni aki, nöö u bi o sa mbei hogi miti dee baaa ku dee sisa fuu.​—Lesi Psalöm 39:1.

15. Andi Saatan o mbei möiti faa du ku u, nöö unfa u sa köni be an kisi u?

 ¹⁵ Na mbei pikipiki soni paati u. Saatan sabi taa te sëmbë u wan wosudendu ta libi paatipaati, nöö di wosudendu dë o booko (Maik. 3:24, 25). Hii juu Saatan o ta mbei möiti faa paati u. A o ta du di soni aki u di a kë taa u musu bigi ta feti ku useei, ka fuu feti ku ën.

16. Andi da wan bunu soni di Sisa Gertrud Poetzinger bi du di useei sa ta du tu?

¹⁶ Keesitu sëmbë di taanga a di biibi seei musu ta köni u di soni aki an miti de. Luku wan woto u tu sisa di bi dë salufuwan. Wan u de de ta kai Gertrud Poetzinger, nöö di wotowan de ta kai Elfriede Löhr. De bi söötö dee sisa aki makandi ku woto sisa a wan dunguwosu u dee Nazi sodati. Sisa Gertrud bi ko ta haun ku Sisa Elfriede, u di Sisa Elfriede bi ta hoi bunu taki di bi ta da dee woto sisa taanga a di dunguwosu. Bakaten, sen bi ko kisi Sisa Gertrud, hën a begi Jehovah faa heepi ën. A bi taki taa: „U musu tei taa sëmbë dë di sa’ u du so soni möön u, nasö di abi möön faantiwöutu möön u.” Andi bi heepi di sisa aki fu an bi ta haun ku di wotowan fëën möön? Gertrud bi bigi ko ta buta pakisei a dee bunu fasi u Elfriede, söseei a bi ko ta buta pakisei a di fasi fa a bi ta lei taa a lobi sëmbë. Di soni aki bi mbei hën ku Sisa Elfriede bi ko dë gaan mati baka. De bi ko puu hii de tuu a di dunguwosu bakaten, nöö de bi dini Jehovah ku hii de hati u te de dëdë. Ee u ta mbei taanga möiti fu u ku dee baaa ku dee sisa fuu ta libi fiifii, nöö na wan soni o sa paati u.​—Kol. 3:13, 14.

17. Faandi mbei hii juu u musu ta du soni kumafa di ölganisaasi u Jehovah ta piki u?

¹⁷ Du dee soni di dee baaa dee ta tei fesi, ta piki i. Ee u ta du dee soni di dee baaa di dë u futoou, di de buta u tei fesi, ta piki u, nöö woo sa ta köni u hogi an miti u (1 Pet. 5:5). A bi pasa taa a wan köndë ka lanti tapa di wooko fuu, dee baaa dee ta tei fesi bi piki dee peleikima taa de an musu da sëmbë dee buku fuu te de bi peleiki da de. Ma wan baaa di bi ta du di pioniliwooko a di köndë dë, bi da sëmbë buku, hii fa dee baaa bi taki taa dee peleikima an bi musu du di soni aki. Andi bi ko pasa bakaten? Kölö sö baka di di baaa aki ku wanlö woto peleikima bi kaba peleiki, hën wanlö siköutu bi ko a de ko hakisi de soni. A kan taa dee siköutu aki bi faaka dee peleikima aki, nöö de bi ko feni dee soni di de bi da dee sëmbë. Andi u ta lei a di woto aki? Wë u ta lei taa u musu ta du soni kumafa dee baaa dee ta tei fesi ta piki u, aluwasi ee u abi wan woto fasi fa useei bi o kë du soni. Hii juu Jehovah ta mbei soni waka bunu da u te u ta wooko makandi ku dee baaa dee a buta u tei fesi.​—Heb. 13:7, 17.

18. Faandi mbei wa musu ta buta wëti da wotowan, di an dë fanöudu?

 ¹⁸ Na buta wëti da wotowan di an dë fanöudu. Ee dee gaanwomi ta buta wëti da wotowan di an dë fanöudu, nöö de sa mbei soni ko taanga da dee baaa ku dee sisa. Baaa Juraj Kaminský, ta taki andi bi pasa di de bi tapa di wooko fuu a di köndë di de bi ta kai Tjëko-Slowakia. Di baaa aki bi taki taa: „Baka di de söötö so u dee gaanwomi, hën so u dee baaa dee bi fika u tei fesi a dee kemeente ku dee keling, bi bigi ta buta wanlö hia wëti da dee peleikima.” Jehovah an ta da u pasi fuu ta buta wëti da dee baaa ku dee sisa fuu. Wan sëmbë di ta buta wëti da dee baaa ku dee sisa, hii fa an bi dë fanöudu, ta buta hënseei basi a wotowan liba, ta piki de unfa de musu biibi.​—2 Kol. 1:24.

19. Faandi mbei u sa taki taa u sa abi degihati aluwasi andi Saatan ta du, te u luku 2 Kloniki 32:7, 8?

¹⁹ Di gaan felantima fuu de kai Saatan Didibi o ta du ku dee dinima u Jehovah nöömö (1 Pet. 5:8; Ako. 2:10). Saatan ku dee bakama fëën o ta pooba u tapa u fu wa dini Jehovah möön. Ma wa a’ fu fëëë! (Deto. 7:21) Jehovah dë ku u, nöö a o heepi u aluwasi sëmbë tapa di wooko fuu.​—Lesi 2 Kloniki 32:7, 8.

20. Andi i dë kabakaba u du?

²⁰ Boo djeesi dee fesiten Keesitu sëmbë dee bi piki dee tiima u di ten u de taa: „Lanti, fa un taki da u aki, nöö u jei. Un bai u taa wa musu konda soni u Masa Jesosi. Ma Masa Gaangadu manda u fuu musu konda. Nöö unfa un mëni? Undi u dee buka un si kuma Masa Gaangadu o kë fuu musu piki? Wë nöö wa sa tjubi dee soni u wojo bi si ku dee u jesi bi jei. U musu konda de nöömö.”​—Tjab. 4:19, 20.