1-2. (a) Tanbasá mak ita la hakfodak kuandu governu bandu ita? (b) Saida mak ita sei aprende iha lisaun neʼe?

IHA tinan 2018, haklaken-naʼin 223.000 liu hela iha rai neʼebé governu bandu ka hanetik ita-nia atividade adorasaun nian. Ita la hakfodak kona-ba neʼe. Hanesan ita aprende ona, ema Kristaun hatene katak ema sei fó-terus ba sira. (2 Tim 3:12) Iha fatin oioin, karik derrepente deʼit governu bele bandu ita atu labele adora tan ita-nia Maromak domin nian, Jeová.

² Se governu iha Ita-nia rai deside atu bandu adorasaun ba Jeová, karik ita husu ba Ita-nia an: ‘Se ema fó-terus ba ita, neʼe katak Maromak la simu ona ita ka lae? Se governu bandu, neʼe sei hapara ita atu adora Maromak ka lae? Haʼu presiza muda ba rai seluk atu adora Maromak ho livre ka lae?’ Iha lisaun neʼe, ita sei hatán ba pergunta sira-neʼe. Ita mós sei aprende oinsá ita bele kontinua adora Jeová maski governu bandu ita no saida mak ita labele halo.

3. Tuir 2 Korinto 11:23-27, apóstolu Paulo neʼebé laran-metin hasoru susar saida deʼit? Saida mak ita aprende husi Paulo nia ezemplu?

³ Se governu bandu ita-nia adorasaun, karik neʼe halo ita hanoin sala katak Maromak la simu ona ita. Maibé hanoin-hetan, bainhira ema fó-terus ba ita, neʼe la dehan katak Maromak la kontente ona ho ita. Porezemplu, Maromak simu apóstolu Paulo. Nia iha priviléjiu atu hakerek karta 14 neʼebé sai parte ba Eskritura Lian Gregu, no nia mak apóstolu ba nasaun sira. Maski nuneʼe, ema fó-terus makaʼas ba nia. (Lee 2 Korinto 11:23-27.) Husi apóstolu Paulo nia esperiénsia, ita aprende katak dala  ruma Jeová husik ema fó-terus ba ninia atan sira neʼebé laran-metin.

4. Tanbasá mundu odi ita?

⁴ Jesus esplika tanbasá ita la presiza hakfodak bainhira ema fó-terus ba ita. Nia hatete katak ema sei odi ita tanba ita laʼós parte husi mundu neʼe. (João 15:18, 19) Bainhira ema fó-terus ba ita, neʼe laʼós katak Jeová la haraik ona bensaun ba ita. Maibé, neʼe hatudu katak ita halo buat neʼebé loos.

5. Ema bele hapara adorasaun ba Jeová ka lae? Esplika toʼok.

⁵ Ema neʼebé kontra ita la iha kbiit atu hapara ita-nia adorasaun ba Jeová, Maromak neʼebé Kbiit Boot Liu Hotu. Ema barak koko maibé la susesu. Porezemplu, durante Funu Mundiál Segundu, governu iha nasaun barak fó-terus makaʼas ba Maromak nia povu. Partidu Nazi bandu Testemuña ba Jeová iha rai-Alemaña, no mós governu Austrália, Kanadá, no rai sira seluk bandu Testemuña. Maibé saida mak akontese? Iha tinan 1939 bainhira funu komesa, iha deʼit haklaken-naʼin 72.475 iha mundu tomak. Maibé tanba Jeová nia bensaun, bainhira funu remata iha tinan 1945, iha haklaken-naʼin 156.299. Haklaken-naʼin aumenta ba dala rua liu.

6. Rezultadu diʼak saida mak bele akontese bainhira governu bandu? Konta toʼok ezemplu ida.

⁶ Bainhira ema fó-terus, duké halo ita taʼuk, karik neʼe book ita atu serbí Jeová liután. Porezemplu, kaben-naʼin neʼebé iha oan-mane ida, hela iha rai neʼebé governu deside atu bandu ita-nia adorasaun. Duké dada an atu serbí Maromak tanba taʼuk, kaben-naʼin neʼe komesa serbí nuʼudar pioneiru regulár. Atu halo nuneʼe, feen para husi serbisu neʼebé manán osan barak. Laʼen neʼe hatete katak tanba governu bandu, ema barak hakarak hatene liután kona-ba Testemuña ba Jeová. Tan neʼe, nia sente fasil liu atu komesa estuda Bíblia ho ema. Kuandu governu bandu, neʼe mós lori benefísiu ba ema seluk. Katuas kongregasaun ida neʼebé mós hela iha rai neʼe dehan katak ema barak neʼebé uluk para atu serbí Jeová, komesa fali tuir reuniaun no haklaken.

7. (a) Saida mak ita aprende husi Levítico 26:36, 37? (b) Saida mak Ita rasik sei halo se governu bandu?

 ⁷ Bainhira ita-nia inimigu bandu ita-nia adorasaun, sira hakarak halo ita taʼuk atu serbí Jeová. Liután neʼe, karik sira mós habelar istória falsu kona-ba ita, haruka autoridade sira atu tama ita-nia uma, lori ita ba tribunál, ka hatama ita balu ba komarka. Sira hakarak halo ita taʼuk tanba sira konsege hatama ita balu ba komarka. Se ita husik sira halo ita taʼuk, karik ita sei dada an ka para atu serbí Jeová. Ita lakohi sai hanesan ema sira neʼebé temi iha Levítico 26:36, 37. (Lee.) Ita lakohi husik sentimentu taʼuk atu halo ita dada an ka para atu serbí Jeová. Ita tau fiar tomak ba Jeová no lakohi sai taʼuk. (Isa 28:16) Ita buka Jeová nia matadalan liuhusi orasaun. Ita hatene katak maski ema nia governu mak forsa boot, maibé ho Jeová nia ajuda, sira labele hanetik ita atu adora nia ho laran-metin nafatin.—Ebr 13:6.

8-9. (a) Desizaun saida mak ulun ba família ka ema ida-idak presiza halo? (b) Saida mak bele ajuda ema ida atu halo desizaun neʼebé diʼak?

⁸ Se governu bandu ita-nia adorasaun, karik Ita hanoin katak Ita presiza muda ba rai seluk atu bele serbí Jeová ho livre. Neʼe mak Ita rasik nia desizaun no ema seluk labele halo desizaun neʼe ba Ita. Antes halo desizaun, karik diʼak atu hanoin uluk esperiénsia husi ema Kristaun iha apóstolu sira-nia tempu bainhira ema fó-terus ba sira. Bainhira inimigu tuda mate Estevão, dixípulu sira iha Jeruzalein muda ba Judeia, Samaria, Fenísia, Xipre no Antiokia. (Mt 10:23; Após 8:1; 11:19) Maibé mós diʼak atu hanoin kona-ba bainhira ema fó-terus dala ida tan ba ema Kristaun iha apóstolu sira-nia tempu. Iha tempu neʼebá, apóstolu Paulo deside atu la muda husi área neʼebé ema kontra serbisu haklaken. Nia tau ninia moris iha perigu laran tanba nia hakarak haklaken no hametin irmaun-irmán sira iha sidade neʼebé ema fó-terus makaʼas.—Após 14:19-23.

⁹ Saida mak ita bele aprende husi istória sira-neʼe? Ulun ba família ida-idak tenke halo desizaun kona-ba muda ka lae. Antes deside, nia tenke halo orasaun no hanoin kona-ba ninia família nia situasaun, no mós hanoin kona-ba buat diʼak ka aat neʼebé bele akontese. Ema Kristaun ida-idak tenke “lori ninia todan rasik”. (Gal 6:5) Ita labele tesi-lia ba ema seluk nia desizaun.

10. Sukursál no katuas kongregasaun sira sei fó matadalan saida?

¹⁰ Oinsá atu kontinua adora Jeová maski governu bandu? Sukursál sei fó matadalan no sujestaun ba katuas kongregasaun sira kona-ba oinsá atu kontinua simu ai-han espirituál, halaʼo reuniaun, no oinsá atu haklaken. Se sukursál labele kontaktu katuas kongregasaun sira, entaun katuas sira sei ajuda ita no ema hotu iha kongregasaun atu kontinua adora Jeová. Sira sei fó matadalan tuir Bíblia no ita-nia publikasaun sira.—Mt 28:19, 20; Após 5:29; Ebr 10:24, 25.

11. Tanbasá mak Ita bele fiar katak Ita sei hetan buat neʼebé Ita presiza atu laran-metin nafatin? Saida mak Ita bele halo atu proteje Ita-nia Bíblia no publikasaun sira?

¹¹ Jeová promete ona katak ninia atan sira sei sai bosu iha dalan espirituál.  (Isa 65:13, 14; Lc 12:42-44) Entaun Ita bele fiar metin katak ninia organizasaun sei hakaʼas an atu fó buat neʼebé Ita presiza atu bele laran-metin nafatin. Saida mak Ita bele halo? Bainhira governu bandu, buka fatin neʼebé seguru atu subar Ita-nia Bíblia no publikasaun sira. Kuidadu atu la husik pubikasaun neʼebé print ona ka eletróniku iha fatin neʼebé ema bele hetan lalais. Ita ida-idak tenke hakaʼas an atu hametin Ita-nia relasaun ho Jeová.

12. Oinsá mak katuas sira bele organiza reuniaun hodi la dada ema nia atensaun?

¹² Oinsá ho ita-nia reuniaun semana-semana nian? Katuas sira sei organiza atu Ita tuir reuniaun iha dalan neʼebé la dada inimigu nia atensaun. Karik sira haruka Ita atu halo reuniaun iha grupu kiʼik, no karik sira sei muda beibeik tempu no fatin ba reuniaun sira. Ita bele ajuda atu proteje irmaun-irmán sira hodi koʼalia neineik bainhira Ita bá ka fila husi reuniaun. Karik Ita mós presiza hatais roupa neʼebé la dada ema nia atensaun.

13. Saida mak ita bele aprende husi irmaun-irmán sira iha Uniaun Soviétika?

¹³ Kona-ba serbisu haklaken, situasaun iha fatin ida-idak la hanesan. Maibé ita hadomi Jeová no hakarak atu fó-hatene ema seluk kona-ba ninia Ukun, tan neʼe ita sei buka dalan atu haklaken. (Lc 8:1; Após 4:29) Matenek-naʼin kona-ba istória naran Emily B. Baran, konta kona-ba Testemuña ba Jeová nia serbisu haklaken iha Uniaun Soviétika, hodi dehan: “Bainhira governu hatete ba fiar-naʼin sira katak sira labele haklaken tan kona-ba sira-nia fiar, Testemuña sira komesa haklaken ba sira-nia viziñu, kolega serbisu, no belun sira. Dala ruma ema hatama Testemuña sira ba komarka tanba haklaken iha dalan sira-neʼe, maibé Testemuña sira haklaken ba dadur seluk.” Maski governu bandu, ita-nia irmaun-irmán sira iha Uniaun Soviétika la para atu haklaken. Se loron ida governu mós bandu serbisu haklaken iha Ita-nia rai, Ita mós bele banati-tuir sira.

14. Salmo 39:1 ajuda ita atu hasees an husi saida?

¹⁴ Kuidadu atu la fahe informasaun segredu ba ema seluk. Bainhira governu bandu, ita tenke hatene tempu neʼebé ita presiza “atu nonook”. (Ecle 3:7) Ita tenke proteje informasaun neʼebé segredu, hanesan irmaun-irmán sira-nia naran, fatin ba reuniaun sira, oinsá ita haklaken, no oinsá ita simu ai-han espirituál. Ita lakohi atu fó sai informasaun sira-neʼe ba autoridade sira. No mós ita lakohi fahe informasaun sira-neʼe  ba belun ka família iha ita-nia rai ka rai seluk. Se ita la kuidadu, ita sei tau ita-nia irmaun-irmán sira iha perigu laran.—Lee Salmo 39:1.

15. Satanás koko atu halo saida ba ita, no oinsá mak ita bele hasees an husi ida-neʼe?

¹⁵ Keta husik problema kiʼik atu haketak ita. Satanás hatene katak umakain ida sei la metin se ninia ema funu malu. (Mc 3:24, 25) Nia sei kontinua koko atu halo ita haketak malu no nia hein katak ita sei funu malu duké funu ho nia.

16. Irmán Gertrud Poetzinger hatudu ezemplu diʼak saida mai ita?

¹⁶ Ema Kristaun neʼebé maduru mós presiza kuidadu. Hanoin toʼok ezemplu husi irmán Gertrud Poetzinger no Elfriede Löhr neʼebé iha esperansa atu bá lalehan. Sira tama Nazi nia komarka hamutuk ho irmán seluk. Gertrud sai laran-moras bainhira Elfriede hatoʼo diskursu neʼebé hametin irmán sira iha komarka laran. Liutiha tempu balu, Gertrud sente moe no husu Jeová nia ajuda. Gertrud hakerek: “Ita tenke aprende atu simu realidade se ema seluk iha abilidade ka responsabilidade liu fali ita.” Oinsá mak nia la sai laran-moras tan? Gertrud tau fokus ba Elfriede nia hahalok diʼak. Ida-neʼe hametin fali ninia relasaun ho Elfriede. Ikusmai, sira naʼin-rua livre husi komarka no serbí Jeová ho laran-metin toʼo sira mate. Se ita hakaʼas an atu hadiʼa problema ho ita-nia irmaun-irmán sira, ita sei la husik buat ida atu sobu ita-nia unidade.—Kol 3:13, 14.

17. Tanbasá mak ita presiza halo tuir matadalan?

¹⁷ Sempre halo tuir matadalan sira. Se ita halo tuir matadalan husi irmaun neʼebé iha responsabilidade, ita sei hasees an husi problema. (1 Ped 5:5) Porezemplu, iha rai ida neʼebé governu bandu ita-nia serbisu, irmaun sira neʼebé iha responsabilidade fó matadalan ba haklaken-naʼin sira atu la fahe publikasaun bainhira haklaken. Maibé, irmaun pioneiru ida sente katak nia hatene liu no nia fahe publikasaun sira. Rezultadu mak saida? Lakleur depois nia no ema seluk remata atu haklaken la formál, polísia halo interrogasaun ba sira. Tuir loloos, ema ida husi governu tuir sira no foti publikasaun neʼebé sira fahe ona. Ita aprende saida husi esperiénsia neʼe? Ita presiza halo tuir matadalan maski ita sente katak ita hatene liu. Jeová sempre haraik bensaun ba ita se ita apoia irmaun sira neʼebé hetan knaar atu dirije ita.—Ebr 13:7, 17.

18. Tanbasá mak ita labele halo ukun-fuan neʼebé la presiza?

 ¹⁸ Keta halo ukun-fuan neʼebé la presiza. Se katuas kongregasaun sira halo ukun-fuan neʼebé la presiza, neʼe sei halo susar ba ema seluk. Irmaun Juraj Kaminský fó sai buat neʼebé akontese durante tempu neʼebé governu bandu Testemuña iha rai neʼebé uluk hanaran Xekoslavákia: “Depois ema kaer tiha katuas barak, irmaun balu neʼebé livre hela komesa halo ukun-fuan ba haklaken-naʼin sira, sira halo lista kona-ba buat neʼebé bele halo no labele halo.” Jeová la fó ita podér atu halo desizaun ba ema seluk. Ema neʼebé halo ukun-fuan neʼebé la presiza, tuir loloos koko atu domina irmaun-irmán sira-nia fiar no la proteje sira.—2 Kor 1:24.

19. Tuir 2 Krónikas 32:7, 8, tanbasá ita bele aten-brani maski Satanás koko fó-terus ba ita?

¹⁹ Ita-nia inimigu, Diabu Satanás, sei nunka para atu koko fó-terus ba Jeová nia atan sira neʼebé laran-metin. (1 Ped 5:8; Apok 2:10) Satanás no ninia ema sira sei koko atu bandu ita-nia adorasaun ba Jeová. Maibé, ita sei nunka para atu serbí Jeová maski ita taʼuk. (Deut 7:21) Jeová hamutuk ho ita, no nia sei kontinua apoia ita maski governu bandu ita-nia serbisu.—Lee 2 Krónikas 32:7, 8.

20. Ita rasik hakarak halo saida?

²⁰ Mai ita hakaʼas an atu iha hanoin neʼebé hanesan ho irmaun-irmán sira iha apóstolu sira-nia tempu, neʼebé hatete ba ukun-naʼin sira iha tempu neʼebá: “Se imi hanoin katak rona ba imi duké rona ba Maromak mak buat loos iha Maromak nia oin, imi rasik deside bá. Maibé ba ami, ami labele para atu koʼalia kona-ba buat neʼebé ami haree no rona ona.”—Após 4:19, 20.