1-2. (a) Ko e hā ‘oku ‘ikai totonu ai ke tau ofo ‘i hano tapui ‘etau lotú? (e) Ko e hā te tau lāulea ki ai ‘i he kupu ko ení?

‘I HE 2018, ko e kau malanga ‘o e ongoongo leleí ‘e toko 223,000 tupu na‘a nau nofo ‘i he ngaahi fonua ‘oku tapui ai pe mātu‘aki fakangatangata ai ‘etau ngaahi ngāue fakalaumālié. ‘Oku ‘ikai ke fai ha ofo heni. Hangē ko ia na‘a tau ako ‘i he kupu ki mu‘á, ko e kau Kalisitiane mo‘oní ‘oku nau ‘amanekina ‘e fakatanga‘i kinautolu. (2 Tīm. 3:12) Tatau ai pē pe ko fē ‘oku tau nofo aí, ko e kau ma‘u mafai fakamāmaní ‘e fakafokifā nai mo ta‘e‘amanekina ‘enau tapui kitautolu mei he‘etau lotu ki hotau ‘Otua ‘ofá, ‘a Sihova.

² Kapau ‘oku fili ‘a e pule‘anga ‘okú ke nofo aí ke tapui ‘a e lotu kia Sihová, te ke ‘eke hifo nai kiate koe ‘a e ngaahi fehu‘i ko ení: ‘‘Oku ‘uhinga ‘a e fakatangá kuo mole ‘a e hōifua ‘a e ‘Otuá meiate kitautolu? ‘E fakangata ‘e ha fakataputapui ‘etau lotu kia Sihová? ‘Oku totonu ke u hiki ki ha fonua ‘oku lava ke tau‘atāina ai ‘eku lotu ki he ‘Otuá?’ ‘I he kupu ko ení, te tau lāulea ki he ngaahi fehu‘i ko iá. Te tau toe lāulea foki ki he founga ‘e lava ke tau hokohoko atu ke lotu kia Sihova ‘i he taimi ‘oku tapui ai ‘etau ngāué mo e ngaahi tauhele kuo pau ke tau faka‘ehi‘ehi mei ai.

3. Fakatatau ki he 2 Kolinitō 11:23-27, ko e hā ‘a e fakatanga na‘e hokosia ‘e he ‘apositolo faitōnunga ko Paulá, pea ko e hā ‘oku tau ako mei he‘ene fa‘ifa‘itaki‘angá?

³ Kapau ‘oku tapui ‘e ha pule‘anga ‘etau lotú, te tau fakamulituku hala nai ‘o pehē ‘oku ‘ikai ke tau ma‘u ‘a e tāpuaki ‘a e ‘Otuá. Kae manatu‘i, ko e fakatangá ‘oku ‘ikai ‘uhinga ia ‘oku mamahi ‘a Sihova ‘iate kitautolu. Ko e fakatātaá, fakakaukau ki he ‘apositolo ko Paulá. Ko hono mo‘oní na‘á ne ma‘u ‘a e hōifua ‘a e ‘Otuá.  Na‘á ne ma‘u ‘a e monū ke hiki ‘a e tohi ‘e 14 ‘i he Ngaahi Konga Tohi Tapu Faka-Kalisi Kalisitiané pea ko ha ‘apositolo ia ki he ngaahi pule‘angá. Neongo ia, na‘á ne fehangahangai mo e fakatanga lahi. (Lau ‘a e 2 Kolinitō 11:23-27.) ‘Oku tau ako mei he hokosia ‘a e ‘apositolo ko Paulá ‘oku faka‘atā ‘e Sihova ‘ene kau sevāniti faitōnungá ke fakatanga‘i.

4. Ko e hā ‘oku fehi‘anekina‘i ai kitautolu ‘e he māmaní?

⁴ Na‘e fakamatala‘i ‘e Sīsū ‘a e ‘uhinga ‘oku totonu ai ke tau ‘amanekina ‘a e fakafepakí. Na‘á ne pehē ‘e fehi‘anekina‘i kitautolu koe‘uhi ‘oku ‘ikai ke tau hoko ko e konga ‘o e māmaní. (Sione 15:18, 19) Ko e fakatangá ‘oku ‘ikai ko ha faka‘ilonga ia ‘o e mole ‘a e tāpuaki ‘a Sihová meiate kitautolu. ‘I hono kehé, ‘oku fakahaa‘i ai ‘oku tau fai ‘a e me‘a ‘oku totonú!

5. ‘Oku ma‘u ‘e he fa‘ahinga ‘o e tangatá ha mālohi ke fakangata ‘a e lotu kia Sihová? Fakamatala‘i.

⁵ Ko e kau fakafepakí ‘oku ‘ikai hanau mālohi ke nau lava ‘o ta‘ofi faka‘aufuli ‘a e lotu ki he ‘Otua māfimafi-aoniú, ‘a Sihova. Kuo feinga ‘a e tokolahi pea nau ta‘elavame‘a. Fakakaukau ki he me‘a na‘e hoko lolotonga ‘a e Tau II ‘a Māmaní. ‘I he taimi ko iá, ko e ngaahi pule‘anga ‘i he ngaahi fonua lahi na‘a nau fakatanga‘i lahi ‘a e kakai ‘a e ‘Otuá. Ko e ngāue ‘a e Kau Fakamo‘oni ‘a Sihová na‘e tapui ‘o ‘ikai ngata pē ‘e he kau Nasí ‘i Siamane kae pehē foki ki ‘Aositelēlia, Kānata mo e ngaahi fonua kehe. Neongo ia, fakatokanga‘i ‘a e me‘a na‘e hokó. ‘I he 1939 ‘i he kamata ‘a e taú, na‘e ‘i ai ‘a e kau malanga ‘e toko 72,475 ‘i māmani lahi. Na‘e fakahaa‘i ‘i he ngaahi līpōtí ‘i he ngata‘anga ‘o e taú ‘i he 1945, ‘i he tāpuaki ‘a Sihová, na‘e ‘i ai ‘a e kau malanga ‘e toko 156,299. Ko e tokolahi ‘o e kau malangá na‘e laka hake ‘i he liunga uá!

6. Ko e hā ‘a e ngaahi me‘a lelei ‘e lava ke hoko ‘i hono fakatanga‘i kitautolú? ‘Omai ha fakatātā.

⁶ ‘I he ‘ikai ke ‘ai kitautolu ‘e he fakatangá ke tau manavaheé, ‘e lava ke ne ue‘i kitautolu ke tauhi kakato ange kia Sihova. Ko e fakatātaá, ko ha ongo me‘a na‘e ‘i ai ‘ena ki‘i tama na‘a nau nofo ‘i ha fonua ‘a ia na‘e fili ‘a e pule‘angá ke tapui ai ‘etau lotú. ‘I he ‘ikai ke tauholomui ‘i he manavaheé, na‘e kamata tāimu‘a tu‘uma‘u ‘a e ongo me‘á. Na‘e a‘u ‘o fakafisi ‘a e uaifí mei he‘ene ngāue totongi leleí ke fai pehē. Na‘e pehē ‘e he husepānití na‘e ‘ai ‘e he fakataputapuí ‘a e kakai tokolahi ke nau fie‘ilo fekau‘aki mo e Kau Fakamo‘oni ‘a Sihová. Ko hono olá, na‘e faingofua ange ai ke ne kamata ha ngaahi ako Tohi Tapu. Na‘e ‘i ai foki mo e ola lelei ‘o e fakataputapuí ki he ni‘ihi kehé. Na‘e pehē ‘e ha mātu‘a ‘i he fonua tatau ko e tokolahi na‘e tuku ‘enau  tauhi kia Sihová na‘e kamata ke nau ma‘u ‘a e ngaahi fakatahá pea nau toe longomo‘ui.

7. (a) Ko e hā ‘oku tau ako mei he Livitiko 26:36, 37? (e) Ko e hā te ke fai ‘i he malumalu ‘o e fakataputapuí?

⁷ ‘I hono tapui ‘e hotau ngaahi filí ‘etau lotú, ‘oku nau loto ke ‘ai kitautolu ke tau ilifia ‘i he tauhi kia Sihová. Tānaki atu ki he fakataputapuí, te nau fakamafola nai ‘a e ngaahi talanoa loi, fekau‘i mai ‘a e kau ‘ōfisa ke nau hua hotau ngaahi ‘apí, ‘ave fakamālohi kitautolu ki he fakamaau‘angá pe a‘u ‘o tuku pilīsone ‘a e ni‘ihi ‘o kitautolu. ‘Oku nau faka‘amu ke tau ilifia koe‘uhi ko e lava ke nau tuku pilīsone ha ki‘i ni‘ihi ‘o kitautolu. Kapau te tau faka‘atā kinautolu ke nau fakahūhū ‘a e manavaheé ki hotau lotó, ‘e a‘u nai ‘o tau “tapui” pē ‘e kitautolu tonu ‘etau lotú. He‘ikai ke tau loto ke hoko ‘o hangē ko e fa‘ahinga ko ia ‘oku fakamatala‘i ‘i he Livitiko 26:36, 37. (Lau.) He‘ikai ke tau faka‘atā ‘a e manavaheé ke ne ‘ai kitautolu ke fakasi‘isi‘i pe ta‘ofi ‘etau ngaahi ngāue fakalaumālié. ‘Oku tau falala kakato kia Sihova pea ‘ikai ilifia. (‘Ai. 28:16) ‘Oku tau fekumi ‘i he fa‘a lotu ki he tataki ‘a Sihová. ‘Oku tau ‘ilo ‘i he‘ene tokoní, na‘a mo e pule‘anga fakaetangata mālohi tahá he‘ikai lava ke ne ta‘ofi kitautolu mei he lotu faitōnunga ki hotau ‘Otuá.​—Hep. 13:6.

8-9. (a) Ko e hā ‘a e fili fakafo‘ituitui ‘e fiema‘u ke fai ‘e ha taha pe ‘ulu‘i fāmili taki taha? (e) Ko e hā ‘e tokoni ki ha tokotaha ke fai ha fili lelei?

⁸ Kapau ‘e tapui ‘e he fonua ‘okú ke nofo aí ‘etau lotú, te ke fifili nai pe ‘oku totonu ke ke hiki ki ha fonua ‘a ia ‘e lava ke tau‘atāina ai ho‘o tauhi kia Sihová. Ko e fili fakafo‘ituitui eni he‘ikai lava ke fai ‘e ha taha ma‘au. ‘E ‘aonga nai ki he ni‘ihi ‘a e fakakaukau ki he me‘a na‘e fai ‘e he kau Kalisitiane ‘i he ‘uluaki senitulí ‘i hono fakatanga‘i kinautolú. Hili hono tolomaka‘i ‘e he ngaahi filí ‘a Sitīveni ‘o maté, ko e kau ākonga ‘i Selusalemá na‘a nau hiki ki Siutea mo Samēlia pea a‘u atu ki Finisia, Saipalo mo ‘Aniteoke. (Māt. 10:23; Ngā. 8:1; 11:19) Kae kehe, ‘oku fakatokanga‘i nai ‘e he ni‘ihi ‘i he hili ha toe fakatanga‘i lahi ‘a e kau Kalisitiane ‘i he ‘uluaki senitulí, na‘e fili ‘a e ‘apositolo ko Paulá ke ‘oua te ne hiki mei he feitu‘u na‘e fakafepaki‘i ai ‘a e ngāue fakamalangá. ‘I hono kehé, na‘á ne tuku ‘ene mo‘uí ke ‘i ha tu‘unga fakatu‘utāmaki ke fakamafola ‘a e ongoongo leleí pea fakaivimālohi‘i ‘a e fanga tokoua ‘i he koló ‘a ia na‘a nau tofanga ‘i he fakatanga lahí.​—Ngā. 14:19-23.

⁹ Ko e hā ‘oku tau ako mei he ngaahi fakamatala ko ení? Ko e ‘ulu‘i fāmili taki taha kuo pau ke ne fai ha fili fakafo‘ituitui fekau‘aki mo e hikí. Ki mu‘a ke fai ha filí, ‘oku totonu ke ne lotu pea fakakaukau fakalelei fekau‘aki mo e ngaahi tu‘unga ‘o hono fāmilí pea mo e ola lelei mo e kovi nai ‘o e hikí kiate kinautolu. ‘I he me‘á ni, ko e Kalisitiane taki taha kuo pau ke ne “fua ‘ene kavenga pē ‘a‘ana.” (Kal. 6:5) ‘Oku totonu ke ‘oua te tau fakamāu‘i ‘a e fili ‘oku fai ‘e he ni‘ihi kehé.

10. Ko e hā ‘a e tataki ‘e ‘oatu ‘e he ‘ōfisi va‘á mo e kau mātu‘á?

¹⁰ ‘E lava fēfē ke hokohoko atu ho‘o lotu kia Sihová ‘i he malumalu ‘o e fakataputapuí? ‘E ‘ave ‘e he ‘ōfisi va‘á ki he kau mātu‘a fakalotofonuá ‘a e ngaahi fakahinohino mo e fokotu‘u ‘aonga fekau‘aki mo e founga ke ma‘u ai ‘a e me‘akai fakalaumālié, founga ke fakatahataha ai ki he lotú mo e founga ke malanga‘i ai ‘a e ongoongo leleí. Kapau he‘ikai lava ‘a e ‘ōfisi va‘á ke fetu‘utaki ki he kau mātu‘á, ko e kau mātu‘á leva te nau tokoni‘i koe mo e kotoa ‘o e fakataha‘angá ke hokohoko atu ho‘omou lotu kia Sihová. Te nau ‘oatu ‘a e tataki ‘o fehoanaki mo e fale‘i ‘oku ma‘u ‘i he Tohi Tapú mo ‘etau ‘ū tohi faka-Kalisitiané.​—Māt. 28:19, 20; Ngā. 5:29; Hep. 10:24, 25.

11. Ko e hā ‘oku lava ai ke ke fakapapau‘i te ke ma‘u ‘a e me‘akai fakalaumālié, pea ko e hā ‘e lava ke ke fai ke malu‘i ai ‘a e tokonaki ko iá?

¹¹ Na‘e tala‘ofa ‘e Sihova ko ‘ene kau sevānití ‘e fafanga‘i lelei fakalaumālie. (‘Ai. 65:13, 14; Luke 12:42-44) Ko ia ‘e lava ke ke fakapapau‘i ko  ‘ene kautahá te ne fai ‘a e me‘a kotoa ‘e malavá ke tokonaki ‘a e fakalototo‘a fakalaumālie ‘okú ke fiema‘ú. Ko e hā ‘e lava ke ke faí? ‘I he malumalu ‘o e fakataputapuí, kumi ha feitu‘u lelei ke fūfuu‘i ai ho‘o Tohi Tapú mo ha me‘akai fakalaumālie pē nai ‘okú ke ma‘u. Tokanga ke ‘oua ‘aupito te ke li‘aki ‘a e ngaahi naunau mahu‘inga ko iá​—pe ‘i he tatau ‘oku pulusi pe faka‘ilekitulōnika—​‘i ha feitu‘u ‘e lavangofua ke ‘ilo‘i. Ko e tokotaha taki taha ‘o kitautolu kuo pau ke tau fou ‘i he ngaahi sitepu ‘aonga ke hanganaki mālohi fakalaumālie ai.

12. ‘E lava fēfē ke fokotu‘utu‘u ‘e he kau mātu‘á ‘a e ngaahi fakatahá ke ‘oua ‘e fu‘u fakatokanga‘í?

¹² Fēfē ‘a e ngaahi fakataha fakauike ki he lotú? ‘E fokotu‘utu‘u nai ‘e he kau mātu‘á ke ke ma‘u ‘a e ngaahi fakatahá ‘i ha founga he‘ikai tohoaki‘i atu ai ha tokanga ta‘etotonu. Te nau fakahinohino‘i nai koe ke fakataha ‘i ha fanga ki‘i kulupu iiki pea ngalingali te nau toutou liliu ‘a e taimi fakatahá mo e feitu‘ú. ‘E lava ke ke tokoni ki he malu ‘a e tokotaha kotoa ‘oku ‘i aí ‘aki ‘a e lea le‘o-si‘i ‘i he ‘alu pe foki mei he ngaahi fakatahá. ‘E toe fiema‘u nai ke ke ‘ai vala ‘i ha founga he‘ikai tohoaki‘i atu ai ‘a e tokangá.

13. Ko e hā ‘e lava ke tau ako mei hotau fanga tokoua ‘i he Sovieti ‘Iunioni ki mu‘á?

¹³ ‘I he fekau‘aki mo e ngāue fakamalangá, ‘e kehekehe pē ‘a e ngaahi tu‘ungá mei he feitu‘u ki he feitu‘u. Ka ‘oku tau ‘ofa kia Sihova pea fiefia ke tala ki he ni‘ihi kehé ‘a hono Pule‘angá, ko ia te tau kumi ki ha founga ke malanga ai. (Luke 8:1; Ngā. 4:29) ‘I he lave ki he ngāue fakamalanga ‘a e Kau Fakamo‘oni ‘a Sihová ‘i he Sovieti ‘Iunioni ki mu‘á, na‘e pehē ‘e ha faihisitōlia ko Emily B. Baran: “‘I hono tala ‘e he pule‘angá ki he kau tuí he‘ikai lava ke nau malanga‘i ‘enau tuí ki he ni‘ihi kehé, na‘e kamata talanoa ‘a e Kau Fakamo‘oní ki honau kaungā‘apí, kaungāngāué mo e kaungāme‘á. ‘I he‘enau iku ki he ngaahi kemi fakamamahí koe‘uhi ko ‘enau ngāue ko ení, ko e Kau Fakamo‘oní na‘a nau fakaului mai honau kaungāpilīsoné.” Neongo ‘a e fakataputapuí, ko hotau fanga tokoua ‘i he Sovieti ‘Iunioni ki mu‘á na‘e ‘ikai tuku ‘enau malangá. Ka faifai ange pea tapui ‘a e ngāue fakamalangá ‘i he feitu‘u ‘okú ke nofo aí, ‘ofa ke ke ma‘u ‘a e fakapapau tatau!

14. Ko e hā ‘a e tauhele ‘e lava ke tokoni‘i kitautolu ‘e he Saame 39:1 ke tau faka‘ehi‘ehi mei aí?

¹⁴ Tokanga fekau‘aki mo hono vahevahe atu ‘o e fakamatalá. Lolotonga ha fakataputapui, kuo pau ke tau ‘ilo‘i ‘oku ‘i ai ‘a e “taimi ke fakalongolongo.” (Tml. 3:7) Kuo pau ke tau malu‘i ‘a e fakamatala pelepelengesí, hangē ko e hingoa hotau fanga tokouá mo e fanga tuofāfiné, ngaahi feitu‘u ‘oku tau fakataha aí, founga ‘oku tau fakahoko ai ‘etau ngāue fakafaifekaú mo e founga ‘oku tau ma‘u ai ‘a e me‘akai fakalaumālié. He‘ikai ke tau fakahaa‘i ‘a e ngaahi me‘á ni ki he kau ma‘u mafai fakamāmaní; pe te tau vahevahe ia ki hotau ngaahi kaume‘a lelei pe kāinga ‘i hotau fonuá pe ‘i ha fonua kehe. Kapau te tau tō ‘i he tauhele ko ení, te tau ‘ai ai ‘a hotau fanga tokouá ke nau ‘i ha tu‘unga fakatu‘utāmaki.​—Lau ‘a e Saame 39:1.

15. Ko e hā ‘e feinga ‘a Sētane ke fai mai kiate kitautolú, pea ‘e lava fēfē ke tau faka‘ehi‘ehi mei he‘ene tauhelé?

 ¹⁵ ‘Oua ‘e faka‘atā ‘a e fanga ki‘i palopalema īkí ke ne fakamavahevahe‘i kitautolu. ‘Oku ‘ilo ‘e Sētane ko ha ‘api māvahevahe he‘ikai lava ke tu‘u. (Mk. 3:24, 25) Te ne feinga ma‘u pē ke fakatupunga ha māvahevahe ‘i hotau lotolotongá. ‘I he founga ko iá, ‘okú ne loto ke tau hoko ‘o feke‘ike‘i kae ‘ikai ke tau faitau mo ia.

16. Ko e hā ‘a e fa‘ifa‘itaki‘anga lelei na‘e fokotu‘u mai ‘e Tuofefine Gertrud Poetzinger?

¹⁶ Na‘a mo e kau Kalisitiane matu‘otu‘á ‘oku fiema‘u ke nau malu‘i kinautolu ke ‘oua te nau tō ‘i he tauhele ko ení. Fakakaukau ki he fa‘ifa‘itaki‘anga ‘a e ongo tuofāfine pani ko Gertrud Poetzinger mo Elfriede Löhr. Na‘e tuku pilīsone fakataha kinaua mo e fanga tuofāfine Kalisitiane kehe ‘i ha kemi fakamamahi Nasi. Na‘e kamata meheka ‘a Gertrud ‘i hono fai ‘e Elfriede ‘a e ngaahi malanga fakalototo‘a ki he fanga tuofāfine kehe ‘i he kemí. Ki mui ai, na‘e ongo‘i fakamā‘ia ‘a Gertrud pea kōlenga ki he tokoni ‘a Sihová. Na‘á ne tohi: “‘I he taimi ‘oku ma‘u ai ‘e he ni‘ihi kehé ‘a e ngaahi malava lahi ange pe ma‘u ‘a e ngaahi fatongia lahi ange ‘ia kitautolu kuo pau ke tau ako ke tali ia.” Na‘e anga-fēfē ‘ene iku‘i ‘a e meheká? Na‘e tokangataha ‘a Gertrud ki he ngaahi ‘ulungaanga lelei ‘o Elfriede mo ‘ene ngaahi tō‘onga fakamānakó. ‘I he foungá ni, na‘á ne toe ma‘u ‘a hono vaha‘angatae lelei mo Elfriede. Na‘á na fakatou hao mei he kemi fakamamahí pea tauhi faitōnunga kia Sihova ‘o a‘u ki he ngata‘anga ‘o ‘ena mo‘ui ‘i he māmaní. Kapau te tau ngāue mālohi ke iku‘i ‘a e ngaahi fetōkehekehe‘aki mo hotau fanga tokouá, te tau faka‘ehi‘ehi ai mei he tauhele ‘o e ta‘efā‘ūtahá.​—Kol. 3:13, 14.

17. Ko e hā kuo pau ai ke tau faka‘ehi‘ehi mei he ‘afungí?

¹⁷ Faka‘ehi‘ehi mei he ‘afungí. Kapau te tau muimui ki he fakahinohino ‘oku tau ma‘u mei he fanga tokoua falala‘anga, fua fatongiá, te tau faka‘ehi‘ehi ai mei he ngaahi palopalemá. (1 Pita 5:5) Ko e fakatātaá, ‘i ha fonua ‘oku tapui ai ‘a e ngāué, na‘e fakahinohino ‘e he fanga tokoua fua fatongiá ki he kau malangá ke ‘oua ‘e tufa ha tohi kuo pulusi ‘i he ngāue fakafaifekaú. Neongo ia, ko ha tokoua tāimu‘a ‘i he feitu‘u ko iá na‘á ne ongo‘i ‘oku tonu ange ‘ene fakakaukaú peá ne tufa ha tohi. Ko e hā ‘a e olá? ‘I he hili pē ‘ene faifakamo‘oni ‘i he founga ‘ikai anga-mahení mo e ni‘ihi kehe, na‘e fakafehu‘i kinautolu ‘e he kau polisí. Ngalingali, na‘e muimui‘i kinautolu ‘e he kau ‘ōfisá pea na‘e malava ke nau ma‘u ‘a e ‘ū tohi na‘a nau tufá. Ko e hā ‘oku tau ako mei he hokosia ko ení? ‘Oku fiema‘u ke tau muimui ki he fakahinohinó ‘o a‘u ki he taimi ‘oku tau ongo‘i ai ‘oku tonu ange ‘etau fakakaukaú. ‘Oku tāpuaki‘i ma‘u pē kitautolu ‘e Sihova ‘i he‘etau ngāue fakataha mo e fanga tokoua ‘a ia kuó ne fakanofo ke nau takimu‘a ‘iate kitautolú.​—Hep. 13:7, 17.

18. Ko e hā kuo pau ai ke tau faka‘ehi‘ehi mei hono fokotu‘u ‘a e ngaahi lao ‘ikai fiema‘ú?

¹⁸ ‘Oua ‘e fokotu‘u ha ngaahi lao ‘ikai fiema‘u.  Kapau ‘oku fokotu‘u ‘e he kau mātu‘á ha ngaahi lao ‘ikai fiema‘u, te nau ‘ai ke mafasia ‘a e ni‘ihi kehé. Na‘e manatu ‘a Tokoua Juraj Kaminský ki he me‘a na‘e hoko ‘i he fakataputapui ‘i Sekisolovākia ki mu‘á: “Hili hono puke ‘a e fanga tokoua fua fatongia mo e kau mātu‘a tokolahi, ko e ni‘ihi na‘a nau takimu‘a ‘i he ngaahi fakataha‘angá mo e ngaahi sēketí na‘e kamata ke nau ‘oatu ‘a e ngaahi lao ki he tō‘onga ‘a e kau malangá, ‘o ‘ai ha lisi ‘o e me‘a ke fai mo ‘ikai ke faí.” Kuo ‘ikai ke ‘omai ‘e Sihova kiate kitautolu ‘a e mafai ke fai ‘a e ngaahi fili fakafo‘ituitui ma‘á e ni‘ihi kehé. Ko ha taha ‘okú ne fokotu‘u ‘a e ngaahi lao ‘ikai fiema‘ú ‘oku ‘ikai ke ne malu‘i ‘a hono tokouá​—‘okú ne feinga ke hoko ko e pule ki he tui ‘a hono tokouá.​—2 Kol. 1:24.

19. Fakatatau ki he 2 Kalonikali 32:7, 8, ko e hā ‘e lava ai ke tau loto-to‘a neongo ‘a e ngaahi feinga ‘a Sētané?

¹⁹ Ko hotau fili tefitó, ‘a Sētane ko e Tēvoló, he‘ikai tuku ‘ene feinga ke fakatanga‘i ‘a e kau sevāniti faitōnunga ‘a Sihová. (1 Pita 5:8; Fkh. 2:10) Ko Sētane mo ‘ene kau fakafofongá te nau feinga ke tapui ‘etau lotu kia Sihová. Kae kehe, ‘oku ‘ikai ha ‘uhinga ia ke tau faka‘atā ‘a e manavaheé ke ne lōmekina kitautolu! (Teu. 7:21) ‘Oku kau ‘a Sihova mo kitautolu, pea te ne hokohoko atu ke poupou‘i kitautolu neongo kapau ‘e tapui ‘etau ngāué.​—Lau ‘a e 2 Kalonikali 32:7, 8.

20. Ko e hā ho‘o fakapapaú?

²⁰ ‘Ofa ke tau ma‘u ‘a e fakapapau tatau mo ia na‘e ma‘u ‘e hotau ongo tokoua ‘i he ‘uluaki senitulí, ‘a ia na‘á na tala ki hona kau pulé: “Tatau ai pē pe ‘oku totonu ‘i he vakai ‘a e ‘Otuá ke ma fanongo kiate kimoutolu kae ‘ikai ki he ‘Otuá, fai ha‘amou fakamaau. Ka kiate kimaua, ‘e ‘ikai lava ke tuku ‘ema lea ‘o fekau‘aki mo e ngaahi me‘a kuó ma mamata mo fanongo ki aí.”​—Ngā. 4:19, 20.