1-2. (a) Nkaambo nzi ncotuteelede kugambwa ikuti bukombi bwesu bwalesyegwa? (b) Ncinzi ncotutiilange-lange mucibalo eeci?

MU 2018, basikumwaya bamakani mabotu ibainda ku 223,000 bakali kukkala mumasena milimo yesu yakumuuya moyakalesyedwe. Eeci tacigambyi pe. Kweelana ambotwakaiya mucibalo cainda, Banakristo bakasimpe balangila kupenzyegwa. (2Tim. 3:12) Kufwumbwa naa tukkala kuli, cakutayeeyela mfwulumende ilakonzya kutulesya kukomba Leza wesu siluyando, Jehova.

² Ikuti naa mfwulumende yamucisi momukkala yasala kumulesya kukomba Jehova, ambweni inga mwalibuzya mibuzyo mbuli bwayeeyi: ‘Sena kupenzyegwa kutondezya kuti Leza tacitukkomanini? Sena kulesyegwa kulapa kuti tulekele limwi kukomba Jehova? Sena ndilongele kubusena nkondikonzya kumukomba Leza cakuliiba?’ Tulaibandika mibuzyo eeyi mucibalo eeci. Kuyungizya waawo, tulalanga-langa mbotukonzya kuzumanana kukomba Jehova ciindi mulimo wesu noulesyedwe alimwi tulabona tukole ntotweelede kweeleba.

3. Kweelana alugwalo lwa 2 Bakorinto 11:23-27, mapenzi nzi mwaapostolo Paulo ngaakajana alimwi ino cikozyanyo cakwe cituyiisya nzi?

³ Ikuti mfwulumende yabulesya bukombi bwesu, tulakonzya kuyeeya kuti Leza tacitukkomanini. Pele amuyeeye kuti, kupenzyegwa tacaambi kuti Jehova tatukkomanini. Amubone cikozyanyo camwaapostolo Paulo. Leza wakali kumukkomanina. Wakaba acoolwe cakulemba Magwalo aa Banakristo aa Chigiriki aali 14 alimwi wakali mwaapostolo kuli bamasi. Nokuba boobo, Paulo wakapenzyegwa citaambiki. (Amubale 2 Bakorinto 11:23-27.)  Aboobo icakacitikila mwaapostolo Paulo cituyiisya kuti zimwi ziindi Jehova ulazumizya babelesi bakwe basyomeka kupenzyegwa.

4. Nkaambo nzi nyika ncoitusulaika?

⁴ Jesu wakapandulula kaambo ncotweelede kulangila kukazyigwa. Wakaamba kuti tuyoosulaikwa akaambo kakuti tatuli banyika. (Joh. 15:18, 19) Aboobo kupenzyegwa tacili citondezyo cakuti Jehova tacitukkomanini. Muciindi caboobo, ncitondezyo cakuti tucita ciluzi!

5. Sena bantu balya maila balakonzya kutulesyela limwi kukomba Jehova? Amupandulule.

⁵ Bantu balya maila ibatukazya tabakonzyi kutulesyela limwi kukomba Leza Singuzuzyoonse, Jehova. Ibanji bakasola, pele bakaalilwa. Amubone cakacitika lya Nkondo Yanyika Yoonse Yabili. Kuciindi eeco, mfwulumende muzisi zinji zyakali kubapenzya kapati bantu ba Leza. Mulimo wa Bakamboni ba Jehova wakalesyegwa, ikutali buyo ankamu ya Nazi mucisi ca Germany pele alimwi amfwulumende yamucisi ca Australia, Canada alimwi amuzisi zimbi. Pele amubone cakacitika. Noyakatalika nkondo mu 1939, munyika yoonse kwakali buyo basikumwaya ibali 72,475. Kwiinda mukugwasyigwa a Jehova, malipooti atondezya kuti noyakamana nkondo mu 1945, kwakali basikumwaya ibali 156,299. Mweelwe wabasikumwaya wakayungizyika ziindi ziinda aali zyobilo!

6. Muciindi cakutupa kuyoowa, ino kukazyigwa inga kwatupa kucita nzi? Amupe cikozyanyo.

⁶ Muciindi cakutupa buyo kuyoowa, kukazyigwa kulakonzya kutukulwaizya kumubelekela Jehova cakumaninina. Mucikozyanyo, banabukwetene bamwi ibakajisi mwana muvwanda bakali kukkala mucisi oomo bukombi bwesu mobwakalesyegwa amfwulumende. Muciindi cakuyoowa alimwi akujoka munsi kubelekela Jehova, banabukwetene aaba bakatalika bupainiya bwaciindi coonse. Mane buya bakaintu bakauleka mulimo uuvwolwa mali manji kutegwa bacite bupainiya. Balumi bakaamba kuti kulesyegwa kwamulimo wesu kwakapa kuti bantu banji bayande kuzyiba zinji kujatikizya Bakamboni ba Jehova. Aboobo, cakabaubila kutalisya ziiyo zya Bbaibbele. Kulesyegwa ooku alimwi kwakapa kuti abamwi babweze ntaamu. Mwaalu umwi wamucisi eeci wakaamba kuti, bunji bwabaabo ibakacilekede kubelekela Jehova bakatalika kujanika kumiswaangano alimwi akukambauka.

7. (a) Ncinzi ncotwiiya kulugwalo lwa Levitiko 26:36, 37? (b) Ncinzi ncomuyoocita ikuti bukombi bwesu bwalesyegwa?

⁷ Ciindi basinkondoma nobabulesya bukombi  bwesu, inga bayanda kuti tuyoowe kubelekela Jehova. Kunze buyo lyakulesya bukombi bwesu, balakonzya kutalika kwaamba makani aakubeja kujatikizya ndiswe, kutuma basilikani kunjila mumaanda eesu, kututola kunkuta, nokuba kubabikka muntolongo bamwi. Bayeeya kuti inga twayoowa akaambo kakuti bacikonzya kubabikka muntolongo bamwi besu. Ikuti naa twabazumizya kutukonga, inga capa kuti “tubuleke” bukombi bwesu. Pele tatuyandi kuba mbuli baabo ibaambidwe kulugwalo lwa Levitiko 26:36, 37. (Amubale.) Tatukalekeli kuyoowa kutupa kujoka munsi naa kuleka kubelekela Jehova. Tulamusyoma Jehova cakumaninina alimwi kunyina notuzwa moyo. (Is. 28:16) Tulapaila kuli Jehova kulomba busolozi bwakwe. Tulizyi kuti kwiinda mukugwasyigwa anguwe, kunyina mfwulumende iili yoonse, noiba yeeyo ilaanguzu kapati iikonzya kutulesya kukomba Leza wesu cakusyomeka.—Heb. 13:6.

8-9. (a) Nkusala nzi silutwe wamukwasyi naa Munakristo umwi aumwi nkwayelede kucita? (b) Ncinzi cikonzya kugwasya muntu kuti asale cabusongo?

⁸ Ikuti naa mfwulumende yamucisi momukkala yabulesya bukombi bwesu, ambweni mulakonzya kuyeeya kulongela kucisi cimbi nkomukonzya kubelekela Jehova cakwaanguluka. Eeci ncakusala canu alimwi kunyina muntu uuli woonse uukonzya kumusalila. Kabatanasala cakucita, bamwi bacibona kuti inga cabagwasya kulanga-langa ncobakacita Banakristo bamumwaanda wamyaka wakusaanguna ciindi nobakapenzyegwa. Ciindi basinkondo nobakamupwaya mabwe Sitefano akumujaya, basikwiiya ibakali mu Jerusalemu bakalongela mumasena oonse aamu Judaya a Samariya, mane buya bakaakusika ku Fonike, ku Kupro aku Antiokeya. (Mt. 10:23; Mil. 8:1; 11:19) Nokuba boobo, bamwi balakonzya kulanga-langa ncaakacita Paulo ciindi Banakristo bamumwaanda wamyaka wakusaanguna nobakapenzyegwa alimwi. Mwaapostolo Paulo wakayeeya kuti atazwi mumasena oomo bantu mobakali kuukazya mulimo wakukambauka nokuba kuti kucita boobo kwakali kukonzya kubikka buumi bwakwe muntenda. Pele wakacita oobo akaambo kakuti wakali kuyanda kukambauka makani mabotu alimwi akuyumya bakwesu ibakali kupenzyegwa kapati.—Mil. 14:19-23.

⁹ Ino twiiya nzi kuzibalo eezyi? Silutwe wamukwasyi umwi aumwi weelede kulisalila kujatikizya makani aakulonga. Pele katanacita oobo, weelede kupaila akubikkila maano kubukkale bwamukwasyi wakwe, bubotu alimwi abubi ibukonzya kuboola akaambo kakulonga. Mumakani aaya, Munakristo aumwi weelede “kunyamuna mukuli wakwe uumugeme.” (Gal. 6:5) Aboobo tatweelede kubabeteka bamwi kweelana akusala kwabo.

10. Ino mbusolozi nzi mbobayoopa bakuofesi yamutabi alimwi abaalu?

¹⁰ Mbuti mbomukonzya kuzumanana kukomba Jehova ciindi mulimo wesu nowalesyegwa? Bakuofesi yamutabi bayoopa baalu malailile alimwi anzila zigwasya kujatikizya mbomukonzya kutambula cakulya cakumuuya, kuba amiswaangano alimwi ambomukonzya kukambauka makani mabotu. Ikuti naa bakuofesi yamutabi kabatacikonzyi kubandika abaalu, nkokuti baalu bayoomugwasya antoomwe ambungano yoonse kuzumanana kukomba Jehova. Bayoomupa malailile aayendelana abusolozi bujanika mu Bbaibbele alimwi amumabbuku eesu aa Bunakristo.—Mt. 28:19, 20; Mil. 5:29; Heb. 10:24, 25.

11. Nkaambo nzi ncomujisi lusyomo lwakuti lyoonse munoojisi nzyomuyandika kumuuya kutegwa muzumanane kuba alusyomo luyumu? Ino ncinzi ncomukonzya kucita kutegwa mukwabilile Bbaibbele lyanu alimwi amabbuku aambi aakumuuya?

¹¹ Jehova wakasyomezya kuti babelesi bakwe banoojisi zyoonse nzyobayandika kumuuya kutegwa  bazumanane kuba alusyomo luyumu. (Is. 65:13, 14; Lk. 12:42-44) Aboobo mulakonzya kuba masimpe kuti mbunga yakwe iyoocita kufwumbwa ncoikonzya kumupa nzyomuyandika kumuuya kutegwa muzumanane kusyomeka. Pele andinywe kuli ncomweelede kucita. Kuti milimo yesu yalesyegwa, mweelede kujana busena bubotu bwakusisa Bbaibbele lyanu alimwi amabbuku aambi akumuuya aali woonse ngomujisi. Amubikkile maano kutegwa mutazisiyi aatuba zibelesyo eezyi ziyandika kapati, tacikwe makani zisimbidwe buya naa zili mutuncini. Umwi aumwi wesu weelede kucita kufwumbwa ncakonzya kutegwa azumanane kuba alusyomo luyumu.

12. Mbuti baalu mbobakonzya kubikka bubambe bwakuti kamuswaangana cakusisikizya?

¹² Mbuti kujatikizya miswaangano yesu yansondo ansondo? Baalu bayoobikka bubambe bwakuti kamuswaangana cakusisikizya. Ambweni bayoomwaambila kuswaangana mutubunga alimwi banoocinca-cinca ciindi abusena bwakuswaanganina. Mulakonzya kubakwabilila bakwesu kwiinda mukwaambaula caansaansi ciindi nomunjila naa kuzwa kumiswaangano. Kuyungizya waawo, ambweni inga mwayandika kusama munzila yakuti bantu batazyibi kuti muya kumiswaangano.

13. Ncinzi ncotukonzya kwiiya kubakwesu baku Soviet Union yakaindi?

¹³ Kujatikizya mulimo wakukambauka, bukkale bunakwiindana kweelana abusena. Pele akaambo kakuti tulamuyanda Jehova alimwi tulakkomana kwaambila bantu kujatikizya Bwami bwakwe, tuyoojana nzila mbotukonzya kukambauka. (Lk. 8:1; Mil. 4:29) Kaamba kujatikizya mulimo wakukambauka wa Bakamboni ba Jehova mu Soviet Union yakaindi, syaazibwene mumakani aakaindi Emily B. Baran wakaamba kuti: “Ciindi mfwulumende noyakaambila Bakamboni ba Jehova kuti baleke kukambauka, Bakamboni bakali kutalisya mibandi kuli basimukobonyina, babelesinyina alimwi abalongwe babo. Mpoonya ciindi nobakaangwa akaambo kakucita boobo, Bakamboni bakatalika kukambaukila baangenyina.” Nokuba kuti mulimo wakukambauka wakalilesyedwe, bakwesu baku Soviet Union yakaindi bakazumanana kukambauka. Ikuti mulimo wakukambauka ulilesyedwe kubusena nkomukkala, amwiiye cikozyanyo cabo!

14. Ino lugwalo lwa Intembauzyo 39:1 inga lwatugwasya kweeleba kakole nzi?

¹⁴ Atucenjele kujatikizya makani ngotwaambila bamwi. Ciindi mulimo wesu nowalesyegwa, tweelede kuzyiba “ciindi cakuumuna.” (Muk. 3:7) Tweelede kubikkila maano kutegwa tutayubununi makani aamaseseke. Makani aayo alakonzya kubikkilizya mazina aabakwesu abacizyi, masena nkotuswaanganina, mbotucita mulimo wesu wakukambauka alimwi ambotutambula cakulya cakumuuya. Tatweelede kuyubununa makani aaya kubeendelezi bamfwulumende  naa kwaambila balongwe besu abamukwasyi ibali mucisi motukkala naa kumasi aambi. Ikuti naa twacegwa mukakole aaka, tulakonzya kubikka buumi bwabakwesu muntenda.—Amubale Intembauzyo 39:1.

15. Ncinzi Saatani ncayoosola kucita alimwi mbuti mbotukonzya kukeeleba kakole kakwe?

¹⁵ Tutalekeli twaambo tutayi koomoonga kutwaandaanya. Saatani ulizyi kuti ŋanda yaandeene taikonzyi kwiima. (Mk. 3:24, 25) Uyoosola cakwiinduluka-induluka kutwaandaanya. Kwiinda mukucita boobo, uyanda kuti katulwana akati kesu muciindi cakulwana nguwe.

16. Ino ncikozyanyo nzi cibotu ncaakatondezya Mucizyi Gertrud Poetzinger?

¹⁶ Nobaba Banakristo basimide beelede kubikkila maano kutegwa batacegwi akakole aaka. Atubone cikozyanyo cabacizyi bobilo bananike, ba Gertrud Poetzinger alimwi aba Elfriede Löhr. Bakaangwa antoomwe abacizyi Banakristo bamwi mucilabba cakupenzezya ca Nazi. Ba Gertrud bakaba amunyono ciindi ba Elfriede nobakapa makani aakabakulwaizya bacizyi bamwi ibakali mucilabba. Nokwakainda ciindi, ba Gertrud bakabona kuti balubizya mpoonya bakalomba Jehova kuti abagwasye. Bakalemba kuti: “Tatweelede kuba amunyono ciindi bamwi nobacita kabotu zintu kwiinda mbotucita naa nobajisi mikuli minji kwiinda njotujisi.” Ino mbuti ba Gertrud mbobakauzunda munyono? Bakabikkila maano kubube bubotu alimwi amuuya wabulongwe ngobakajisi ba Elfriede. Kwiinda mukucita boobu, ba Gertrud bakacibambulula cilongwe cabo aba Elfriede. Boonse bakazwa mucilabba cakupenzezya alimwi bakamubelekela Jehova cakusyomeka kusikila ciindi nobakamanizya buumi bwabo bwaanyika. Ikuti twabeleka canguzu kumana mazwanga ngotukonzya kuba angawo abakwesu, tatukazumizyi cintu cili coonse kutwaandaanya.—Kol. 3:13, 14.

17. Nkaambo nzi ncotweelede kwaatobela lyoonse malailile aazwa kumbunga ya Jehova?

¹⁷ Atutobele malailile lyoonse. Ikuti katutobela malailile aazwa kubakwesu beendelezya aabo mbotusyoma, tuyootantamuka mapenzi. (1Pet. 5:5) Mucikozyanyo, mucisi oomo mulimo wesu moulesyedwe, bakwesu beendelezya bakapa malailile aakuti basikumwaya batanoopi bantu mabbuku ciindi nobali mumuunda. Pele mupainiya wakubusena ooko tanaakaatobela malailile aaya. Ino ncinzi cakacitika? Muciindi buyo cisyoonto kuzwa ciindi mukwesu ooyo alimwi abamwi nobakamana kucita bukambausi bwamukwiizya, bamapulisa bakatalika kubabuzya mibuzyo. Kweelede kuti bamapulisa aaba bakali kuyaabubatobela alimwi akuyaabunyanga bantu mabbuku aayo ngobakali kubapa. Ino twiiya nzi kuliceeci cakacitika? Tweelede kwaatobela malailile nokuba kuti tatwaakkomanini. Lyoonse Jehova ulatulongezya ciindi notubelekela antoomwe abakwesu aabo mbasalide kuti kabasololela akati kesu.—Heb. 13:7, 17.

18. Nkaambo nzi ncotuteelede kubikka milawo iitayandiki?

 ¹⁸ Mutani kubikki milawo njobatayandiki bantu. Ikuti baalu kababikka milawo njobatayandiki bantu, bayoopa kuti zintu zibayumine bamwi. Mukwesu Juraj Kaminský ulayeeya cakacitika ciindi mulimo wesu nowakalesyedwe ku Czechoslovakia yakaindi. Wakaamba kuti: “Ciindi bakwesu ibakali kweendelezya alimwi abaalu banji nobakaangwa, bamwi akati kabaabo ibakali kusololela mumbungano alimwi amumabazu bakatalika kubikkila basikumwaya milawo kujatikizya mbobakeelede kulilemeka. Bakapanga mulongo wazintu zyakeelede kucitwa alimwi azyatakeelede kucitwa.” Jehova kunyina naakatupa nguzu zyakusalila bamwi zintu nzyobeelede kucita. Muntu uubikkila basyominyina milawo iitayandiki mubwini tabakwabilili pe, pele usola kuba simalelo walusyomo lwabo.—2Kor. 1:24.

19. Kweelana alugwalo lwa 2 Makani 32:7, 8, nkaambo nzi ncotukonzya kuba basicamba nokuba kuti Saatani wasoleka kutupenzya?

¹⁹ Sinkondoma mupati, Saatani Diabolosi, takaleki kusola kubapenzya babelesi ba Jehova basyomeka. (1Pet. 5:8; Ciy. 2:10) Saatani alimwi abaabo ibali kulubazu lwakwe bayoosola kulesya bukombi bwesu. Nokuba boobo, tatweelede kutyompwa akaambo kakuyoowa! (Dt. 7:21) Jehova uli kulubazu lwesu alimwi unootugwasya lyoonse nociba ciindi mulimo wesu nowalesyegwa.—Amubale 2 Makani 32:7, 8.

20. Ino mukanzide kucita nzi?

²⁰ Atube amakanze akozyenye angobakajisi bakwesu bamumwaanda wamyaka wakusaanguna. Bakaambila beendelezi bamumazuba aabo kuti: “Naa cililuleme mumeso aa Leza kumvwida ndinywe muciindi cakumvwida Leza, amulisalile nobeni. Pele swebo, tatukonzyi kuleka kwaamba zintu nzyotwakabona akumvwa.”—Mil. 4:19, 20.