1-2. (a) Wai na yumi no ken kirap nogut taim gavman i tambuim wok lotu bilong yumi? (b) Long dispela atikol, yumi bai stori long wanem samting?

LONG 2018, winim 223 tausen pablisa i stap long ol kantri we gavman i tambuim wok lotu bilong yumi. Yumi no kirap nogut long dispela. Olsem yumi skelim long atikol i kamap paslain, ol Kristen tru i save olsem ol birua bai mekim nogut long ol. (2 Tim. 3:12) Maski yumi stap long wanem wanem hap, gavman inap tambuim yumi long mekim wok bilong lotuim God bilong yumi, Jehova.

² Sapos gavman long kantri yumi stap long en i tambuim yumi long lotuim Jehova, ating yumi bai askim yumi yet olsem: ‘God i no orait moa long yumi? Yumi no inap moa long lotuim Jehova? I stret yumi go long narapela hap we yumi inap stap fri long lotuim God?’ Long dispela atikol, yumi bai stori long ol dispela askim. Yumi bai stori tu long olsem wanem yumi inap lotuim yet Jehova taim gavman i tambuim wok bilong yumi. Na tu, yumi bai skelim ol trap yumi mas abrusim.

3. Olsem 2 Korin 11:23-27 i kamapim, ol birua i mekim wanem long aposel Pol? (b) Stori bilong em i givim wanem skul long yumi?

³ Sapos gavman i tambuim wok lotu bilong yumi, yumi inap kisim tingting kranki olsem God i no orait moa long yumi. Tasol tingim, taim ol man i birua long yumi, dispela i no makim olsem God i kros long yumi. Tingim eksampel bilong aposel Pol. God i amamas long em, na em inap raitim  14-pela pas bilong Ol Skripsa Grik, na em i stap olsem aposel God i salim i go long ol manmeri bilong ol arapela lain. Maski i olsem, ol man i mekim nogut tru long em. (Ritim 2 Korin 11:23-27.) Stori bilong aposel Pol i helpim yumi long luksave olsem Jehova i save larim ol birua i mekim nogut long ol wokman bilong em.

4. Wai na ol manmeri bilong dispela graun i heitim yumi?

⁴ Jisas i kolim risen bilong ol manmeri long birua long yumi. Em i tok ol manmeri bai heitim yumi bikos yumi no insait long ol samting bilong dispela graun. (Jon 15:18, 19) Taim ol man i birua long yumi, dispela i no makim olsem Jehova i kros long yumi, nogat. Dispela i makim olsem yumi bihainim stretpela pasin!

5. Yu ting ol man inap stopim yumi long lotuim Jehova? Eksplenim.

⁵ Ol birua i no inap tru long stopim yumi long lotuim Jehova, em God i Gat Olgeta Strong. Planti birua i bin traim long mekim olsem, tasol ol i no inap. Skelim samting i kamap long taim bilong Wol Woa 2. Long dispela taim, ol gavman long planti kantri i mekim nogut tru long ol manmeri bilong God. Gavman Natsi long Jemani i tambuim wok bilong ol Witnes Bilong Jehova, na gavman bilong Australia, Kanada, na ol narapela kantri tu i mekim olsem. Tasol tingim samting i kamap. Taim woa i kirap long 1939, inap olsem 72,475 pablisa i stap long olgeta hap bilong graun. Taim woa i pinis long 1945, ripot i soim olsem Jehova i blesim wok na namba bilong ol pablisa i go antap inap olsem 156,299. Namba bilong ol pablisa i go antap inap 2-pela taim moa winim namba long pastaim!

6. Pasin birua inap kamapim wanem gutpela samting? Stori long wanpela eksampel.

⁶ Pasin birua inap pretim yumi. Tasol em inap kamapim gutpela samting tu. Em inap kirapim yumi long givim bel moa yet long mekim wok bilong Jehova. Tupela marit wantaim liklik pikinini boi bilong ol i stap long wanpela kantri we gavman i tambuim wok lotu bilong yumi. Tasol ol i no pret, olsem na ol i kirap mekim wok painia. Meri i lusim gutpela wok mani bambai em inap mekim wok painia. Man bilong em i tok, taim gavman i tambuim wok lotu bilong yumi, planti manmeri i laik save moa  long ol Witnes Bilong Jehova. Olsem na i no hatwok long em inap kirapim ol Baibel stadi. Dispela lo bilong gavman i helpim tu ol narapela. Wanpela elda long seim kantri i tok planti pablisa i bin stop long lotuim Jehova, tasol lo bilong gavman i mekim na ol i kirap gen long kam long miting na mekim wok autim tok.

7. (a) Yumi kisim wanem skul long tok bilong Wok Pris 26:36, 37? (b) Yu bai mekim wanem taim gavman i tambuim wok bilong yumi?

⁷ Taim ol birua i stopim wok lotu bilong yumi, ol i laik pretim yumi na bai yumi lusim wok bilong Jehova. Ol inap sutim ol tok giaman long yumi, salim polis i kam long sekim haus bilong yumi, fosim yumi long go long kot, o kalabusim sampela bilong yumi. Taim ol i kalabusim sampela wanbilip bilong yumi, ol i laik bai dispela i pretim yumi. Sapos yumi pret, yumi inap stopim yumi yet long mekim wok bilong Jehova. Yumi no laik kamap olsem ol manmeri em stori bilong ol i stap long Wok Pris 26:36, 37. (Ritim.) Yumi no inap larim pret i mekim na isi isi yumi lusim wok lotu o yumi lusim olgeta. Yumi trastim tru Jehova na yumi no inap pret na guria. (Ais. 28:16) Yumi beten askim Jehova long stiaim yumi. God i sambai long yumi, olsem na i no gat wanpela gavman long graun i gat pawa long stopim yumi long lotuim God.—Hib. 13:6.

8-9. (a) Ol het bilong famili na olgeta wan wan Kristen i gat wok long mekim wanem disisen? (b) Wanem samting inap helpim Kristen long mekim gutpela disisen?

⁸ Sapos gavman long kantri yu stap long en i tambuim wok bilong yumi, yu inap pilim olsem yu mas go long narapela hap na bai yu stap fri long lotuim Jehova. Dispela em disisen yu yet i mas mekim. Paslain long yu mekim disisen, i gutpela long skelim eksampel bilong ol Kristen long taim bilong ol aposel. Bihain long ol birua i stonim Stiven na kilim em i dai, ol disaipel long Jerusalem i go sindaun long Judia na Samaria, na long ol ples olsem Fonisia, Saiprus, na Antiok. (Mat. 10:23; Apo. 8:1; 11:19) Tasol taim ol man i stat long birua gen long ol Kristen, aposel Pol i stap yet long ol ples we ol man i birua long wok autim tok. Em i redi long sambai long gutnius na strongim ol Kristen em ol i stap long ol taun we ol birua i mekim nogut tru long ol.—Apo. 14:19-23.

⁹ Yumi kisim wanem skul long ol dispela stori? Ol het bilong famili bai mekim disisen olsem ol bai i go long narapela ples o nogat. Paslain long mekim disisen, ol i mas beten na skelim gut sindaun bilong famili, na tingim ol gutpela samting na ol samting nogut we inap kamap taim ol i go long narapela ples. Olgeta wan wan Kristen i mas “mekim ol samting em ol yet i gat wok long mekim.” (Gal. 6:5) Yumi no ken skelim disisen bilong ol narapela.

10. Brens ofis na ol elda bai givim instraksen long wanem ol samting?

¹⁰ Olsem wanem yu inap lotuim yet Jehova taim gavman i tambuim wok lotu bilong yumi? Brens ofis bai givim instraksen long ol elda long rot bilong kisim kaikai bilong strongim bilip, hau yumi inap mekim miting, na hau yumi inap autim tok. Sapos brens ofis i no gat rot long kontektim ol elda, orait ol elda bai helpim yu na olgeta long kongrigesen long lotuim yet Jehova. Ol bai bihainim daireksen i stap long Baibel na ol pablikesen bilong yumi na givim ol tok bilong stiaim yu.—Mat. 28:19, 20; Apo. 5:29; Hib. 10:24, 25.

11. (a) Bilong wanem yu ken bilip olsem yu bai i gat kaikai bilong strongim bilip? (b) Yu inap mekim wanem bilong lukautim Baibel na ol pablikesen bilong Baibel?

 ¹¹ Jehova i tok promis olsem em bai givim kaikai bilong strongim bilip bilong ol manmeri bilong em. (Ais. 65:13, 14; Luk 12:42-44) Olsem na yu ken bilip tru olsem oganaisesen bilong em bai mekim olgeta samting bilong strongim yu long sait bilong bilip. Yu inap mekim wanem? Sapos gavman i tambuim wok lotu bilong yumi, yu mas painim gutpela hap bilong haitim Baibel na ol pablikesen bilong Baibel. Was gut na no ken putim Baibel na ol pablikesen—dispela i makim tu ol elektronik kopi—long hap we ol birua inap lukim. Yumi olgeta wan wan i mas mekim ol samting bilong helpim yumi long i stap strong yet long bilip.

12. Long sait bilong miting, ol elda bai mekim wanem?

¹² Olsem wanem long ol miting long olgeta wan wan wik? Ol elda bai stretim rot na taim yumi laik go long miting, yumi bai go long pasin we ol narapela i no inap luksave long en. Ating ol bai tokim yumi long bung long ol liklik grup, na planti taim ol inap senisim taim na ples bilong mekim miting. Taim yumi go long miting na taim yumi lusim miting, no ken apim nek taim yumi toktok wantaim ol bratasista. Ating yumi bai werim ol klos we i no inap pulim ai bilong ol birua.

13. Yumi inap kisim wanem skul long pasin bilong ol bratasista long Soviet Yunion?

¹³ Hevi i kamap long wanpela ples bai i no wankain long hevi i kamap long narapela ples, olsem na yumi no inap bihainim wankain wei bilong autim tok. Tasol yumi laikim Jehova na yumi laik tokim ol narapela long Kingdom bilong em, olsem na yumi bai painim narapela narapela rot long autim tok. (Luk 8:1; Apo. 4:29) Savemeri bilong histori, Emily B. Baran, i stori long wok autim tok bilong ol Witnes Bilong Jehova long Soviet Yunion na em i tok: “Taim gavman i stopim ol Witnes long autim bilip bilong ol long ol narapela, ol i kirap toktok wantaim ol neiba, ol wanwok, na ol pren bilong ol. Taim ol Witnes i go stap long banis kalabus, ol i autim tok long ol wankalabus.” Maski gavman bilong Soviet Yunion i tambuim wok lotu, ol bratasista i no stop long autim tok. Sapos gavman long kantri yu stap long en i tambuim wok lotu bilong yumi, orait yu ken bihainim gutpela eksampel bilong ol bratasista long Soviet Yunion!

14. Tok bilong Song 39:1 inap helpim yumi long abrusim wanem trap?

¹⁴ Skelim gut ol samting yu laik tokim ol narapela. Taim gavman i putim tambu, yumi mas luksave olsem i gat taim bilong “pasim maus.” (Ekl. 3:7) Yumi no ken tokaut long nem bilong ol bratasista, ples  yumi bung long en, wei bilong autim tok, na hau yumi kisim kaikai bilong strongim bilip. Yumi no ken tokaut long ol dispela samting long ol wokman bilong gavman, ol pren na ol wanblut i stap long kantri bilong yumi o narapela kantri, maski ol i Witnes Bilong Jehova o nogat. Sapos yumi tokaut, yumi inap putim ol bratasista long han bilong ol birua.—Ritim Buk Song 39:1.

15. (a) Satan bai traim long mekim wanem long yumi? (b) Olsem wanem yumi inap abrusim trap bilong em?

¹⁵ No ken larim ol liklik hevi i brukim lain. Satan i save olsem taim famili i bruk 2-pela lain, ol i no inap sanap strong. (Mak 3:24, 25) Oltaim Satan bai mekim ol samting bilong brukim lain bilong yumi. Em i laik bai yumi pait long narapela narapela na yumi no pait long em.

16. Yumi inap kisim wanem skul long stori bilong Sista Gertrud Poetzinger?

¹⁶ Ol Kristen i stap strong long bilip, ol tu i mas was gut bambai ol i no pundaun long dispela trap. Tingim eksampel bilong 2-pela sista em God i makim ol long holi spirit, em sista Gertrud Poetzinger na Elfriede Löhr. Ol i kalabus wantaim ol narapela sista long banis kalabus bilong lain Natsi. Gertrud i jeles taim Elfriede i mekim ol tok bilong strongim ol sista. Bihain, Gertrud i sem long pasin em i mekim na em i askim Jehova long helpim em. Em i tok: “Yumi no ken bel nogut long ol lain i gat bikpela save moa o ol i mekim planti wok moa winim yumi.” Olsem wanem Gertrud i daunim pasin bilong jeles? Gertrud i tingim ol gutpela pasin bilong Elfriede. Long dispela rot, em i pas gut gen wantaim Elfriede. Tupela wantaim i stap gut long Jehova i go inap long tupela i pinisim wok bilong ol hia long graun. Sapos yumi wok hat long daunim ol liklik hevi yumi gat wantaim ol wanbilip, yumi bai stap wanbel.—Kol. 3:13, 14.

17. Bilong wanem yumi mas abrusim pasin antap?

¹⁷ Abrusim pasin antap. Yumi bai abrusim ol hevi sapos yumi bihainim tok bilong ol brata husat i kisim wok bilong lukautim yumi. (1 Pita 5:5) Long wanpela kantri i gat tambu long wok bilong yumi, ol brata i tokim ol pablisa olsem ol i no ken tilim ol buk na nius taim ol i autim tok. Tasol wanpela painia brata i sakim tok na em i tilim ol nius. Wanem samting i kamap? Bihain liklik long dispela brata na ol narapela i pinis long autim tok, ol polis i kwestenim ol. Sampela wokman bilong gavman i bihainim ol na kisim ol nius ol i bin tilim. Yumi kisim wanem skul long dispela stori? Yumi mas bihainim tok bilong ol brata, maski yumi no wanbel long tok bilong ol. Jehova i save blesim yumi taim yumi wok bung wantaim ol brata  em i makim bilong i go pas long yumi.—Hib. 13:7, 17.

18. Bilong wanem yumi no ken putim ol ekstra lo?

¹⁸ No ken putim ol ekstra lo. Sapos ol elda i putim ol ekstra lo, dispela bai givim hatwok long ol narapela. Brata Juraj Kaminský i tingim bek samting i bin kamap taim gavman i tambuim wok long Sekoslovakia long bipo, na em i tok: “Bihain long ol i arestim planti elda, sampela bilong ol husat i stap bilong lukautim kongrigesen na sekit, ol i kirap long putim ol ekstra lo bilong ol samting ol pablisa i mas mekim na ol samting ol i no ken mekim.” Jehova i no givim wok long yumi long mekim disisen bilong ol narapela. Sapos wanpela i putim ol ekstra lo, i olsem em i laik bosim bilip bilong ol bratasista—dispela i no stretpela wei bilong lukautim ol bratasista.—2 Kor. 1:24.

19. Maski Satan i laik mekim nogut long yumi, olsem wanem tok bilong 2 Stori 32:7, 8 inap strongim yumi?

¹⁹ Satan em nambawan birua bilong yumi, na em i no inap stop long mekim nogut long ol wokman bilong Jehova. (1 Pita 5:8; Rev. 2:10) Satan na lain bilong em bai traim long stopim yumi long lotuim Jehova. Tasol yumi no ken larim pret i daunim yumi! (Lo 7:21) Jehova i stap long sait bilong yumi, na em bai wok yet long sapotim yumi maski ol man i tambuim wok bilong yumi.—Ritim 2 Stori 32:7, 8.

20. Yu tingting strong long mekim wanem?

²⁰ Yumi tu i laik holim strongpela tingting olsem ol brata bilong yumi long taim bilong ol aposel. Ol i tokim ol bikman bilong gavman: “Yupela i ting wanem pasin i stret long ai bilong God? Mitupela i mas bihainim tok bilong yupela o mitupela i mas bihainim tok bilong God? Yupela yet i ken skelim. Tasol mitupela i no inap pasim maus long ol samting mitupela i bin lukim naharim.”—Apo. 4:19, 20.