1-2. (a) Chifukwa wuli tikwenera kuzizwa yayi para boma lakanizga mulimo withu? (b) Kasi tisambirenge vichi mu nkhani iyi?

MU CHAKA cha 2018, ŵapharazgi ŵakujumpha 223,000 ŵakaŵa mu vyaru ivyo mukaŵa bani panji milimo yithu yinyake yikaŵa yakukanizgika. Ichi ntchakuzizika yayi. Nga umo tikasambilira mu nkhani iyo yajumpha, Ŵakhristu ŵaunenesko ŵakukhazga kuti ŵatambuzgikenge. (2 Tim. 3:12) Vilije kanthu uko tikukhala, kweni nyengo zinyake boma lingatikanizga mwamabuchi kusopa Yehova, Chiuta withu uyo tikumutemwa.

² Usange uko mukukhala boma lamukanizgani kusopa Yehova, mungamba kujifumba kuti: ‘Kasi nthambuzgo ntchilongolero chakuti Yehova waleka kutitemwa? Kasi bani yitilekeskenge kusopa Yehova? Kasi nisamire ku charu chinyake kuti nkhasopenge Chiuta mwakufwatuka?’ Nkhani iyi, yizgorenge mafumbo agha. Tiwonengeso umo tingachitira kuti tilutilire kusopa Yehova para boma latikanizga kusopa kweniso ivyo tikwenera yayi kuchita.

3. Kuyana na 2 Ŵakorinte 11:23-27, kasi mpositole Paulosi wakasangana na masuzgo wuli, ndipo tikusambirako vichi kwa iyo?

³ Para boma latikanizga kusopa, tingamba kuŵa na maghanoghano ghakubudika ghakuti Chiuta waleka kukondwa nase. Kweni kumbukani kuti para tikutambuzgika ndikuti Yehova wakuleka kukondwa nase yayi. Mwachiyelezgero, ghanaghanirani ivyo vikachitikira mpositole Paulosi. Chiuta wakakondwanga nayo. Wakaŵa na mwaŵi wakulemba makalata 14 agho  ntchigaŵa cha Malemba Ghachigiriki, ndipo wakaŵa mpositole ku ŵamitundu. Nangauli vikaŵa nthena, kweni wakatambuzgika chomene. (Ŵazgani 2 Ŵakorinte 11:23-27.) Ivyo vikachitikira mpositole Paulosi, tikusambirako kuti Yehova wakuzomerezga kuti ŵateŵeti ŵake ŵakugomezgeka ŵatambuzgike.

4. Chifukwa wuli charu chikutitinkha?

⁴ Yesu wakayowoya chifukwa icho tikutambuzgikira. Wakati tizamutinkhika chifukwa chakuti tili ku chigaŵa cha charu chara. (Yoh. 15:18, 19) Nthambuzgo yikung’anamura kuti Yehova waleka kutitemwa yayi. M’malo mwake, yikulongora kuti tikuchita icho ntchiwemi.

5. Kasi ŵanthu ŵangatilekeska kusopa Yehova? Longosorani.

⁵ Munthu wangatilekeska yayi kusopa Chiuta withu wankhongonozose, Yehova. Ŵanandi ŵayezgapo kweni ŵatondeka. Wonani ivyo vikachitika panyengo ya Nkhondo Yachiŵiri ya pa Charu Chose. Panyengo iyo, mu vyaru vinandi maboma ghakatambuzganga chomene ŵanthu ŵa Chiuta. Ntchito ya Ŵakaboni ŵa Yehova yikakanizgika na chipani cha Nazi ku Germany, kweniso na boma la Australia, Canada, na vyaru vinyake. Kweni wonani ivyo vikachitika. Mu 1939 apo nkhondo yikambanga, pa charu chose pakaŵa ŵapharazgi 72,475. Malipoti ghakulongora kuti apo nkhondo iyi yikamaranga mu 1945, Yehova wakatumbika ŵanthu ŵake, ndipo ŵapharazgi ŵakaŵa 156,299. Chiŵelengero cha ŵapharazgi chikasazgikira chomene.

6. Kasi ni vinthu wuli viwemi ivyo vingachitika para tikutambuzgika? Yowoyani chiyelezgero.

⁶ Para tikutambuzgika vingatovwira kuti tiŵikepo mtima kuteŵetera Yehova na kuleka kopa. Mwachiyelezgero, banja linyake ilo likaŵa na mwana msepuka likakhalanga mu charu icho mukaŵa bani. M’malo mwakopa na kuleka kuchita vinandi pakuteŵetera Yehova, banja ili likamba kuchita upayiniya. Nakuti mudumbu wakaleka ntchito yapachanya ya ndalama zinandi kuti wachite upayiniya. Mubali wakati bani yikapangiska ŵanthu ŵanandi kunweka na Ŵakaboni ŵa Yehova. Ntheura chikaŵa chipusu kwambiska masambiro gha Baibolo. Pakachitikaso vinthu viwemi vinandi. Mulara munyake mu charu chenechichi wakati ŵanandi awo ŵakaleka kusopa Yehova, ŵakambaso kuwungana na kupharazga.

7. (a) Kasi tikusambirapo vichi pa Levitiko 26:36, 37? (b) Kasi muchitenge wuli para kuli bani?

 ⁷ Para ŵalwani ŵatikanizga kusopa, ŵakukhazga kuti topenge kuteŵetera Yehova. Padera pakutikanizga kusopa, ŵakuthandazga nkhani zautesi, ŵakutuma ŵalara ŵa boma kuzakasecha mu nyumba zithu, kutitolera ku khoti, panji kujalira mu jele ŵabali ŵithu ŵanyake. Ŵakughanaghana kuti topenge chifukwa chakuti ŵanyithu ŵachoko waka ŵaŵajalira mu jele. Para tikopa, mbwenu tingagongowa na kuleka kusopa Yehova. Tingatemwa yayi kuŵa nga ni awo ŵakuyowoyeka pa Levitiko 26:36, 37. (Ŵazgani.) Tizomerezgenge yayi kuti wofi utigongoweske panji kutilekeska kuteŵetera Yehova. Tikuthemba Yehova na mtima wose ndipo tikopa yayi. (Yes. 28:16) Tikulomba Yehova kuti watilongozge. Chifukwa chakuti Chiuta wakutovwira, nanga ghangaŵa maboma ghankhongono chomene ghangatitondeska yayi kusopa Chiuta withu mwakugomezgeka.—Heb. 13:6.

8-9. (a) Kasi mutu wa mbumba panji Mkhristu waliyose wakwenera kusankha yekha kuchita vichi? (b) Ntchivichi chingawovwira munthu kusankha mwamahara?

⁸ Para uko mukukhala boma lamukanizgani kusopa, mungamba kughanaghana kuti musamire ku charu chinyake kuti mukasopenge Yehova mwakufwatuka. Iyi ni nkhani yakuti waliyose wasankhe yekha. Ŵanyake pambere ŵandasankhe chakuchita ŵakuwona kuti ntchakovwira kusambira dankha ivyo Ŵakhristu ŵakwambilira ŵakachita apo ŵakatambuzgikanga. Ŵalwani ŵati ŵamukoma Stefano mwakumudinya na malibwe, ŵasambiri mu Yerusalemu ŵakachimbilira ku Yudeya na Samariya ndipo ŵanyake ŵakafika m’paka ku Fonike, Kipro, na Antiyoke. (Mat. 10:23; Mil. 8:1; 11:19) Ndipouli, ŵanyake ŵangawona kuti nthambuzgo yati yambaso, mpositole Paulosi wakasankha kuleka kusama mu malo agho ŵanthu ŵakakanizganga kupharazga makani ghawemi. M’malo mwake, wakaŵika umoyo wake pangozi, kupharazga makani ghawemi na kukhozga ŵabali mu misumba iyo ŵakatambuzgikanga chomene.—Mil. 14:19-23.

⁹ Kasi tikusambirako vichi ku nkhani izi? Mutu wa mbumba wakwenera kusankha usange ntchakwenelera kusama panji yayi. Pambere wandasankhe chakuchita, mfumu wakwenera kulomba na kughanaghanirapo umo vinthu viliri mu mbumba yake kweniso uwemi na uheni wa kusama. Pa nkhani iyi, Mkhristu waliyose wakwenera ‘kuyegha katundu wake.’ (Gal. 6:5) Tikwenera yayi kweruzga ŵanyithu pa ivyo ŵasankha.

10. Kasi ni ulongozgi wuli uwo ofesi ya munthavi panji ŵalara ŵangatipa?

¹⁰ Kasi mungachita wuli kuti mulutilire kusopa Yehova para ŵamukanizgani kusopa? Ofesi ya munthavi yizamupeleka ulongozgi na masachizgo ku ŵalara pa nkhani ya umo tingapokelera chakurya chauzimu, umo tingachitira kuti tiwunganenge, na umo tingapharazgira. Usange ofesi yingafiska yayi kuyowoya na ŵalara, mbwenu ŵalara ŵamovwiraninge umo mungachitira kuti mulutilire kusopa Yehova. Ŵamupaninge ulongozgi uwo ukukolerana na fundo za mu Baibolo na mabuku ghithu.—Mat. 28:19, 20; Mil. 5:29; Heb. 10:24, 25.

11. Chifukwa wuli mukwenera kugomezga kuti muŵenge na chakurya chauzimu nyengo zose? Kasi mungachita wuli kuti musunge makora Baibolo na mabuku ghinu?

¹¹ Yehova wali kulayizga kuti ŵateŵeti ŵake waŵapenge chilichose icho chikukhumbikwa kuti ŵaŵe ŵakukhora mwauzimu. (Yes. 65:13, 14; Luka 12:42-44) Mukwenera kugomezga  kuti gulu la Yehova limupaninge chilichose icho mukukhumbikwira kuti mulutilire kugomezgeka. Kweni pali vinyake ivyo namwe mungachita. Pa nyengo ya bani, sangani malo ghawemi ghakuti mubisengepo Baibolo na mabuku ghanyake. Mukwenera kuŵa maso kuti muleke kuŵika Baibolo panji mabuku ghithu nanga ghangaŵa gha mu foni pa malo agho ŵanthu ŵangaghasanga mwaluŵiro. Waliyose wakwenera kuchita chilichose icho wangafiska kuti walutilire kuŵa wakukhora mwauzimu.

12. Kasi ŵalara ŵanganozga wuli maungano munthowa yakuti ŵanthu ŵanyake ŵaleke kumanya?

¹² Wuli pa nkhani ya maungano agho ghakuŵako sabata yiliyose? Ŵalara ŵazamunozga kuti maungano ghachitike munthowa yakuti ŵalwani ŵithu ŵaleke kumanya. Ŵangamuphalirani kuti muwunganenge mu tumagulu, ndipo ŵangasintha nyengo na malo ghakuchitira maungano pafupipafupi. Mungavikilira ŵabali na ŵadumbu ŵinu para mukuyowoya mwapasipasi para mukuluta panji mukuwera ku maungano. Mungakhumbikwiraso kuvwara munthowa yakuti ŵanthu ŵaleke kumumanyani kuti ndimwe Ŵakaboni ŵa Yehova.

13. Kasi tikusambirako vichi ku ŵabali ŵithu ŵa mu vyaru ivyo vikawusikanga na boma la Soviet Union?

¹³ Pa nkhani ya upharazgi, vinthu vingapambana kuyana na uko muli. Chifukwa chakuti tikutemwa Yehova na ŵanthu, tikuyezgayezga kusanga nthowa iyo tingapharazgira vya Ufumu wake. (Luka 8:1; Mil. 4:29) Wakulemba mbiri munyake zina lake Emily Baran, wakayowoyapo ivyo Ŵakaboni ŵa Yehova ŵakachitanga ŵati ŵakanizgika kupharazga na boma la Soviet Union. Iyo wakati: “Boma lati lakanizga Ŵakaboni kupharazga, ŵakamba kupharazgira ŵazengezgani ŵawo, awo ŵakagwiranga nawo ntchito, na ŵabwezi ŵawo. Para ŵaŵakora na kuŵajalira mu jele chifukwa cha kupharazga, Ŵakaboni ŵakapharazgiranga ŵakayidi ŵanyawo.” Nangauli kukaŵa bani, kweni ŵabali ŵithu ŵakaleka yayi kupharazga. Para uko mukukhala ntchito yithu yakupharazga njakukanizgika, mungachita makora kuyezga ŵabali aŵa.

14. Kasi lemba la Salimo 39:1 likutichenjezga vichi?

¹⁴ Muŵe maso na ivyo mukuphalira ŵanyinu. Pa nyengo ya bani, tikwenera kumanya “nyengo ya kukhala chete.” (Muph. 3:7) Tikwenera yayi kuyowoya vinthu vyachisisi, nga ni mazina gha ŵabali na ŵadumbu, malo agho tikuwungana, nthowa izo tikupharazgira, na umo tikusangira chakurya chauzimu. Tiyowoyenge yayi vinthu ivi ku ŵanthu awo ŵakugwira ntchito mu boma, ku ŵabwezi ŵithu panji ŵabali ŵithu nanga ŵangaŵa kuti ŵakukhala ku charu chinyake. Para tingayowoya, tingaŵika umoyo wa ŵabali na ŵadumbu ŵithu pangozi.—Ŵazgani Salimo 39:1.

15. Kasi Satana wayezgenge kuchitachi, ndipo ise tingachita wuli?

 ¹⁵ Mungazomerezganga yayi kuti masuzgo ghachokoghachoko ghamupangiskani kuti mugaŵikane. Satana wakumanya kuti nyumba iyo njakugaŵikana, yingima yayi. (Mrk. 3:24, 25) Wakuyezgayezga kuti paŵe kugaŵikana pakati pithu. Iyo wakukhumba kuti tilimbanenge tekhatekha m’malo mwakuti tilimbanenge na iyo.

16. Kasi Mudumbu Gertrud Poetzinger wakachita vichi ivyo nase tikwenera kutolerako?

¹⁶ Nanga ŵangaŵa Ŵakhristu ŵakukhwima mwauzimu ŵakwenera kuŵa maso. Wonani ivyo vikachitikira ŵadumbu ŵaŵiri ŵakuphakazgika, Gertrud Poetzinger na Elfriede Löhr. Ŵadumbu aŵa ŵakajalirika mu jele pamoza na ŵadumbu ŵanyake mu msasa wakuyuzgirako ŵanthu wa Nazi. Gertrud wakamba kuchitira sanji mudumbu Elfriede chifukwa chakuti wakayowoyanga nkhani zakukhozga ku ŵadumbu ŵanyake awo ŵakaŵa mu jele. Pamanyuma, Gertrud wakamanya kuti ndiyo wakaŵa na suzgo, ndipo wakaŵeyelera Yehova kuti wamovwire. Gertrud wakalemba kuti, “Tikwenera kuzomerezga para ŵanyithu ŵakutiluska kweniso para ŵali na vyakuchita vinandi kuluska ise.” Kasi mudumbu uyu wakachita wuli kuti waleke sanji? Wakamba kulaŵiska chomene pa vinthu viwemi ivyo mudumbu Elfriede wakachitanga makora, nga ni mtima waubwezi uwo wakaŵa nawo. Ntheura wakaŵaso paubwezi na Elfriede. Wose ŵakafumiskika mu msasa wakuyuzgirako ŵanthu, ndipo ŵakalutilira kuteŵetera Yehova mwakugomezgeka m’paka apo ŵakamalizgira uteŵeti wawo pa charu cha chapasi. Para tikuŵikapo mtima kumazga mphindano na ŵabali ŵithu, tizomerezgenge chilichose yayi kutipangiska kuŵa ŵakugaŵikana.—Kol. 3:13, 14.

17. Chifukwa wuli nyengo zose tikwenera kulondezga ulongozgi wakufuma ku gulu la Yehova?

¹⁷ Nyengo zose pulikirani ulongozgi. Usange tikupulikira ulongozgi wakufuma ku ŵalara tigegenge masuzgo. (1 Pet. 5:5) Mwachiyelezgero ku charu chinyake icho kukaŵa bani, ŵalara ŵakaphalira ŵapharazgi kuti ŵaleke kugaŵira mabuku na magazini mu uteŵeti. Kweni mubali munyake uyo wakaŵa mupayiniya wakapulikira yayi ulongozgi uwu, ndipo wakamba kugaŵira mabuku mu uteŵeti. Kasi chikachitika ntchivichi? Wati wamara kupharazga, iyo pamoza na ŵabali ŵanyake, ŵapolisi ŵakaŵakora na kwamba kuŵafumba mafumbo. Apo ŵakapharazganga, ŵapolisi ŵakaŵalondezganga ndipo ŵakapokanga mabuku agho ŵakagaŵira. Kasi tikusambirapo vichi apa? Ntchiwemi kulondezga ulongozgi nanga vingaŵa kuti tikukolerana nawo yayi. Yehova wakutitumbika para nyengo zose  tikukolerana na ŵabali awo ŵali kwimikika kuti ŵatilongozgenge.—Heb. 13:7, 17.

18. Chifukwa wuli tikwenera yayi kupanga malango ghambura kwenelera?

¹⁸ Lekani kupanga malango ghambura kwenelera. Para ŵalara ŵakupanga malango ghambura kwenelera, ŵakupeleka mphingo ku ŵabali na ŵadumbu ŵanyake. Mubali Juraj Kaminský wakukumbuka ivyo vikachitika pa nyengo ya bani ku charu icho chikamanyikwanga kuti Czechoslovakia. Mubali uyu wakati: “Ŵabali ŵalara na ŵabali ŵanyake ŵamaudindo ŵakati ŵakakika, ŵabali ŵanyake mu mpingo ŵakamba kupanga malango ghawo ghakuti ŵapharazgi ŵalondezgenge, ŵakaŵaphaliranga ivyo ŵakwenera kuchita na ivyo ŵakwenera yayi kuchita.” Yehova wandatipe udindo wakusankhira ŵanyithu vyakuchita. Uyo wakupanga malango ghambura ntchito wakuvikilira ŵabali yayi, kweni wakuchita ufumu pa chipulikano cha ŵabali.—2 Kor. 1:24.

19. Kuyana na 2 Midauko 32:7, 8, chifukwa wuli tingaŵa na chikanga nangauli Satana wakulimbana nase?

¹⁹ Mulwani withu mukuru, Satana Dyabulosi walekenge yayi kutambuzga ŵateŵeti ŵakugomezgeka ŵa Yehova. (1 Pet. 5:8; Chivu. 2:10) Satana na gulu lake ŵakuyezgayezga kuti tileke kusopa Yehova. Ndipouli, palije chifukwa chakuŵira na wofi na kuleka kusopa Yehova. (Doto. 7:21) Yehova wali nase, ndipo walutilirenge kutovwira nanga vingaŵa kuti ntchito yithu njakukanizgika.—Ŵazgani 2 Midauko 32:7, 8.

20. Kasi mwaŵikapo mtima kuchita vichi?

²⁰ Mphanyi nase taŵikapo mtima nga Mbakhristu ŵa mu nyengo yakwambilira, awo ŵakaphalira ŵalongozgi kuti: “Yeruzgani mwekha usange ntchakwenelera pamaso pa Chiuta kuti tipulikire imwe panji Chiuta. Kweni ise tingaleka yayi kuyowoya vinthu ivyo tili kuwona na kupulika.”—Mil. 4:19, 20.