1-2. (a) No te aha eita tatou e maere ia opanihia ta tatou ohipa? (b) Eaha ta tatou e hiˈopoa i roto i teie haapiiraa?

 I 2018, hau atu i te 223 000 taata poro te ora nei i te mau fenua ua opanihia ta tatou ohipa. Eita tatou e maere! Mai ta te haapiiraa na mua ˈtu i faaite, e hamani-ino-hia te mau Kerisetiano. (Tim. 2, 3:12) E nehenehe te faatereraa o to tatou fenua e opani taue noa ia tavini i te Atua î i te here ra o Iehova.

² Ia na reira-noa-hia ˈtu i to tatou fenua, e uiui paha tatou, ‘E haapapuraa anei te hamani-ino-raa ua ere tatou i ta Iehova farii maitai? Eita iho â anei tatou e nehenehe faahou e tavini ia Iehova? E titauhia anei ia horo i te fenua ê no te tamau i te tavini ia ˈNa?’ E pahonohia tera mau uiraa i roto i teie haapiiraa. E hiˈopoa atoa mai tatou e nafea ia tamau i te tavini ia Iehova e eaha te titauhia ia ape ia opanihia ta tatou taviniraa.

3. Ia au i te Korinetia 2, 11:23-27, eaha te mau tupuraa ta te aposetolo Paulo i farerei e eaha te haapiiraa e huti mai?

³ Ia opani te hoê faatereraa i ta tatou ohipa, eiaha tatou e faaoti aita Iehova e mauruuru ra ia tatou. A feruri na i te aposetolo Paulo. Noa ˈtu ua hamani-ino-hia  oia, ua mauruuru e ua maiti Iehova ia Paulo no te papai 14 rata o te mau Papai Heleni Kerisetiano e no te faaite i ta ˈNa poroi i te mau nunaa ěê. (A taio i te Korinetia 2, 11:23-27.) Te faaite mai ra te tupuraa o te aposetolo Paulo e vaiiho Iehova ia hamani-ino-hia ta ˈna mau tavini taiva ore.

4. No te aha teie nei ao e hae ai ia tatou?

⁴ Ua faataa Iesu e hamani-ino-hia tatou no te mea e ere tatou no teie nei ao. (Ioa. 15:18, 19) Eiaha ïa e manaˈo ua ere tatou i ta Iehova farii maitai, e haapapu te reira te rave ra tatou i te mea maitai!

5. E tia anei i te hoê taata ia tapea i te ohipa a Iehova?

⁵ Eita roa ˈtu te hoê taata e nehenehe e tapea i te ohipa a te Atua Mana hope! E rave rahi tei tamata, aita roa râ i manuïa! A hiˈo na i tei tupu i te roaraa o te Piti o te Tamaˈi rahi. Ua hamani ino e rave rahi feia mana i te nunaa o Iehova. Ua opanihia ta tatou ohipa i Heremani, Auteralia, Kanada, oia atoa râ i te tahi atu mau fenua. Eaha râ te faahopearaa? A haamata ˈi te tamaˈi i 1939, e 72 475 taata poro na te ao. I te hoperaa te tamaˈi i 1945, ua taiohia 156 299 taata poro. E ere anei i te mea faahiahia?

6. Eaha te mau maitai i itehia no te hamani-ino-raa? A horoa i te hiˈoraa.

⁶ E nehenehe te hamani-ino-raa e turai ia tatou ia tavini atu â ia Iehova. Noa ˈtu te opaniraa i to ratou fenua, tera ta te hoê taeae e ta ˈna vahine i rave. Aita raua i vaiiho i te mǎtaˈu ia tapea ia raua ia rave i te taviniraa pionie tamau. Noa ˈtu hoê tamarii ta raua, ua faarue te tuahine i ta ˈna ohipa aufau-maitai-hia ia naea ta ˈna fa. Te faataa ra te taeae ua turai tera opaniraa i te taata ia hinaaro e ite atu â no nia i te mau Ite no Iehova. Ohie roa ˈtu ïa ratou i te haamata i te mau haapiiraa Bibilia. Ia au i te hoê matahiapo, ua turai atoa te opaniraa i te feia tei faaea i te tavini ia Iehova ia hoˈi i te mau putuputuraa e ia poro faahou.

7. (a) Eaha te faataahia ra i roto i te Levitiko 26:36, 37? (b) Eaha ta outou e rave ia opanihia ta tatou haamoriraa?

 ⁷ E opani te mau enemi i ta tatou haamoriraa ia mǎtaˈu tatou i te tavini ia Iehova. E haaparare atoa paha ratou i te mau parau haavare, e tono i te mau mutoi no te imi i to tatou mau fare e e horo ia tatou i mua i te ture. E huri atoa ratou vetahi o tatou i roto i te fare tapearaa ia mǎtaˈu te toea. Ia vaiiho tatou i te mǎtaˈu ia haaparuparu i to tatou aau, e faaoti tatou i te faaea i te tavini ia Iehova. Eita roa ˈtu tatou e hinaaro e riro mai te feia i faataahia i roto i te Levitiko 26:36, 37. (A taio.) Eiaha te mǎtaˈu ia faaiti aore ra ia tapea i ta tatou taviniraa. No te ore e ahoaho, e tiaturi papu anaˈe ia Iehova. (Sal. 27:1) Maoti te pure, e taparu anaˈe i ta ˈna aratairaa. Tei to tatou pae o Iehova, eita roa te hoê noa ˈˈe faatereraa e nehenehe e tapea ia tatou ia tavini i te Atua ma te taiva ore.—Heb. 13:6.

8-9. (a) Ia tupu te hamani-ino-raa, eaha te faaotiraa ta te upoo utuafare e rave? (b) Eaha te tauturu ia ˈna ia rave i te faaotiraa paari?

⁸ Ia opani te faatereraa i ta tatou ohipa, e titauhia anei ia horo i te tahi atu fenua no te tavini ia Iehova? Na te Kerisetiano tataitahi e rave i ta ˈna iho faaotiraa. Hou a na reira ˈi, mea maitai ia feruri i ta te mau Kerisetiano matamua i rave i mua i te hamani-ino-raa. I te haapoheraahia Setephano, ua horo te mau pǐpǐ o Ierusalema i Iudea e Samaria, oia atoa i Phoinikia, Kupero e i Anetiohia. (Mat. 10:23; Ohi. 8:1; 11:19) A tupu faahou ai râ te tahi atu hamani-ino-raa, ua faaoti te aposetolo Paulo i te faaea noa i te mau tuhaa fenua ua opanihia te ohipa pororaa. Ua rave Paulo i tera faaotiraa no te faaite i te parau apî oaoa e no te faaitoito i te mau taeae e faaruru ra i te hamani-ino-raa uˈana.—Ohi. 14:19-23.

⁹ Eaha te haapiiraa no tatou? Na te upoo utuafare e rave i te faaotiraa e horo anei i te tahi atu fenua aore ra aita. E titauhia ia ˈna ia pure e ia feruri maite eaha te faahopearaa maitai e ino i nia i to ˈna utuafare. E amo “te taata tataitahi i ta ˈna iho hopoia.” (Gal. 6:5) Eiaha roa ïa tatou ia haava aore ra ia faahapa i ta vetahi ê faaotiraa.

10. Eaha te mau aratairaa ta te amaa e ta te mau matahiapo e horoa mai?

¹⁰ E nafea ia tamau i te tavini ia Iehova noa ˈtu te opaniraa? E horoa te amaa i te mau aratairaa ia ite te mau matahiapo e nafea ia fanaˈo noa i te maa pae varua, ia faatupu i te putuputuraa e ia tamau i te poro. Ia ore e tia i te amaa ia na reira, na te mau matahiapo e faanaho ia tamau te mau mero o te amuiraa i te haamori ia Iehova. E horoa ratou i te mau aratairaa tano no roto mai i te Bibilia e ta tatou mau papai.—Mat. 28:19, 20; Ohi. 5:29; Heb. 10:24, 25.

11. Eaha te haapapu ra e fanaˈo iho â tatou i te maa pae varua noa ˈtu te opaniraa? Eaha te titauhia ia rave no ta tatou Bibilia e papai Kerisetiano?

¹¹ Ua fafau Iehova e tamau ta ˈna mau tavini i te amu i te maa pae varua. (Isa. 65:13, 14; Luka 12:42-44) Eiaha ïa e haapeapea, e rave iho â te faanahonahoraa  i te titauhia no te horoa i te faaitoitoraa i te taime tano. Eaha râ ta tatou e nehenehe e rave i to tatou pae? Ia opanihia ta tatou ohipa, e imi anaˈe i te hoê vahi papu no te faatapuni i ta tatou Bibilia e papai neneihia e roro uira. Eiaha e vaiiho i te vahi e ite ohie-noa-hia! E tia ia tatou tataitahi ia rave i ta tatou tuhaa no te vai puai noa noa ˈtu te opaniraa.

12. Eaha ta te mau matahiapo e rave ia ore te taata ia ite te faatupuhia ra te mau putuputuraa?

¹² Na te mau matahiapo e faaite atu e nafea ia apiti i te mau putuputuraa. E faanaho paha ratou i te mau pǔpǔ nainai e e tauiui atoa paha i te hora e te vahi. No te paruru i te mau taeae e tuahine atoa, eiaha tatou ia paraparau puai a haere e a faarue ai i te vahi putuputuraa. E titau-atoa-hia paha ia maiti i te faaahuraa au noa ia ore te taata ia ite te faatupuhia ra te putuputuraa.

13. Eaha ta te hiˈoraa o te mau taeae i Rusia tahito e haapii mai ra?

¹³ E taui te faanahoraa o te pororaa ia au i te tupuraa i tera e tera fenua. Mea here na tatou ia Iehova e te haafaufaa nei tatou i te poroi o te Faatereraa arii. Noa ˈtu ïa te opaniraa, e imi iho â tatou i te mau ravea no te tamau i te poro. (Luka 8:1; Ohi. 4:29) Teie ta te taata tuatapapa Emily Baran i parau no nia i te mau Ite no Iehova tapeahia i Rusia tahito: “A faaue ai te faatereraa eiaha ia poro faahou i te taata, ua paraparau te mau Ite i to ratou feia tapiri, hoa ohipa e hoa piri. I te hopoiraahia ratou i te mau aua haavîraa, ua poro te mau Ite no Iehova i te feia i roto i to ratou piha tapearaa.” Noa ˈtu te opaniraa a te faatereraa Rusia tahito, ua tamau te mau taeae i te poro. Ia opani-noa-hia ˈtu te ohipa pororaa i ǒ nei, e pee anaˈe i to ratou hiˈoraa!

14. Eaha te faaararaa a te Salamo 39:1?

¹⁴ A haapao maitai i ta outou e parau. Ia opanihia ta tatou ohipa, e titauhia ia haroˈaroˈa i te taime no “te mamû noa.” (Koh. 3:7) Eiaha tatou ia faaite i te taata i te mau parau faufaa mai te iˈoa o to tatou mau taeae e tuahine, te vahi putuputuraa, tei faanahohia no te ohipa pororaa e te ravea e fanaˈo ai tatou i te maa pae varua. Eita tatou e faaite i te feia mana, i te mau hoa e fetii atoa râ e ora ra i to tatou fenua e i te ara. Ia ore tatou ia haapao i tera tuhaa, e fifihia to tatou mau taeae e tuahine.—A taio i te Salamo 39:1.

15. Eaha ta Satani e tamata i te rave e e nafea ia ore ia topa i roto i ta ˈna marei?

 ¹⁵ Eiaha tatou ia amahamaha no te tahi fifi rii. Ua ite Satani eita te hoê utuafare amahamaha e mau papu i mua i te fifi. (Mar. 3:24, 25) Ta ˈna ravea, e faatupu ïa i te tatamaˈiraa i rotopu ia tatou a moˈehia ˈtu ai o vai to tatou enemi mau.

16. Eaha te hiˈoraa maitai ta tuahine Gertrud Poetzinger i horoa mai?

¹⁶ E nehenehe atoa te mau Kerisetiano feruriraa paari e topa i roto i tera marei. A hiˈo na i na tuahine faatavaihia o Gertrud Poetzinger raua Elfriede Löhr tei tapeahia i roto i te hoê aua haavîraa. Ua pohehae Gertrud i to Elfriede horoaraa i te oreroraa parau i mua i te tahi atu mau tuahine. I muri mai râ, ua tatarahapa Gertrud e taparu atura i ta Iehova tauturu. Ua papai oia: “E farii anaˈe ia horoahia te hopoia rahi i te tahi Kerisetiano aravihi aˈe.” Eaha ta Gertrud i rave no te faaea i te pohehae? Ua tiatonu oia i nia i te mau huru maitatai o tuahine Elfriede e maitai faahou atura to raua auhoaraa. Ua ora mai raua toopiti atoa i te aua haavîraa e ua tavini ia Iehova ma te haapao maitai e hope noa ˈtu ta raua taviniraa i te fenua nei. E tutava anaˈe ïa i te ore e vaiiho i te mau fifi rii ia faataa ê ia tatou i te mau taeae e tuahine!—Kol. 3:13, 14.

17. No te aha eiaha e manaˈo mea ite aˈe tatou?

¹⁷ Eiaha e manaˈo mea ite aˈe tatou. Eita tatou e fifihia ia haapao tatou i te mau aratairaa a te mau taeae e tiaau ra i ta tatou ohipa. (Pet. 1, 5:5) I te hoê fenua ua opanihia ta tatou taviniraa, ua faaue te mau taeae tiaau i te feia poro eiaha e opere i te mau papai i roto i te pororaa. Ma te manaˈo mea ite aˈe o ˈna, aita te hoê taeae pionie i pee i te aratairaa e pûpû atura i te papai. I muri iti noa ˈˈe i te pororaa faanaho-ore-hia, ua uiui te mau mutoi ia ˈna e i te tahi atu mau taeae. E au ra ua apee atu e ua ohi te mau mutoi i te mau papai ta ratou i pûpû i te taata. Eaha te haapiiraa no tatou? E titauhia ia auraro i te mau aratairaa noa ˈtu aita tatou e mauruuru ra. E haamaitai noa mai Iehova ia ohipa amui tatou e te mau taeae ta ˈna i maiti no te aratai ia tatou.—Heb. 13:7, 17.

18. No te aha eiaha e horoa i ta tatou iho mau faaueraa?

¹⁸ Eiaha e horoa i te mau faaueraa faufaa ore. Eiaha te mau matahiapo ia horoa  i ta ratou iho mau faaueraa a teimaha te mau taeae e tuahine. Te faatia ra taeae Juraj Kaminský i tei tupu a opanihia ˈi ta tatou taviniraa i Tekolovakia: “I te tapearaahia te mau taeae tiaau e e rave rahi matahiapo, ua tia mai vetahi no te aratai i te amuiraa e te mau tuhaa haaati. Ua haamata ratou i te horoa i te mau faaueraa no nia i te haerea o te feia poro e ua hamani atoa i te hoê tapura o te mau mea e tia ia rave e te ore e tia ia rave.” Eita Iehova e faatia ia rave tatou i te faaotiraa no vetahi ê. Te taata e horoa i ta ˈna iho mau faaueraa, aita ïa e imi ra i te maitai o to ˈna mau taeae. Te hinaaro ra râ oia e faatere i to ratou faaroo!—Kor. 2, 1:24.

19. Ia au i te Paraleipomeno 2, 32:7, 8, eaha to tatou tiaturiraa papu noa ˈtu te mau raveraa a Satani?

¹⁹ Eita to tatou enemi rahi e faaea i te hamani ino i te mau tavini haapao maitai a Iehova. (Pet. 1, 5:8; Apo. 2:10) E imi Satani e te feia atoa e turu ra ia ˈna i te ravea ia mau ta tatou taviniraa ia Iehova. Eita roa râ tatou e mǎtaˈu! (Deut. 7:21) Tei to tatou pae o Iehova, na ˈna e tauturu mai ia opanihia ta tatou ohipa!—A taio i te Paraleipomeno 2, 32:7, 8.

20. Eaha ta outou i faaoti papu i te rave?

²⁰ Mai te mau Kerisetiano matamua, e faaoti papu anaˈe i te parau i te feia mana o teie tau: “Mai te peu e mea tia i te aro o te Atua ia faaroo ia outou eiaha râ ia ˈna, na outou e hiˈo. Area [matou], eita ïa e tia ia ore e parau i te mau mea ta [matou] i ite e i faaroo.”—Ohi. 4:19, 20.