1, 2. а) Малы ми ум паймиське, куд-ог шаеръёсын кивалтӥсьёс Иеговалы йыбыртъяны уг лэзё шуыса? б) Мае ми эскеромы та статьяын?

 ШАЕРЪЁСЫН, кудъёсаз уг лэзё Иеговалы йыбыртъяны яке йыбыртъянэн герӟаськем куд-ог ужъёсты быдэсъяны, 2018-тӥ арын тодытӥсьёслэн лыдзы 223 000-лэсь тросгес вал. Ми ум паймиське, куке кивалтӥсьёс Иеговалэн Адӟись-Ивортӥсьёсызлы пумитъясько. Кызьы азьвыл статьяын гожтэмын вал, зэмос христианъёс тодо, соосты уйылозы-уллялозы шуыса (2 Тим. 3:12). Кытын гинэ ми медам улэ, шӧдтэк шорысь кылдыны быгатэ сыӵе югдур, куке кивалтӥсьёс яратӥсь Иегова Инмармылы йыбыртъяны уз лэзе ни.

² Сыӵе югдур тӥляд шаерады кылдӥз ке, тӥляд таӵе юанъёсты луыны быгато: возьматэ-а со, ми Иеговалы ум яраське ни шуыса? Дугдытоз-а со тодытон ужез? Кошконо-а отчы, кытын Иеговалы кышкатэк йыбыртъяны луэ? Ойдолэ та юанъёсты эскеромы но тодомы, кызьы уйылон-уллянъёс дыръя Иеговалы йыбыртъяно но кыӵе янгышъёслэсь палэнсконо.

3. Кыӵе уйылон-уллянъёсын пумиськоно луиз апостол Павел, 2 Коринфъёслы 11:23—27 лыдэ басьтыса, но мае со возьматэ?

³ Уйылон-уллянъёс сэрен малпан кылдыны быгатэ, ми Иеговалы ум ни яраське шуыса. Но со озьы ӧвӧл. Кылсярысь, тодамы ваёмы апостол Павелэз. Веранэз ик ӧвӧл, со Инмарлы ярамон вал. Иегова Павеллы дано уж сётӥз гожтыны 14 гожтэтъёсты, кудъёсыз Христиан Грек Гожтэмъёс пӧлы  пыризы, но мукет адямиос понна апостол луыны. Озьы ке но Павел лек уйылон-уллянъёсын пумиськиз. (Лыдӟе 2 Коринфъёслы 11:23—27.) Павеллэн учырез возьматэ, куддыръя Иегова лэзе, солэсь ужась-тыршисьёссэ мед уйылозы-уллялозы шуыса.

4. Малы дунне милемыз адӟемпотостэм каре?

⁴ Иисус валэктӥз, малы ми уйылон-уллянъёслы паймыны кулэ ӧвӧл. Со вераз: «Тӥ дуннелэн ӧвӧл бере... соин ик дунне тӥледыз адӟемпотостэм каре» (Иоанн 15:18, 19). Уйылон-уллянъёс уг возьмато, Иегова милемыз бакель уг кары ни шуыса. Нош соос возьмато, ми шонер лэсьтӥськомы шуыса!

5. Быгато-а адямиос Иеговалы йыбырттонэз дугдытыны? Валэктэ.

⁵ Адямиос уг быгато Ваньмызлэсь Кужмо Иегова Инмарлы йыбырттонэз дугдытыны. Тросэз тыршизы дугдытыны, но ӧз быгатэ. Тодамы ваёмы, мар луиз Кыкетӥ дунневыл ож дыръя. Трос шаеръёслэн кивалтӥсьёссы туж тыршизы Инмарлэн калыкезлы люкетыны. Иеговалэн Адӟись-Ивортӥсьёсызлы ужзэс нуыны ӧз лэзе ни Германиын, нацистъёс кивалтыку, озьы ик Австралиын, Канадаын но мукет шаеръёсын. Нош висъялэ саклыктэс солы, кытчы со вуттӥз. 1939-тӥ арын, ожлэн кутсконаз, быдэс дунне вылын 72 475 ивортӥсьёс вал. Нош ожлэн пумаз, 1945-тӥ арын, соос 156 299 вал ини. Адӟись-Ивортӥсьёслэн лыдзы кык поллэсь но тросгес луиз! Веранэз ӧвӧл: Иеговалэн юрттэменыз гинэ, озьы луыны быгатэ.

6. Кызьы ми вылын уйылон-уллянъёс шӧдӥськыны быгато? Вералэ одӥг учырез.

⁶ Уйылон-уллянъёс милемыз кышкатыны но сюлмаськытыны быгато. Но со дыре ик соос мылкыдмес ӝутыны быгато Иеговалы тросгес ужаны-тыршыны. Тани одӥг кузпалъёслэн учырзы, кудъёсызлэн пичи нылпизы вал. Та кузпалъёс улӥзы шаерын, кудаз кивалтӥсьёс Иеговалы ужаны-тыршыны уг лэзё. Соос кышканлы ӧз сётске но пионеръёс луыса ужаны-тыршыны кутскизы. Со понна кышноез бадӟым уждунэн ужзэ но кельтӥз. Картэзлэн верамезъя, уйылон-уллянъёс кутскем бере адямиослэн Иеговалэн Адӟись-Ивортӥсьёсыз сярысь тросгес тодэмзы потӥз. Соин ик солы Библиез дышетонъёсты кутскыны капчигес луиз. Уйылон-уллянъёслэн эшшо одӥг умой емышсы вань. Со шаерысь ик тӧро вераз, соос, кинъёс Иеговалы ужамысь-тыршемысь дугдӥзы, кенешлэн  пумиськонъёсаз ветлыны но выльысь тодытыны кутскизы шуыса.

7. а) Малы ми дышетскиськомы Левитын 26:36, 37 гожтэмысь? б) Мар тӥ кароды, кивалтӥсьёс Иеговалы йыбыртъяны ӧз лэзе ке?

⁷ Куке тушмонъёсмы ужмес нуыны уг лэзё, соослэн потэ, ми мед кышкаломы но Иеговалы ужамысь-тыршемысь мед дугдомы шуыса. Соос быгато ми сярысь зэмос луисьтэм веранъёс вӧлмытыны, улон интыосамы утчаськонъёс ортчытъяны, судэ ӧтьылыны но пытсэтэ пуктыны. Соос малпало, кинэ ке пытсэтэ пуктыны быгатӥзы ке, мукетъёсыз кышкаса номыр карыны уз быгатэ ини шуыса. Кышканлы сётскыса, ми ужан-тыршонэ ӧжытгес пыриськыны кутскомы яке пыриськемысь чылкак дугдомы. Милям уг поты укшаммы соослы, кинъёс сярысь гожтэмын Левитын 26:36, 37. (Лыдӟе.) Ми ум лэзе кышканлы ӟырдыт мылкыдмес сӥятыны яке Инмарлы ужамысь-тыршемысь дугдытыны. Ми быдэсак Иеговалы оскиськомы но кышкаса ум куалекъялэ (Пс. 26:1). Ми вӧсяськыса Иеговалэсь кивалтэтсэ куромы. Ми юн оскиськомы: Инмармы милемын ке, та дуннеысь туж кужмо кивалтӥсьёс но уз быгатэ люкетыны солы оскымон ужаны-тыршыны (Евр. 13:6).

8, 9. а) Кыӵе ужпум кутоно котькуд семьялэн йырызлы? б) Мар юрттоз малпаськыса ужпум кутыны?

⁸ Тӥляд шаерады кивалтӥсьёс Иеговалэн Адӟись-Ивортӥсьёсызлэсь ужзэс нуыны уг лэзё ке, тӥляд юанды кылдыны быгатоз: «Кошконо-а отчы, кытын мон кышкатэк Инмарлы ужаны-тыршыны быгато?» Тӥ интые та ужпумез нокин уз куты. Кинлы ке но ужпум кутыны юрттоз эскерон со сярысь, мар каризы христианъёс нырысетӥ даурын, уйылон-уллянъёс кутскем бере. Куке Стефанлэн тушмонъёсыз сое изъёсын жугизы, Иерусалимын улӥсь дышетскисьёс «Иудеялэн но Самариялэн пӧртэм палъёсаз» пазьгиськизы но «Финикияозь, Кипрозь, Антиохияозь вуизы» (Ап. уж. 8:1; 11:19; Матф. 10:23). Нош кин ке но малпаськоз апостол Павеллэн учырез сярысь. Со ӧз кошкы отысь, кытын тушмонъёс тодытон ужлы туж люкетӥзы. Ас улонзэ жалятэк но, со ӟеч иворез вераз но вын-агайёслы юрттӥз со каръёсын, кудъёсаз соосты лек уйылыса-улляса возизы (Ап. уж. 14:19—23).

⁹ Малы дышето милемыз та учыръёс? Котькуд семьялэн йырызлы ужпум кутоно, мар умойгес луоз солэн семьяез понна. Ужпум кутэмлэсь азьло солы Иеговалы вӧсяськоно но семьяезлэн югдурез сярысь умой малпаськоно. Озьы ик эскероно, мар умоез но умойтэмез вань, соос кошкизы ке. Та удысын котькуд христиан мурт «аслаз улонысьтыз секытлыкъёсты ачиз нуыны кулэ» (Гал. 6:5). Мукет адямиосты судъяно ӧвӧл со понна, кыӵе соос ужпум кутӥзы.

10. Кыӵе кивалтэт сётоз филиал но тӧроос?

¹⁰ Кызьы уйылон-уллянъёс дыръя Иеговалы йыбыртъяно? Филиал тӧроослы сётоз кивалтэт со сярысь, кызьы духовной сиён басьтыны луоз, кызьы кенешлэсь пумиськонъёссэ ортчытъяно но ӟеч иворез верано. Филиал тӧроосын герӟаськыны ӧз быгаты ке, тӧроос асьсэос сюлмаськозы, тӥ но быдэс кенешты азьланяз но Иеговалы ужаны-тыршыны мед быгатоды шуыса. Тӧроос кивалтэт сётозы, лыдэ басьтыса сое, мар гожтэмын Библиын но публикациосамы (Матф. 28:19, 20; Ап. уж. 5:29; Евр. 10:24, 25).

11. Малы оскыны луэ, духовной сиёнмы котьку луоз шуыса? Мар тӥ карыны быгатӥськоды, духовной сиёнды мед луоз шуыса?

¹¹ Иегова кыл сётӥз, ужась-тыршисьёсызлэн духовной сиёнзы тырмыт луоз шуыса  (Ис. 65:13, 14; Лука 12:42—44). Соин ик оске, солэн организациез лэсьтоз ваньзэ, тӥ Инмарлы оскымон кыльыны мед быгатоды шуыса. Нош мар карыны быгатӥськоды тӥ? Уйылон-уллянъёс кутскем бере шедьтэ инты, кытчы тӥ ватыны быгатысалды Библиез но публикациосмес. Ноку но эн кельтэ та дуно духовной сиёнэз — книгаосты но, электрон тӥрлыкъёсты но — отчы, кытысь сое капчиен шедьтозы. Осконмы юн мед луоз шуыса, милемлы туж тыршыны кулэ.

12. Кызьы тӧроос пумиськонъёсты ортчытъялозы, мукет адямиос соос сярысь медаз тодэ шуыса?

¹² Нош мар вераны луоз кенешлэн пумиськонъёсыз сярысь? Тӧроос пумиськонъёсты озьы ортчытъяны тыршозы, тушмонъёс соос сярысь медаз тодэ шуыса. Оло нош, тӧроос курозы кӧня ке ӵошен гинэ люкаськыны но пумиськонъёсты ортчытъян дырез но интыез ӵем вошъялозы. Вын-агайёслы но сузэр-апайёслы номыр кышкытлык медаз вайы шуыса, пумиськонэ лыктыкуды но, кошкыкуды но, тӥледлы шыпытгес вераськоно луоз. Адямиос милемлы трос саклыксэс медаз висъялэ шуыса, огшорыгес дӥсяськоно луоз, вылды.

13. Малы дышетэ милемыз Совето Союзысь вын-агайёслэн примерзы?

¹³ Кызьы ми ӟеч иворез вераломы? Со герӟаськемын соин, кыӵе югдур тӥляд шаерады. Кызьы гинэ медам луы, ми тодытыны луонлык шедьтомы, малы ке шуоно ми Иеговаез яратӥськомы но милям мукетъёсызлы солэн Эксэйлыкез сярысь вераммы потэ (Лука 8:1; Ап. уж. 4:29). Тани мар гожъяз Эмили Бэран, история удысысь тодосчи, Совето Союзын улӥсь Иеговалэн Адӟись-Ивортӥсьёсыз сярысь: «Куке кивалтӥсьёс Иеговалэн Адӟись-Ивортӥсьёсызлы тодытыны ӧз лэзе, соос вераськыны кутскизы бускельёсынызы, ӵош ужасьёсынызы но эшъёсынызы. Нош куке Адӟись-Ивортӥсьёсты пуктылӥзы пытсэтъёсы, кудъёсаз пукисьёсты ужато вал, соос тодытыны кутскизы пытсэтын мукет пукисьёслы». Уйылон-уллянъёс вын-агайёсты ӟеч иворез верамысь ӧз дугдытэ. Тӥляд шаерады но уйылон-уллянъёс куке но кутскизы ке, соослэсь умой примерзэс тодады вае.

14. Кыӵе кышкытлык сярысь тодамы вайытэ Псалтирь 38:2?

¹⁴ Мултэссэ эн вералэ. Уйылон-уллянъёс дыръя туж кулэ тодамы возьыны, «шып улонлэн аслаз дырыз» шуыса (Екк. 3:7). Милемлы верано ӧвӧл вын-агайёслэсь но сузэр-апайёслэсь нимъёссэс, пумиськонъёсты ортчытъян интыос сярысь, кызьы ӟеч иворез вераськомы но кызьы духовной сиён басьтӥськомы. Ми ум вералэ сое кивалтӥсьёслы, озьы ик асьме шаерын яке кунгож сьӧрын улӥсь эшъёсмылы но ӵыжы-выжыосмылы, соос Иеговалэн Адӟись-Ивортӥсьёсыз луо ке но. Ми та визь-кенешъёслэсь ӧм ке  кылзӥське, вын-агайёсмы кышкытлыке сюрозы. (Лыдӟе Псалтирез 38:2.)

15. Мар карыны тыршоз Шайтан но мар милемлы кароно, солэн сьӧлтэтаз медам сюре шуыса?

¹⁵ Огшоры мугъёсын сэрен куспады люкиськонъёс медаз кылдэ. Шайтан умой тодэ, «юрт аслыз ачиз пумит люкиськиз ке, со юртлэн быдэс кылемез уз луы» шуыса (Марк 3:24, 25). Соин со вань кужмысьтыз милемыз люкыны тыршоз. Со малпа, ми соин ум, нош ог-огенымы нюръяськыны кутскомы шуыса.

16. Малы дышетэ милемыз Гертруд Пётцингер сузэрлэн учырез?

¹⁶ Юн осконэн христианъёслы но сак луоно. Тани мар луиз кык зырӟем сузэръёсын, кудъёсызлэн нимъёссы Гертруд Пётцингер но Эльфриде Лёр. Соос мукет сузэръёсын ӵош нацистъёслэн концлагерязы вал. Гертруд вожъяськыны кутскиз, Эльфриде, речьёс вераса, сузэръёслэсь мылкыдзэс ӝутыны быгатэ вал шуыса. Кӧня ке дыр ортчыса, Гертруд сузэрлы со понна возьыт луиз, но со сюлворыса Иеговалэсь юрттэт куриз. Со гожъяз: «Милемлы дышетсконо валаны, мукетъёсызлэн, милям сярысь, быгатонлыкъёссы тросгес луыны быгато шуыса, но сюлмаськытэк улыны, соослы тросгес дано ужъёс оскемын шуыса». Кызьы Гертруд вожъяськон сямзэ вормиз? Со саклыксэ висъяны кутскиз Эльфриде сузэрлэн умой сямъёсызлы но мукет адямиосын тупаса улыны быгатэмезлы. Солы луыса Гертруд умой сямен учкыны кутскиз Эльфриде сузэр шоры. Гертруд но Эльфриде сузэръёс концлагерь пыр потӥзы но кулытозязы Иеговалы оскымон ужазы-тыршизы. Ми вань кужмысьтымы вын-агайёсынымы но сузэр-апайёсынымы тупамтэосмес сэрттыны-пертчыны тыршиськомы ке, соку Шайтан огкылысь улонмес сӧрыны уз быгаты (Кол. 3:13, 14).

17. Маин кышкыт ас вылад оскиськыса улон?

¹⁷ Ас вылад оскиськыса улыны кышкыт. Ми кыл кутӥсь вын-агайёслэн кивалтэтсылэсь кылзӥськимы ке, соку мултэс шуг-секытъёслэсь палэнскомы (1 Пётр 5:5). Тани одӥг учыр. Шаерын, кудаз кивалтӥсьёс ужмес нуыны уг лэзё, кыл кутӥсь вын-агайёс ивортӥсьёслы кивалтэт сётӥзы, адямиослы ӟеч иворез вераку, печатлам публикациосты кельтоно ӧвӧл шуыса. Нош одӥг агай, кудӥз пионер луыса ужа-тырше, малпаз, ачиз умойгес тодэ шуыса, но азьло сямен тодытӥз. Кытчы со вуттӥз? Одӥг пол, куке со но мукет ивортӥсьёс ужан-тыршонзэс йылпумъязы, соос доры полициын ужасьёс лыктӥзы. Та ужасьёс ивортӥсьёсты чакласа улӥзы, шӧдске, но соос кие сюризы адямиослы кельтэм публикациос. Малы дышетэ милемыз та учыр? Вын-агайёслэн вань куронъёссылэсь кылзӥськыны кулэ, ми малпаськомы ке но,  мукет сямен лэсьтыны умойгес луысал шуыса. Иегова милемыз бакель каре котьку но, куке ми кылзӥськиськомы соослэсь, кинъёслы со аслаз организацияз кивалтэт сётӥз (Евр. 13:7, 17).

18. Малы кулэтэм курон-косонъёс пуктоно ӧвӧл?

¹⁸ Кулэтэм курон-косонъёсты эн пуктэ. Кулэтэм курон-косонъёсты пуктыса, тӧроос мукетъёсызлы шуг-секытъёс кылдыто. Тани мае тодаз вае Юрай Каминский агай со дыръёс сярысь, куке Чехословакиын уйылон-уллянъёс вал: «Куке троссэ тӧроосты пытсэтэ пуктӥзы, кылем вын-агайёс пӧлысь куд-огъёсыз кенешъёсын но ёросъёсын ас вылазы кивалтэт басьтӥзы но ивортӥсьёслы вераны кутскизы, мае лэсьтыны яра, нош мае уг яра шуыса». Иегова ӧз сёты милемлы право мукет адямиос понна ужпум кутыны. Соос, кинъёс кулэтэм курон-косонъёс пукто, вын-агайёсты кышкытлыкъёслэсь уг утё, нош осконэнызы кузёяськыны тыршо (2 Кор. 1:24).

19. Кыӵе оскон сёто милемлы 2 Паралипоменонын 32:7, 8 гожтэм кылъёс?

¹⁹ Асьмелэн валтӥсь тушмонмы, Шайтан, Иеговалэсь ужась-тыршисьёссэ азьланяз но уйылоз-уллялоз (1 Пётр 5:8; Усьт. 2:10). Шайтан но солы дурбасьтӥсьёс лэсьтозы ваньзэ, Иеговалы йыбырттонэз дугдытон понна. Озьы ке но, кышканмы шоры учкытэк, ми ноку но ум дугдэ Иеговалы ужамысь-тыршемысь (К. Зак. 7:21). Иегова ми палан. Со юрттоз милемлы, кивалтӥсьёс ужмес нуыны ӧз лэзе ке но. (Лыдӟе 2 Паралипоменонэз 32:7, 8.)

20. Мар карыны тӥляд мылкыдды вань?

²⁰ Ойдолэ адӟем каромы христианъёслэсь, кудъёсыз кивалтӥсьёслы шуизы: «Асьтэос судить каре: Инмар азьын шонер-а луоз, Инмарез сярысь, тӥледыз золгес кылзӥськыны? Ми ум быгатӥське адӟеммес но, кылэммес но вератэк улыны» (Ап. уж. 4:19, 20).