BIBLIA ukoro lembe ma tung’ tung’ ma dhanu ma gibino “ku kum calu wan” gibed giyero niai kud i adundegi. (Yak. 5:17) Ku lapor, wacopo nyang’ yot yot i lembe ma jakwenda Paulo uyero ma nwang’ere i Jurumi 7:21-24. Eyero kumae: ‘Kinde m’ayenyo atim ber, dubo nuti. . . . Ei an a ng’atu ma ng’ic!’ Saa ma wabenyego ku ng’ico moko nikum dubo alaga, wanwang’u tielocwiny lee ning’eyo nia kadok jakwenda Paulo m’ubino won bedopwe de unyego anyega ku dubo alaga.

Re Paulo udok uyero wec moko mange m’uai kud i adundene. Eyero ku tegocwinye kumae: ‘Wod Mungu, umara, man emire gire pira!’ (Gal. 2:20) Nyo in de ibed inwang’u nia Yesu umiyere piri? Copere, re nyo nja ngo.

Kan asu cwinywa bedieng’ pi dubo moko ma wagam watimo con, wacopo nwang’u nia ve Yehova umaruwa ngo man nia eweko ngo dubone, eno copo ketho ebedo iwa tek niyio nia Yesu uthiero jamgony piwa. Nyo andha Yesu ubemito inen jamgony ni giramia m’emio iri? Ang’o ma copo konyi nineno jamgony kumeno? Dong’ wakewadwok wang’ penji ario maeno.

Yesu ubemito nia ng’atuman unen jamgony ni giramia m’emio ire. Ang’o m’unyutho nia etie kumeno? Wakenen lembe ma nwang’ere i buku pa Luka 23:39-43. Jutwio ng’atu moko iwi yen i ng’et Yesu. Eyio nia andha etimo dubo. M’umbe jiji, ebino dubo ma pek, pilembe ju m’utimo dubo ma pek re ma jubed julierogi iwi yen. Cwiny jalwo maeno ubino dieng’ lee mandha, uketho eyero ni Yesu kumae: “Poi pira kan imondo i Ker peri.”

Yesu udwoko ire lembang’o? Kepar pi litho ma Yesu unwang’u kinde m’egam eloko wang’e pi nineno jatimrac maeno. Kadok Yesu ubino winjo litho ma lee de, re egam evonjo man etielo cwiny jatimrac maeno ku wec ma e: ‘Andha awacu iri kumae tin, wabibedo wakudi i Paradiso.’ Nwang’u Yesu copo poyo wie kende kende nia ‘Wod dhanu . . . mio kwo pare ni gony mi dhanu dupa.’ (Mat. 20:28) Ento Yesu uyero ire wec m’unyutho nia jamgony m’ebecithiero utie ku bero ni jatimracne en gire. Eyero ire ku mer nia “wabibedo wakudi.” I ayi maeno, Yesu unyutho ire nia jamgony m’emio biketho ebikwo i Paradiso iwi ng’om.

M’umbe jiji, Yesu umito ng’atuno ung’ei nia jamgony m’ebecithiero bimio bende bero ire. Ka Yesu unyutho kamaleng’ nia jamgony maeno utie ku kony ni jatimrac m’ugam unwang’u de ngo kaka mi timo ni Mungu, m’umbe jiji, etie bende ku kony ni Jakristu m’ulimo batizo man m’ubetimo ni Mungu. Ang’o ma copo konyowa niyio nia andha jamgony ma Kristu umio utie iwa ku bero kadok nwang’u nyo i wang’e walar watimo kosa moko de?

Tic mi rweyo lembanyong’a ma Yesu umio ni Paulo uketho enyang’ nia Yesu utho pire.  Nenedi? Ekoro kumae: “Afoye m’emio ira tego, en e Kristu Yesu Rwoth mwa, kum ekwana ya an a ng’atu mandha m’egoyo wia eketha ko kum tic pare, ma naka an a jayer lembacidi, man jaragedo, man jarop bende.” (1 Tim. 1:12-14) Kadok nwang’u jakwenda Paulo ubed utimo lembe ma rac i wang’e de, re Yesu ugam umio ire tic, eno uketho enwang’u nia Yesu nyutho ire kisa, umare man ugene. Yesu umio bende tic mi rweyo lembanyong’a ni ng’atuman acel acel m’i kindwa. (Mat. 28:19, 20) Nyo tic mwa mi rweyo lembanyong’a copo konyo wan bende ning’eyo nia Yesu utho piwa?

Umego Albert ma jugam jukoyo kud i cokiri man edwogo i ng’ei oro kago 34, uyero kumae: “Wiya bewil ungo i kum dubo m’agam atimo. Ento kan aberweyo lembanyong’a, calu Paulo, anwang’u nia an de Yesu re m’umio ira tic maeno. Ticne mio ira mutoro, eketho abedo ku nen ma ber i wiya, iwi kwo para ma tin man mi nindo m’ubino.”​—Zab. 51:3.

Umego Allan m’ubed utimo nyoth dupa man m’ubino dhanu ma ger i wang’ niponjo lemandha ukoro kumae: “Saa ceke aparu pi racu m’abed atimo ni dhanu. Saa moko lembene turo cwinya lee dit. Ento adwoko foyofoc ni Yehova kum eweko nia an m’atie jadubo de arwei lembanyong’a ni dhanu. Kinde m’abeneno kite ma dhanu gibejolo ko lembanyong’a, apoi nia andha Yehova e ber man emaru dhanu lee dit. Anwang’u nia ebetio kuda nikonyo dhanu ma gibetimo lembe ma reco ma an de abed atimo.”

Ka waberweyo lembanyong’a nwang’u wabetimo tic ma ber; bende saa ma wani tije wabedo ku paru ma cuu. Tije konyowa ning’eyo nia Yesu utie ku kisa i kumwa, emaruwa man egenowa.

Nitundo ma Yehova binyotho ng’om maeni ma pa Sitani, adundewa copo medere asu nipoko lembe rac i wiwa pi kosa moko ma wagam watimo con. Ang’o ma copo konyowa niwodho paru ma kumeno cen kud i wiwa?

Nyamego Jean ma cwinye bedieng’ lee pilembe i wang’e ebed ekwalere nitimo lembe m’ukoc ku cik pa Mungu uyero kumae: “Amaru lembe ma Biblia uyero nia ‘Mungu dwong’ ma sagu adundewa.’” (1 Yoh. 3:19, 20) Calu nyamego Jean, wan de cwinywa copo kwio kum wang’eyo nia Yehova giku Yesu ginyang’ nia watie judubo. Pieno poi nia mer ma lee ma gimeri ko ucwalugi nimio jamgony pi judubo ma giyewo dubo migi, ento ungo pi dhanu ma gimbe ku dubo alaga.​—1 Tim. 1:15.

Ka wabeparu kilili mandha ayi ma Yesu ubed utio ko ku dhanu ma gileng’ ungo, man wabemiyara ku cwinywa ceke i tic m’eketho i korwa, eno bikonyowa niyio nia andha jamgony utie giramia m’emio iwa. Kan itimo kumeno, calu jakwenda Paulo, in de icopo yero kumae: ‘Yesu umara, man emire gire pira.’