LLENO el Biblia de maga expresion del maga gente que tiene maga sentido “igual lang canaton.” (Sant. 5:17) Por ejemplo, ta sinti kita si cosa ya habla si Pablo: “Masquin quiere yo hace bueno, no puede, cay ta puede lang yo sigui hace el maldad. . . . Que miserable gayot este di mio vida!” (Rom. 7:21-24, El Nuevo Testamento) Si tan dificil kita por causa na diaton imperfeccion, el cosa ya habla si Pablo ta puede kanaton dale comforta.

Ya menciona tambien si Pablo otro pa sentido. Na Galacia 2:20, convincido le que si Jesus “ya ama [con ele] y ya dale su cuerpo para muri por causa [de suyu]”! Ta sinti ba tambien tu igual ansina? Posible, gendeh pirmi.

Si bajo el diaton mirada na diaton mismo cuerpo por causa na diaton maga pecado de antes, posible tan dificil kita acepta que si Jehova ta ama y ya perdona ya kanaton. Posible, tan dificil tambien kita pensa que un personal regalo para kanaton el rescate. Quierre ba gayot si Jesus que pensa kita que un regalo para kanaton el rescate? Cosa kanaton puede ayuda para ansina kita pensa? Examina kita con ese dos pregunta.

Si, quierre si Jesus que pensa kita que un personal regalo para kanaton el de suyu sacrificio. Porque kita se puede habla? Imagina el ecsena na Lucas 23:39-43. Bitay el un gente na estaca cerca con Jesus. Ya admiti le que tiene le cosa ya hace malo. Asigurao que serioso el crimen que ya hace le cay con el maga criminal quien ya hace bien mal cosas lang el ta mata na estaca. Bien malingasa este persona poreso ya habla le con Jesus: “Acorda conmigo cuando ay anda Uste na de Uste Reino.”

Cosa ya hace si Jesus? Imagina si cosa dolor ya sinti si Jesus cuando necesita le bira cara para mira con el criminal. Maskin pa bajo le na dolencia, yan smile si Jesus y ya asigura con el gente: “Ay esta tu na Paraiso junto conmigo.” Puede lang era hace acorda si Jesus con el gente que “ya vene Le para sirvi y entrega su vida para rescata con mucho maga gente.” (Mat. 20:28) Pero ya puede ba tu nota que ya hace claro si Jesus que para con aquel mismo gente el de suyu sacrificio? Ya usa le con el palabra “tu” y “conmigo.” Y ya habla le con el gente que hay vivi le na paraiso tierra.

Asigurao, quierre si Jesus que entende este persona que hay beneficia tambien le na sacrificio de Jesus. Si ese el cosa ya sinti si Jesus para na un gente quien nuay gane tiene oportunidad para sirvi con Dios, asigurao ansina tambien ta sinti si Jesus para con el un bautizao Cristiano quien ta sirvi con Dios. Pero cosa puede ayuda kanaton para queda convincido que hay beneficia gayot kita con el rescate de Jesus maskin pa ya puede kita comete culpa de antes?

El ministerio de Pablo tiene efecto na de suyu mirada na sacrificio de Jesus. Na cosa manera? Ele ya habla: “Ta dale yo gracias con Cristo Jesus, el diaton Señor, quien ya dale conmigo fuerza  y ya comfia conmigo cuando ya llama Le conmigo na su servicio, maskin estaba yo ta ultraja y ta persigui y ta insulta con Ele.” (1 Tim. 1:12-14) Cay ya dale con ele trabajo si Jesus maskin pa na todo mal cosas le ya hace, ya convinci este con ele que si Jesus tiene amor, lastima y confianza con ele. Ya manda tambien si Jesus con el cada uno kanaton que predica con el buen noticia. (Mat. 28:19, 20) Puede ba este convinci kanaton que ya muri tambien si Jesus para kanaton mismo?

Si Albert, quien nuevo lang ya bira con Jehova despues man disfellow cerca 34 año, ya habla: “Gendeh yo ta puede ulvida con el maga culpa que ya hace yo. Pero si talli yo na ministerio, ta sinti yo que igual con apostol Pablo, personal conmigo ya dale si Jesus este ministerio. Mas alegre yo y tiene positivo mirada na de mio mismo cuerpo, na de mio vida y na de mio futuro.”​—Sal. 51:3.

Antes aprende si Allan con el verdad, bien violente le y ya comete manada crimen. Ele ya habla: “Ta puede siempre yo pensa con el maga mal cosas que ya hace yo con el maga gente. Y tiene vez, ta hace este conmigo bien triste. Pero ta rindi yo gracias con Jehova cay ya permiti le con el un pecador igual conmigo para predica el buen noticia con otro. Si ta mira yo con el positivo reaccion del maga gente na buen noticia, ta hace este conmigo acorda si paquemodo de bueno y amable si Jehova. Ta sinti yo que ta usa le conmigo para ayuda con otro quien ya puede tambien hace maga mal cosas.”

El diaton ministerio ta ayuda kanaton para hace y pensa maga buen cosas. Ta dale este kanaton asiguranza que si Jesus tiene amor, lastima y confianza kanaton.

Cay nuay pa destroza con el mal sistema de Satanas, posible siempre kita queda bien triste por causa na maga culpa que ya hace kita de antes. Pero cosa puede ayuda kanaton para man contra con este sentido?

“Bien alegre yo sabe que el ‘Dios mas sabe que canaton acerca del di aton maga corazon,’” ya habla si Jean quien ta sinti siempre culpable cay tiene le doble manera de vida cuando joven le. (1 Juan 3:19, 20, El Nuevo Testamento) Igual con Jean, puede tambien kita sinti alivio cay sabe kita que si Jehova y si Jesus ta entende que maga pecador kita. Acorda que ya dale sila con el rescate, gendeh para na maga perfecto gente sino para con aquellos quien ya arripinti na maga pecado que ya comete sila.​—1 Tim. 1:15.

Ta queda kita convincido que el rescate un personal regalo para kanaton si ta reza kita y ta medita si paquemodo ya trata si Jesus con el maga imperfecto gente y si ta hace kita el todo lo que puede na diaton ministerio. Si hace tu se, igual con Pablo, puede tu habla que si Jesus “ya ama conmigo y ya dale su cuerpo para muri por causa dimio.”