MBIBILIANI iyo ninofwanyamo dhitanalelo dha attu ‘dhinligana na dhehu.’ (Tia. 5:17) Motagiha, murumiwi Paulo ohoniha ntanaalelo naye mBibiliani va Roma 7:21-24 wi: “Vanfunemi wira dhapama, panddaddamela obure. . . . Ntowa gani nina miyo!” Otanaalela dhubuwelo esi dhinonikamihedha mudhidhi ongumanana iyo dhorutxa.

Paulo kanivitile elo, ohiloga esile dhanpatta. Munivuruni na Galásia 2:20 iyene ohoniha mwinyene wi onomukuluvela Yezu valogiliye wi “ddineddana n’omuroromela Mwana-Mulugu onddikwela!” Enlagiha wi ‘wahikaana dhubuwelo ninga dhehu’ vina? Txino kahiyo dila dhotene

Akala iyo ninottiddiwa na dhubuwelo dhawobana, sabwa ya elobo yottega ekosile iyo wale, txino mudhidhene obo ninorutxiwa orumela okwela wa Mulugu wa onilevelela vina woona mukutto wa Yezu ninga nvaho operhekeliwe iyo. Txibarene Yezu onfuna wi naganyedhege mukutto oniperhekeliye? Elobo gani enfwanyela iyo okosa wi enikamihedhe? Ovano ndoweni nirome otanaalela mavuzo aba.

Indde, Yezu onfuna wi noonege mukutto waye ninga nvaho webaribari. Ninawodhe dhavi okuluvela? Karoma otanaalela dhologa dhaye dhinfwanyeya va Luka 23:39-43. Yezu wahikomeliwa waddamana na Timbwini. Timbwiniya wahirumela wi dheriliye mundduni kadhakalile, iyene wahifanyeela ososotteliwa merelo aye. Sabwa ya okubanya na esile dhanpaduwela, ohimuddoddobela Yezu eraga: “Muddubuwele miyo mwafiya mumweneni mwenyu.”

Yezu wakulile dhavi? Karoma otanalela mukalelo wavilibihedhile Yezu ozugunutxa nikotti wi amwang’ane mulobwana oddule. Wowundeyene guru na wiwa opa ovilibihedha ompangarhaza. Iyene ohiloga: ‘Ddinoddubela ddabuno, weyo onokala na miyo mparaizu.’ Kofuna Yezu agamubutxedha mulobwana oduule wi “Mwana-Muthu kadhele wimeleliwa, odhele . . . ovilevela woboleliwa wa enjene.” (Mt. 20:28) Weyo onowubuwela elogile Yezu mwaha wa mukutto waye? Na mukalelo wa wandana Yezu ohimwaddela alabihedhaga mazu aba “weyo” na “miyo.” Mwinyene wahimwaddela mulobwana oddule, wi agahikala mparaizu velaboni ya vati.

Mohaganyedha, Yezu wafuna wi mulobwana oddule arumeele mukutto wa nvaho waye. Yezu wahimukubanyedha timbwini oddule watowile gari ya omulabela Mulugu, iyene agahubuwela mukalelo wakakene ogubuwele Mukristu obatiziwa yawi agatxinuwa mwa dhovirigana dhawa anele oleveleliwa. Txini enanikamihedhe orumeela wi mukutto wa Yezu onele onikamihedha n’anya, masiki na dhovirigana dhirilehu mundduni?

Mabasa a Paulo ahoniha wi iyene wahipattiwa na mukutto wa Yezu. Sabwaya? Iyene ohitapulela: “Ddinomutamalela Nabuyehu Yezu Kristu, oddilibihile murima, oddonilena ororomeleya, addithanela mabasaye, oku miyo wale ddimwabaga, ddimusuthaga, ddimwiddaga.” (1 Tim. 1:12-14) Mabasa avahiwe Paulo ahimpangarhaza, wi ttagaraga na okwela wa Yezu yali ebaribari wa iyene mwinyene. Moligana, Yezu ohinittomela mabasa a olaleya. (Mt. 28:19, 20) Mabasa aba annipatta dhavi?

Albert, waburutxiwe mmulogoni okwaranya vyaka 34, omwiyelele Yehova ovanenevi ohiloga: “Dhotega dhaga dhilivi na miyo. Mbwenye ddigakala mmalaleyoni, ddinowubuwela ninga murumiwi Paulo wi miyo dhamwinya ddittambirha mabasa addittomeli Yezu. Eji enoddunuwiha, enoddivaha wagalala mwigumini mwaga na njedhelo na musogorho.”—Masal. 51:3.

Allan, ahinatti onsunza ebaribari wali panga vina namavuta ohiloga: “Miyo ddinowubuwela dhilobo dhotene dhabure dhawirelimi attu. Dila dhina dhinoddittiya wokubanyene. Mbwenye ddinomutamaalela Yehova onddittiya miyo ninga muttegi walaleya attu ena miselu dhapama. Ddigawona attu arumeelaga miselu dhapama, enoddubuweliha oderetu na okwela wa Yehova. Iyene onoddilabihedha miyo wi ddakamihedhe attu ena anwanana dhilobo dhabure.”

Efunelo yehu ya olaleya enonikamihedha ozuzumela dhilobo dhapama vina wubuwela dhilobo dhaderetu. Dhinonilibiha okuluvela ttagaraga na okwela wa Yezu.

Mpaka ofiya otolotxiwa wa elabo yabure ya Satana, murima wehu onele onikona sabwa ya dhubuwelo dhabure dhikosilihu mundduni. Txini enanikamihedhe ovilela dhubuwelo esi?

Jean ohiloga: “Miyo ddinomukwela ‘Mulugu vowi iyene onopitta murimehu,’” iyene onowanana dhubuwelo dhabure, vowi bali muzombwe wattukula egumi ninga nakattenddewa. (1 Jo. 3:19, 20) Iyo ninopangarhazeya oziwa wi Yehova vamodha Yezu ahikaana monelo wapama mwaha wa dhottega dhehu opitta nanya. Kobuwela wi awene kawobolile attu owakwana, mbwenye attegi antxinuwa.—1 Tim. 1:15.

Iyo ninokuluvela wi yobolo enonipatta, nigalobelaga, ninotanaalela mukalelo onaweddiha Yezu attu ohiligana vina nigalabaga mmabasani a olaleya ninovilibihedha wakwanihedha mabasa attomeliwehu. Ogakosa dhahene, ninga Paulo, onele ologa: Yezu “oddikwela miyo ofiyedha oddiperhekela egumi yaye.”