MADAMO kita sing mabasa sa Biblia parte sa ginbatyag sang matutom nga mga tawo nga “may balatyagon kaangay sa aton.” (Sant. 5:17) Halimbawa, mahangpan naton ang ginbatyag ni Pablo sang nagsiling sia sa Roma 7:21-24: “Kon luyag ko himuon ang husto, ang malain yari sa akon. . . . Makaluluoy gid ako!” Makapalig-on mabal-an nga nabatyagan man sang isa ka matutom nga tawo pareho ni Pablo ang aton nabatyagan kon ginabatuan naton ang aton mga kaluyahon bangod indi kita perpekto.

Pero lain naman ang ginbatyag ni Pablo sang nagsiling sia sa Galacia 2:20: “[Ang Anak sang Dios] naghigugma sa akon kag nagtugyan sang iya kaugalingon para sa akon.” Kumbinsido gid si Pablo sa sini. Amo man bala sini ang imo ginabatyag? Basi kon kaisa, indi amo sini ang imo nabatyagan.

Kon nagabatyag kita nga wala kita sing pulos bangod sang mga sala naton sang una, mahimo nga indi kita magpati kon kaisa nga palangga kita ni Jehova kag ginpatawad na niya kita. Mabudlayan man kita nga tamdon ang halad ni Jesus nga regalo para sa kada isa sa aton. Gusto gid bala ni Jesus nga tamdon naton nga regalo ang gawad? Ano ang makabulig sa aton para tamdon naton ini nga regalo? Binagbinagon naton ining duha ka pamangkot.

Huo, gusto ni Jesus nga tamdon naton ang iya halad nga regalo para sa kada isa sa aton. Ngaa sigurado kita sa sini? Imadyina ang eksena nga mabasa sa Lucas 23:39-43. Nalansang man sa usok sang pag-antos ang isa ka tawo sa tupad ni Jesus. Gin-aku niya nga nakahimo sia sang sala. Grabe gid nga krimen ang iya nahimo bangod ang silot sa iya para lang sa pinakamalain nga mga kriminal. Nabalaka gid ini nga tawo, gani nangabay sia kay Jesus: “Dumduma ako kon magsulod ka sa imo Ginharian.”

Ano ang ginhimo ni Jesus? Imadyina kon daw ano kasakit ang iya nabatyagan sang nagliso sia kag nagtulok sa tawo. Bisan pa nasakitan sia, nagyuhum sia kag ginpasalig ang tawo: “Sa pagkamatuod ginasiling ko sa imo karon nga adlaw, mangin kaupod ko ikaw sa Paraiso.” Puede lang kuntani sia silingan ni Jesus nga “ang Anak sang tawo [nagkari agod] ihatag ang iya kabuhi nga gawad kabaylo sang madamo.” (Mat. 20:28) Pero mainayuhon nga ginsiling ni Jesus sa tawo nga sia mismo makabenepisyo sa iya halad. Mainabyanon si Jesus sang gingamit niya ang mga tinaga nga “ikaw” kag “ko.” Kag ginsilingan niya ang tawo nga puede sia mabuhi sa paraiso sa duta.

Gusto gid ni Jesus nga mahangpan sini nga tawo nga para man sa iya ang halad nga himuon ni Jesus. Kon amo sini ang ginbatyag ni Jesus sa isa ka kriminal nga wala gid makaalagad sa Dios, mas batyagon ini ni Jesus sa isa ka bawtismado nga Cristiano nga nagaalagad sa Dios. Ano ang makabulig sa aton nga magpati nga para sa kada isa sa aton ang halad sang Cristo bisan pa nakasala kita sang una?

Bangod ginhatagan ni Jesus si Pablo sing asaynment nga magbantala, nahangpan niya nga napatay si Jesus para sa iya. Ginpaathag niya: “Nagapasalamat ako kay Cristo Jesus nga aton Ginuo, nga  nagpabakod sa akon, bangod ginkabig niya ako nga matutom paagi sa pagtangdo sa akon sa isa ka ministeryo, bisan pa sadto manugpasipala ako, manughingabot, kag arogante nga tawo.” (1 Tim. 1:12-14) Bangod ginhatag ni Jesus kay Pablo ini nga asaynment bisan pa malain ang ginhimo niya sang una, nagkumbinsi ini sa iya nga ginkaluuyan, ginpalangga, kag ginsaligan sia ni Jesus. Ginhatagan man ni Jesus ang kada isa sa aton sing asaynment nga magbantala. (Mat. 28:19, 20) Makabulig man bala ini sa aton nga mahangpan nga napatay si Jesus para sa aton?

Si Albert, nga na-disfellowship sing halos 34 ka tuig kag nagbalik na kay Jehova, nagsiling: “Pirme ko madumduman ang akon mga sala. Pero kon nagabantala ako, mabatyagan ko ang ginbatyag ni apostol Pablo kay ginhatag ni Jesus ini nga asaynment sa akon. Nagbulig ini sa akon nga mangin malipayon kag pensaron ang maayo sa akon kaugalingon, sa akon kabuhi, kag sa akon palaabuton.”—Sal. 51:3.

Si Allan, nga isa anay ka kriminal kag bayolente nga tawo antes niya matun-an ang kamatuoran, nagsiling: “Madumduman ko gihapon ang tanan nga malain nga ginhimo ko sa iban. Bangod sini, nagakadepres ako kon kaisa. Pero nagapasalamat ako kay Jehova kay gintugutan niya ako nga magbantala sang maayong balita sa iban bisan pa makasasala ako. Kon makita ko nga ginabaton sang mga tawo ang maayong balita, madumduman ko nga maayo gid kag mahigugmaon si Jehova. Nabatyagan ko nga ginagamit niya ako para buligan ang iban nga nakahimo man sang malain pareho sa akon sang una.”

Kon nagabantala kita, maayo ang aton ginahimo kag ginapamensar. Nagakumbinsi ini sa aton nga ginakaluuyan, ginapalangga, kag ginasaligan kita ni Jesus.

Samtang wala pa malaglag ang malaut nga sistema ni Satanas, mahimo kita gihapon magbatyag sing kasubo bangod sang mga sala naton sang una. Paano naton mabatuan ini nga balatyagon?

“Nalipay gid ako nga ‘ang Dios labaw pa sa aton tagipusuon,’” siling ni Jean, nga pirme ginakonsiensia bangod sang iya doble nga pagkabuhi sang pamatan-on pa sia. (1 Juan 3:19, 20) Mapaumpawan man kita kon hunahunaon naton nga nahangpan ni Jehova kag ni Jesus nga makasasala kita. Dumduma nga ginhatag nila ang gawad para sa mga makasasala nga naghinulsol, indi sa perpekto nga mga tawo.—1 Tim. 1:15.

Makumbinsi gid kita nga para sa kada isa sa aton ang gawad kon pamalandungan naton ang pagtamod ni Jesus sa indi perpekto nga mga tawo kag kon himuon naton ang aton bug-os nga masarangan sa ginhatag niya sa aton nga asaynment nga magbantala. Kon himuon mo ini, masiling mo man ang ginsiling ni Pablo: Si Jesus “naghigugma sa akon kag nagtugyan sang iya kaugalingon para sa akon.”