MOMBEIBELA tu lesa ohunga novarumendu ovaṱakame mba ri noumune “otja eṱe.” (Jak. 5:17) Otjotjihorera, tu yenena okuzuva nawa omambo wa Paulus nga hungira mOvaroma 7:21-24 nge tja: “Ami mbi vanga okutjita ouwa, nungwari ihi porwatjo tji mbi tjita owo mbwi ouvi. . . . Tjiri, owami omundu ngu mba ningisa ondjenda!” Tjiri otjiṋa otjihuhumiṋe okutjiwa kutja omurumendu omuṱakame tjimuna Paulus wa ri noumune otja imbo.

Paulus wina wa hungira oumune warwe. Eye wa tja: ‘Omuna wa Ndjambi, we ndji suverere nu we riyandjera ami omuinyo we.’ (Gal. 2:20) Paulus wa ri nongamburiro tjiri! Hapo ove u noumune otjingewo? Mape ya kaaruhe tji u kara noumune otjingewo.

Indu tji tu noumune ouvi mena rozondataiziro nḓu twa tjita morukapitaveze, eṱe mape ya atu utu okumuna kutja Jehova ke tu suvera nu ke tu isira. Nu mape ya ai rire otjiṋa otjizeu tjinene okuvara ombunguhiro ya Jesus otjotjiyandjewa kweṱe. Hapo Jesus tjiri u vanga kutja tu vare otjisuta tjonguturiro momuano mbo? Otjikwaye tji matji tu vatere kutja tu tji vare otjotjiyandjewa? Indjo tu tare komapuriro 2 ngo.

Otjiperi kutja Jesus u vanga kutja tu vare ombunguhiro ye otjotjiyandjewa kweṱe. Matu tjiwa vi? Ripura nomambo nge ri mu Lukas 23:39-43. Omurumendu wa turikirwe komuti wondatumisire meṋe ya Jesus. Eye we rimuna ondjo kotjiṋa otjivi tja tjita. Ondjito ndjo mape ya ya ri otjiṋa otjivi tjinene mena rokutja ovandu ovavi omba ve zepewa momuano otjingewo. Omurumendu ngwi ee ri kende tjinene nu we ri heka ku Jesus na tja: “Ndji zemburuka tji wa hiti mouhona woye!”

Jesus we mu zira vi? Ripura nomihihamo Jesus mbya ri navyo indu tja tanaura otjiuru tje okutara komundu ngwi. Nandarire kutja wa ri momihihamo, eye wa meṱameṱa na huhumiṋa omurumendu ngwi na tja: “Tjiri, me ku raere, ndino mo kakara puna Ami moparadisa.” Jesus a tja zemburukisa omurumendu ngwi kutja: ‘Omuna wOmundu . . . we era okuyandja omuinyo we u rire onguturiro yovengi.’ (Mat. 20:28) Hapo wa munu kutja Jesus wa raisira omurumendu ngwi kutja ombunguhiro ye mai ṱunu kourike we wina? Eye wa hungira momuano omuwa nu wa ungurisa omambo nga “mo kakara” nembo ndi “ami.” Nu wa raera omurumendu ngo kutja ma kakara moparadisa kombanda yehi.

Otjingaperi kutja Jesus wa raisira omurumendu ngo kutja ma munu ouwa mombunguhiro ye. Tjinangara Jesus wa ri noumune mbo ohunga nomurumendu ngu hina aa karere Mukuru, eye tjiri u noumune mbo ohunga nOmukriste ngwa papitisiwa nu ngu karera Mukuru. Otjikwaye tji matji tu vatere okukara nongamburiro mombunguhiro ya Kristus nandarire kutja twa tjita ouvi morukapitaveze?

Otjiungura tja Paulus tjokuzuvarisa tja ṱuna komuano eye maa vara ombunguhiro ya Jesus. Omomuano  uṋe? Eye wa tja: “Ami me tja okuhepa ku Kristus Jesus, oMuhona wetu, ngwe ndji zeuparisa motjiungura tjandje. Ami me Mu tjere okuhepa kokutja we ndji vara omuṱakame nokutja we ndji toororera okumukarera, nandarire kutja momayuva nga kapita ami mbe Mu teturura, e Mu tatumisa ne Mu yamburura.” (1 Tim. 1:12-14) Otjiungura tja Paulus tji tje mu raisira ondjenda, orusuvero nongamburiro ya Jesus mu ye. Jesus wina wa yandja otjiungura tjokuzuvarisa ku auhe wetu. (Mat. 28:19, 20) Hapo otjiungura tjetu tjokuzuvarisa, matji yenene okutuvatera okuzuva nawa kutja Jesus we tu ṱira?

Albert, ngwa kotoka ku Jehova kombunda yokukondwa kombongo, oure wozombura ape 34, wa tja: “Omauvi wandje aruhe ye rikomurungu wandje. Posi yokutja, indu tji mbi ri motjiungura tjokuzuvarisa, ami mbi muna kutja mba pewa otjiungura tjokuzuvarisa okuza ku Jesus tjimuna omuapostele Paulus. Ihi tji tjita kutja mbi kare nondjoroka nokukara noumune ouwa ohunga na ami omuini, ehupo randje noruyaveze rwandje.”—Eps. 51:3.

Allan, ngwa tjiti outwe ngunda e he rihonga Ombeibela wa tja: “Ami ngamba mbi ripura ohunga noviṋa ovivi mbi mba tjita kovandu nu povikando mbi kara nozombameno. Posiya mbi nondangi kutja Jehova u yandjera omurunde tjimuna ami okuzuvarisa ombuze ombwa ku varwe. Indu tji me munu omuano omuwa ovandu mu mave yakura ombuze ombwa, ihi tji ndji zemburukisa ouwa norusuvero rwa Jehova. Ami mbi muna kutja Eye u ndji ungurisa okutja mbi vatere ovandu mba tjita oviṋa ovivi wina.”

Indu tji twa piti motjiungura tjokuzuvarisa, tu tjita otjiṋa otjiwa nu tu kara nouripura ouwa. Nu wina ku tu vatera okumuna ondjenda, orusuvero nongamburiro ya Jesus mu eṱe.

Ngunda ouye wa Satan mbwi au hiya nyonwa, ouvi mbu twa tjita mape ya au kotoka rukwao mourizemburuka wetu. Ovikwaye mbi mavi tu vatere okurwisa oumune mbwi?

Jean wa tja: “Mbi tjaterwa kutja ‘Ndjambi omunene pomeritjiviro wetu womorukoro.’” Povikando ngu rimuna ondjo mena rokuhupa pevari indu tjaari omutanda. (1 Joh. 3:19, 20) Eṱe wina matu yenene okumuna omahuhumiṋino mokutjiwa kutja Jehova na Jesus ve tjiwa nawa kutja twa za mouvi. Zemburuka kutja, owo va yandja otjisuta tjonguturiro kovandu mbee ritanaura komauvi wawo nungwari ka kovandu ohomonena.—1 Tim. 1:15.

Tu kara nongamburiro kutja otjisuta tjonguturiro tji tu ṱuna kourike wetu indu tji twe ripurire ko oukoto nomasa komuano Jesus maa tjindi ovandu mbe hari ohomonena. Nu wina tji tu ri motjiungura tjokusuvarisa. Indu tji wa tjiti nao, mo yenene okuhungira tjimuna Paulus indu tja tja: Jesus ‘we ndji suverere nu we riyandjera ami omuinyo we.’