NAGLAON ti Biblia iti adu a naimpusuan a sasao nga imbaga dagiti tattao nga addaan “rikna a kas kadatayo.” (Sant. 5:17) Kas pagarigan, nalaka a maawatantayo ti rikna ni Pablo idi inaminna ti mabasa iti Roma 7:21-24: “No kayatko nga aramiden ti umiso, ti dakes ti adda kaniak. . . . Kakaasiak a tao!” Makaliwliwa daytoy no lablabanantayo dagiti pagkapuyantayo.

Adda pay sabali a rikna nga inyebkas ni Pablo. Iti Galacia 2:20, imbagana a kombinsido nga ‘ay-ayaten’ ni Jesus ken ‘insakripisiona ti biagna’ para kenkuana! Kasta met kadi ti riknam? Mabalin a saan a kanayon.

No mariknatayo nga awan patpategtayo gapu kadagiti napalabas a basoltayo, mabalin a marigatantayo a mamati nga ay-ayatennatayo ni Jehova ken napakawannatayon. Mabalin a nagrigat met a patien a personal a sagut kadatayo ti daton a subbot ni Jesus. Talaga kadi a kayat ni Jesus a matmatantayo a para kadatayo ti subbot? Ania ngarud ti makatulong tapno kasta ti panangmatmattayo? Usigentayo dagitoy a dua a saludsod.

Wen, kayat ni Jesus a matmatantayo ti sakripisiona kas personal a sagut. Apay a maikunatayo a kasta? Panunotem ti eksena a nairekord iti Lucas 23:39-43. Adda lalaki a nakalansa iti kayo a pagtutuokan iti abay ni Jesus. Inaminna a nagbasol. Sigurado a nadagsen ti naaramidna a krimen ta para laeng kadagiti nakadakdakes a kriminal ti kasta a naulpit a dusa. Gapu ta awanen ti namnama ti lalaki, impakaasina ken Jesus: “Laglagipennak inton addakan iti Pagariam.”

Ania ti inaramid ni Jesus? Panunotem ti ut-ot a marikriknana bayat a tumaltaliaw tapno laeng kitaenna ti kriminal. Uray marigrigatan, immisem ken impasiguradona iti lalaki: “Pudno kunak kenka ita nga aldaw, makikaduakanto kaniak idiay Paraiso.” Mabalin koma nga imbagana lattan nga ‘immay ti Anak ti tao tapno itedna ti biagna kas pangsubbot iti adu.’ (Mat. 20:28) Ngem nadlawmo kadi ti nadungngo a panangipaganetgetna iti subbot nga ipaayna? Inusarna dagiti personal a sasao a “makikaduakanto” ken “kaniak.” Ken imbagana ti personal a magunggona ti lalaki iti sakripisio nga ipaayna: mabalinna ti agbiag iti paraiso a daga.

Talaga a kayat ni Jesus nga ibilang daytoy a lalaki a para kenkuana ti ipaayna a sakripisio. No kasta ti kayat ni Jesus nga aramiden ti kriminal nga awan man laeng gundawayna nga agserbi iti Dios, sigurado a kasta met ti kayatna nga aramiden ti maysa a bautisado a Kristiano nga agserserbi iti Dios. Ania ngarud ti makatulong tapno mamatitayo a ti sakripisio ni Kristo ket para met kadatayo uray adda dagiti naaramidtayo a basol iti napalabas?

Adda epekto ti ministerio ni Pablo iti panangmatmatna iti sakripisio ni Jesus. Kasano? Inlawlawagna:  “Agyamanak ken Kristo Jesus nga Apotayo, a nangted kaniak iti autoridad, ta imbilangnak a matalek babaen ti panangtedna iti maysa a ministerio, nupay dati nga agsasaoak maibusor iti Dios ken manangidadanes ken natangsitak.” (1 Tim. 1:12-14) Gapu ta inted ni Jesus daytoy nga annongen ken Pablo uray no dakes ti inar-aramidna, nakombinsir ni Pablo iti asi, pammateg, ken panagtalek kenkuana ni Jesus. Adda met ministerio nga intalek ni Jesus kadatayo. (Mat. 28:19, 20) Kasta met kadi ti epekto dayta kadatayo?

Imbaga ni Albert, a nabiit pay a nagsubli ken Jehova kalpasan a nailaksid iti dandani 34 a tawen: “Malaglagipko latta dagiti basolko. Ngem no addaak iti ministerio, mariknak, a kas ken apostol Pablo, adda met ministerio a personal nga intalek kaniak ni Jesus. Mapabpabilegak gapu iti dayta ken positibo latta ti panangkitak iti bagik, iti biagko, ken iti masakbayak.”​—Sal. 51:3.

Inamin ni Allan, a dati a kriminal ken naranggas sakbay a naammuanna ti kinapudno: “Mapampanunotko latta ti amin a dakes nga inaramidko kadagiti tattao. No dadduma, madepresak gapu iti dayta. Ngem agyamyamanak ken Jehova ta ipalpalubosna ti managbasol a kas kaniak a mangipakaammo iti naimbag a damag. No makitak nga awaten dagiti tattao ti naimbag a damag, maipalagip kaniak ti kinaimbag ken kinamanagayat ni Jehova. Mariknak nga us-usarennak a tumulong kadagiti kas kaniak a nakaaramid iti dakes.”

Matulongannatayo ti ministeriotayo nga agaramid ken agpanunot iti bambanag a positibo. Ipasiguradona ti asi, pammateg, ken panagtalek kadatayo ni Jesus.

Agingga a saan pay a nagpatingga ti dakes a sistema ni Satanas, mabalin a makonsiensiatayo latta gapu kadagiti napalabas a basoltayo. Ania ti makatulong tapno malabanantayo ti kasta a rikrikna?

“Magustuak ti sasao a ‘dakdakkel ti Dios ngem ti pusotayo,’” kuna ni Jean, a masansan a makonsiensia gapu iti doble kara a panagbiagna idi agtutubo pay. (1 Juan 3:19, 20) Maliwliwatayo met a makaammo a mas maawatan ni Jehova ken ni Jesus ngem datayo ti managbasol a kasasaadtayo. Laglagipentayo a siaayat nga impaayda ti subbot, saan a para kadagiti perpekto a tattao, no di ket para kadagiti agbabbabawi a managbasol.​—1 Tim. 1:15.

Agbalintayo a kombinsido a para kadatayo ti subbot no panunotentayo a naimbag ti panangtrato ni Jesus kadagiti imperpekto a tattao ken no ikagumaantayo nga itungpal ti ministerio nga intalekna kadatayo. No aramidentayo dayta, maibagatayo met ti imbaga ni Pablo: ‘Ay-ayatennak [ni Jesus] ken insakripisiona ti biagna para kaniak.’