BAIBO tẹmhọn ebi emhin dia ẹbho eso bhi egbe yẹ. Ebi emhin dia mhan bhi egbe yẹ, iriọ ọ yẹ dia ene ẹbho nan bhi egbe. (Jas. 5:17) Bhi ọsi ijiẹmhin, mhan wo lẹn ebi emhin dia iPaul bhi egbe yẹ ẹghe nin ọle rẹ ta ọta nin ọle ta bhi Romans 7:21-24. Ọ da yọle: “Ẹghe nin mẹn ha rẹ ha guanọ nin mẹn lu emhin nọn diale, emhin ẹbe ki vae dọ ne mẹn dia. . . . Okpea nin oya gbele mẹn khin!” Mhan dẹ sabọ miẹn izebhudu bhi ene ọta nan nin Paul tale, beji mhan ha rẹ ha khọn olukhọ nọn re imhan bhi egbe.

Paul yẹ ta ọta ebhebhe ne rẹman ebi ọle rẹ ha ghe emhin eso yẹ. Bhi ọsi ijiẹmhin, bhi Galatians 2:20, ọle da rẹman ọle rẹọbhọ ghe, Jesu “hoẹmhọn [ọlẹn], yẹ yu [nanlẹn]” tobọle! Iriọ uwẹ be rẹ ghe izọese nọnsi Jesu? Asabọmiẹn ọ iyi ẹghe rebhe uwẹ re re inian ghe ọle.

Ahamiẹn mhan ghe egbe mhan bii ọria nọn bha sẹ emhin soso, ranmhude olukhọ nin mhan lu ẹghe nọn gbera, ọ ki ha nọghọ mhan rẹ rẹọbhọ ghe Jehova hoẹmhọn mhan, ghe ọle rehunmhan mhan. Mhan bhọ ida sabọ ha riale ghe imhan tobọmhan Jesu yu nan. Jesu be guanọ nin uwẹ ha ghe izọese nọnsọle bii emhin nin ọle rẹ lu ẹsele nin uwẹ? Be ha rẹkpa uwẹ rẹ diriọ ha ghe ọle? Bha ji mhan zilo nyan ene inọnta eva nan.

Bhi ọsi ẹmhọanta, Jesu guanọ nin mhan ha ghe izọese nọnsọle bii ẹsele. Be imhan rẹ lẹn yẹ? Dọnmhegbe re ọkhọle daghe ebi emhin nan gbẹn ọbhi Luke 23:39-43 rẹ sunu yẹ. Okpea nan khan mun oran sikẹ iJesu da wo taman iJesu ghe ọle lu khọlọ. Asabọmiẹn ọne olukhọ manman kaka, ranmhude ọria nọn lu olukhọ nọn kaka, ọle a re inian gbe a. Ọne okpea da bhii Jesu yọle: “Ye mẹn re ẹghe nin uwẹ ha rẹ nabhi Agbejele nọnsẹ.”

Be iJesu ki rẹ wanniẹn ọlẹn yẹ? Arẹmiẹn Jesu ribhi ọbalọ, ọle da sẹyẹ dọnmhegbe denọ ẹlo ghe ọne okpea. Ọle da jẹ man ọlẹn yẹ taman ọlẹn yọle: “Bhi ọsi ẹmhọanta, mẹn taman uwẹ ẹlẹnan, uwẹ dẹ deba mẹn ha ribhi Agbọn Ọfubhegbe.” Jesu sabọ rẹ taman ọne okpea yọle: “Ọmọn nọnsi okpea . . . re iẹnlẹn nọnsọle rẹ zọẹse rẹ dẹ ene bunbun kiere.” (Matt. 20:28) Ọkpakinọn, uwẹ ha gbẹlokotọ nọnsẹn, uwẹ ki kere ghe, Jesu da rẹman ọlẹn ghe ọne izọese rẹso ọle tobọle. Ọta nin ọle noolo rẹ re ọnan man hi, “uwẹ” bi “mẹn.” Ọle da taman ọne okpea ghe ọle dẹ nyẹnlẹn bhi agbọn ọfubhegbe nọn vade bhi ọne otọ nan.

Edandan iribhọ ghe, Jesu guanọ nin ọne okpea miẹn izọese nin ọle ho nin ọle re egbe ọle zọ nin mhan ọbhi egbe. Jesu da ha guanọ nin ọne ọria nọn lu khọlọ ha ghe izọese nọnsọle bii ẹsele nan lu nanlẹn, arẹmiẹn ọle bha sẹ miẹn isẹhoa rẹ ga iJehova. Iriọ yẹ nọn rẹji Kristiẹn ẹlẹnan nọn ki mianmẹn fo nọn yẹ ga iJehova. Jesu guanọ nin ọle ha ghe izọese nọnsọle bii ẹsele nan lu nanlẹn? Be ha rẹkpa mhan rẹ re inian ha ghe izọese nọnsi Jesu arẹmiẹn mhan ka ha lu khọlọ khẹ?

Ranmhude Jesu mun iwẹnna itẹmhọn Osẹnobulua nin Paul ha lu, Paul da rẹọbhọ ghe uyumhin  nọnsi Jesu rẹso ọle tobọle. Bezẹle nin mhan da ta iriọ? Paul da yọle: “Ekhuẹnmhẹn hi ọsi Jesu Kristi nin Ebeanlẹn mhan, nọn re ahu nin mẹn ranmhude ọle gba ẹkẹ mẹn sẹbhọ ghe, ọle da mun iwẹnna oga nin mẹn, arẹmiẹn ọria nọn runun ji Osẹnobulua, ọria nọn kpokpo ene ga Osẹnobulua, bi ọnọn ire ekpẹn ne ọria lu emhin mẹn ka ha khin.” (1 Tim. 1:12-14) Ọne iwẹnna nan nin Jesu mun nin Paul da re iPaul rẹọbhọ ghe, Jesu mhọn itohan bi oyẹẹ da ọle, ghe Jesu yẹ gba ẹkẹ ọle. Ẹlẹnan nian yẹ, Jesu mun iwẹnna itẹmhọn Osẹnobulua nin mhan. (Matt. 28:19, 20) Ọkhẹke nin ọne iwẹnna nan rẹ mhan rẹọbhọ ghe, uyumhin nọnsi Jesu rẹso mhan tobọmhan.

Ebe sẹbhi ikpe 34 ki gbera nan rẹ khu Albert bhi agbotu, ọle da fikie bu iJehova. Ọle da yọle: “Ẹghe rebhe mẹn rẹ ye olukhọ nọnsẹmhẹn re. Ọkpakinọn, ahamiẹn mẹn tẹmhọn Osẹnobulua, ọ ki dia mẹn bhi egbe ghe, Jesu mun ọne iwẹnna oga nan mẹn bhi obọ, beji ọle yẹ rẹ mun nin Paul nin odibo. Ọnan wo manman rẹ imẹn miẹn eghọnghọn bhi iẹnlẹn.”—Ps. 51:3.

Allan nọn ka wo ha gbugbe ọkuẹsẹ ọle dọ miẹn oga ẹmhọanta da yọle: “Mẹn sẹyẹ wo ria ẹmhọn ọbalọ nin mẹn si ji ẹbho. Ẹghe eso, ọnan ki wo re ahu fo mẹn bhọ. Mẹn khuẹnmhẹn iJehova ghe, ọle ji ọria olukhọ bii mẹn da sabọ dọ ha tẹmhọn Agbejele nọnsọle man ẹbho. Mẹn ha daghe ebi ọne ẹmhọn Agbejele rẹ ko ẹbho udu re yẹ, mẹn ki yere ghe, Osẹnobulua nọn mhẹn, nọn yẹ mhọn oyẹẹ, ọle iJehova khin. Ọ dia mẹn bhi egbe ghe, ọle noo mẹn rẹ rẹkpa ẹbho ne yẹ lu khọlọ.”

Iwẹnna oga nan mun nin mhan rẹkpa mhan rẹ denọ ahu bi ọkhọle nọnsẹmhan ọbhi emhin esili. Ọ rẹkpa mhan lẹn ghe Jesu mhọn itohan, bi oyẹẹ da mhan, ghe ọle gba ẹkẹ mhan.

Ọkuẹsẹ ọne agbọn Esu nan sẹbhi ọkpẹnlẹn, ọkhọle nọnsẹmhan sabọ rẹ ha gbe mhan asan, ranmhude emhin ọbe nin mhan lu ẹghe nọn gbera. Be ha rẹkpa mhan khọn ọne ọkhọle nan?

Obhio mhan nin okhuo natiọle Jean, da ha do lu emhin ọbe ẹghe nin ọle rẹ ha yi ọlasẹre. Arẹmiẹn ọkhọle gbe ọle asan ranmhude ene emhin ọbe nin ọle ha do lu ẹghenin, ọle da yọle: “Ọ yẹẹ mẹn rẹ lẹn ghe, ‘Osẹnobulua kpọnọ nẹ ọkhọle nọnsẹmhan.’ ” (1 John 3:19, 20) Beji ọ dia iJean le, ọ yẹ ko mhan udu re rẹ lẹn ghe, Jehova bi Jesu lẹn ghe ọ bha gba nin mhan. Bha ji mhan yere ghe, eria ne fidenọ bhi olukhọ nọnsele, ele iJehova re aranlẹn nọnsi Jesu zọese nan, ọ iyi eria nin egbe gba nan.—1 Tim. 1:15.

Ahamiẹn mhan nan erọnmhọn yẹ ria eria nyan uwedẹ nin Jesu rẹ ha ne ẹbho nin egbe bha gba nan lu emhin, bi ahamiẹn mhan dọnmhegbe rẹ ha lu iwẹnna oga nin Jesu mun nin mhan, mhan ki sabọ ha mhọn ọlẹn bhi ọkhọle ghe, ọdeọde, ọle iJesu yu nan. Bhiriọ, bii Paul, uwẹ ki sabọ yọle: Jesu “hoẹmhọn mẹn, yẹ yu nin mẹn.”