“ANHTE hte maren” hkamsha chye ai masha ni a lam hpe Chyum Laika hta hti lu ai. (Yak 5:17) Ga shadawn, Roma 7:21-24 hta Pawlu tsun mayu ai ndai lam hpe anhte chye na lu ai: “Mai kaja galaw mayu ai ngai hkum lala, n hkru n hkra hte ginrun nga ai, . . . Chyum sha hkrum ai ngai wa e.” Dai zawn Pawlu a hkamsha lam hpe chye lu ai gaw, anhte a n hkum tsup ai lam ni hpe matut gasat lu hkra karum ya ai.

Pawlu gaw shi a kaga hkamsha lam hpe mung tsun dan wa ai. Yesu gaw “ngai hpe tsawra nna, nye a matu mara shi hkum dai shi ap kau ai” nga nna Galati 2:20 hta kamhpa myit hte tsun wa ai. Nang mung dai zawn hkamsha ai kun? Ayan na gaw dai hku hkamsha na n re.

Lai wa sai aten na mara ni a majaw, manu n dan ai ngu hkamsha nga chye ai. Dai shaloi, Yehowa gaw anhte hpe tsawra nna mara raw ya ai, gawng malai jahpu mung anhte hpe jaw ya ai ngu ai hpe hkap la na matu yak nga chye ai. Gawng malai jahpu hpe dai lam hku nna Yesu mu mada shangun mayu ai kun? Dai zawn mu mada nga yang hpa gaw nang hpe karum ya lu na kun? Dai lam hpe bawngban yu ga.

Gawng malai hkungga hpe kumhpa langai hku nna anhte hpe Yesu mu mada shangun mayu ai. Dai hpe gara hku chye lu na kun? Luka 23:39-43 hta tsun da ai lam hpe myit yu ga. Masha langai gaw Yesu a makau hta jen da hkrum ai. Mara galaw wa ai ngu nna shi hkum shi yin la ai. Shi mara kaba galaw wa ai majaw, hpun hta jen sat hkrum ai re. Shi grai myitru myit tsang ai majaw, Yesu hpe ndai hku hpyi shawn wa ai: “Nang na a mungdan hta du wa yang, ngai e dum rit law.”

Yesu gara hku bai htang wa ai kun? Yesu gaw nni nkri hkrum nga ai lapran shi hpe yu na matu, baw kayin dat ai hpe shingran yu u. Myit masin hte hkumhkrang nni nkri hkrum nga tim, Yesu gaw n-gun shadat nna tsawra myit hte shalan shabran ya ai. Shi ndai hku tsun ai: “Ngai nang hpe teng teng tsun de ga, Dai ni jang nang ngai hte rau Hparadisu e nga na rai nga ai.” Dai hku tsun ai gaw, “Masha Kasha wa pyi, . . . masha law law a matu mara, shi a asak hpe gawng malai jahpu shatai ya na nga nna du sa ai” ngu tsun da ai lam hpe Yesu shadum ya ai re. (Mat 20:28) Shi a gawng malai hkungga a lachyum gaw, hpa re ai hpe Yesu ahkyak shatai tsun nga ai hpe nang sadi hkrup ai kun? “Nang” hte “ngai” ngu ai ga si hpe lang wa ai gaw, grai hku hkau ai hku Yesu tsun wa ai hpe chye lu ai. Mungkan hparadisu hta nga lu na ngu dai wa hpe Yesu tsun wa ai.

Yesu gaw, shi jaw na hkungga hpe kumhpa hku nna hkap la shangun mayu ai. Karai Kasang hpe nawku na matu ahkaw ahkang n lu wa ai dai masha hte seng nna Yesu dai hku myit ai nga yang, hkalup hkam nna Karai Kasang hpe nawku nga sai Hkristan langai hte seng nna mung dai zawn sha shi myit ya na re. Lai wa sai aten hta mara ni galaw wa tim, Hkristu a gawng malai hkungga kaw nna akyu lu la na hpe kam na matu hpa gaw anhte hpe karum ya lu ai kun?

Yesu jaw wa ai gawng malai hkungga hpe mu mada ai lam gaw, Pawlu a magam hta grai shingkang ka-up wa ai. Gara hku nna kun? Shi ndai hku sanglang dan ai: “Ngai hpe kangka re ai wa nawn nna, dai aya hta ngai hpe dang da ai majaw, ngai hpe n-gun shaja ya ai, anhte a Madu Hkristu Yesu hpe nan, ngai shakawn kungdawn nngai. Ngai chyawm gaw, shawng e shatan nhkan ai, zingri zingrat ai hte sheng mareng re ai wa rai nga nngai.” (1 Tm 1:12-14) Pawlu lu da ai magam lit gaw, Yesu shi hpe kamhpa ai, matsan dum ai, tsawra ai hpe kam shangun ai. Anhte hpe mung magam lit jaw nna kamhpa ai lam Yesu madun nga ai. (Mat 28:19, 20) Dai lam gaw anhte hpe akyu shabyin ya lu ai kun?

Shapraw kau hkrum nna 34 ning daram na yang she, Yehowa hpang de bai wa ai Ebat ndai hku tsun dan ai: “Nye a mara ni hpe ngai malap kau n lu ai. Raitim, hkaw tsun magam galaw ai shaloi, Yesu ngai hpe nan jaw da ai lit re ngu nna Pawlu zawn hkamsha ai. Dai gaw nye a htawm hpang, nye a prat hte ngai hte seng nna kaja ai ningmu nga hkra ngai hpe karum ya ai.”​—⁠Shk 51:3.

Tengman ai lam hpe n sharin la shi ai shaloi, tara tawt lai nna nhkru ai lam ni galaw wa ai Alan ndai hku tsun ai: “Masha ni hpe hkra machyi hkra galaw wa ai lam ni hpe ngai naw dum nga ai. Kalang lang dai gaw ngai hpe myit daw shangun ai. Raitim, ngai zawn mara nga ai masha hpe kabu gara shiga hkaw tsun na matu ahkaw ahkang jaw ai majaw, Yehowa hpe chyeju dum ai. Kabu gara shiga hpe masha ni bai htang ai hpe mu ai shaloi, Yehowa gaw kade daram kaja nna, tsawra myit kaba ai hpe ngai chye lu ai. Ngai zawn masa lam nga ai ni hpe karum na matu ngai hpe akyu jashawn ai ngu hkamsha ai.”

Anhte a hkawtsun magam gaw, anhte a n-gun atsam hpe kaja ai hku akyu jashawn nna, kaja ai lam hpe myit na matu karum ya ai. Dai gaw Yesu a matsan dum myit, tsawra myit hte anhte hpe kamhpa ai lam kam shangun ai.

Satan a nhkru ai mungkan hpe n jahten kau dingsa, lai wa sai aten na galaw shut ai lam ni a majaw, anhte myit hta hkamsha nga chye ai. Dai zawn hkamsha lam ni hpe tawt lai lu hkra hpa gaw karum ya lu na kun?

“‘Karai Kasang gaw anhte a myit hta grau kaba ai’ ngu ai lam hpe ngai ra ai” nga nna nauna Jin tsun ai. Shi gaw ramma aten hta prat lahkawng hte asak hkrung wa ai ngu ai n kaja ai hkamsha lam hpe chyahkring hkring tawt lai nga ra ai. (1 Yh 3:19, 20) Yehowa hte Yesu gaw mara nga ai anhte a masa hpe lai nna mu ai ngu ai hpe chye ai gaw, shalan shabran lam lu shangun ai. Shan gaw gawng malai hkungga hpe hkum tsup ai masha ni a matu n re ai sha, myit malai lu ai yubak masha ni a matu tsawra myit hte lajang ya ai re.​—⁠1 Tm 1:15.

N hkum tsup ai masha ni hpe Yesu kanawn mazum ai lam hpe anhte atsawm myit ai shaloi, anhte hpe jaw da ai lit hpe kaja htum galaw ai shaloi, dai manu dan ai tengman lam hpe anhte a myit hta grau kam wa ai. Nang dai hku galaw yang, Pawlu zawn tsun lu na re: Yesu gaw “ngai hpe tsawra nna, nye a matu mara shi hkum dai shi ap kau ai.”