MOMBIIBELI omu na omautumbulilo taa holola omaliudo a shangwa ‘kovanhu ngaashi fye.’ (Jak. 5:17) Pashihopaenenwa, ohatu dulu okuuda ko omaliudo aPaulus oo taa hangwa mOvaroma 7:21-24, taa ti: “Ou nda hala okulonga ouwa, ondi wete mwaame omhango ei: Owii wa kanyatela nge. . . . Aame omunhu mwii.” Omaliudo a tya ngaho otaa dulu oku tu hekeleka ngeenge hatu kondjo noulunde wetu vene.

Paulus okwa li a holola omaliudo amwe vali. Okwa popya mOvagalati 2:20 kutya Jesus oku mu ‘hole nokwe liyandja ponhele yaye.’ Mbela nafye osho hatu kala tu udite ngaho omafimbo amwe? Otashi dulika hasho.

Ngeenge natango ohatu kala tu udite tuhe na oshilonga omolwomapuko oo twa ninga monakudiwa, otashi dulika tuha itavele kutya Jehova oku tu hole nokwe tu dimina po, notashi ka kala shidjuu okumona kutya ekuliloyambo oli li oshali ya denga mbada. Ndele mbela Jesus okwa hala ngoo shili tu tale ko ekuliloyambo li li oshali ya denga mbada? Ngeenge osho, oshike tashi ke tu kwafela tu ninge ngaho? Natu ka konakoneni omapulo oo avali.

Jesus okwa hala tu tale ko ekuliloyambo li li oshali. Ongahelipi hatu dulu okukala noushili u na sha naasho? Diladila kehokololo olo li li muLukas 23:39-43, lomulumenhu oo a li a valelwa pamwe naJesus komuti womahepeko. Okwa li a dimina kutya okwa ninga omapuko monakudiwa. Oku na okukala a li a nyona sha kwata moiti nomolwaashi a tokolelwa efyo komuti womahepeko. Omulumenhu oo okwa li e na oshisho, nomolwaasho a indila Jesus a ti: “Dimbulukwe nge, ngeenge wa fiki mouhamba woye.”

Jesus okwa li e linyenga ngahelipi? Diladila ashike kouyahame oo Jesus a li e udite eshi ta keuka opo a tale omukolokoshi oo. Nonande okwa li mouyahame u udifa omwenyo munyenye, okwa li e limemesha ndele te mu lombwele ta ti: ‘Oshili handi ku lombwele, oto ka kala pamwe naame moParadisa.’ Jesus okwa li ta dulu okulombwela omulumenhu oo kutya ‘Omona womunhu okwe uya okuyandja omwenyo waye u ninge oikulila yavahapu.’ (Mat. 20:28) Ndele ponhele yaasho, Jesus okwa ulika kutya ota yandjele omulumenhu oo omwenyo waye. Okwa li a ulika kutya oku na oukaume eshi a longifa oitya ngaashi “oto” nosho yo “naame.” Okwa lombwela omulumenhu oo kutya ota ka kala moparadisa kombada yedu.

Kape na omalimbililo, Jesus okwa li ta lombwele omulumenhu oo kutya eyambo olo a li poku ka ninga ota li ke mu etela yo ouwa. Ngeenge Jesus osho a li e uditile ngaho omukolokoshi oo ina mona omhito yokulongela Kalunga, ongahelipi shi na sha nOmukriste oo a ninginifwa noha longele Jehova? Oshike tashi dulu oku tu kwafela tu itavele kutya ekuliloyambo laKristus otali ke tu etela ouwa pauhandimwe?

Oukalele waPaulus owa li wa nwefa mo onghedi omo a li ha tale ko ekuliloyambo laJesus. Ngahelipi  mbela? Okwa ti: “Ndele ohandi pandula ou a pa nge eenghono, oKristus Jesus, Omwene wetu, eshi a tala nge ame omudiinini nokwa tula nge meyakulolonga, ame ou nda li nale omusheki nomutaataai nomuhepeki.” (1 Tim. 1:12-14) Oshinakuwanifwa osho Paulus a li a pewa oshe mu dimbulukifa onghenda, ohole nosho yo elineekelo olo Jesus a li e na muye. Sha faafana, Jesus okwe lineekelela keshe umwe womufye oshinakuwanifwa shokuudifa onghundana iwa. (Mat. 28:19, 20) Mbela oshinakuwanifwa shetu shokuudifa itashi tu kwafele tu ude ko kutya nafye Jesus okwe tu fila?

Albert, oo opo a alukile kuJehova konima eshi a kala a kondwa hanga oule womido 34, okwa ti: “Omatimba ange oku li alushe momesho ange. Ashike ngeenge ndi li moukalele, ohandi kala ndi udite ngaashi omuyapostoli Paulus, kutya naame onda pewa oshinakuwanifwa shokuudifa kuJesus. Ohashi pameke nge nohashi kwafele nge ndi kale nda hafa.” — Eps. 51:3.

Allan, oo a li omukolokoshi noku hole elongifo leenghono ofimbo ina shiiva oshili, okwa ti: “Ohandi dimbuluka alushe ouyahame oo nda etela ovanhu. Omafimbo amwe ohashi polimaneke nge. Ashike ohandi pandula Jehova eshi a pitika omulunde ngaashi ame ndi udifile vamwe onghundana iwa. Ngeenge ndi wete ovanhu tava pwilikine konghundana iwa, ohashi dimbulukifa nge kutya Jehova omuwa nomunahole. Ohandi kala ndi udite kutya ota longifa nge opo ndi kwafele vamwe ovo ve na onghalamwenyo ya fa oyo nda li ndi na monakudiwa.”

Ngeenge tu li moukalele ohatu ningi oinima iwa nohatu diladila omadiladilo a yuka. Ohashi tu dimbulukifa kutya Jesus omunanghenda, omunahole nokwe tu lineekela.

Fiyo osheshi ounyuni waSatana wa hanaunwa po, omitima detu otadi twikile noku tu hokololifa omolwomanyono oo twa ninga monakudiwa. Oshike tashi tu kwafele tu kondjife omaliudo a tya ngaho?

Jean, oo luhapu he lipe oushima molwaashi a li e na onghalamwenyo yopavali ofimbo a li omunyasha, okwa ti: “Onda hafa eshi ndi shii kutya ‘Kalunga Oye e dule omutima wetu.’” (1 Joh. 3:19, 20) Nafye ohatu dulu okumona ehekeleko ngeenge otwa shiiva kutya Jehova naJesus ove shii kutya fye ovalunde. Dimbuluka kutya inava longekidila ekuliloyambo lopahole ovo vehe fi ovalunde, ndele ovo vo ve lidilulula komanyono avo. — 1 Tim. 1:15.

Ohatu kala twa tomhwa kutya ekuliloyambo otali ti sha kufye ngeenge hatu dilonga pamwe neilikano kunghee Jesus a ungaunga novalunde, nongeenge hatu longo ngaashi hatu dulu opo tu wanife po oshinakuwanifwa osho e tu pa. Ngaashi Paulus, naave oto dulu okutya: Jesus oku “hole nge nokwe liyandja ponhele yange.”