E BIBLIA yiri mw’ebinywe bingyi eby’abalhume ababya “nga thwe.” (Yak. 5:17) Ng’eky’erileberyako, ni kyolho eriyitheghererya ekya Paulo amanyisaya akabugha ebinywe ebiri omu Abanya Roma 7:21-24: “Omughulhu nganza erikolha ekibuya, ekibi ekiri omwisi w’omuthima waghe kikaghana. . . . Ingye indi mundu w’obulighe!” Eriyowa ng’eryo likaleka ithwasika thukarwanisya obuthahikana bwethu.

Aliwe kandi Paulo mwakania okwa rindi iyowa. Omwa Abanya Galatia 2:20, mwakangania ku akaligha ngoku Yesu ‘mwamwanza, n’eriyiha busana nayu.’ Nawu wukanayowa wuthya? Obundi ikwan’oko.

Thwamabya ithukinayowa isithutholere busana n’ebibi ebyo thwakolha kera, ikyangana thukalira erikirirya ngoku Yehova athwanzire kandi ku abirithughanyira, n’erithukalira erilhangira omughaso w’ekihongwa kya Yesu. Mbwino Yesu ananzire ithwalhangira embanulho ngoku ni kihembo? Kyamabya ikwakiri kithya, ni kyahi ekyanga thuwathikya erikolha ekyo? Thukanaye okwa bibulyo bibiri ebyo.

Ahathe erithika-thika, Yesu anzire ithwalhangira ekihongwa kiwe ikikathughasira ahabwethu. Ekyo thwanga kikakasya thuthi? Thathera akasasani k’ebiri omu Luka 23:39-43. Omulhume anahanikire okwa muthi hakuhi na Yesu. Omulhume oyo anasi ekibi kiwe. Angabya imwakolha ekindu ekikalire kundi esyongoli sy’ebibi esyabya sikakolha ebikalire kutsibu sy’esyabya sik’ithibwa omwa mibere ng’eyi. Omwa bulighe bunene, omulhume oyu akalemba-lemba Yesu athi: “Wunyibuke omughulhu wukasa omo Bwami bwawu.”

Yesu mwakolhaki? Thathera akasasani obulhumi obwa Yesu abyamo akakeba erisamalira omukolha-nabi. Yesu n’omwane omwa bulhumi, akasenyenyaya n’erihumulikania omulhume, athi: ‘Kwenene ngakubwira munabwire, wukendi syabya naghe omwa Paradiso.’ Yesu anganakwamire ky’ibukya omulhume oyo athi “Omughalha w’omundu . . . asa eriha engebe yiwe mo bughuli busana n’abandu bangyi.” (Mt. 20:28) Aliwe omwakanya k’ekyo, Yesu omwa bwolho-bwolho mwakangania omulhume oyo ngoku ekihongwa kiwe kikamughasira. Mwakania nayu ng’omunywani akakolesya ebinywe “wukendi” na “naghe.” Kandi mwabwira omulhume oyo athi akendi syabya omwa paradiso okwa kihugho.

Ahathe erithika-thika, Yesu abya anzire omulhume oyu inialhangira ngoku ekihongwa ekyo akayahayo nayu kikendi mughasira. Yesu amabya imwanayowa athya okwa mukolha-nabi oyuwabya isyathathunga n’akaghisa k’erikolera Nyamuhanga, ahathe erithika-thika iniakendi yowa athya okwa Mukristayo oyubatizibirwe oyune mukolera Nyamuhanga. Neryo, ni kyahi ekyanga thuwathikya erikirirya ngoku ekihongwa kya Kristo kikathughasira nomuthwangabya imuthwakolha ebibi kera?

Omubiiri wa Paulo ow’erithulira mwahamba okwa malengekania agho aby’awithe okwa kihongwa kya Yesu. Athi? Akabugha athi: “Ngaha Kristo Yesu Omukama wethu y’ewasingya, oyuwabirinyiha amaaka busana n’omubiiri waghe. Kusangwa mwanyighanza ng’oyuthereghulha, n’erinyihira oko mubiiri wiwe. Kera nabya nga mutsumi, n’oyukamwendereraya, n’erimulethera omwagha.” (1 Tim. 1:12-14) Omubiiri owa Paulo ahebawa mwamukakasya ngoku Yesu abirimughanyira, amwanzire, kandi ku amuyikethere. Kuthya Yesu abiriha obuli mughuma w’okw’ithwe omubiiri w’erithulira. (Mt. 28:19, 20) Mbwino nethu anganaleka ithwalhangira ku mwathuholera?

Albert, oyuwasuba oku Yehova lino-lino enyuma w’emyaka hakuhi 34 alihighithirwe, akabugha athi: “Ng’ibuka ebibi byaghe mughulhu wosi. Aliwe ngabya ngane omw’ithulira, ngayowa, ng’omukwenda Paulo, Yesu abirinyiha omubiiri. Kikaleka ingasika n’eribya n’amalengekania awatholere okwa ngebe yaghe, n’obuthuku bw’embere.”—Esy. 51:3.

Allan, oyuwabya ngoli y’ebibi kandi mutsindi athali igha ekwenene, akabugha athi: “Ngakin’ibuka ebindu bibi byosi ebyo nabya ngakolera abandu. Hakanayira, ikyaleka inayowa nabi kutsibu. Aliwe ngasima Yehova eribya iniakalighira omukolha-nabi ng’ingye eribwira abandi engulhu yuwene. Ngabya ngalhangira abandu bakahulikirira engulhu yuwene, kikaleka in’ibuka obubuya n’olhwanzo lhwa Yehova. Ngayowa iniakanyikolesaya eriwathikya abandi abakalhaba omwa biri ng’ebya nalhabamo.”

Ithwe erithulira kikaleka ithwahira akaghalha kethu n’amalengekania wethu okwa byuwene. Kikaleka ithwakakasya ngoku Yesu abirithughanyira, erithwanza, n’erithuyikethera.

Thukendibya ithunemuyowa nabi busana n’ebibi ebyo thwakolha kera, erihika aho omughulhu mubi wa Sitani akendi thoghothibirwa. Ni kyahi ekikendi thuwathikya erirwanisya eriyowa ng’eryo?

Jean oyukayowa nabi mughulhu mungyi busana n’eribya imwabya omwa ngebe ibiri iniakine mulere akabugha athi: “Ngasima eribya ‘Nyamuhanga inialengire emithima yethu.’” (1 Yn. 3:19, 20) Nethu nga Jean, thukahumulikana busana n’eriminya ngoku Yehova na Yesu banasi ku thuli bakolha-nabi. Wibuke, omo lhwanzo mubahayo embanulho, butsira busana n’abandu abahikene, aliwe busana n’abakolha-nabi abakayisubamo.—1 Tim. 1:15.

Thukakakasaya emithima yethu ngoku embanulho yikathughasira thukaghanirya okwa mibere Yesu akolonganiramu n’abandu abathahikene kandi thukakolha ekya thwanga thoka eriberererya omubiiri ogho thwabirihebwa. Omw’ikolha ekyo nawu, nga Paulo, iwangana bugha wuthi: Yesu ‘mwanyanza, n’eriyiha busana naghe.’