BAABUIYO nɔ bɔɔ diomnda kɛndɛla pilaŋ naa kɔltaŋ ndaŋ. Diomndaŋ ndaŋ la bɔɔbɔɔ waŋchieeya soo laŋ nda wa “mɛɛ naa ŋ cho naa yɛ.” (Chemi. 5:​17) Le taamaseliiyo, wana o wana nɔla mbo sɛɛŋgiaa nyɛ Pɔɔl dimi o Luomaŋnda 7:​21-24 wo niŋ te. Mbo dimi aa, “Teleŋ o teleŋ ya I yeema le suɛi kɛndɛi tosaa, suɛi wɔɔŋnde koni ya I tiu ba le tosaa ni. . . . Nyɛ palaa hoo cho o bana bana ya choo fɔ.” Nyɛ Pɔɔl dimi hoo a ndupila okɔɔ wo dɛɛniaa naa kɔltaŋ tau le miŋ hiou lachi a hakila naalaŋ chɔulabaa.

Nyɛ cheleŋ cho o Pɔɔl dimi o hei kɔɔli wo, nduyɛ ndi bɛɛ cho tonya. Mbo dimi o Kaleesiaŋnda 2:​20, NW maa Chiisu “kaala [ndu] nduyɛ mbo chɛl mbo wu le [ndu].” Nyɛ Pɔɔl dimi hoo wo chɔm maa ndoo nɔ tiindaŋndo maa le ndu kpeekpei Chiisu vi ni! Baa hei chɔm kpendekele maa Pɔɔl bɛɛ wana chioo le o wa “mɛɛ naa ŋ cho naa yɛ” le? Naapum ŋ kue le ndi chɛlɔɔ le.

Le sɔɔŋ wɔɔŋ naŋ tosa paandu woŋ, lepum miŋ wa wɔ yiyaŋndo maa ŋ cho a sɔvɛ le. Yiyaŋ waa naa tosa ndi ikala le laalaŋndo maa Chɛhowa kaala naa nduyɛ maa o mal naa niŋ haki. Ŋ laalaŋ vɛlɛ maa le naa kpeekpei le Chiisu vi le. Baa Chiisu yeema miŋ laalaŋ kɛsɛ maa le naa pilɛŋ pilɛŋnda kpou o vi ni? Yɛɛ mala yɛ naa miŋ laalaŋ hei? Ŋ yaasiaŋndɔ nyunala tiɔɔŋndaŋ ndaŋ le hei biyɔɔ bila.

Baa Chiisu yeema miŋ laalaŋ kɛsɛ maa le naa pilɛŋ pilɛŋnda kpou o vi ni? Ei, o yeema mi naa pilɛŋ pilɛŋnda che sala ndɔɔ ma kioo o cho le naa ni. Yiyaŋndɔ a kona cho o Luku 23:​39-43, NW niŋndo. Poo cho o baŋaa o yɔmndo choo Chiisu ikɛi. O sɔlɔlaŋ maa le yɔŋndɔ wɔɔŋndo nda baŋ ndu o yɔmndo choo ni. Le mi ndaa baŋ wana o yɔmndo choo, mɛɛ mi num aa tosa suɛi wɔɔŋ wɔɔŋnde. Mɛɛ ŋ dimi maa poo hoo bɛɛ suɛi wɔɔŋii waa lende ndoo tosa ni, kani o yɔmndo choo nda baŋ ndu ni. Poo hoo wa bɔɔ o buulaŋndo niŋ, le hei mbo dimul Chiisu aa, “Loonuŋ a ya Chiisu, lɔɔ ŋ cho hunɔɔ wa Masaa wo.”

Vɛɛ Chiisu ndoo muli yɛ? Yiyaŋndɔ a nyɛ nɛiyaa Chiisu wa sinaŋndo wo mɛɛ o wa bolleŋ chuaa le poo hoo hɔlla nuaa. A nyɛ nɛiyaa wa ndu choo wo kpou, mbo kindiŋ dɔɔ le mamɔɔ muɛɛŋ o poo hoo lo. Nduyɛ mbo dimul ndu aa, “Mi dimul num hau, a cho wa a ya latulu o Kpele Hɛnɛkiɔɔ niŋ.” Chiisu ndoo loonuŋ poo hoo maa, “Po Wana Pɔnɔɔ . . . hiŋ . . . le mbo . . . yɔŋgu yoomu ndɔɔ le wanaa faŋga faŋga baŋaa.” (Maa. 20:​28) O muli Chiisu ke poo hoo wo niŋ, a che pa nyɛ chɔm kɛsɛ maa le naa pilɛŋ pilɛŋnda o vi ni wo? Mbo dimul ndu diomnda ichaŋya laŋ aa “a cho wa a ya latulu” le ndu kɔllo dɛɛniaa. Nduyɛ mbo mala poo hoo le sinaa maa le ndu kpeekpei o vi ni mɛɛ o dimul ndu maa o cho wa o kpele hɛnɛkiɔɔ niŋ o lɛŋndeŋ choo.

Hei chɔm kpendekele maa Chiisu ndoo yeema mi poo hoo ndoo che sala ndɔ baŋaa maa le ndu kpeekpei o wa ni. Te Chiisu ndoo yeema pɛ mi po dɛnɛ wɔɔŋ bɛndu piɛi hoo Mɛlɛka paale pilɛ bɛɛ le wo che sala ndɔ baŋaa maa le ndu kpeekpei o wa ni, mɛɛ lende ko o yeema ni mi Kilisiɔŋnɔ yiŋ mbo wa Mɛlɛka piɛiyo wo bɛɛ che ndu. O yɔŋ bɛɛ mi naŋ tosa yɔŋ wɔɔŋndo paandu, yɛɛ mala yɛ naa le laalaŋndo kɛsɛ maa le naa kpeekpei Chiisu vi ni?

Wali dimiaa yooŋgu kɛndɛ Chiisu ke Pɔɔllo mala ndu ni le sinaa maa le ndu o vi ni. Le yɛɛ naŋ dimi yɛ  lende? Mi Pɔɔl pila dimi aa, “Masanɔ naa Chiisu Kiliti o ke ya kpaayaa le wallo hoo tosaa wo, I yil ndu balika le mɛɛ o laalaŋ a ya le wallo hoo tosaa yɛ. Nduyɛ, I mel ndu balika le mɛɛ o hɛli ya le wallo hoo yɛ. Mi che bɛɛ o tasela ndɔɔ mi I tɛɛmbuu diola ndɔlaŋ, o koŋ kɔɔli, mi I tusi ndu nyɛ palaa choo, nduyɛ mi yiou ndu.” (1 Timo. 1:​12-14) Wali teŋgeŋ Chiisu ke hoo Pɔɔllo mala ndu ni mbo laalaŋ kɛsɛ maa o tuiŋ ndu inyiɛɛ, kaala ndu, nduyɛ maa o nɔ tiindaŋndo o ndu niŋ. Naa bɛɛ Chiisu ke naa wali dimiaa yooŋgu kɛndɔɔ le tosaa. (Maa. 28:​19, 20) Vɛ, o cho wallo hoo le ke naa tiindaŋndo maa le naa kpeekpei le Chiisu vi le?

Mi Albat sɔla solioo le wɔsilaŋ 34 kɛ mbo laŋga miiŋgu Chɛhowa o ibuŋ ndo dimi aa, “Mi yiyaŋ lɔɔlɔɔ a yɔŋnda wɔɔŋnda ya tosalaŋ. Kɛ te I wa pɛ o wali pollo niŋ, mi yiyaŋ maa wali teŋgeŋndo Chiisu ke ya ni maa Pɔɔl, wana o vem hɔlte ndɔ wo. Wallo hoo kpeekpei tosa ni mi naŋ kɔl tau, nduyɛ mi pɛŋgi yiyaŋ wɔɔŋndo nɔɔ a yapila, yoomu nuu vɛlɛ a chila nilaŋ.”—Sam 51:​3.

Alaŋ ndoo bii sawa le, nduyɛ sɔŋgɔlaŋ pila ndoo kaala ni tuupa mbo pɛɛku Baabuiyo. Mbo dimi aa, “Mi yiyaŋndɔ a sɔɔŋ wɔɔŋ yaa tosal waŋnda woŋ okɔɔ. Lepum mi yiyaŋndaŋ la tɛɛmbuu ya kɔl tau. Kɛ I mel Chɛhowa balika le mbo chɛl wana dɛnɛ wɔɔŋndo maa ya, le acheleŋnda yooŋgu kɛndɔɔ dimullo. Te I dimul pɛ waŋnda yooŋgu kɛndɔɔ mi che mɛɛ kɔltaŋ la naŋ nda yɛ, mi sina kɛsɛ maa Chɛhowa cho bɔɔ wana kɛndɛ nduyɛ maa o kaala naa bɔɔ. Mi sina vɛlɛ maa Chɛhowa cho ya kpekoo soliŋndo le wanaa cho sɔɔŋ wɔɔŋ ndoŋ tosaa wa malaa ma siŋgaŋ.”

Wali pollo mala naa ni le kɔllo kɛsioo o sɔɔŋ kɛndɔŋ choo nduyɛ miŋ mala acheleŋnda le mi ndaa bɛɛ siŋgaŋ. Ndu ke naa vɛlɛ tiindaŋndo ni maa Chiisu nɔ nyiɛɛye le naa, kaala naa nduyɛ maa o laalaŋ a naa.

Te chieeŋ dɛnɛ wɔɔŋ Setana cho hoo masaa choo wo cho wɔ pɛ, fɛŋ bɛɛ ŋ puɛɛnuŋ a sɔɔŋ wɔɔŋ naŋ tosa paandu woŋ te. Mɛɛ mbo huŋ sɔla tambei malaŋ naŋ puɛɛŋ. Lelaŋ, yɛɛ mala yɛ naa le yiyaŋnda wɔɔŋndaŋ chɔulabaa?

Chiaŋ wanuŋ o kaala wɔɔŋndaŋ niŋ yikpi teleŋ o wa feleŋgɔnɔ wo, kɛ wanaa velu ndu wa a puaapiliaa ve o sina choo le. Mi che bɛɛ o siŋgaŋ niŋ, kɛ mi kɔl iyama ndɔɔ paaliaŋ ndɔ ndu le yoomu wɔɔŋ o wa choo wo. Mbo dimi aa, “I kaala bɔɔ nyɛ dimiŋ hoo maa ‘Mɛlɛka ndu hiou a kɔlta naalaŋ ni wo.’” (1 Chɔŋ 3:​19, 20) Naa bɛɛ nɔla miŋ sɔla kɔl dɛɛniaa le sinaa maa Chɛhowa nda Chiisu sina maa wanaa lahakiaa naŋ cho ni. Nduyɛ o bɛnda ma kɛsiŋ vɛlɛ o kɔl maa sala baŋaa nda yɔŋgu wo cho le wanaa walaŋ te, kɛ le wanaa lahakiaa mulul yɔŋnda wɔɔŋndo kɔɔ wa.—1 Timo. 1:​15.

Le miŋ nɔ tiindaŋndo maa le naa kpeekpei sala baŋaa Chiisoo cho ni, mɛɛ miŋ wa yiyaŋndo a mɛɛ Chiisu ndoo bii wanaa lahakiaa yɛ okɔɔ, nduyɛ miŋ kindiŋ kpoke le wali dimiaa yooŋgu kɛndɛ o ke naa wo tosaa. Te a tosa hei pɛ, num bɛɛ cho nɔ tiindaŋndo maa Pɔɔl, nduyɛ ma dimi aa Chiisu “kaala ya nduyɛ mbo chɛl mbo wu le ya.”