MOBIBELI kwa tjanga mo malizuvho govantu ava ngava ‘hepa ngwendi nyose.’ (Jak. 5:17) Pasihonena, kuvhura tu kwate egano eyi ga tembe Paurusa apa ga uyungire nonkango edi da kara moVaroma 7:21-24 asi: “Ame kwa hara kurugana uwa, nye udona nawo kapi hena wa pira po pwange. . . . Oru ruhepo rwange ame muntu ame rureru oru!” Ayo kutuhengagwida pokudiva asi mupositoli Paurusa nage nga kondjo mokurwanesa po maupirankondo ngwendi nyose.

Paurusa kwa uyungire hena omu a lizuvhu kuhamena yuma yapeke. MoVagarata 2:20, age kwa uyungire asi Jesus kwa “hara nge, yiyo ga gavera nge mwenyo gwendi panzambo.” Nove yimo o lizuvhu ngoso kuhamena nzambo zaJesus ndi? Nampo kapisi yimo.

Nsene ose kulizuvha udona morwa nonzo detu danare, eyi kuvhura kutuninkisa tu dire kuyipura asi Jehova ga tu hara ntani ga tu gusira po ntani ngayi tu karera udigu kuyipura asi Jesus nyose ga fira. Jesus ana hara tu yi pure asi nyose sili ga fira ndi? Yisinke nayi tu vatera yipo tu yi pure oyo? Tu zeni tu ka konakone mapuro ogo gavali.

Jesus ana hara tu tare nzambo zendi ngouhwi ga pa nkenye gumwe gwetu. Ngapi omu twa yi diva oyo? Gazara kuhamena sihorokwa esi sa kara mwaRukasa 23:39-43. Mugara ogu va pamparere kositji, ogu ga likundamene kumwe naJesus kwa lizuvhire unzoni kweyi ga rugana. Unzoni wendi unene sili, morwa vantu ava ngava rugana yininke yoyidona unene, yiwo velike ngava pampara kositji. Morwa mugara ogo kwa kere nosinka, age kwa likwamberere kwaJesus asi: “Diworoka nge nsene no za moUntungi woge.”

Ngapi ga mu limbwilire Jesus? Gazara tupu kukora oku ga zuvhire Jesus apa ga pirukire a tare munamahaka gwina. Nampili ngomu ga zuvhire kukora, age kwa menywine ntani nokuhengagwida mugara gwina pokutanta asi: ‘Yosili nina kukutantera naina asi, to ka kara kumwe name moParadisa.’ Jesus ngano ga tanterere mugara gwina asi: “MunwaMuntu kwa wizira . . . a ya gave mwenyo gwendi, gu kare sizoweseso sovanzi.” (Mat. 20:28) Nye Jesus kwa here mugara gwina a lizuvhe asi Jesus yige ana kufira. Age kwa uyungire nougomoki ntani kwa ruganesere nkango “to” ntani “name.” Ntani age kwa tanterere mugara gwina asi nga ka paruka pevhu moparadisa.

Yosili, Jesus kwa here mugara gwina a lizuvhe asi nage nga ka gwana mauwa komeho morwa nzambo ezi ga geve Jesus. Nsene yimo ga lizuvhire ngoso kuhamena mukorokotji ogu ga dilire kukarera Karunga, eyi kulikida asi age kugusira po Mukriste ogu ga gwana ekuho ogu ana kukarera Karunga. Yisinke nayi tu vatera tu yi pure nawa-nawa asi nampili ngomu twa zona, nsene tu litezurura ose ngatu ka gwanena mo mauwa monzambo zaJesus?

Sirugana esi Jesus ga pere Paurusa sa mu vaterere a yi pure nawa-nawa asi Jesus yige ga fira. Morwasinke tuna kuuyungira ngoso? Age kwa tente asi: “Ame tani pandura Jesus Kristusa, Hompa gwetu, ogu ga pa nge nonkondo ni sikise mo yirugana yange. Tani mu pandura morwa ga huguvara nge, yiyo ga tura nge asi ni mu kerere.” (1 Tim. 1:12-14) Nampili ngomu Paurusa nga rugana yininke yoyidona, sirugana esi ga mu pere Jesus kwa mu vaterere a yi pure nawa-nawa asi Jesus ga mu hara, ga mu huguvara ntani ga mu gusira po. Ngwendi Paurusa, Jesus kwa tu pa nose sirugana sokuzuvhisa mbudi zongwa. (Mat. 28:19, 20) Mokumona asi Jesus kwa tu pa sirugana esi, eyi kuvhura yi tu vatere tu yi pure nawa-nawa asi Jesus nyose ga fira ndi?

Albert ntani tupu kava mu tengwidilire mombunga. Age kwa mu gusire mo ure wonomvhura 34. Age kwa tanta asi: “Ame kulivera nkenye apa nonzo dange, nye apa ani kara moyirugana yokuzuvhisa, ame kulizuvha ngwendi mupositoli Paurusa, Jesus kwa pa nge name sirugana esi. Sirugana esi kukorangeda nge ntani kuretera nge ruhafo nokuninkisa nge ni lizuvhe nawa kuhamena eparu lyange ntani nomeho zange.”—Epis. 51:3.

Allan ogu ga kere mukorokotji ntani nonyanya komeho a lironge usili kwa tanta asi: “Ame simpe kudiworoka yininke yoyidona eyi ngani rugana kovantu. Poyiruwo yimwe ayo kuguvisa nge. Nye ame kupandura Jehova kweyi ga pulisira munanzo gomudona ngwendi nyame ni tantere ko wopeke mbudi zongwa. Apa ani mono vantu kuna kutambura mbudi zongwa, ayo kudiworokesa nge eharo eli ga kara nalyo Jehova. Ame kulizuvha asi age kuna kuruganesa nge yipo ni vatere vantu ava vana kurugana yirugana yoyidona ngwendi eyi ngani rugana.”

Apa atu zuvhisa, ayo kutuvatera tu demenene koyininke yoyiwa ntani nokugazara yininke yoyiwa. Sirugana esi kutuvatera tu dimburure asi Jesus ga tu huguvara, ga tu hara ntani kutugusira po.

Ose ngatu twikira kulizuvha unzoni kononzo detu danare dogoro apa uzuni waSatana ngava ka u zonagura po. Yisinke nayi tu vatera tu rwanese po malizuvho gangoso?

Jean ogu a lizuvhu udona kweyi nga lininkisa pounona asi age kuna kukarera Jehova, kwa tanta asi: “Ame na hafa pokudiva asi ‘Karunga ga pitakana nomutjima detu.’” (Joh. 3:19, 20) Ngwendi Jean, ayo kutuhengagwida pokudiva asi Jehova naJesus kutukwata egano asi ose vananzo. Diworoka asi awo kwa geve sizoweseso kovananzo wokulitezurura nye kapisi kovantu wokusikilira mo.—1 Tim. 1:15.

Apa atu teda ko monkedi omu Jesus nga tekura vantu ntani nokurugana paapa twa hulira mokusikisa mo sirugana esi ga tu pa, ayo kutuvatera tu yi pure nawa-nawa asi Jesus nyose ga fira. Nsene tu yi rugana, ose ngatu uyunga ngwendi Paurusa ogu ga tente asi: Jesus “ogu ga hara nge, yiyo ga gavera nge mwenyo gwendi panzambo.”