MUNA Nkand’a Nzambi tutanganga e mvovo mia akwa kwikizi ana bakala ye ‘ngindu nze zeto.’ (Yak. 5:17) Kasikil’owu, tulenda bakula vana vau e nsas’a mvovo mina Paulu kasoneka muna Roma 7:21-24. Wavova vo: “Avo nzolele vanga edi diambote, edi diambi dina yame.  . . Ekwe mono fwafwala kia muntu!” E mvovo miami mia nsi a ntima mikutufiaulwisanga vava tunuananga ye usumuki weto.

Paulu wavovela mpe ngindu zankaka. Muna Ngalatia 2:20, wavova ye ziku kiawonso vo Yesu ‘wanzola yo kukiyekola mu kuma kiandi.’ Nga i wau mpe omonanga? Nanga ke ntangwa zawonso ko.

Avo tukuyimwenanga vo ke tuna kweto mfunu ko mu kuma kia masumu twavola, dilenda kala diampasi mu tambulwila vo Yave okutuzolanga yo kutuloloka. Diampasi mpe dikala mu badikila e kimenga kia lukûlu nze lukau lwa Nzambi kwa yeto. Nga Yesu ozolanga kikilu vo twabadikila e kimenga mu mpila yayi? Avo i wau, adieyi dilenda kutusadisa mu vanga wo? Yambula twabadika yuvu yole yayi.

Kieleka, Yesu ozolanga vo twabadikila e kimenga kia lukûlu nze lukau lwa Nzambi kwa yeto. Aweyi tulenda kadila ye ziku kiaki? Yindula dina diasonama muna Luka 23:39-43. Muntu mosi wamanikwa vana nti ampasi vana ndambu a Yesu. O muntu ndioyu watambulwila e mambu mambi kavanga. O nkanu kavola wampwena kikilu kadi e tumbu kiakina kiavewanga kaka kwa yimpumbulu. Muntu ndioyu watokana kwayingi yo lomba kwa Yesu vo: “Unsungamena vava okota muna Kintinu kiaku.”

Adieyi Yesu kavanga? Yindula e mpasi kamona o Yesu vava kavilula o ntu kimana katala e kimpumbulu kiaki. Kana una vo mu mpasi kakala, Yesu wavovela kuna ngemba yo fiaulwisa muntu ndioyu mu mvovo emi: “Kieleka, o unu isamunwini vo, okala yame muna Paradiso.” Yesu wafwana kunsungamesa kaka vo ‘Mwan’a muntu wayiza . . . vana moyo andi se lukûlu lwa wantu ayingi.’ (Mat. 20:28) Kansi, nga omwene e mpila o Yesu kasongela kuna ngemba zawonso vo Nzambi wavana mpe kimenga kia lukûlu mu kuma kia muntu ndioyu? Yesu mvovo miangemba kikilu kasadila vava kavova vo “okala yame.” Yesu wayika mpe nluta mia kimenga kia lukûlu vava kavova kwa kimpumbulu vo okala ye lau dia zingila muna paradiso ova ntoto.

Ka lukatikisu ko vo, Yesu wazola vo muntu ndioyu kabakula vo e kimenga kia lukûlu kiavewa mpe mu kuma kiandi. Avo Yesu wafwila kimpumbulu e nkenda, ona kakala ye lau dia sadila Nzambi ko, tulenda kala ye ziku vo i wau mpe kemonanga mu kuma kia Nkristu wavubwa ona osadilanga Nzambi. Adieyi dilenda kutusadisa mu kwikila vo e kimenga kia Kristu kia lukûlu kitwasa e nluta kwa konso muntu mu yeto kana una vo entete masumu twavanganga?

Wau vo Yesu wamvana kiyekwa kia samuna e nsangu zambote, Paulu wabakula vo Yesu wafwa mu kuma kiandi. Mu nkia mpila? Wavova vo: “Ntondele Kristu Yesu wa Mfumu eto, ona wankumika, kadi wambadikila vo i nkwa kwikizi wau kangiekeka uselo, kana una vo ntianguni a Nzambi yakala ye mbangiki ye nkwa nsoki.” (1 Tim. 1:12-14) E kiyekwa kia Paulu kiasonga e ziku kia nkenda, zola ye vuvu kina Yesu kakala kiau muna yandi. Yesu wavana kwa konso muntu mu yeto e kiyekwa kia samuna e nsangu zambote. (Mat. 28:19, 20) Nga e kiyekwa kiaki kikutusadisanga mpe mu bakula vo Yesu wafwa mpe mu kuma kieto?

Mpangi Albert ona waviokesa tezo kia mvu 34 kuna mbazi a nkutakani, ke kolo ko wavutukidi sadila Yave. Wavova vo: “Iyindulanga masumu mame ntangwa zawonso. Kansi vava ikalanga muna salu kia umbangi, imonanga vo nze Paulu wa ntumwa, Yesu wampana kiyekwa kiamfunu. Ediadi dikunkumikanga yo kuntwasila kiese yo kunsadisa mu kala ye ngindu zasikila mu kuma kia zingu kiame owau ye kia kusentu.”—Nku. 51:3.

Mpangi Allan, ona wakala kimpumbulu vitila kazaya e ludi, wavova vo: “Yakinu yindula e mpasi zawonso yamwesanga o wantu. Ezak’e ntangwa dikunkendelekanga. Kansi, ivutulanga matondo kwa Yave wau keyambulanga nsumuki nze mono kasamuna e nsangu zambote kwa akaka. Vava imonanga una wantu betambulwilanga e nsangu zambote, dikunsungamesanga vo Yave wambote ye nkwa zola. Imonanga vo okunsadilanga muna sadisa mpe akaka bevanganga mambu mambi.”

Vava tukalanga muna salu kia umbangi tuvanganga oma mambote yo kala ye ngindu zasikila. Ediadi dikutukwikidisanga vo Yesu okutufwilanga e nkenda, okutuzolanga yo kutubunda e vuvu.

Yavana e nza ya Satana ifwaswa, e ntima mieto mikwamanana kututumba mu kuma kia masumu twavanga. Adieyi dilenda kutusadisa mu sunda e ngindu zazi?

Mpangi mosi ankento una ye nkumbu a Jean, ona onuananga ye ntokani mu kuma kia zingu kia disu ku nsi a lukaya kanatanga muna kileke, wavova vo: “Diakiese mu zaya wo vo ‘Nzambi osundidi ntima mieto.’” (1 Yoa. 3:19, 20) Tulenda mpe fiaulwiswa mu zaya vo Yave yo Yesu bebakulanga vo tu asumuki. Tufwete sungamenanga vo bakubika o lukûlu kuna zola kwawonso ke mu kuma kia wantu alunga ko, kansi mu kuma kia asumuki ana bevilukanga o ntima.—1 Tim. 1:15.

Tukwikidisanga e ntima mieto vo e kimenga kia Yesu kia lukûlu kiavewa mpe mu kuma kieto vava tusambanga yo badika una Yesu kakadilanga yo wantu alembi lunga ye vava tuvanganga mawonso tulenda muna lungisa o uselo weto. Avo ovangidi wo, ngeye mpe olenda vova nze una Paulu vo: Yesu “wanzola yo fwa mu kuma kiame.”