IN JAW quʼjin toj Tyol Dios aju kubʼ kynaʼn qeju tbʼanel xjal ten kyximbʼetz ik tzeʼn qe (Sant. 5:17). Jun techel, tqʼama apóstol Pablo jlu: «Wajbʼile tuʼn nbʼinchanteye aju bʼaʼn, pero aju mya bʼaʼn tkubʼ nwitze. [...] Bʼekʼbʼilxix nwitze» (Rom. 7:21-24). Ax ikx qe in nok tilil quʼn tuʼn tkubʼ kyiʼj nya bʼaʼn qajbʼil, pero in tzaj qʼuqbʼaʼn qkʼuʼj aj tel qnikʼ tiʼjju kubʼ tnaʼn Pablo.

Ax ikx yolin Pablo tiʼjju kubʼ tnaʼn tiʼj chojbʼil bʼant tuʼn Jesús. Toj Gálatas 2:20 tqʼama jlu: «In kʼujlanjtze tuʼn [Tkʼwaʼl Dios], ex xi tqʼon tibʼ tuʼn tkyim tuʼntzun nklete». Qʼuqlixixtoq tkʼuʼj Pablo tiʼj jlu. ¿Axpe qximbʼetz at ik tzeʼn te? Bʼalo at maj mintiʼxix in nok qeʼ qkʼuʼj tiʼj jlu.

Qa in kubʼ qnaʼn nya bʼaʼn tuʼn tpaj jun il kubʼ qbʼinchaʼn, bʼalo tuʼn jlu kwest tuʼn tok qeʼ qkʼuʼj tiʼj qa kʼujlaʼn qoʼ tuʼn Jehová ex qa in kubʼ tnajsaʼn qil. Ax ikx, maslo kwest tuʼn tok qeʼ qkʼuʼj tiʼj qa te qe aju chojbʼil bʼant tuʼn Jesús. ¿Axpe tok taj Jesús tuʼn tten qximbʼetz ik tzeʼn jlu tiʼj chojbʼil? Qa ikju, ¿tiʼ kʼonil qiʼj tuʼn tten qximbʼetz ik tzeʼn jlu? Qo xnaqʼtzan kyiʼj kabʼe xjel lu.

Taj Jesús tuʼn tok qqʼoʼn chojbʼil ik tzeʼn jun oyaj tzaj tqʼoʼn qe. ¿Tiquʼn qʼuqli qkʼuʼj tiʼj jlu? Qo ximen tiʼjju in tzaj tqʼamaʼn Lucas 23:39 a 43, TNM. Jun kyxol qeju xjal otoq jaw yobʼin twitz tzeʼ junx tukʼil Jesús, el tnikʼ tiʼj qa otoq kubʼ tbʼinchaʼn il. Kubʼlo tbʼinchaʼn jun matij il, tuʼnju kubʼ qʼoʼn tkastiw ik tzeʼn jun xjal puro nya bʼaʼn tbʼinchbʼen. Tuʼnju attoq toj kʼixkʼoj toj ambʼil aju, kubʼsan twitz Jesús tej tqʼama jlu: «Bʼiʼx chin ule tiʼj tkʼuʼja ok tula tuʼn tkawina».

¿Tiʼ xi ttzaqʼweʼn Jesús te xjal? Qo ximen tiʼj kʼixkʼoj ikʼx tuʼn tej t-xi tyukin twiʼ tuʼn t-xi tkeʼyin toj twitz xjal nya bʼaʼn. Maske ikju, ten tjwers ex xi tzeʼn toj twitz xjal tuʼn t-xi tqʼamaʼn jlu te tukʼil kʼujlabʼil: «Ax tok kxel nqʼamaʼne teya jaʼlo, ktela wukʼile toj Tbʼanel Najbʼil». Oʼkx jakutoq txi tqʼamaʼn Jesús te xjal qa otoq tzul tuʼn t-xi tqʼon tibʼ tuʼn tkyim tuʼn kyklet nimku xjal (Mat. 20:28). Pero mintiʼ bʼant jlu tuʼn, sino onin tiʼj xjal tuʼn tel tnikʼ tiʼj qa otoq kyim tiʼj tuʼntzun tklet. Xi tqʼamaʼn Jesús te xjal tukʼil kʼujlabʼil, «ktela wukʼile», ex xi tqʼamaʼn te qa jakutoq tzʼanqʼin toj Tbʼanel Najbʼil tzalu twitz Txʼotxʼ noq tuʼn chojbʼil.

Mintiʼ bʼant tuʼn tajbʼen nya bʼaʼn xjal te Jehová. Noqtzun tuʼnj, bʼalo tajtoq Jesús tuʼn tel tnikʼ tiʼj qa ax ikx kʼoniltoq chojbʼil tiʼj. Tajtoq Jesús tuʼn tel tnikʼ xjal nya bʼaʼn tiʼj qa jun oyaj chojbʼil te te, ax ikx taj tuʼn tok qeʼ tkʼuʼj jun okslal tiʼj, aju o jaw aʼ twiʼ ex in najbʼen te Jehová. Pero, ¿tzeʼn jaku tzʼel qnikʼ tiʼj qa in nonin chojbʼil bʼant tuʼn Jesús qiʼj maske kubʼ qbʼinchaʼn il ojtxe?

El tnikʼ Pablo tiʼj qa kyim Jesús tiʼj tuʼnju xi tqʼoʼn toklen tuʼn tpakbʼan. Tqʼama jlu: «Kxel nqʼoʼne chjonte te Qajaw Jesucrist tuʼnju ma  tzaj qʼoʼn wipumale tuʼn, porke ma qeʼ tkʼuʼj wiʼje ex ma chin ok qʼoʼne tuʼn, tuʼn wajbʼene te. Ojtxi in yasune tiʼj, ex in yajlane kyiʼj okslal, ex o nbʼinchaye mya bʼaʼn kyiʼj» (1 Tim. 1:12-14). Tuʼnju tzaj tkʼamoʼn Pablo toklen lu, ok qeʼ tkʼuʼj tiʼj qa kubʼ tyekʼin Jesús qʼaqʼbʼil tkʼuʼj tiʼj, qa kʼujlaʼntoq tuʼn ex qa ok qeʼ tkʼuʼj tiʼj. Ax ikx qe, o tzaj qʼoʼn qoklen tuʼn Jesús tuʼn qpakbʼan tiʼj Tkawbʼil Dios (Mat. 28:19, 20). ¿Jakupe tzʼonin qoklen tuʼn qpakbʼan tuʼn tel qnikʼ tiʼj qa ax tok kyim Jesús qiʼj?

Qo xnaqʼtzan tiʼjju bʼaj tiʼj Albert, aju ex tin tibʼ chʼixme 34 abʼqʼi toj ttnam Jehová ex kʼitzqeku meltzʼaj. Tqʼama jlu: «Kukx in tzaj nnaʼne qe wile. Pero aj wexe pakbʼal, in kubʼ nnaʼne qa o tzaj toqxenin Jesús jun woklene, ik tzeʼn te Pablo. Tuʼn jlu mas in chin tzalaje, in nonin wiʼje tuʼn tten tbʼanel nximbʼetze wiʼjxe, tiʼj wanqʼibʼile ex tiʼj ambʼil tzul» (Sal. 51:3).

Atzunte Allan in che oktoq tkʼixbʼisaʼn xjal ex kubʼ tbʼinchaʼn nim il tej naʼmxtoq tok tojtzqiʼn Jehová. Tqʼama jlu: «Kukx in tzaj nnaʼne nya bʼaʼn ok nbʼinchaʼne kyiʼj xjal. Tuʼn jlu at maj in tzaj bʼaj nkʼuʼje. Pero in xi nqʼoʼne chjonte te Jehová tuʼnju maske aj il qine, in tzaj tqʼoʼn ambʼil weye tuʼn t-xi nqʼamaʼne tbʼanel tqanil kye xjal. Tuʼnju kymod xjal in kubʼ kyyekʼin toj pakbʼabʼil, in tzaj nnaʼne qa tbʼanel te Jehová ex qa at tkʼujlabʼil. In kubʼ nximane qa in chin ajbʼene tuʼn tuʼn wonine kyiʼj xjal iktoq kyanqʼibʼil ik tzeʼn weye tnejel».

Aj qex pakbʼal, in nonin qiʼj tuʼn tajbʼen qjwers tuʼn tkubʼ qbʼinchaʼn aju tbʼanel ex tuʼn qximen tiʼjju bʼaʼn. Ex tuʼn jlu qʼuqli qkʼuʼj tiʼj qa in kubʼ tyekʼin Jesús qʼaqʼbʼil tkʼuʼj qiʼj, qa kʼujlaʼn qoʼ tuʼn ex qa qʼuqli tkʼuʼj qiʼj.

Akux in qo anqʼin tjaqʼ tkawbʼil Satanás, bʼalo kukx kbʼel qximen qa mintiʼ qoklen toj twitz Jehová tuʼnju kubʼ qbʼinchaʼn nya bʼaʼn toj ambʼil ojtxe. ¿Tiʼ kʼonil qiʼj tuʼn tkubʼ tiʼj nya bʼaʼn ximbʼetz lu quʼn?

Kukx in nok tilil tuʼn jun ermana Jean tuʼn tkubʼ kyiʼj nya bʼaʼn t-ximbʼetz tuʼnju mintiʼ kubʼ tanqʼin axix tok tej tzmatoq txin. Pero in tzaj tqʼamaʼn jlu: «Tbʼanel in nela toj nwitze aj tok nbʼiʼne qa mas maʼ toklen Jehová ‹twitz ju qanmi› moqa qximbʼetz» (1 Juan 3:19, 20). Ax ikx qe, in tzaj qʼuqbʼaʼn qkʼuʼj aj tok qojtzqiʼn qa in nel tnikʼ Jehová ex Jesús tiʼj qa aj il qoʼ. Bʼaʼn tuʼn ttzaj qnaʼn qa noq tuʼnju at kykʼujlabʼil, tzaj kyqʼoʼn chojbʼil kyiʼj xjal aj il in najtz tiʼj kyanmi (1 Tim. 1:15).

Tuʼn tok qeʼ qkʼuʼj tiʼj qa xi tqʼoʼn Jesús chojbʼil qiʼj, qo ximen tiʼj tmod kubʼ tyekʼin kyiʼj xjal aj il ex qqʼonk tilil tuʼn tjapun qoklen o kyaj tqʼoʼn. Iktzun tten jaku txi qqʼamaʼn ik tzeʼn te Pablo: «In kʼujlanjtze tuʼn [Jesús], ex xi tqʼon tibʼ tuʼn tkyim tuʼntzun nklete».