TU̱ʼUN Ndióxi̱ káʼa̱nña xa̱ʼa̱ na̱ yiví, na̱ ni̱xi̱yo ini táki̱ʼva íyo ini miíyó (Sant. 5:17). Tá kúú, ta̱ apóstol Pablo ni̱ka̱ʼa̱nra: “Tá kúni̱i̱ keʼíi̱ ña̱ va̱ʼa ña̱ va̱ása va̱ʼa va̱xi nu̱úi̱. [...] Ndáʼvinívai̱” (Rom. 7:21-24). Sana va̱ása íxayo̱ʼvi̱ña xíʼinyó ña̱ kunda̱a̱-iniyó ña̱ íyoyó táki̱ʼva ni̱xi̱yo ta̱kán. Ki̱vi̱ ndákava-iniyó xa̱ʼa̱ ña̱ kúúyó na̱ yiví ku̱a̱chi, ña̱ ni̱ka̱ʼa̱n ta̱ Pablo kúú ña̱ kivi sandíko-iniyó.

Saátu ta̱ Pablo ni̱ka̱ʼa̱nra xa̱ʼa̱ ña̱ ndákanixi̱níra xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Nu̱ú Gálatas 2:20 ni̱ka̱ʼa̱nra: “Se̱ʼe Ndióxi̱ kúú ta̱ ni̱kuʼvi̱-ini xi̱ni yi̱ʼi̱ ta̱ nda̱taxi xíʼin miíra xa̱ʼíi̱”. Ta̱ apóstol Pablo xíʼin ndinuʼu-inira xi̱kandíxara ña̱ tu̱ʼun yóʼo. ¿Á inkáchi ndákanixi̱níyó xíʼinra? Sana sava yichi̱ xíka-iniyó xa̱ʼa̱ ña̱yóʼo.

Tá ndákava-iniyó xa̱ʼa̱ ña̱ va̱ása va̱ʼa ña̱ ke̱ʼéyó tá ya̱chi̱, sana íxayo̱ʼvi̱ña xíʼinyó kandíxayó ña̱ kúʼvi̱ní-ini Jehová xínira miíyó ta kúkáʼnu-inira xa̱ʼa̱ ku̱a̱chiyó. Ta sana saátu íxayo̱ʼvi̱ña xíʼinyó ña̱ kandíxayó ña̱ iin regalo kúú ña̱ ta̱xi Jehová ndaʼa̱yó xa̱ʼa̱ ña̱ ta̱xira ta̱ Jesús ni̱xi̱ʼi̱ra xa̱ʼa̱ iin iinyó. ¿Á saá kúni̱ ta̱ Jesús ná ndakanixi̱níyó xa̱ʼa̱ña? Ta ¿ndáaña chindeétáʼan xíʼinyó ña̱ kandíxayó ña̱ ndixa ni̱xi̱ʼi̱ra xa̱ʼa̱yó? Ná ka̱ʼa̱nyó xa̱ʼa̱ u̱vi̱ pregunta yóʼo.

Ta̱ Jesús kúni̱ra ña̱ ná kandíxayó ña̱ ndixa ni̱xi̱ʼi̱ra xa̱ʼa̱yó, ta nda̱a̱ táki̱ʼva íyo iin regalo ña̱ ta̱xira ndaʼa̱yó saá íyoña. ¿Ndáaña kivi chindeétáʼan xíʼinyó ña̱ kandíxayó ña̱yóʼo? Ná ndakanixi̱níyó xa̱ʼa̱ ña̱ káʼa̱n Lucas 23:39-43. Iin ta̱a ta̱ tíkaa ndaʼa̱ yitu̱n siín ta̱ Jesús ndákunira ku̱a̱chi ña̱ ni̱ki̱ʼvira. Sana iin ku̱a̱chi ña̱ ndeé kúú ña̱ ni̱ki̱ʼvira, chi castigo ña̱ nda̱kiʼinra kúú ña̱ ndákiʼin iin na̱ ni̱ki̱ʼvi iin ku̱a̱chi ndeé. Xa̱ʼa̱ ña̱ ndíʼi̱ní-inira xa̱ʼa̱ ña̱ ndóʼora, ni̱ka̱ʼa̱nra xíʼin ta̱ Jesús: “Ndakaʼún xa̱ʼíi̱ tá ná kixáʼún kaʼndachíñún”.

¿Nda̱saa nda̱kuiin ta̱ Jesús yuʼú ta̱ ta̱a kán? Ná ndakanixi̱níyó ña̱ ni kúʼvi̱níra, na̱ndikoniʼira xi̱níra ña̱ kotora nu̱ú ta̱ ta̱a kán. Ta saátu ña̱ ku̱a̱kura xíʼin ta̱ ta̱a kán ta vií ka̱ʼa̱nra xíʼinra: “Míí ña̱ ndixa káʼi̱n xíʼún vitin: Koún xíʼi̱n nu̱ú ñuʼú livi”. Ta̱ Jesús kiviva sandakaʼán kuitíra ta̱ ta̱a kán, ña̱ se̱ʼe Ndióxi̱ ki̱xira ña̱ kuvira xa̱ʼa̱ ku̱a̱ʼání na̱ yiví ña̱ va̱ʼa ka̱kuna (Mat. 20:28). Soo chi̱ndeétáʼanra xíʼin ta̱ ta̱a kán ña̱ kunda̱a̱-inira ña̱ kuvira xa̱ʼa̱ra. Vií ni̱ka̱ʼa̱nra xíʼinra “koún xíʼi̱n” ta saátu ni̱ka̱ʼa̱nra ña̱ kutakura ndiʼi tiempo nu̱ú ñuʼú livi ña̱ koo nu̱ú ñuʼú yóʼo tíxa̱ʼvi ña̱ kuvira xa̱ʼa̱ra.

Ta̱ ta̱a kán ni va̱ása níkivi xa̱a̱ra ndasakáʼnura Ndióxi̱. Soo ta̱ Jesús xi̱kuni̱ra na̱ kunda̱a̱-inira ña̱ iin regalo ña̱ taxira ndaʼa̱ra kúú ña̱ kuvira xa̱ʼa̱ra. Ña̱kán tá xi̱kuni̱ ta̱ Jesús ña̱ ná kunda̱a̱-ini ta̱ ta̱a kán xa̱ʼa̱ ña̱yóʼo, saátu kúni̱ra ña̱ ná kunda̱a̱-ini iin na̱ cristiano na̱ xa̱a̱ nda̱kuchi ta ndásakáʼnu Ndióxi̱. Tá saá ¿ndáaña chindeétáʼan xíʼinyó ña̱ kandíxayó ña̱ ni̱xi̱ʼi̱ ta̱ Jesús xa̱ʼa̱yó, xíʼin ña̱ ndakiʼinyó ña̱ va̱ʼa ni ke̱ʼéyó ña̱ va̱ása va̱ʼa tá ya̱chi̱?

Ta̱ Pablo xi̱kunda̱a̱-inira ña̱ ni̱xi̱ʼi̱ ta̱ Jesús xa̱ʼa̱ra chi ni̱ka̱ʼa̱nra xíʼinra ña̱ ná natúʼunra xíʼin inkana.  Ka̱chira: “Táxii̱ tíxa̱ʼvi ndaʼa̱ tátayó Cristo Jesús, ta̱ ta̱xi ndee̱ ndaʼíi̱, saáchi xi̱nira ña̱ nda̱kú-inii̱ xíʼinra ta ta̱xira iin chiñu ndaʼíi̱ ña̱ natúʼi̱n xíʼin na̱ yiví, ni tá ya̱chi̱ xi̱kui̱ ta̱ xi̱ka̱ʼa̱n ndi̱va̱ʼa, ta̱ xi̱ndiku̱n sa̱tá inkana, ta xi̱kui̱ ta̱ kǒo ña̱ to̱ʼó” (1 Tim. 1:12-14). Ña̱ nda̱kiʼinra chiñu yóʼo, ta̱xiña ndee̱ ndaʼa̱ra ña̱ kandíxara ña̱ kúʼvi̱ní-ini ta̱ Jesús xínirara ta kándíxarara. Ta saátu ni̱ka̱ʼa̱n ta̱ Jesús xíʼinyó ña̱ ná ku̱ʼu̱nyó natúʼunyó xíʼin na̱ yiví xa̱ʼa̱ reino Ndióxi̱ (Mat. 28:19, 20). ¿Á kándíxayó ña̱ ndixa ni̱xi̱ʼi̱ ta̱ Jesús xa̱ʼa̱yó nda̱a̱ táki̱ʼva ke̱ʼé ta̱ Pablo?

Ná kotoyó ña̱ ndo̱ʼo ta̱ Albert, ta̱ ta̱vána ti̱xin ñuu Ndióxi̱ ki̱ʼva 34 ku̱i̱ya̱, ta sa̱kán nda̱ndikóra. Káchira: “Va̱ása kivi nandósói̱ xa̱ʼa̱ ña̱ va̱ása va̱ʼa ña̱ ke̱ʼíi̱ tá ya̱chi̱. Soo ki̱vi̱ kítai̱ nátúʼi̱n xíʼin na̱ yiví xa̱ʼa̱ Ndióxi̱, túvii̱ ña̱ mií ta̱ Jesús kúú ta̱ ta̱xi chiñu yóʼo ndaʼíi̱ nda̱a̱ táki̱ʼva ke̱ʼéra xíʼin ta̱ Pablo. Ña̱yóʼo sákusi̱íníña-inii̱ ta chíndeétáʼanña xíʼi̱n ña̱ kandíxai̱ mií xíʼin ña̱ ndakiʼii̱n ña̱ va̱ʼa chí nu̱únínu” (Sal. 51:3).

Ta̱ Allan, xi̱kuura iin ta̱ xi̱kutóoní kanitáʼan ta xi̱keʼéra ku̱a̱ʼání ña̱ va̱ása va̱ʼa tá kúma̱níka sakuaʼara xa̱ʼa̱ Ndióxi̱. Káchira: “Nda̱a̱ vitin ndákanikaxi̱níi̱ xa̱ʼa̱ ndiʼi ña̱ va̱ása va̱ʼa ña̱ ke̱ʼíi̱. Sava ndákavaní-inii̱. Soo táxiníi̱ tíxa̱ʼvi ndaʼa̱ Jehová chi ni xi̱keʼé ña̱ va̱ása va̱ʼa, táxira ña̱ ná ku̱ʼi̱n natúʼi̱n xíʼin na̱ yiví xa̱ʼa̱ra. Tá xítoi̱ ña̱ kúsi̱íní-ini na̱ yiví xíʼin ña̱ sánáʼa̱ tu̱ʼunra, ndákaʼíi̱n xa̱ʼa̱ ña̱ va̱ʼaní-ini Jehová ta kúʼvi̱ní-inira xínira ndiʼi na̱ yiví. Túvii̱ ña̱ xíniñúʼura yi̱ʼi̱ ña̱ chindeétáʼi̱n xíʼin inka na̱ íyo táki̱ʼva ni̱xi̱yoi̱ tá ya̱chi̱”.

Ña̱ kítayó sánáʼa̱yó na̱ yiví chíndeétáʼanña xíʼinyó ña̱ ndakanixi̱níyó xa̱ʼa̱ ña̱ va̱ʼa. Ta sándakaʼánña miíyó xa̱ʼa̱ ña̱ kúʼvi̱ní-ini ta̱ Jesús xínira miíyó ta kándíxara ña̱ kuchiñuyó keʼéyó chiñu ña̱ ta̱xira ndaʼa̱yó.

Níma̱yó kivi sandi̱ʼi̱níña-iniyó xa̱ʼa̱ ña̱ va̱ása va̱ʼa ña̱ ke̱ʼéyó tá ya̱chi̱ nda̱a̱ ná ndiʼi-xa̱ʼa̱ ñuyǐví ta̱ Ndi̱va̱ʼa. ¿Ndáaña chindeétáʼan xíʼinyó ña̱ va̱ása ndakaniníxi̱níyó xa̱ʼa̱ña?

Ñá Jean ndiʼi ki̱vi̱ chíka̱a̱níñá ndee̱ ña̱ va̱ása ndákanixi̱níñá xa̱ʼa̱ ña̱ va̱ása va̱ʼa ña̱ xi̱keʼéñá tá loʼoñá. Káchiñá: “Kúsi̱íní-inii̱ ña̱ kúnda̱a̱-inii̱ ña̱ káʼnuka Ndióxi̱ nu̱ú níma̱yó” (1 Juan 3:19, 20). Saátu miíyó va̱ʼa kúniyó chi kúnda̱a̱-ini Jehová xíʼin ta̱ Jesús ña̱ kúúyó na̱ yiví ku̱a̱chi. Ná ndakaʼányó chi xa̱ʼa̱ ña̱ kúʼvi̱-ini Ndióxi̱ xínira miíyó, ta̱xira se̱ʼera ña̱ kuvira xa̱ʼa̱ na̱ yiví ku̱a̱chi na̱ ndándikó-ini, ta su̱ví xa̱ʼa̱ na̱ yiví na̱ kǒo ku̱a̱chi ni̱xi̱ʼi̱ra (1 Tim. 1:15).

Ña̱ va̱ʼa kandíxayó xíʼin ndinuʼu-iniyó ña̱ iin regalo ña̱ ta̱xi ta̱ Jesús ndaʼa̱ iin iinyó kúú ña̱ ni̱xi̱ʼi̱ra, xíniñúʼu keʼéyó u̱vi̱ ña̱ʼa: ndakanixi̱níyó xa̱ʼa̱ ña̱ xi̱ke̱ʼé ta̱ Jesús xíʼin na̱ yiví ku̱a̱chi, ta saátu chika̱a̱yó ndee̱ ña̱ saxínuyó chiñu ña̱ ta̱xira ndaʼa̱yó. Tá saá kéʼéyó kivi ka̱ʼa̱nyó nda̱a̱ táki̱ʼva ni̱ka̱ʼa̱n ta̱ Pablo: ta̱ Jesús “kúú ta̱ ni̱kuʼvi̱-ini xi̱ni yi̱ʼi̱ ta nda̱taxi xíʼin miíra xa̱ʼíi̱”.