KUA puke e Tohi Tapu he tau talahauaga mafanatia mai he tau tagata ne logona hifo “tuga na tautolu.” (Iako. 5:17) Ma e fakatai, mukamuka ia tautolu ke maama e kakano ha Paulo he mogo ne talahau fakamaaliali e ia e tau kupu ne fakamau ia Roma 7:21-24: “Ka loto au ke he mena mitaki ke eke, ti ha ha ia au e kelea. . . . Oi te, ko e tagata malaia au!” Ko e tau logonaaga fakamooli pihia kua fakamafana a tautolu ka taufetului mo e tau nakai mitaki katoatoa ni ha tautolu.

Fakakite e Paulo e falu logonaaga fakamooli foki. Ia Kalatia 2:20, ne talahau e Paulo e mauokafua haana ko Iesu kua “fakaalofa mai kia au, mo e foaki mai e ia a ia ke hukui aki au”! Fakamaama nakai he mena ia e tau logonaaga ke “tuga na tautolu” foki? Liga nakai pihia tumau.

Ka lauia a tautolu mo e tau logonaaga kua tote e aoga fakatagata ha ko e tau agahala kua mole, liga taufetului a tautolu he falu mogo ke talia e fakaalofa mo e fakamagaloaga ha Iehova, ti uka ke onoono ke he poa lukutoto ko e mena fakaalofa ma tautolu. Manako mooli kia a Iesu ke moua e tautolu e onoonoaga ia ke he lukutoto? Ka pihia, ko e heigoa ka lagomatai a tautolu ke taute e mena ia? Kia kumikumi a tautolu ke he tau hūhū ia ne ua.

Ē, manako a Iesu ke onoono a tautolu ke he poa haana ko e mena fakaalofa fakatagata. Iloa fēfē e tautolu e mena ia? Manamanatu ke he fakatino ne fakamau ia Luka 23:39-43. Ha ha i ai e tagata ne tautau ke he akau tata ki a Iesu. Talahau e ia e agahala haana ha ko e hehē kua mole. Liga kelea lahi mahaki e matahavala ha ko e fakahala kelea nei kua lata ni ma e tau tagata matahavala kelea muitui. Ne fakaatukehe e tagata ti olelalo ki a Iesu: “Kia manatu mai a a koe kia au ka haele mai a koe ke he hau a kautu.”

Tali atu fēfē a Iesu? Manamanatu ki a Iesu ne mamahi he fuluhi haana ulu ke ono fakahako ke he tagata. Pete ne mamahi lahi, fakamalolō a ia ke mamali mo e fakamafana e tagata: “Ko e moli, ke tala atu e au kia koe, ko e [“aho nei,” NW] ke fakalataha ai a taua mo koe i parataiso.” Maeke ia Iesu ke fakamanatu age ke he tagata ko e “Tama he tagata [kua hau] kia fekafekau atu a ia, kia foaki atu foki hana moui mo lukutoto ke hukui aki e tau tagata tokologa.” (Mata. 20:28) Ka e mailoga nakai e koe kua peehi e Iesu e uho he poa haana ke lata mo e tagata ia? Ne totonu a Iesu he fakaaoga e tau kupu “koe” mo e “au.” Ti tala age e ia ke he tagata e amanakiaga, to moui ai ke he parataiso he lalolagi.

Kua manako mooli a Iesu ke talia he tagata nei e poa haana ko e mena fakaalofa fakatagata. Ka logona hifo pihia a Iesu hagaao ke he tagata matahavala ne nakaila fekafekau ke he Atua, to logona hifo pihia mooli a ia ke he Kerisiano kua papatiso ne fekafekau ke he Atua. Ko e heigoa mogoia ka lagomatai a tautolu ke feaki e logonaaga mitaki hagaao ki a tautolu ni pete ne tau agahala kua mole?

Ne fakalagalaga he fekafekauaga ha Paulo e onoonoaga haana ke he poa ha Iesu. Ke he puhala fe?  Fakamaama e ia: “Kua fakaaue atu foki au kia Keriso Iesu ha tautolu a Iki, ko ia kua fakamalolo kia au, he manatu a ia kua fakamoli au, ti kua kotofa e ia au ke he feua nai; Ko au ne vagahau kelea fakamua, to favale, to fakakelea atu.” (1 Timo. 1:12-14) Fakamafana he kotofaaga ha Paulo a ia hagaao ke he fakaalofa noa, ofania, mo e falanaki ha Iesu ki a ia fakatagata. Foaki mai foki e Iesu ki a tautolu takitokotaha e feua, po ke fekafekauaga ke fakamatala. (Mata. 28:19, 20) Maeke nakai ke lauia pihia a tautolu?

Ko Albert, ne nakaila leva e liu mai ki a Iehova he mole e tuku ki tua ke teitei 34 e tau, ne pehē: “Ha ha tumau i mua ia au e tau agahala haaku. Ka ko e mogo ka haia au he gahua he fonua, logona hifo au ke tuga e aposetolo ko Paulo, kua foaki ki a au fakatagata e fekafekauaga mai ia Iesu. Ne ati hake au ti logona hifo tumau e fiafia ki a au ni, moui haaku, mo e vahā i mua haaku.”​—Sala. 51:3.

Ko Allan, ne moui matahavala mo e favale ato fakaako e ia e kupu mooli, ne talahau: “Manamanatu agaia au ke he mamahi ne taute e au ke he tau tagata. Falu mogo kua fakaatukehe lahi au. Ka e fakaaue au ki a Iehova he fakaatā e ia e tagata agahala tuga a au ke uta e tala mitaki ke he falu. He kitia e au e tali he tau tagata ke he tala mitaki, ne fakamanatu ki a au e mitaki mo e fakaalofa lahi ha Iehova. Logona hifo e au kua fakaaoga e ia au ke lagomatai a lautolu hane taufetului mo e tuaga pihia.”

Ko e fekafekauaga ha tautolu kua taute a tautolu ke hagaaki e tau malolō ke he tau gahua mo e tau manatu mitaki. Ne fakamafana mai hagaao ke he fakaalofa noa, ofania, mo e falanaki ha Iesu ki a tautolu.

Ato utakehe e fakatokaaga kelea ha Satani, liga matutaki e tau loto ha tautolu ke fakapehia a tautolu ha ko e tau hehē kua mole. Ko e heigoa ka lagomatai a tautolu ke totoko e tau logonaaga pihia?

“Fiafia lahi au ha kua ‘mua e Atua ke he tau loto ha tautolu,’” he talahau e Jean, ne fa taufetului mo e tau logonaaga he agahala ha kua moui faahi ua he mogo ne fuata a ia. (1 Ioa. 3:19, 20) Maeke foki a tautolu ke mafanatia he iloa kua lahi atu e maama ha Iehova mo Iesu ke he tuaga agahala ha tautolu. Manatu, na foaki fakaalofa mai e laua e lukutoto, nakai ma e tau tagata mitaki katoatoa ka e ma lautolu ne agahala kua fakatokihala.​—1 Timo. 1:15.

Fakamooli e tautolu ke he tau loto e kupu mooli uho nei he mogo ka manamanatu fakahokulo he liogi ke he puhala ne fehagai a Iesu mo e tau tagata nakai mitaki katoatoa, ti eketaha a tautolu ke fakamooli ke he fekafekauaga kua kotofa mai e ia ki a tautolu. He taute pihia e koe tuga a Paulo, kua pehē a koe: Ko Iesu “ne fakaalofa mai kia au, mo e foaki mai e ia a ia ke hukui aki au.”