DIYIN BIZAAD halneʼgo éí hastóí bijéí nidabiiłnáago ‘tʼáá nihígi ádaatʼéé nítʼééʼ.’ (Jas. 5:17) Nihí ałdóʼ yilʼaadii Paul íiyisíí biʼdiiłʼáhígíí baa ákoniidzin doo, éí Romans 7:​21-24 ání: “Yáʼátʼéhígi ádeeshnííł niisįįh nidi bąąhági átʼéii tʼáá áłahjįʼ shidáahgi hólǫ́. . . . Dooládóʼ lá diné hojoobaʼ átʼéii nishłı̨́į da!” Azhą́ nidaʼiyiilzíih ndi, Paul ádííniid yę́ę binahjįʼ hadaʼííníilní.

Paul ájítʼéegi bee ádaa hojoolneʼ. Galatians 2:20 ání: Jesus “ayóóʼáshóʼníigo shá daaztsáanii baa jííníshłíhígíí bee hinishná.” Paul díí tʼáá aaníí yoodlą́. Paul ánínígi átʼéego ‘nihiísh ákótʼéego nitsídeikees?’ Łahda daatsʼí tʼéiyá.

Ádił nidaʼayeelzííʼ yę́ę biniinaa doo yáʼátʼééhgóó ádaa tsídííkos, áko Jiihóvah ayóóʼánihóʼní dóó nihaa ninéiidiyiizʼánę́ę doo nihił nílı̨́į da yileeh. Jesus bibee iinaʼ yee nihikʼé nináʼídlá yę́ę doo baa ahééh niidzingóó ánihiiłʼįįh. Ákoósh Jesus kótʼéego nitsíikees doo nihóʼní? Ákótʼéé ládą́ą́ʼ, haʼátʼíísh nihíká adoolwoł? Díí naakigo naʼídíkidígíí baa nídadíitʼįįł.

Jesus nihá nináʼadeitʼánígíí éí baa ahééh niidzin doo nihóʼní. Luke 23:​39-43 éí áhóótʼįįdígíí hazhóʼó baa nitsíníkees. Jesus bíighahgi hastiin léiʼ tsin yąąh dahidétı̨́. Bąąhígi ájiidzaa yę́ę Jesus bee bił hojoolneʼ. Éí tsʼídá doo yáʼáshónígi ájiidzaaígíí biniinaa yéigo ádihozhdiiltʼiʼgo tsin bąąh dah hoʼdiiltʼeʼ. Nitseedzáago Jesus ííłní: “Bee nóhólníihii biih yíníyáago shéénílniih doo.”

Jesus éí hastiin díí doo tʼáá naʼníleʼdii yichʼįʼ haadzíiʼ da: “Diné Silı̨́įʼii . . . beʼiinaʼ ninéidiníʼą́ągo daaztsánígíí yee ląʼí ninéidiyoołnih yiniyé níyá.” (Matt. 20:28) Azhą́ Jesus yéigo hoł nahonigaah ndi, hwee ajoobaʼ bee hastiin jinééłʼı̨́įʼgo ábizhdííniid: “Díí jı̨́ tʼáá aaníígóó ándishní, Kéyah Hózhǫ́ǫdi shił honílǫ́ǫ doo.” Ndi nináʼázhdeetʼánígíí hazhóʼó bił ííshjání ájiilaa. Há áhwiinítʼı̨́įgo Jesus éí saad “ni” dóó “shí” chojoosʼįįd. Hastiin éí kéyah hózhónígi nahasdzáán bikááʼ kééhonítʼı̨́į doo yiłní.

Tʼáadoo bahatʼaadí, Jesus éí bibee iinaʼ díí hastiin yá ninéidiníʼánígíí yaa ahééh nízin doo yóʼní. Díí hastiin awáalyahí jílı̨́į ndi, Jesus há ádzaaígíí baa ahééh jinízin doo hóʼnínígi átʼéego, Oodlání baptize ádanihiʼdiilyaaígíí tʼáá bééhózínígo éí ałdóʼ nihá yinízin. Azhą́ nidaʼayeelzíiʼ ndi, Jesus nihá nináʼádeetʼánígíí binahjįʼ haitʼéego yáʼátʼéehgo ádaa nitsíikees doo?

Paul éí Jesus bibee iinaʼ há ninéidiníʼánígíí binahjįʼ nahojilneʼígíí tʼáá íiyisíí hoł nilı̨́įgo baa tsízdeezkééz. Kójíní: “Christ  Jesus nihiBóhólníihii bee adziil sheiníláii bichʼįʼ baa ahééh nisin, háálá shaa dzólíigo shaa nitsíkeesgo binaanish nilíinii yiniyé nishiníłtı̨́. Tʼah doo ooshdląąh yę́ędą́ą́ʼ Jesus tʼóó baaʼihgo baa yááłtiʼ áádóó atííłʼįįd índa yéédzííʼ.” (1 Tim. 1:​12-14) Paul naanish baa deitʼánígíí binahjįʼ Jesus baa aʼááh nízingi, ayóóʼábóʼníigi, dóó baʼólíigi bił bééhoozin. Tʼáá ákótʼéego nahaneʼgi Jesus nihainílá. (Matt. 28:​19, 20) Nidahwiilneʼígíísh tʼáá ákótʼéego ahééh niidzingo ánihidoolííł?

Albert éí 34 nááhai yę́ędą́ą́ʼ disfellowship áhoʼdilyaago Jiihóvah baa nídzídzá. Ájíní: “Niʼiiyésííʼ yę́ę tʼahdii shidáahgi hólǫ́ǫ ndi, yilʼaadii Paul nahalingo shí ałdóʼ Jesus nahashneʼgi shee diníʼą́ągo baa nitséskees. Éí binahjįʼ hazhóʼó ádaa nitséskeesgo áshósin, áádóó sheʼiinaʼ índa náásgóó shá ahóótʼiʼígíí ałdóʼ baa shił hózhǫ́.”—Ps. 51:3.

Allan éí tʼah doo ajoodląąh yę́ędą́ą́ʼ hweʼiinaʼ tʼáá íiyisíí tʼóó baaʼihgo joołtʼih ńtʼééʼ, éí ayóó háháchįʼ. Ájíní: “Diné atídaashłaa yę́ę baa nitséskees łeh. Łahda bikʼee yínííł náshdleeh. Ákondi Jiihóvah bichʼįʼ ahééh nisin, niʼiisíih ndi, háálá yáʼátʼéehgo haneʼ baa hashneʼ. Diné díí yáʼátʼéehgo haneʼ deidiitsʼı̨́įhgo ayóó baa hózhǫ́ǫgo baa nitséskees. Jiihóvah éí yáʼátʼééh índa ayóóʼóʼóʼníinii nilı̨́. Jiihóvah choshoołʼı̨́įgo diné shígi áníshtʼé yę́ęgi átʼéego nidaakaiígíí bíká anáshwoʼ.”

Tʼáá nihí nahwiilneʼgi yáʼátʼéehii baa ákoniidzin áádóó yáʼátʼéehgo baa nitsíikees. Díí éí Jesus bibee ayóóʼóʼóʼniʼ, bibee ajoobaʼ, índa nihaa dzólíigi nihił ííshjání áyósin.

Séítan hooʼáłígíí biyaa kééhwiitʼı̨́, éí nahjįʼ kólyaajįʼ, hádą́ą́ʼ shı̨́ı̨́ nidaʼayeelzííʼ yę́ę bikʼee yínííł nideiikai. Nihijéí hadaałtʼée dooleełgi haʼátʼíí nihíká adoolwoł?

Tʼah ániid naasháádą́ą́ʼ sheʼiinaʼ doo yáʼátʼééhgóó yishtʼih ńtʼééʼ yę́ę tʼáá ákwíí jı̨́ shiʼdiiłʼá, ní Jean. Ákondi “‘God éí nihijéí biláahdi ayóó átʼéii nilı̨́įgo,’ díí ayóó shił yáʼátʼééh.” (1 John 3:​19, 20) Jiihóvah dóó Jesus éí bąąhígi ádaniitʼéhígíí bił bééhózin, áádóó nidaʼayeelzíʼígíí ałdóʼ bił bééhózin, áko díí binahjįʼ hadaʼííníilní. Béénílniih, ayóóʼóʼóʼní binahjįʼ nihikʼé nináʼílyáii éí diné yáʼátʼéehii doo bá da, ndi nidaʼiisíihii bá.—1 Tim. 1:15.

Sodilzingo tʼáá aaníinii nijéí bee hashtʼenilééh. Nidahwiilneʼgo éí Jesus diné nidaʼiisííh yaa nitsíkees yę́ęgi átʼéego baa nitsíikees doo. Díí átʼéego éí Paul haadzíʼígíí biʼdiilnííł, Jesus “ayóóʼáshóʼníigo shá daaztsáanii baa jííníshłíhígíí bee hinishná.”