MU Biblia mudi nu mbimbi jia giamatshidia jiazuelele athu akhalele ‘nu matangi gifua esue.’ (Yak. 5:17) Ha gufezegesa, tuajiya gukotelesa luholo Phaula wadivuile tangua gasonegele mbimbi jidi mu Lomo 7:21-24 egi: “Hangatshigina gutshita ndaga jiabonga, ngudi mutshita khuta ndaga jiabola. . . . Ngudi muenya malamba avula!” Mbimbi eji jia giamatshidia jiazuelele mupostolo Phaula jiajiya gutukuatesa tangua tudi mulua nu gubola guetu hakhetu.

Uvi mupostolo Phaula wazuelele luko luholo gakhalele gudivua. Mu Galatiya 2:20, wamonesele gutshigina guenji egi Yesu ‘wamuzumbile nu wadihanene mukunda nu muene’! Wana gudivua nji luholo elu ba? Yajiya gukhala egi wanago gudivua ngenyi tangua diagasue.

Uvi, gula tudi mulandula gudisagesa mukunda nu ndaga jiabola tuatshitshile, yajiya gukhala lamba ha gutshigina egi Yehowa wana gutuzumba nu wana gututotesela gubola. Yajiya gukhala nji lamba ha gutadila mulambu wa Yesu gifua kado gatuhanewe. Yesu wana gutshigina tukotelese egi mulambu wenji udi kado. Henyaha, itshi yajiya gutukuatesa ha gukotelesa egi mulambu wa Yesu udi kado? Tutadilenu ndaga eji mbadi.

Yesu wana gutshigina egi tutadile mulambu wenji gifua kado getu hakhetu. Luholo lutshi tuajiya gutshigina ndaga yene? Tangiza lumene ludi mu Luka 23:39-43. Mutshitshi wa ndaga jiabola wakhokhewe ha mutshi wa lamba hehi nu Yesu. Wajiyile gubola guenji. Idi naye gukhala egi muthu muene watshitshile gubola guakoma handaga phamba athu akhalele mutshita gubola guakoma akhalele mushiyiwa holu dia mutshi. Muthu muene wadisagele muavula nu wabubidile Yesu egi: ‘Nguwunguluge tangua mbawuza mu Ufumu waye.’

Itshi Yesu watshitshile? Tangiza gikenene giavuile Yesu tangua gabalumudile phala yenji ha gutala muthu muene. Ngatshima wakhalele mu lamba, Yesu wamuemuetele nu wamuwambelele egi: ‘Giamatshidia ngudi guguwambela mangino egi, mbawukhala nu ame mu phaladiso.’ Yesu wakhalele naye guwunguluisa muthu muene egi ‘Muna muthu wajile . . . ha guhana monyo wenji gifua gibawu mukunda nu athu avula.’ (Mat. 20:28) Uvi Yesu wamonesele muthu muene nu gisemo giagasue egi wahanele mulambu wenji mukunda nu muene. Wazuelele nu gisemo giagasue tangua diakalegele muene mbimbi “aye” nu “ame.” Wamonesele egi mulambu wenji wakhalele mukunda nu muthu muene luholo gamuhanele felela dia gujinga mu phaladiso.

Yadiago, Yesu watshiginyile egi muthu muene akotelese egi mulambu wenji wakhalele diago kado mukunda nu muene. Gula Yesu wadivile ngenyi mukunda nu mutshitshi wa ndaga jiabola wago wahetelego luendu lua gukombelela Yehowa, udi naye gudivua luholo lumoshi mukunda nu Muklisto wabatijiwe wago udi mukombeledi wa Nzambi. Itshi yajiya gutukuatesa ha gutshigina diago egi mulambu wa Klisto mbawutubatela gubonga ikhale tuatshitshile gubola masugu abalega?

Luholo Yesu wahanele Phaula mudimo wa gulongesa, yajiya gukhala egi Phaula wakotelesele  egi Yesu wafuile mukunda nu muene. Mu luholo lutshi? Udi muzuela egi: ‘Ngudi muhana mersi gudi Fumu Yesu Klisto wanguhuile ngolo jia gutshita mudimo wami, ngudi muhana mersi mukunda wana gunguzangula gifua muthu watagana nu wangutombele ha gumutshitshila mudimo, ngatshima ha thomo ngakhalele gumulelula nu gumusagesa nu gumushinga.’ (1 Tim. 1:12-14) Luholo Yesu wahanele Phaula mudimo, yamonesele egi wamuvidile khenda, wamuzumbile nu wakhalele gumushila mutshima. Yesu wahanele nji muthu wagasue mukatshi dietu ginemo gia gulongesa lukuma luabonga. (Mat. 28:19, 20) Luholo lumoshi nji, mudimo wetu wa gulongesa wana gutukuatesa ha gukotelesa egi Yesu wafuile mukunda nu esue.

Albert watshitshile ivo hehi nu 34 tangua gazolewe mu hungu. Wakatuga guvutudiwa mu hungu, udi muzuela egi: “Ngajiyilego gujimbila gubola guami. Uvi ngana gudivua gifua mupostolo Phaula gula ngudi mu mudimo wa gulongesa, handaga mudimo wene, Yesu wanguhanele. Mudimo wene wana gungusuanguluisa nu wana gungukuatesa ha gukhala nu matangi abonga mukunda nu lujingu nu masugu adi muza.”—Ngi. 51:3.

Gutuama egi Allan ajiye giamatshidia, wakhalele mutshita ndaga jiavula jiabola nu jia khuta. Udi muzuela egi: “Ngana gulandula gutangiza ndaga jiagasue jiabola ngatshitshidile athu. Matangua ako jiana gunguhana gikenene. Uvi ngudi muhana Yehowa mersi luholo watshiginyile egi muenya gubola gifua ame ngulongese lukuma luabonga gudi athu ako. Tangua ngana gumona athu mutshigina lukuma luabonga, yana gungukuatesa ha gujiya egi Yehowa udi muenya mutshima wabonga nu wana gutuzumba. Wana gungukalegela ha gukuatesa athu ako atshitshile ndaga jiabola gifua ame.”

Tangua tuana guya mu mudimo wa gulongesa, tuana gutshita ndaga jiawaha nu tuana gukhala nu matangi abonga. Mudimo wene wana gututshiginyisa egi, Yesu wana gutuvuila khenda, wana gutuzumba nu wana gutushila mutshima.

Mbatulandula gudibela mukunda nu ndaga tuakalegele masugu abalega uu nu tangua ulondegi wa Satana mbawushiyiwa. Uvi, itshi mbayitukuatesa ha gulua nu matangi ene?

Jean wana gudisagesa mukunda nu ndaga jiatshitshile muene tangua gakhalele muvuala. Udi muzuela egi: ‘Ngana gusuanguluga ha gujiya egi ‘Yehowa udi wakoma gubalega mitshima yetu’.” (1 Yone 3:19, 20) Esue nji tuajiya guheta gikhesa luholo tuana gujiya egi Yehowa nu Yesu ana gukotelesa egi tudi enya gubola. Hene, jiya egi ahanelego gibawu giene mukunda nu athu atagana, uvi mukunda nu enya gubola.—1 Tim. 1:15.

Gutangigiza mu gisambu luholo Yesu wakhalele mukalegela enya gubola ndaga, nu tangua tuana gutshita yagasue ha gutagenesa mudimo gatuhanele, tuana gutshigina egi gibawu giahanewe mukunda nu esue. Gula tuatshita ngenyi tuajiya guzuela gifua Phaula egi: Yesu ‘wanguzumbile nu wadihanene mukunda nu ame.’