BIBLIACHÖQA “noqantsiknö sentimientuyoq” mëtsikaq alli nunakunapaqmi willakun (Sant. 5:17). Jukqa karqan apostol Pablum, pëmi kënö nirqan: “Alli kaqta rurëta munaptïmi, mana alli kaq noqachö këkan. [...] ¡Alläpa ankupëpaq nunam kä!”. (Rom. 7:21-24) Noqantsikpis höraqa pënöchi sientikuntsik. Mana alli munënintsikta vencinapaq kallpachakïkarqa, Pablu imanö sientikunqanman yarpëmi alläpa yanapamäshun.

Jina Pabluqa nunakunarëkur Jesus wanunqanta imanö rikanqantapis willakurqanmi. Gälatas 2:20 textuchömi kënö nirqan: ‘Diospa Tsurinqa [...] kuyamarqanmi y noqarëkurmi kawëninta qorqan’. Apostol Pabluqa tsënö kanqampitaqa segürum karqan. ¿Noqantsikpis tsënöku pensantsik? Höraqa itsa tsënö kanqanta segürutsu kashwan.

Unë witsankuna mana allikunata ruranqantsikpita mana väleqnö sientikurqa, itsa difïcil kanman Jehovä kuyamanqantsikta y perdonamanqantsikta creiqa. Tsëqa, Jesus wanunqan cada ünupaq juk qarënö kanqanta rikëqa, itsa mas difïcilraq kanman. ¿Rasumpatsuraq Jesusqa noqantsikrëkur wanunqanta juk qarëtanö rikänata munan? Tsënö kaptinqa, ¿imaraq yanapamäshun tsëtanö rikänapaq? Tsë ishkan tapukïpita yachakurishun.

Noqantsikrëkur wanunqanta juk qarëtanö rikänatam Jesusqa munan. ¿Imanirtaq tsëta nintsik? Lücas 23:39-43 textu ninqanman pensarishun. Tsëchöqa willakun, Jesuspa lädun juk qeruchö warkurëkaq nuna mana allikunata ruranqampita arrepentikunqantam. Alläpa mana allikunatachi rurashqa karqan, porqui tsënöqa castigayaq pasëpa mana allita ruraq nunakunallatam. Tsënö jutsasapa wanunampaq kaqman alläpa yarpachakurchi, Jesusta kënö rogakurqan: “Gobiernïkiman yëkurir noqata yarpäramanki”.

¿Imataq Jesus nirqan? Pensarishun, pëqa alläpa nanatsikurchi suwakoq nunata rikänampaq tumarirqan. Alläpa nanatsikïkarpis aguantëkurninmi kuyëpa rikärir kënö nirqan: “Rasuntam kanan neq, noqawanmi Shumaq Patsachö kanki”. Jesusqa, ‘kawëninwan chaninta pagakur mëtsikaqta libranampaq’ kaqllatam nirinman karqan (Mat. 20:28). Peru manam tsëllatatsu nirqan, sinöqa përëkur wanunqantam tsë nunata entienditsirqan. Kuyëpam, ‘noqawanmi kanki’ nirqan y tsëqa rikätsikurqan, Jesus wanunqanrëkur tsë nuna juk mushoq patsachö kawanampaq kaqtam.

Tsë suwakoq nunaqa manam Diosta sirwishqatsu karqan. Tsënö karpis, Jesus wanunqan tsë nunapaq juk qarë cuenta kanampaq kaqtam Jesusqa entienditsita munarqan. Tsë nuna tsëta entiendinanta Jesus munëkaptinqa, masraqchi Diosta sirweq juk bautizakushqa cristiänu entiendinantaqa munan. Tsëqa, unë witsankuna jutsata rurashqa karpis, ¿imaraq yanapamäshun Jesuspa wanïninta juk yanapakoq qarëtanö rikänapaq?

Wakinkunata Diospita yachatsinampaq Jesus mandashqa kaptinmi, Pabluqa entiendirqan përëkur Jesus wanushqa kanqanta. Kënömi nirqan: “Kallpata qomaq Señornintsik Cristu Jesustam  agradecikü, porqui markäkïpaq kanqätam rikarqan y juk sagrädu rurëtam cargüman churamurqan, puntata Diosta ofendeq, markanta chikir imëkata ruraq y mana respetakoq nuna kashqa kaptïpis” (1 Tim. 1:12-14). Tsëta mandashqa kaptinmi, Pabluqa següru karqan Jesusqa pëta ankupanqanta, kuyanqanta y pëman confiakunqanta. Jesusqa noqantsiktapis Diospa Gobiernumpita willakunapaqmi mandamarquntsik (Mat. 28:19, 20). Tsëta ruranqantsikqa, ¿yanapamäshuntsuraq noqantsikrëkur Jesus wanushqa kanqanta entiendinapaq?

Rikärishun Albert jutiyoq wawqipa cäsunta. Pëqa 34 watapanömi Jehoväpa markampita qarqushqa karqan. Pëmi kënö willakun: “Jutsata ruranqäkunatam imëpis yarpakurkü. Peru yachatsikoq yarqurninqa, Pablunöpis Diospita yachatsikunäpaq Jesus mandamashqa kanqantam sientï. Tsëqa alläpam kushitsiman y kikïpita mana allita mana pensanäpaq y shamoq tiempuchö alli kawakïman pensanäpaqmi yanapaman” (Sal. 51:3).

Ällanqa alläpa piñakoq y lïsu nunam karqan y imëka mana allikunatam rurashqa karqan. Pëmi kënö nin: “Yarpäran wakinkunata mana allita ruranqäta. Höraqa tsëqa alläpam llakitsiman. Peru Jehovätam alläpa agradecikü jutsäkunata perdonaramar, pëpita alli noticiakunata wakinkunata willanäpaq permitimanqampita. Yachatsikunqäta nunakuna imanö chaskikuyanqanta rikëqa, Jehovä alläpa alli y kuyakoq kanqantam rikätsiman. Noqanö kashqa nunakunata yanapanäpaq pë utilizämanqantanömi sientï”.

Diospita yachatsikïchö ocupädu kanqantsikqa, alli kaqchö kallpantsikta utilizänapaq y alli kaq cösaskunaman pensanapaqmi yanapamantsik. Y tsëqa Jesus ankupämanqantsikta, kuyamanqantsikta y noqantsikman confiakunqantam cläru rikätsimantsik.

Itsachi Satanaspa mana alli mundun ushakanqanyaqqa, unë witsan ruranqantsik jutsakunata shonquntsik yarpëkätsimäshunraq. Tsëqa, ¿imaraq yanapamäshun tsëkunata yarpar mana llakikunapaq?

Jean jutiyoq wawqiqa, jövin kanqan witsan mana cristiänu kaqkunawan lluta portakunqampitam kananyaq alläpa llakikun. Peru pëqa kënömi nin: “Alläpam kushikü ‘Dios shonquntsikpitapis mas jatun’ kanqanta yarpar” (1 Juan 3:19, 20). Noqantsiktapis alläpam shoqamantsik jutsasapa kanqantsikta Jehoväwan Jesus yarpäyanqampita. Ama qonqashuntsu, Jehoväwan Jesusqa kuyakoq karmi jutsapa chaninta pagakuyarqan, y manam jutsannaq nunakunapaqtsu, sinöqa jutsankunapita arrepentikoq nunakunapaqmi (1 Tim. 1:15).

Jesus wanunqan noqantsikpaq juk qarë cuenta kanqantaqa següru kashun: jutsasapa nunakunata Jesus imanö tratanqanman pensarnin y llapan puëdinqantsikmannö Diospita yachatsikïta tïrarninmi. Tsënöpam Pablunöpis kënö nishun: “Pëqa kuyamarqanmi y noqarëkurmi kawëninta qorqan”.