BIBLIATAQA noqanchis jina sienteq runakunan qelqaranku (Sant. 5:17). Chaytan Pabloq qelqasqanpipas reparanchis, paymi Romanos 7:21-24 textopi niran: “Kay kamachikuytan noqapi tarini: ‘Allin kaqta ruwayta munashaqtiy noqapiña mana allin kaq kashasqanta. ¡Ay noqa runamanta!’”, nispa. Noqanchispas pay jinan sientekunchis.

Apóstol Pablon Gálatas 2:20 textopi mana iskayaspa kayta niran: ‘Criston noqata munakuwaspa noqarayku wañuran’, nispa. Wakinqa manapaschá chhaynachu sientekunchis. Qanri, ¿Pablo jinachu sientekunki?

Ñaupaqpi mana allinkunata ruwasqanchisraykun wakinninchisqa mal sientekuspa nisunman: “Manan Diosqa munakuwanmanchu nitaq juchaytapas perdonawanmanchu, manataqmi Jesuspas noqaraykuqa wañunmanchu karan”, nispa. Ichaqa, ¿imaynatan Jesús munan sacrificakusqanta qhawarinanchista? ¿Iman yanapawasunman pay jina qhawarinanchispaq? Chaymanta kunan yachasun.

Jesusqa niwanchismi: “Qanraykun vidaytaqa sacrificarani”, nispa. ¿Imaraykun chaymanta mana iskayananchischu? Chaypaq qhawarisun Lucas 23:39-43 textopi imachus pasasqanta. Juj runan k’aspipi warkusqa kashan Jesuspa ladonpi. Chay runaqa aceptanmi millaykuna ruwasqanta. Payqa sinchi millaykunatapunin ruwanman karan, chhayna ruwaqkunallatan k’aspipi warkuspaqa wañuchiqku. Juchanmanta pesapakuspan ichaqa Jesusta valekun: “Jesús, gobiernoykiman jaykuspayki noqata yuyarikuwanki”, nispa.

Jesusmi ichaqa kutichinanpaq payta qhawariran, chayta ruwaqtinqa cuerponqa astawanraqchá nanaran. Chaywanpas sumaqllatan niran: “Cheqaqtan kunan niyki: Noqawanmi paraisopi kanki”, nispa. Jesusqa ninmanmi karan: “Runaq Churinqa jamuran vidanwan pagaspa askha runakunata kacharichinanpaqmi’, nispa (Mat. 20:28). Jesusmi ichaqa entiendechiyta munaran payrayku wañushasqanta, chaymi sumaqllata niran: “Noqawanmi paraisopi kanki”, nispa. Chaywanmi payta prometesharan jamuq tiempopi kay allpapi wiñaypaq tiyananpaq.

Chay runaqa manan Jehová Dios serviyta atiranñachu, chaywanpas Jesusqa munaranmi payrayku sacrificakushasqanta aceptananta. Chhaynaqa astawanraqmi bautizakuspa Diosta serviq cristianoqa aceptanan payrayku Jesús wañusqanta. Ñaupaqpi jatun juchakunataña ruwaranchis chaypas, ¿iman yanapawasunman Jesuspa wañupusqanta aceptashanallanchispaq?

Apóstol Pabloqa predicay atisqanwanmi entienderan Jesús payrayku sacrificakusqanta. Chaymi niran: “Atiy qowaqniy Señorninchis Cristo Jesustan ‘gracias’ nini; paymi junt’aq runapaq qhawariwaspa juj llank’anata  qowaran ñaupaqpi Diosta pisichaspa rimaqña karani, jujkunata qatikachaqña karani, millay k’amiqña karani chaypas”, nispa (1 Tim. 1:12-14). Predicayta atisqanraykun mana iskayaranchu Jesuspa khuyapayasqanmanta munakusqanmantapas. Jesusqa sapankanchismanmi predicay llank’ayta qowaranchis (Mat. 28:19, 20). ¿Imaynatan chay yanapawanchis?

Albertmanta rimasun, payqa 34 watakuna jinan iñiq t’aqamanta qarqosqa karan. Paymi nin: “Manan qonqanichu mana allinkuna ruwasqayta, Jesusmi ichaqa Pabloman jina predicay llank’ayta qowaran. Chayta entiendeymi yanapawan kusisqa kanaypaq, jamuq tiempopi sumaq kausayta suyakunaypaqpas”, nispa (Sal. 51:3).

Alanmanta rimasun, manaraq bautizakushaspan imaymana mana allinkunata ruwaran, paymi nin: “Runakunata sufrichisqayta yuyarispan mayninpiqa sinchita llakikuni. Ichaqa Jehová Diosmi kay juchasapa runata permitiwan jujkunaman allin willakuykunata predicanaypaq. Wakinqa uyarikunkun predicasqayta, chaymi yuyarichiwan Jehová Dios munakuq khuyapayakuq kasqanta. Payqa munanmi noqa jina juchayoq runakunata yanapanayta, chaymi kay llank’aytaqa qowaran”, nispa.

Predicaspaqa allin kaqtan ruwashanchis, yanapawanchistaqmi allin kaqkunapi piensananchispaq. Predicayta atisqanchisraykun mana iskayanchischu Jesuspa khuyapayawasqanchismanta, munakuwasqanchismanta, noqanchispi confiasqanmantapas.

Millay runakuna chinkachisqa kananku p’unchaykaman sonqonchisqa mana allinkuna ruwasqanchismanta juchachawashallasun. Chhaynaqa, ¿iman yanapawasun ama pisipananchispaq?

Jeanmanta rimasun, payqa sinchitan llakikun ñaupaqpi Diosta servishaspa mana allinkunata ruwasqanmanta. Ichaqa paymi nin: “Diosqa sonqonchismanta aswan jatun kasqanta yuyarispan sonqoyqa tiyaykun”, nispa (1 Juan 3:19, 20). Jehová Diospas Jesuspas juchayoq kasqanchistan entiendewanchis, chayta yachaspan kallpachasqa sientekunchis. Manan kayta qonqananchischu: Jesusqa manan ch’uya runakunapaqchu vidanta sacrificaran, aswanpas juchayoq runakunapaqmi (1 Tim. 1:15).

“Noqaraykun Jesusqa wañuran” nisqanchismanta mana iskayanapaqqa kaykunatan ruwananchis: Jesús juchayoq runakunata imayna tratasqanpin piensananchis, atisqanchisman jinataq predicay llank’ayninchista junt’ananchis. Chaykunata ruwaspan apóstol Pablo jina nisunchis: ‘Jesusqa noqata munakuwaspan noqarayku wañuran’, nispa.