KUA ki te Pipiria i te au manako ngakau no te tangata “mei ia tatou katoa te tu.” (Iako. 5:17) Ei akaraanga, kua mārama ua tatou i te au tuatua a Paulo ia Roma 7:21-24: “E kia anoano au i te rave i te mea meitaki ra, te vaitata ua nei te kino iaku i reira. . . . Aue oki au ko te tangata mate maata e!” Te riro ra teia au manako ei akapumaana ia tatou, me tarevake tatou.

Kua akakite katoa a Paulo i tetai au manako ngakau ke. Ia Galatia 2:20, kua akapapu aia no Iesu “ko tei aroa mai [iaia], e kua oronga mai iaia uaorai [nona].” Kare ainei teia “mei ia tatou katoa te tu?” Penei i tetai taime.

Me kite tatou i te au manako ngakau taitaia no ta tatou ara i mua ana, penei ka ngata ia tatou i te āriki i to Iehova aroa e tona tu akakore i te ara, e kia āriki i te atinga oko ei apinga aroa kia tatou. Te inangaro ra ainei a Iesu ia tatou kia akamanako i te atinga oko mei teia te tu? Me koia ia, eaa te ka tauturu ia tatou kia pera? Ka akara matatio tatou e rua uianga.

Ae, te inangaro ra a Iesu kia akamanako tatou i tona atinga ei apinga aroa. Akapeea tatou e papu ei? Akamanako ana i teia akaraanga ia Luka 23:39-43. Te akatautau ua ra tetai tangata i te pae ia Iesu i runga i te rakau tamamae anga. Kua akakite aia i tona tarevake e te apa. Papu e e angaanga kikino tana i rave no te mea e utunga teia no te aronga kino mei iaia rai. Ma te taitaia, kua pati akatenga teia tangata kia Iesu: “E akamaara mai koe iaku, kia tae koe ki toou basileia.”

Akapeea a Iesu te ariu anga atu? Akamanako ana iaia i te uri anga i tona upoko no te akara atu i teia tangata. Noatu tona mamae, kua akapumaana atu aia i teia tangata ma te akapapu e: “Koia mou taku e karanga atu kia koe nei, ei Paradaiso taua katoa i teianei rai rā.” Kua akamaara atu a Iesu ki teia tangata no “te Tamaiti a te tangata i aere mai . . . e kia oronga i tona ora ei oko no te tangata e manganui.” (Mata. 20:28) Te kite ra ainei koe e kua akakite maru ua a Iesu i te tumu no tona atinga? Ma te tu oaoa kua karanga aia e ko “taua.” E kua akakite aia ki teia tangata no te manakonakoanga kia noo i te parataito i te enua nei.

Kare e ekoko anga, kua inangaro a Iesu i teia tangata kia āriki i tona atinga oko ei apinga aroa. No to Iesu tu aroa ki teia tangata kino kare i tavini ake i te Atua, ka pera rai a Iesu i tetai Kerititiano tei papetitoia e te tavini ra i te Atua. Eaa te ka tauturu ia tatou kia akamanako meitaki ia tatou uaorai noatu ta tatou ara i mua ana?

Kua tauturu ta Paulo angaanga tutu aere iaia kia akamanako e kua mate a Iesu nona.  Akapeea? Akamārama aia: “E te akameitaki nei au i to tatou Atu i te Mesia ra ia Iesu, i te akamaroiroi mai iaku nei, koia i tuatua iaku i te pikikaa kore, e kua akataoonga orometua mai iaku nei; I tei akakino oki i muatangana, e te takinga-kino, e te rave kino atu.” (1 Timo. 1:12-14) Kua riro tana tuanga angaanga ei akapapu kiaia i to Iesu aroa, tu akaaroa e te irinaki tikai iaia. Kua oronga katoa mai a Iesu i te angaanga tutu aere kia tatou. (Mata. 28:19, 20) Ka akakeu ainei teia ia tatou?

Akamārama a Albert, tei oki mai kia Iehova i muri ake i te akaatea angaia ki vao i te putuputuanga, mei te 34 mataiti e: “Te vai ua nei rai taku ara i mua iaku. Inara me rave au i te angaanga tutu aere, ka aite au mei te apotetoro ko Paulo, kua oronga mai a Iesu i tetai tuanga angaanga tutu aere naku. Te akamaroiroi nei teia iaku e te mataora nei au, i toku oraanga, e toku tuatau ki mua.”—Sala. 51:3.

Akakite a Allan, e oraanga kikino e te ta ua tona i mua ake ka apii ei i te tuatua mou: “E akamanako ua ana au i te kino taku i akatupu ki te tangata. I tetai taime, kua taitaia au. Inara te akameitaki nei au ia Iehova no tei āriki i tetai tangata ara mei iaku rai kia apai i te nuti meitaki ki tetai ke. Me kite au i te tangata e āriki ra i te nuti meitaki, e akamaara ua ana au i te tu meitaki e te tu aroa o Iehova. Te kite nei au e te taangaanga ra aia iaku, kia tauturu i tetai ke mei iaku rai.”

Te riro nei ta tatou angaanga tutu aere ei akapou i to tatou maroiroi ki runga i te au angaanga e te au mea memeitaki. Te akapapu maira te reira i to Iesu aroa, tu akaaroa, e te irinaki tikai ia tatou.

E tae ua atu ki te taime me takoreia te akatereanga kino a Satani, ka akaapa ua rai to tatou ngakau ia tatou no to tatou tarevake i mua ana. Eaa te ka tauturu ia tatou kia akakoromaki?

“Reka tikai au e ‘e maata te Atua i to tatou ngakau,’” i karanga ai a Jean, tei ngata iaia i te akakore i tona au tu apa ua e te oraanga tau kore mei tona mapu anga. (1 Ioa. 3:19, 20) Ka pumaana katoa tatou i te kite e kua mārama a Iehova e Iesu, i to tatou tu ara. E akamaara, kua oronga aroa mai raua i te atinga oko, kare no te aronga apa kore, mari ra no te aronga ara tei tataraara.—1 Timo. 1:15.

Ka akapumaana tatou ia tatou uaorai, me akamanako oonu tatou na roto i te pure, i to Iesu akono anga i te aronga ara, e me rave maroiroi tatou i te angaanga tutu aere, tana i oronga mai kia tatou. Na te pera anga, ka rauka ia koe i te tuatua mei ia Paulo rai: “Aroa mai [a Iesu] iaku, e kua oronga mai iaia uaorai noku.”