KI BIBLIJA čitinaja bašo verna sluge e Devleskere kolen so sine len „ista čuvstvija sar amen“ (Jak. 5:17, fus.). Na primer, lokhe šaj te haljova so manglja te vakerel o Pavle keda ko Rimjanite 7:21-24 pišingja: „Keda mangava te kerav adava soj šukar, o lošno tano ki mande... Žalibaske sium me!“ But ohrabrinela amen adava so o Pavle vakergja ple čuvstvija ko asavko način, soske adalea haljovaja kaj na siem samo amen adala so borinaja amen protiv amari nesovršenost.

O Pavle isto agjaar kerela sine lafi bašo javera da čuvstvija so sine le. Ov vakergja: „O Čhavo e Devleskoro... manglja man hem dengja plo životo baši mande“ (Gal. 2:20). O Pavle sine celosno uverimo ko adava. Dali tu da osetinea tut agjaar? Šaj na sekogaš.

Ako osetinea tut lošno baši nesave grevija so kergjan len angleder, šaj nane tuke lokho te prifatine kaj o Jehova mangela tut hem kaj prostingja tuke. Isto agjaar, šaj tuke pharo te dikhe ki otkupnina sar poklon soj dendo tuke lično. Ama, dali o Isus mangela te dikha ki otkupnina sar jekh asavko poklon? Ako oja, tegani so šaj te pomožinel amen te kera adava? Te dikha akala duj pučiba.

O Isus mangela te dikha ki leskiri žrtva sar poklon kova soj dendo lično amenge. Soske šaj te ova sigurna ko adava? Probin te zamisline tuke adava soj pišimo ko Luka 23:39-43. Jekh manuš soj kovimo uzo Isus ko stubo, priznajnela kaj kergja nešto but lošno. Sigurno kerela pe sine lafi bašo nešto seriozno, soske ko asavko surovo meribe sine osudime samo manuša kola so kergje but lošna bukja. Adaleske soj tano ki asavki phari situacija, akava manuš tano but voznemirimo hem molinela e Isuse: „Setin tut ki mande keda ka ove Cari“.

So kergja o Isus? Iako sine le bare dukha, irangja plo šero ki leste te šaj te dikhel le ko jakhja. Khedingja sila, ljubezno asandilo hem utešno glasoja vakergja leske: „Čače vakerava tuke avdive, tu ka ove mancar ko raj“. O Isus šaj sine te vakerel e manušeske kaj o manušikano Čhavo alo „te del plo životo sar otkupnina bute dženenge“ (Mat. 20:28). Ama, o Isus na kergja adava. Primetingjan li sar o Isus sikavgja kaj leskiri žrtva tani poklon kova soj dendo bašo adava manuš? Adalea so ljubezno vakergja leske „tu ka ove mancar“. Osven adava, o Isus istakningja kaj akale kriminalco ka ovel le lično korist tari leskiri žrtva — ka šaj te živinel ko raj ki Phuv.

O Isus manglja akava manuš te prifatinel leskiri žrtva sar poklon kova so ka ovel dendo leske lično. Ako e Isuse sine le asavko stavi sprema jekh kriminalco kova so ni na počmingja te služinel e Devleske, kobor poviše adava važinela bašo jekh krstimo hristijani kova so više služinela e Devleske. Ama, so šaj te pomožinel amenge te dikha ko asavko način ki e Hristoseskiri žrtva iako kergjem grevija angleder?

Adaleske so o Isus dengja zadača e Pavleske te propovedinel, ov sine uverimo kaj o Isus mulo leske da. O Pavle objasningja: „Blagodarno sium e Hristos Isuseske, amaro Gospodari, kova so dengja man sila, soske dikhlja ki mande sar verno hem dengja man služba, iako angleder sium sine huliteli, progoninava sine leskere narodo hem sium sine drsko manuš“ (1. Tim. 1:12-14). Adaleske so o Pavle dobingja asavki zadača iako angleder kerela sine but lošna bukja, ov sine uverimo kaj o Isus mangela le, sikavela leske milost hem isi le doverba ki leste. Slično, o Isus sekaske amendar dengja zadača te propovedina (Mat. 28:19, 20). Dali adava šaj te uverinel amen kaj ov mulo lično amenge da?

O Alberti, kova so sigende irangja pe ko Jehova otkeda sine isklučimo skoro 34 berš vakerela: „Našti te bistrav o grevija kola so kergjum len angleder. Ama, keda sium ki služba, isto sar o apostol Pavle mande da isi man čuvstvo kaj adaja zadača dobingjum la taro Isus. Adava ohrabrinela man hem pomožinela mange te dikhav pozitivno ki mande, ko mlo životo hem ki mli idnina“ (Ps. 51:3).

O Aleni kova so angleder te šunel bašo čačipe sine nasilno kriminalco, vakerela: „Našti te bistrav o lošna bukja so kerava sine e manušenge. Adaleske, ponekogaš osetinava man razočarimo. Ama, blagodarno sium e Jehovaske so dozvolinela jekh grešniko sar mande te vakerel o šukar haberi e javerenge. Keda dikhava sar reagirinena o manuša ko šukar haberi, mislinava ko adava kobor tano šukar o Jehova hem kobor mangela amen. Osetinava kaj koristinela man te šaj te pomožinav e manušenge kola so isi len slično životo sar so sine man“.

Keda siem ki služba, isi amen pozitivna misle soske džanaja kaj keraja nešto soj šukar. Adava uverinela amen kaj o Isus sikavela amenge mangipe, milost hem doverba.

Sa džikote trajnela akava lošno sveto, amaro vilo šaj te osudinel amen bašo grevija so kergjem len angleder. So šaj te pomožinel amenge te borina amen asavke čuvstvoncar?

I Džin koja so but puti osetinela pe krivo bašo adava so živinela sine dvolično životo keda sine poterni, vakerela: „Ohrabrinela man adava so ’o Devel tano pobaro taro amaro vilo‘“ (1. Jov. 3:19, 20). Isto sar i Džin, amen da šaj te utešinel amen adava so džanaja kaj o Jehova hem o Isus haljovena kaj siem grešna. Ma te bistra kaj ola mangipaja dengje otkupnina na bašo sovršena manuša, nego bašo grešnikija kola so kainena pe (1. Tim. 1:15).

Uverinaja amen kaj i otkupnina tani poklon soj dendo lično amenge keda hor razmislinaja bašo adava sar o Isus postapingja e nesovršena manušencar hem keda daja sa amendar te kera i služba soj amenge dendi. Tegani amen da, isto sar o Pavle, šaj te vakera: O Isus „manglja man hem dengja plo životo baši mande“.