Η ΑΓΙΑ ΓΡΑΦΗ ισί πφερντί λαφίντζαρ σο βακερντέ αντράλ πουμαρέ γκίσταρ τζενέ “σο τθερένας αισθήματα σαρ αμαρέ”. (Ιακ. 5:​17) Για παράδειγμας, αγαβάσα εύκολα σο μανγκέλας τι βακερέλ ο Παύλος κάνα βακερντάς χωρίς τι γκεραβέλ-πες ο λάφια σο ισί κο εδάφια Ρωμαίους 7:​21-24: «Όταν μανγκάβα τι κεράβ ο σωστός, ο κακός ισί ανγκλά-μάντε. . . . Σο ταλαιπωρία τσσίνταβα!» Ασακέ λάφια λοκχιαρένα αμαρό γκι κάνα μαράσα-αμέν για τι τζας κόντρα κο ατέλειες αμαρέ.

Ο Παύλος βακερντάς γιαβερά-ντα ασακέ λάφια σο νικιόνας αντράλ λέσκε γκίσταρ. Κο εδάφιος Γαλάτες 2:​20, βακερντάς ότι σίγουρα ο Ιησούς “μανγκλάς-λες ντα ντινάς πι ζωή λέσκε” προσωπικά! Σαρ νιωθίνενα τουμέν; Μπάζιμα μπορεί μα τι νιωθίνενα αντικάς.

Άμα ο πουρανέ αμαρτίες σο κερντάμ κερένα-αμέν τι νιωθίνας μπέτι, μπορεί μπάζιμα τι αβέλ αμένγκε δύσκολος τι πακιάς ότι ο Ιεχωβά μανγκέλα-αμέν ντα ότι συγχωριντάς-αμέν, ντα μπορεί τι ισί ατζέ πιο δύσκολος τι αγαβάς ότι η θυσία ι Ιησούσκι ισί εκ δώρος αμένγκε. Μανγκέλα μπαγιά ο Ιησούς τι ντικχάς ότι ο λύτρος ισί εκ δώρος; Αν βα, σο κα βοηθίνελ-αμέν τι κεράς-λες ανταβά; Για τι ντικχάς ανταλά ντούι ερωτήσεις.

Βα, ο Ιησούς μανγκέλα τι ντικχάς λέσκι θυσία σαρ εκ δώρος σο κερντάς ι κάθε τζενέσκε. Σαρ μπορίνασα τι αβάς σίγουροι ανταλέσκε; Ανέν τουμαρέ γκοντιάτε ο λάφια σο ισί κο εδάφια Λουκάς 23:​39-43. Εκ μουρς ισί ιμπλαντό εκχέ καστέστε πασέ κο Ιησούς. Μουτθαβέλα ότι κερντάς κάτι μπέτι. Οντουβά σο κερντάς πρέπει τι αβέλας μπουτ γκεραλό σόσκε αντικάς τιμωρίνενας οντουλέν σο κερένας ο πιο μπέτι πράγματα. Οντουβά τζενό τθερέλα μπαρί ντουκχ πι γκίστε οντουλένγκε σο κερντάς, ντα μολίνελα ι Ιησούς: «Μα τι μπιστρές-μαν κάνα κα αβές τι Βασιλειάτε».

Σο κερντάς ο Ιησούς; Σκεφτίνεν ι ντουκχ σο νιωθίνελα καζόμ βουρτίνελα πο σορό για τι ντικχέλ-λες κο γιακχά. Παρόλο σο ντουκχάλα μπουτ, ασάλα λέσκε γκουλντές ντα βακερέλα λέσκε: «Μπαγιά βακεράβα τούκε αντιβές, κα αβές μάντζαρ κο Παράδεισος». Ο Ιησούς κα μπορίνελας απλά τι βακερέλ λέσκε ότι «ο Τσσαβό ι τζενέσκο αβιλό . . . τι ντελ πι ζωή σαρ λύτρος μπουτέ τζενένγκε». (Ματθ. 20:​28) Αλλά ο Ιησούς σικαντάς σαρ η θυσία λέσκι κα κερέλας λατσσιπέ οντουλέ τζενέσκε προσωπικά. Κερντάς λέσαρ λάφι σαρ τι αβέλας λέσκο αμάλ κάνα βακερντάς «κα αβές μάντζαρ». Ντα βακερντάς προσωπικά οντουλέ τζενέσκε ότι κα τζουβντιόλας κο παράδεισος κι πφουβ.

Σίγουρα, ο Ιησούς μανγκέλας τι αγαβέλ οντουβά τζενό ότι λέσκι θυσία ισινέ εκ δώρος λέσκε. Αν ο Ιησούς νιωθίνελας αντικάς εκχέ τζενέσκε σο κερντάς μπέτι πράγματα ντα να τθερέλας ι ευκαιρία τι υπηρετίνελ ι Ντεβλές, σίγουρα νιωθίνελα αντικάς εκχέ μπολντέ Χριστιανόσκε-ντα σο υπηρετίνελα ι Ντεβλές. Σο κα βοηθίνελ-αμέν τι πακιάς ότι η θυσία ι Ιησούσκι κερέλα λατσσιπέ αμένγκε προσωπικά παρόλο σο κερντάμ αμαρτίες;

Ο Ιησούς ντινάς κο Παύλος τι κερέλ εκ έργος ντα ανταβά βοηθιντάς ι Παυλός τι αγαβέλ ότι ο Ιησούς μουλόας λέσκε. Σαρ αβέλας-πες ανταβά; Βοβ βακερντάς: «Ισινόμ πφερντό εκτίμηση ι Ιησού Χριστόσκε αμαρέ Κυριόσκε σο ντινάς-μαν ζορ, επειδή βακερντάς ότι ισινόμ πιστός ντα ντινάς-μαν εκ έργος, παρόλο σο πριν βακεράβας λάφια σο προσβαλίνενας ι Ντεβλές, τζάβας κόντρα λέσκε λαόσαρ ντα να σικαβάβας σεβασμός». (1 Τιμ. 1:​12-14) Ο διορισμός ι Παυλόσκο κερέλας-λες τι αβέλ σίγουρος ότι ο Ιησούς σικαβέλας λέσκε έλεος, αγάπη ντα εμπιστοσύνη. Ο Ιησούς ντινάς αμέν-ντα εκ έργος. (Ματθ. 28:​19, 20) Μπορίνελα ανταβά έργος τι επηρεάνελ αμέν-ντα σαρ ι Παυλός;

Ο Άλμπερτ, σο ισινέ αποκομμέ 34 μπρεσά ντα βουρτισάλο κο Ιεχωβά ακανά σουγκό, βακερέλα: «Μο αμαρτίες ισί πάντα ανγκλά-μάντε. Αλλά κάνα ισινόμ κο έργος, νιωθίναβα ότι λιντόμ εκ διορισμός κατά Ιησούς σαρ ο απόστολος Παύλος. Ανταβά ντέλα-μαν ζορ ντα κερέλα-μαν τι νιωθίναβ πιο λατσσές μάνγκε, μι ζωγιάκε ντα οντουλένγκε σο κα αβέν-πες».​—Ψαλμ. 51:3.

Ο Άλαν, σο τθερέλας εκ ζωή αντρέ κο έγκλημας ντα κι βία πριν τι σικλιόλ ι αλήθεια, βακερέλα: «Συνεχίναβα τι σκεφτίναβ ο γκεραλιπέ σο κερντόμ μερικέ τζενέντε. Ισί φαρ σο ανταβά ανέλα μάνγκε κατάθλιψη. Αλλά βακεράβα ευχαριστώ κο Ιεχωβά σο μουκχέλα εκχέ αμαρτωλέ τζενές σαρ ισινόμ με τι βακερέλ ο λατσσέ αμπέρια γιαβερέντε. Κάνα ντικχάβα ότι ο τζενέ ασουνένα ο λατσσέ αμπέρια, αβέλα μι γκοντιάτε καζόμ λατσσιπέ ντα αγάπη σικαβέλα ο Ιεχωβά. Νιωθίναβα ότι χρησιμοποιήνελα-μαν για τι βοηθίνελ τζενέν σο κερντέ βον-ντα μπέτι πράγματα σαρ κερντόμας με».

Κάνα ισινάμ κο έργος κεράσα κάτι λατσσό ντα σκεφτίνασα λατσσέ πράγματα. Ο έργος κερέλα-αμέν τι αβάς σίγουροι ότι ο Ιησούς σικαβέλα αμένγκε έλεος, αγάπη ντα εμπιστοσύνη.

Μέχρι τι καταστραφίντιβελ ανταβά πφιρνό ντουνιάς ι Μπενγκέσκο, αμαρό γκι μπορεί τι καταδικάνελα-αμέν πουρανέ αμαρτιένγκε. Σο κα βοηθίνελ-αμέν τι νασκιαράς ασακέ αισθήματα;

«Μπεϊντίναβα μπουτ σο “ο Ντεβέλ ισί πιο μπαρό αμαρέ γκίσταρ”», βακερέλα η Τζιν, σο χάνα-λα μπουτ φαρ ο τύψεις επειδή κάνα ισινέ τερνί, ανγκλάλ κο πφραλά ισινέ λατσσί αλλά αποτσοράλ κερέλας μπέτι πράγματα. (1 Ιωάν. 3:​19, 20) Αμαρό-ντα γκι λοκχιόλα κάνα ντάσα-αμέν γκοντί ότι ο Ιεχωβά ντα ο Ιησούς αγαβένα μπουτ πιο λατσσές αμένταρ ότι ισινάμ αμαρτωλοί. Μα μπιστρέν ότι βον ντινέ ο λύτρος, όχι τέλειε τζενένγκε, αλλά αμαρτωλέ τζενένγκε σο μετανιωσάλε.​—1 Τιμ. 1:15.

Κεράσα αμαρό γκι τι αβέλ σίγουρος ανταλέσκε κάνα σκεφτίνασα με προσευχή σο συμπεριφορά τθερέλας ο Ιησούς κο ατελείς τζενέ ντα κάνα κεράσα ο πιο λατσσό κο έργος σο ντινάς-αμέν. Άμα κα κερέν-λες ανταβά, τουμέν-ντα, σαρ ο Παύλος, κα μπορίνεν τι βακερέν: Ο Ιησούς «μανγκλάς-μαν ντα ντινάς πι ζωή μάνγκε».