M’BHIBHLYA, ife tisaleri mabvero a amuna akukhulupirika akuti akhali na “mabvero ninga ali na ife.” (Tiya. 5:17) Mwacitsandzo, ife tisakwanisa kubvesesa kuti Paulu akhafuna kulonganji pidalonga iye mafala anagumanika pa Aroma 7:21-24: “Ndingafuna kucita cinthu cadidi, ndisaona muna ine cifuno cakucita pinthu pyakuipa. . . . Munthu wakunentseka ninga ine!” Tingathimbana na kusowa kwathu ungwiro, ndi pyakuwangisa kakamwe kudziwa kuti mamuna wakukhulupirika ninga Paulu akhalimbo na mabvero mabodzi ene.

Mbwenye Paulu alongambo thangwi ya mabvero anango. Pa Agalata 2:20, iye alonga mwacinyindiro kuti ‘Mwana wa Mulungu andifuna mbaperekeka thangwi ya ine.’ Kodi imwe musapibvambo munjira ibodzi ene? Panango nee ndi ndzidzi onsene.

Khala ife tisatsukwala thangwi ya madawo adacita ife nduli, panango tinanyerezera kuti Yahova nee asatifuna, pontho nee asatilekerera, pyenepi pinaticitisa kukhonda tawira kuti ntsembe ya Yezu ndi yakufunika kwa ife. Kodi Yezu asafuna kuti ife tione ntsembe ya ciomboli munjira ineyi? Ninji pinafuna kutiphedza toera kucalira manyerezero anewa? Tendeni tidinge mibvundzo ineyi miwiri.

Mwandimomwene, Yezu asafuna kuti tione ntsembe yace ninga muoni wa munthu paekha. Tinakwanisa tani kunyindira pyenepi? Nyerezerani mafala adalembwa pa Luka 23:39-43. Mamuna akhomerwa pamuti wakusikimizira cifupi na Yezu. Iye alonga kuti akhali wakutsukwala thangwi ya pinthu pyakuipa pidacita iye. Uphanga ukhali cinthu cakuipa kakamwe thangwi munthu akhacita pyenepi akhakhomerwa pamuti. Thangwi yakutsukwala na pinthu pyenepi, mamuna unoyu adembetera Yezu kuti: “Ndikumbukireni mungapita mu Umambo wanu.”

Kodi Yezu atawira tani? Nyerezerani Yezu wakuti ali kubva kupha kakamwe, azungunusa nsolo wace mbayang’ana phanga. Maseze akhabva kupha kakamwe, Yezu amwetulira, pontho abalangaza mamuna unoyu mbampanga: “Mwandimomwene ine ndiri kukupanga lero kuti, unadzakhala na ine m’Paraizu.” Yezu mbadakwanisa kukumbusa basi ene mamuna unoyu kuti “Mwana wa munthu abwera . . . toera kupereka umaso wace ninga ciomboli toera kuombola anthu azinji.” (Mat. 20:28) Mbwenye, Yezu alonga mwakukoma ntima pya ntsembe yace kuna mamuna unoyu. Iye alonga mwauxamwali pidaphatisira iye mafala akuti “unadzakhala” na “ine.” Pontho iye apanga mamuna kuti mbadadzakhala m’paraizu pa dziko yapantsi.

Mwakukhonda penula, Yezu akhafuna kuti mamuna unoyu adziwe kuti ntsembe ikhafuna kupereka Yezu ndi ninga muoni kuna iye. Khala Yezu apibva munjira ineyi kuna munthu wakuti nee akhatumikira Mulungu, iye asapibvambo munjira ibodzi ene kuna Nkristu wakubatizwa wakuti asatumikira Mulungu. Ninji pinafuna kutiphedza toera kunyindira mwakukwana kuti ntsembe ya Kristu inaphindulisa m’bodzi na m’bodzi wa ife mwakukhonda tsalakana madawo adacita ife nduli?

Utumiki wa Paulu wam’phedza toera kukhala na maonero adidi thangwi ya ntsembe ya Yezu. Munjira  ipi? Iye alonga: “Ine ndisapereka takhuta kuna Kristu Yezu Mbuyathu, ule adandipasa mphambvu, thangwi iye andiona kuti ndine wakukhulupirika, mbandipasa basa ya utumiki, maseze kale ine ndikhali munthu wakuxola Mulungu, ndikhatcinga mbumba yace, pontho ndikhali waukali.” (1 Tim. 1:12-14) Nakuti Yezu akhadapasa basa Paulu mwakukhonda tsalakana pinthu pyakuipa pidacita iye, pyenepi pyampasa cinyindiro cakuti Yezu akhambvera ntsisi, akhanfuna, pontho akhan’nyindira. Munjira ibodzi ene, Yezu apasambo m’bodzi na m’bodzi wa ife basa yakumwaza mphangwa zadidi. (Mat. 28:19, 20) Kodi basa yathu yakumwaza mphangwa isatiphedza toera kubvesesa kuti Yezu aferambo ife?

Albert, wakuti abwerera cincino kuna Yahova pakumala pyaka 34 mbali wakubuluswa mu mpingo, alonga: “Ine nee ndisakwanisa kuduwala pinthu pyakuipa pidacita ine nduli. Mbwenye ndingakhala mu utumiki, ndisapibva kuti ndapaswa basa yakumwaza mphangwa na Yezu, ninga pidacita iye kuna mpostolo Paulu. Pyenepi pisandiphedza toera kukhala wakutsandzaya, pontho ndisakhala na maonero adidi thangwi ya umaso wanga na tsogolo yanga.”—Masal. 51:3.

Allan, wakuti akhali phanga na wanthonga mbadzati kupfundza undimomwene, alonga: “Ndisakumbuka pinthu pyakuipa pyonsene pikhacitira ine anthu. Midzidzi inango, pyenepi pisanditsukwalisa. Mbwenye ndisapereka takhuta kuna Yahova thangwi ya kutawirisa munthu wakudawa ninga ine kumwaza mphangwa zadidi kuna anango. Ndingaona anthu mbatawira mphangwa zadidi, pisandikumbusa kuti Yahova ndi wadidi na waufuni kakamwe. Ndisapibva kuti Yahova asaphatisira ine toera kuphedza anango akuti akhacitambo pinthu pyakuipa.”

Ife tingakhala mu utumiki, tisacita pinthu pyadidi, pontho tisanyerezera pinthu pyadidi. Pyenepi pisatiphedza toera kuona kuti Yezu asatibvera ntsisi, asatifuna, pontho asatinyindira.

Mpaka kumala kufudzwa kwa dziko ino ya Sathani, mitima yathu inapitiriza kutipasa mulando thangwi ya madawo adacita ife nduli. Ninji pinafuna kutiphedza toera kukunda mabvero anewa?

Jean, wakuti kazinji kene asathimbana na mabvero akuipa thangwi ya pinthu pyakuipa pikhacita iye ncibisobiso mbali ntsikana, alonga: “Ndisatsandzaya thangwi ya kudziwa kuti ‘Mulungu ndi nkulu kupiringana mitima yathu.’” (1 Juw. 3:19, 20) Ninga Jean, ife tinakwanisa kukhala na mabvero adidi thangwi tisadziwa kuti Yahova na Yezu asabvesesa kuti ndife akudawa. Kumbukani kuti iwo nee apereka ciomboli kuna anthu aungwiro, mbwenye apereka kuna anthu anatcunyuka madawo awo.—1 Tim. 1:15.

Ife tinakwanisa kukhala na cinyindiro cakuti ciomboli cisaphata basa kuna m’bodzi na m’bodzi wa ife, tingacita phembero na kunyerezera mwacidikhodikho njira idatsalakana Yezu anthu akusowa ungwiro, pontho tingacita pyonsene pinakwanisa ife toera kucita basa yakumwaza mphangwa idatipasa iye. Mungacita pyenepi, munakwanisambo kulonga ninga Paulu kuti: ‘Mwana wa Mulungu andifuna mbaperekeka thangwi ya ine.’