QULLAAWU MAXAAFI ‘ninke gedee manni’ giddonsata xawise coyiˈrino woyiti noota kulanno. (Yai. 5:17) Lawishshaho, Phaawuloosi Roomu Sokka 7:21-24 togo yee maaxikkinni coyiˈrino: “Dancha coye assate hasiˈranni heeˈreenna, busha coye assa doodheemmo gede assannoehu wolu seeri noota afoommo. . . . Ani hiittoo qarraataamooti!” Phaawuloosi coyiˈrinori guuntete xeˈne ledo sharrammeemmo woyite hexxo mudhineemmokki gede kaaˈlannonke.

Wole yannara kayinni Phaawuloosi Galatiyu Sokka 2:20 aana Yesuusi ‘baxannositanna’ ‘isi daafira lubbosi sayise uyinota’ coyiˈrino. Atera hatto lawannohe? Hatto yine hendeemmohu woˈmanka woyite ikka hoogara dandaanno.

Konni albaanni loonsoommo cubbinni kainohunni waagu dinoonkereeti yine hendeemmoha ikkiro, Yihowa baxannonketanna maarannonketa ammana, hattono isi wodo qixxeessinohu aneraati yine ammana qarra ikkitankera dandiitanno. Yesuusi, wodo qixxaabbinohu aneraati yine hendammora hasiˈranno? Hatto yee hedate mayi kaaˈlannonke? Hanni lamenta xaˈmuwa laˈno.

Yesuusi, wodote kakkalo mittu mittunku manchira uyinoonni elto gede assine laˈnammora hasiˈranno. Tenne mayinni anfeemmo? Hanni Luqaasi 23:39-43 noo xagge hedi. Mittu manchi qarru haqqira Yesuusi mule sutame no. Kuni manchi, busha coye assinota ammanino. Isi loosino jaddo shota diˈˈikkitino; korkaatuno haqqaho sunte shinannihu lowo jaddo loosino manchooti. Kuni manchi shete heeˈre, Yesuusa “Gashshootikkinni daatto woyite qaagie” yee huucciˈrino.

Yesuusi maa assiyya? Isi hakkonne mancho laˈˈate wirri yii woyite mageeshshi geeshsha shete nooro hedi. Yesuusi hisatu albinni manchoho, “Techo halaale yeemmohena, ati ane ledo Gannatete heeˈratto” (Haaro Alame Tiro) yee sheshifachishinosi. Yesuusi hakkonni jaddo loosino manchira, “Manchi Beetti lowo manna wode gatisate lubbosi sayise aara dayino” yaa dandaanno. (Mat. 20:28) Ikkollana Yesuusi wodote hakko manchono kaaˈlitannosita huwatanno gede assino. Yesuusi “ati” hattono “ane ledo” yitanno qaalla horoonsiˈrasi, hakkonne mancho shaqqillunni hasaawisinosita leellishshanno. Yesuusi, kakkalosi hakko manchira kaaˈlitannosita yaano gannate ikkitanno uullara heeˈranno faro fantannosita kulinosi.

Konni daafira, Yesuusi hakku manchi wodo qixxeessinoonnihu aneraati yee ammanara hasiˈrino. Yesuusi Maganoho soqqamannokkihu jaddo loosino manchi nafa wodo qixxeessinoonnihu aneraati yee ammanara hasiˈrinoha ikkiro, Magano magansiˈrannohu cuuamino Kiristaani isinni roorenkanni hatto yee ammanara hasiˈrannoti egennantinote. Ikkina, konni albaanni aye geeshshi cubbo loonsoommoha ikkirono, wodo qixxeessinoonnihu ninke mitti mittinkera ikkinota ammanneemmo gede mayi kaaˈlannonke?

Phaawuloosira uyinoonnisiti soqqanshote qoosso, Kiristoosi reyinohu aneraati yee ammananno  gede assitinosi. Hiittoonni? Isi togo yee xawisino: “Ane soqqanshosira doore, ammanamoommoha asse kiire jawaante uyinoeha Mooticha Kiristoosa Yesuusa galaxxeemmo. [Konni] albaanni Kiristoosa xonoommosiha, xiiwoommosihanna shollishoommosiha ikkiro nafa, isi kayinni saoˈya agurinoe.” (1 Xim. 1:12-14) Phaawuloosi afiˈrinoti soqqanshote qoosso, Yesuusi maarinositanna baxannosita huwatanno gedenna iso addaxxanno gede assitinosi. Ninke mittu mittunkurano Yesuusi sabbakate looso eeggo uyinonke. (Mat. 28:19, 20) Kuni loosi, Yesuusi reyinohu ninke mittu mittunkura ikkinota ammanneemmo gede assannonke?

Bohamihunni 34 diri gedensaanni muli yannara Yihowawa higinohu Alberti togo yiino: “Loosoommo cubbo dihaweemmo. Ikkirono, soqqameemmo woyite Phaawuloosi gede Yesuusi soqqanshote qoosso anerano uyinoeta hedeemmo. Soqqansho jawaachishshannoe; qoleno hagiirraamo ikkeemmo gedenna xaano ikko albillittete heeshshoˈya daafira gara ikkitino lao heedhannoe gede kaaˈlitannoe.”—Far. 51:3.

Halaale macciishshara albaanni jaddo loosannohunna finqila ikkinohu Alenino togo yiino: “Manna mageeshshi geeshsha gawajjoommoro xaano qaageemmo. Konninni kainohunni mito woyite quwa sae dadilleemmo. Ani cubbaataamo ikke heeˈreenna Yihowa mannaho dancha duduwo kuleemmo gede fajjinoeta hedeemmo woyite kayinni iso galaxxeemmo. Mannu halaale macciishshe adhanna laeemmo woyite, Yihowa mageeshshi geeshsha shaqqadonna baxillaancho Magano ikkinoro qaageemmo. Alba anete gedee heeshsho heeˈranno manna kaaˈlate Yihowa horoonsiˈranni nooeta hedeemmo.”

Soqqanshonke dancha coye assineemmonna gara ikkinore hendeemmo faro fantannonke. Qoleno Yesuusi maarinonketanna baxannonketa, hattono ammanannonketa qaangeemmo gede assitannonke.

Tini Sheexaanunniti busha alame baˈa geeshsha, konni albaanni loonsoommo cubbira wodaninke bushiishanni waadankera dandaanno. Ikkina togoo hedo gargadha dandiineemmohu hiittoonniiti?

Wedellite noo yannara lamu gari heeshsho heeˈrasenni wodanise buushiishanni waadannoseti Jiini togo yitino: “‘Maganu wodaninkera aliidiha’ ikkinota afaˈya tashshi assitannoe.” (1 Yoh. 3:19, 20) Ninkeno, Yihowanna Yesuusi cubbaataamma ikkinoommota ninkenni roore affinota huwatanke sheshifachishshannonke. Insa wodote kakkalo baxillunni qixxeessitinohu, guutu mannira ikkikkinni maaro eˈanno cubbaataammira ikkinota qaango.—1 Xim. 1:15.

Yesuusi guuntete xeˈne noonsa mannira assinore huuccatto assiˈne hiincankenna uyinonkeha sabbakate looso loosate dandiinummore baala assanke, wodo qixxaabbinohu ninke mittu mittunkura ikkinota ammanate kaaˈlitannonke. Hatto assinummoro Phaawuloosi gede, Yesuusi “baxannoe” hattono “ane daafira lubbosi sayise uyino” yine coyiˈra dandiineemmo.