SÖMËNI pasi di Bëibel ta taki unfa so sëmbë bi ta fii. Dee sëmbë aki bi dë „libisëmbë leti kuma u tu” (Jak. 5:17). Wë u ta fusutan gbelingbelin andi Paulosu bi kë taki, di a bi taki di soni di sikifi a Loomë 7:21-24. A bi taki taa: „Wan soni ta wooko a mi liba hebi fu te mi go u go du wan bumbuu soni nöö hogi nöö mi ta du. . . . Ee maingë, unfa seei mi o du te mi kumutu a di fuka aki basu?” Ee hën u ta mbei taanga möiti u dee zöndu fii fuu an basi u, nöö u sa feni taanga te u ta lesi a Bëibel taa Paulosu di bi ta hoi hënseei a Gadu, seei bi ta fii sö tu.

Paulosu bi taki u woto fasi fa a bi ta fii tu. A Galasia 2:20 Paulosu bi taki unfa a dë seiki taa Jesosi ’lobi ën tee a tei di dëdë fëën dëdë dëën’! I ta fii sö tu ö? Wë kandë ja ta fii sö hii juu.

Ee u ta fii bookosaka u di u bi du wan gaan zöndu a di ten di pasa, nöö so juu u sa ta fii kuma Jehovah an lobi u, söseei taa an da u paadon u di soni di u du. A sa ta taanga da u tu fuu biibi taa di dëdë di Jesosi dëdë paka di lusupaima da u, dë kuma wan kado di a da u. Jesosi kë fuu si di lusupaima kuma wan kado u? Wë ee sö a kë fuu si ën, nöö andi sa heepi u fuu ko ta si ën a di lö fasi dë? Boo taki u tu soni.

Jesosi kë fuu si di lusupaima kuma wan kado di a da u. Unfa u sa ko dë seiki u di soni aki? Pakisei di soni di sikifi a Lukasi 23:39-43. Wan womi dë pekapeka a wan posu a Jesosi bandja. A ta taki taa a du wan zöndu. A musu u dë taa wan gaan zöndu di womi aki du, mbei de pekëën a wan posu. Di womi aki dë ku gaan fuka a hati. Fëën mbei a ta begi Jesosi faa du wan soni dëën. A ta taki taa: „Jesosi o, gaantangi mi begi i, te i tei di Könu Tii fii nöö i mëni mi e.”

Andi Jesosi piki di womi aki? Pakisei unfa Jesosi bi fii pen tjika di a bi bia luku di womi. Hii fa Jesosi dë ku di pen aki, tökuseei a bi lafu mukii da di womi aki, hën a dëën kötöhati. A piki ën taa: „Tuutuu mi ta piki i tide taa joo dë ku mi a di Paladëisi.” Jesosi bi sa piki di womi taa: „Mi di ko dë Libisëmbë Mii ko a goonliba aki, . . . u mi lasi mi libi seei paka paima fu sömëni hia sëmbë sa ko bunu ku Gadu” (Mat. 20:28). Ma an bi du ën sö. A bi lei di womi taa di lusupaima di a paka bi dë da di womi seei tu. Jesosi bi fan a wan suti fasi di a bi taki taa „mi ku i”. A bi piki di womi taa a o libi u teego a wan paladëisi a goonliba aki.

An dë u taki taa Jesosi bi kë u di womi aki ko fusutan taa di lusupaima bi o tja wini ko dëën tu. Wë ee Jesosi bi taki di soni aki da wan hogiduma di an bi pena feni pasi faa dini Gadu, nöö unfa a dë ku wan Keesitu sëmbë di dopu, di ta dini Gadu? Andi sa heepi u fuu biibi taa di lusupaima sa heepi u aluwasi u bi du gaan zöndu a di ten di pasa?

U di Jesosi bi da Paulosu di wooko faa ta peleiki da sëmbë, mbei Paulosu bi sa fusutan taa Jesosi bi dëdë paka di lusupaima dëën. Faandi mbei u  taki sö? Paulosu bi taki taa: „Mi ta da Jesosi Keesitu tangi seei fu di a futoou mi teee a buta mi ko wookoma fëën, nöö hën a toona da mi kaakiti u mi du di wooko tu. Aai, di soni dë, a bigi da mi e. Biga a fesi, nöö mi bi dë gaan hogisonima. Mi bi ta sösö Masa Jesosi taa an dë u Gadu. Mi bi ta sitaafu dee sëmbë dee ta biibi nëën liba gaanfa seei. Sö mi bi libi hogi ku ën tjika” (1 Tim. 1:12-14). U di Jesosi bi da Paulosu wan wooko faa du hii fa a bi du hogi soni a di ten di pasa, mbei Paulosu bi si taa Jesosi abi tjalihati fëën, söseei taa a lobi ën, nöö a ta futoou ën tu. Wë sö nöö Jesosi da u di wooko fuu paaja di bunu buka tu (Mat. 28:19, 20). Di peleikiwooko di u ta du sa heepi u fuu ko fusutan taa Jesosi dëdë paka di lusupaima da u tu ö?

Albert da wan baaa di an bi ta dini Jehovah möön, ma baka 34 jaa hën a toona ko a di ölganisaasi u Jehovah. A ta taki taa: „Ma sa fëëkëtë dee soni dee mi bi du. Ma te mi ta du di peleikiwooko, nöö mi ta fii kuma apösutu Paulosu. Mi ta fii taa Jesosi hën da mi di wooko aki u mi du. Di wooko aki ta mbei mi ta dë waiwai, a ta mbei mi ko ta fii taa Gadu lobi mi, söseei taa soni o waka bunu da mi a di ten di ta ko.”​—Ps. 51:3.

Allan, da wan womi di bi ta du hogi soni ku sëmbë ufö a ko sabi soni u di tuutuu lei. A ta taki taa: „Mi ta mëni dee hogi dee mi bi ta du ku sëmbë jeti. So juu, di soni aki ta mbei mi fii bookosaka seei. Ma mi ta da Jehovah tangi taa a mbei wan hogiduma kuma mi, feni pasi u konda di bunu buka da wotowan. Te mi ta si unfa sëmbë ta haika di bunu buka, nöö a ta mbei mi mëni unfa Jehovah lobi sëmbë tjika, söseei unfa a abi bunuhati tjika. Mi ta fii taa a ta tei mi u mi heepi wotowan di bi du hogi soni a di ten di pasa tu.”

Di peleikiwooko di u ta du da wan bunu soni, nöö a ta heepi u fuu ta pakisei bunu soni tu. Di soni aki ta mbei u dë seiki taa Jesosi abi tjalihati fuu, taa a lobi u, söseei taa a ta futoou u.

Solanga u dë a di hogi goonliba u Saatan aki jeti, nöö hati fuu o sa ta kuutu u u dee föutu dee u bi mbei a di ten di pasa. Andi u sa du te a dë sö?

Wan sisa de kai Jean bi ta fii bookosaka so juu, u di a bi ta tjubi ta du soni di an bi bunu di a bi njönku. A ta taki taa: „Mi lobi di tëkisi di ta taki taa ’Gadu hei möön libisëmbë hati’” (1 Joh. 3:19, 20). Useei sa feni kötöhati te u sabi taa Jehovah ku Jesosi ta fusutan taa u da zöndu libisëmbë. Hoi a pakisei taa de wë seeka soni fuu sa feni di lusupaima. De an du di soni aki da sëmbë di an abi zöndu, ma de du ën da zöndu libisëmbë di ta tjali u dee zöndu di de du.​—1 Tim. 1:15.

Woo ko dë seiki taa Jesosi paka di lusupaima da u, te u ta begi, ta pakisei fundu u di fasi fa Jesosi bi ta libi ku zöndu libisëmbë, söseei te u ta mbei hii möiti fuu sa du di wooko di a da u fuu du. Te u ta du dee soni aki, nöö woo sa taki di soni di Paulosu bi taki. A bi taki taa: Jesosi „lobi mi tee a tei mi dëdë dëdë da mi.”