NA INI Bijbel wi kan leisi fu furu sma di ben „abi den srefi firi leki wi” (Yak. 5:17). Fu eksempre, wi kan frustan fa Paulus ben e firi di a taki a sani di skrifi na Romesma 7:21-24: „Te mi wani du bun, dan ogri de na ini mi. . . . Ai, mi de fu sari fu tru!” Te wi musu feti nanga wi eigi swakifasi, dan wi e kisi deki-ati te wi e leisi taki wan man leki Paulus ben abi den srefi firi leki wi.

Paulus ben e taki tu fu tra firi di a ben abi. Na Galasiasma 2:20 a taki dati a ben abi na overtoigi taki Yesus ’lobi en èn taki a gi en libi fu en ede’! Na so yu e firi tu? Kande a no ala ten yu e firi so.

Efu den sondu di yu du na ini a ten di pasa e meki yu firi leki yu no warti noti, dan a kan muilek son leisi fu bribi taki Yehovah lobi yu èn taki a gi yu pardon. A kan muilek srefi fu si a lusu-paiman fu Yesus leki wan kado di Gado gi yu. A de so trutru taki Yesus wani taki wi si a lusu-paiman leki wan kado? San kan yepi wi fu si a lusu-paiman na a fasi dati? Wi o taki fu den tu aksi disi.

Yesus wani taki yu si a lusu-paiman leki wan kado di Gado gi yu. Fa wi du sabi dati? Pruberi fu si na yu fesi san pasa na Lukas 23:39-43. Wan man e anga na wan postu na sei Yesus. A man sabi taki a du wan sani di no bun. A musu fu de so taki a du wan bigi ogri, fu di na soso sma di du so wan ogri e kisi dedestrafu na wan postu. Fu di a man disi e sari, meki a e begi Yesus: „Memre mi te yu kon na ini yu Kownukondre.”

San Yesus piki a man? Prakseri o furu pen Yesus firi di a drai luku a man. Toku a pruberi fu lafu nanga en èn fu gi en deki-ati nanga den wortu disi: „Fu tru, mi e taigi yu tide: Yu o de nanga mi na ini Paradijs.” Yesus ben kan taigi a man nomo taki ’a Manpikin fu libisma kon fu gi en libi leki wan lusu-paiman fu frulusu furu sma’ (Mat. 20:28). Ma yu si fa Yesus sori a man taki a dede gi en? A taki na wan switi fasi èn a gebroiki den wortu „yu” nanga „mi”. Yesus sori a man tu sortu wini a lusu-paiman ben o tyari gi en. A taigi en taki a ben o libi na ini a paradijs na grontapu.

Yesus ben wani taki a man disi frustan taki a dede fu en ben o tyari furu wini gi en. Efu Yesus sori lobi gi wan ogriman di no ben kisi na okasi srefi fu dini Gado, dan wi kan de seiker taki a abi moro lobi gi wan dopu Kresten di e dini Gado. San kan yepi yu fu bribi taki a lusu-paiman fu Krestes o tyari wini gi yu, awinsi sortu sondu yu du na ini a ten di pasa?

Fu di Yesus ben gi Paulus a wroko fu preiki, meki Paulus ben frustan taki Yesus dede gi en. Fa so? Paulus taki: „Mi e taki Krestes Yesus, wi Masra, tangi. Na en gi mi krakti, fu di a si mi leki wan sma di e gi yesi na Gado ala ten. Dati meki a poti mi fu du wan wroko gi en, aladi fosifosi mi ben de wan sma di ben e taki ogri fu Gado, di ben e frufolgu sma èn di no ben abi syen” (1 Tim. 1:12-14). Yesus gi Paulus a wroko disi aladi Paulus ben du furu ogri. Dati meki Paulus ben abi na overtoigi taki Yesus sori sari-ati gi en, taki a lobi en èn taki a ben e frutrow en. Yesus gi ibriwan fu wi a wroko tu fu preiki a bun nyunsu (Mat. 28:19, 20). A sani disi e yepi yu fu si taki Yesus dede gi yu tu?

Albert drai kon baka na Yehovah baka di a ben puru fu a gemeente pikinmoro 34 yari. A e taki: „Mi no man frigiti den ogri di mi du. Ma te mi e du a preikiwroko, dan neleki na apostel Paulus, mi e firi taki na Yesus gi mi a wroko disi. A wroko disi e gi mi deki-ati. A e meki taki mi abi wan koloku libi èn wan moi howpu.”​—Ps. 51:3.

Fosi Allan tron wan Kotoigi, a ben e du furu ogri. A e taki: „Te now ete mi e prakseri ala den ogri di mi du nanga sma. Son leisi mi e firi brokosaka. Ma mi e taki Yehovah tangi taki wan sondusma leki mi mag preiki a bun nyunsu gi tra sma. Te mi e si fa sma e arki a bun nyunsu, dan dati e memre mi taki Yehovah bun èn taki a abi lobi. Mi e firi leki a e gebroiki mi fu yepi tra sma di du den srefi sani di mi du.”

Te wi e du a preikiwroko, dan wi e du wan bun sani èn a e yepi wi fu prakseri bun sani tu. A e sori wi taki Yesus abi sari-ati nanga lobi èn taki a e frutrow wi.

Solanga a grontapu fu Satan no kisi pori, wi ati kan tan krutu wi fu den sondu di wi du. San o yepi wi fu feti nanga den firi disi?

Di Jean ben moro yongu, a ben e libi wan dobru libi. Furu leisi a e sari fu san a du. Ma a lobi a sani disi di Bijbel e taki: „Gado bigi moro wi ati” (1 Yoh. 3:19, 20). Wi kan kisi trowstu tu fu di wi sabi taki Yehovah nanga Yesus e frustan taki wi na sondusma. Fu di den lobi wi, meki Yehovah pai a lusu-paiman èn Yesus ben de klariklari fu dede gi wi. Den no du en gi sma di no abi sondu, ma gi sondusma di abi berow.​—1 Tim. 1:15.

Yu kan kon abi na overtoigi tu taki Yesus dede gi yu te yu e denki dipi fa Yesus sori lobi gi sondusma èn te yu e du a preikiwroko nanga yu heri ati. Te yu e du dati, dan yu o man taki a srefi sani disi di Paulus taki: ’Yesus lobi mi èn a gi en libi fu mi ede.’