EBHAYIBHELINI sifundza ngetibonelo letitsintsa inhlitiyo temadvodza ‘lebekanemiva lefana neyetfu.’ (Jak. 5:17) Sibonelo saloko kutsi singakucondza kahle loko lokwashiwo nguPawula nakakhuluma lamavi lesiwatfola kuRoma 7:21-24 latsi: “Nangifisa kwenta lokulungile, kunalokubi kimi. . . . Maye mine muntfu lohluphekako!” Imiva leliciniso njengalena iyasidvudvuta nasilwisana nesono lesinaso.

Kunaleminye imiva leliciniso Pawula layiveta. Embhalweni waGalathiya 2:20, Pawula waveta kuciniseka kwakhe nakatsi Jesu ‘wamtsandza futsi watinikela ngenca yakhe.’ Loko kuyiveta kahle yini ‘imiva lefana neyetfu?’ Kungenteka asitiva kanjalo ngaso sonkhe sikhatsi.

Nangabe silwisana nemiva lesenta sitive singakabaluleki ngenca yetono lesake satenta, ngalesinye sikhatsi singakutfola kumatima kwemukela lutsandvo lwaJehova nentsetselelo yakhe, futsi kungaba matima kakhulu kutsatsa umhlatjelo loyinhlawulo njengesipho lesiphiwa umuntfu ngamunye. Lena yindlela Jesu lafuna sitsatse ngayo lenhlawulo yini? Nangabe ngiyo, yini letasisita sente kanjalo? Ase sihlatiye lemibuto lemibili.

Jesu ufuna kutsi sitsatse umhlatjelo wakhe njengesipho lesiphiwa umuntfu ngamunye. Yini lesenta siciniseke ngaloko? Cabanga ngaloko lokubhalwe kuLukha 23:39-43. Bekunendvodza lebeyilenga elugodvweni eceleni kwaJesu. Yavuma kutsi beyenta tintfo letimbi. Kungenteka kutsi licala layo belilibi mbamba ngobe bekutigebengu lebetigange kakhulu lebetitfola sijeziso lesibuhlungu kangaka. Lendvodza ikhatsatekile ngenca yalesimo lebeyikuso, yancenga Jesu yatsi: “Ungikhumbule nawufika eMbusweni wakho.”

Watsini Jesu? Cabanga kutsi bekubuhlungu kanjani kuJesu nakagucuka kuze abuke lesigebengu. Ngisho nobe bekasebuhlungwini lobukhulu, Jesu wetama kumamatseka futsi wacinisekisa lendvodza, watsi: “Lamuhla ngiyakutjela ngitsi: Utawuba nami ePharadisi.” Jesu bekangavele akhumbute lendvodza kutsi ‘iNdvodzana yemuntfu . . . yetela kutewunikela ngemphefumulo wayo kutsi ube yinhlawulo yalabanyenti.’ (Mat. 20:28) Kepha unakile yini kutsi ngemusa Jesu wasebentisa umhlatjelo wakhe kulendvodza? Waba nebungani futsi wasebentisa ligama lelitsi “utawuba” nalelitsi “nami.” Wakhuluma ngalokucondzile nalendvodza ngalesikhatsi ayiniketa litsemba lekutsi itawuphila emhlabeni lolipharadisi.

Asingabati kutsi Jesu bekafuna lendvodza yemukele lomhlatjelo wakhe lobewutanikelwa kutsi ube sipho sayo. Nangabe Jesu bekativa ngalendlela ngalesigebengu lebesingakaze sitfole litfuba lekukhonta Nkulunkulu, loko kusenta setsembe kutsi utawuvelana kakhulu nemKhristu lobhajatisiwe futsi lokhonta Jehova. Yini-ke letasisita setsembe kutsi umhlatjelo waKhristu utawuzusisa umuntfu ngamunye ngisho nobe sake senta tono?

Umsebenti wekushumayela lebewentiwa nguPawula wayitsintsa indlela lebekatsatsa ngayo umhlatjelo waJesu. Kanjani? Wachaza watsi: “Ngiyambonga Khristu Jesu iNkhosi yetfu longinike emandla, ngobe ungibone ngetsembekile ngekunginika umsebenti, nanobe ekucaleni ngangihlambalata, ngihlupha labanye futsi ngedzelela.” (1 Thim. 1:12-14) Umsebenti Pawula lanikwa wona wamcinisekisa ngekutsi Jesu unemusa kuye, uyamtsandza futsi uyametsemba. Ngendlela lefanako, Jesu unikete ngamunye wetfu umsebenti wekushumayela tindzaba letimnandzi. (Mat. 28:19, 20) Lomsebenti wekushumayela ungasisita yini sicondze kutsi Jesu wasifela?

Albert losandza kubuyela kuJehova ngemuva kweminyaka lengaba ngu-34 ayekeliswa kuba nguFakazi, utsi: “Tono tami tisembikwami njalo. Kodvwa nangenta umsebenti wekushumayela, nami ngiva ngatsi Jesu unginikete umsebenti wekushumayela njengaPawula. Loko kuyangakha futsi kungenta ngitive ngijabulile ngekuphila kwami nangelikusasa lami.”—Hla. 51:3.

Allan, lebekasigebengu futsi anebudlova ngaphambi kwekutsi afundze liciniso, uyavuma utsi: “Ngihle ngicabanga ngato tonkhe tintfo letibuhlungu lengatenta kubantfu. Ngaletinye tikhatsi kungenta ngitive ngicindzetelekile. Kodvwa ngiyambonga Jehova ngekutsi uvumela soni lesinjengami kutsi simikise tindzaba letimnandzi kubantfu. Nangibona bantfu bemukela tindzaba letimnandzi, ngivele ngikhumbule kutsi Jehova muhle futsi unelutsandvo. Ngiva ngatsi usebentisa mine kuze asite labanye labake benta tintfo letimbi njengami.”

Umsebenti wekushumayela usisita kutsi sinake tintfo letikahle futsi sibe nemicabango lemihle. Usicinisekisa ngekutsi Jesu unemusa kitsi, uyasitsandza futsi uyasetsemba.

Nasisaphila kulelive lelibuswa nguSathane, tinhlitiyo tetfu tisengachubeka tisilahla ngenca yetono lesake satenta. Yini lengasisita silwisane naloku?

Jean lobekavame kulwisana nekutiva anelicala ngenca yekuphila lokumbacambili lebekakuphila ngesikhatsi asemusha, utsi: “Kuyangijabulisa kutsi ‘Nkulunkulu mkhulu kakhulu kunetinhlitiyo tetfu.’” (1 Johane 3:19, 20) Natsi kungasidvudvuta kwati kutsi Jehova naJesu basicondza kahle simo setfu sekuba nesono. Khumbula kutsi ngenca yelutsandvo labanalo, balungisela toni letiphendvukako inhlawulo, hhayi bantfu labete sono.—1 Thim. 1:15.

Nangabe sizindla futsi sicabanga ngaloko Jesu lakwentele bantfu labanesono, futsi nangabe senta konkhe lokusemandleni etfu kuze siwente kahle umsebenti lesiniketwe wona, sisuke senta tinhlitiyo tetfu ticiniseke ngaleliciniso leliligugu. Nangabe wenta njalo, njengaPawula, nawe ungatsi: Jesu ‘wangitsandza futsi watinikela ngenca yami.’