BIBLE ndola tɔɔ la ɛtɛkɛta w’oma k’ɛse otema w’anto waki “oko sho.” (Jak. 5:17) Ɛnyɛlɔ, sho koka nshihodia esadi eto kɛnɛ kakalange Pɔɔlɔ mbuta lo ɛtɛkɛta ande wofundami lo Rɔmɔ 7:21-24 wata ɔnɛ: “Lam’akombolami nsala kɛnɛ kele ɔlɔlɔ, kɛnɛ kele kɔlɔ kekɔ le mi. . . . Ose paa ko onto emi!” Ɛtɛkɛta w’oma k’ɛse otema ɛsɔ tokeketshaka etena kalɔshanaso la munga yaso hita.

Pɔɔlɔ akakambe nto l’ɛtɛkɛta ɛkina w’oma k’ɛse otema. Lo Ngalatiya 2:20, nde akɛnya eshikikelo kaki la nde ɔnɛ Yeso ‘akawoke ngandji ndo akayakimɔ dikambo diande’! Onde wɛ ndjaokaka woho akɔ waamɛ? Ondo aha mbala tshɛ.

Naka tekɔ lo ndjaɔsa oko anto w’anyanya l’ɔtɛ wa pɛkato yakatasale lo nshi y’edjedja, ondo sho koka monga l’okakatanu dia mbetawɔ ɔnɛ Jehowa tokaka ngandji, todimanyiyaka ndo koka monga tshondo y’okakatanu dia mbɔsa dia olambo wa Yeso wekɔ dikambo diaso shoamɛ. Onde mɛtɛ ngasɔ mbalanga Yeso dia sho mbɔsa oshinga w’etshungwelo? Naka ngasɔ, kakɔna kayotokimanyiya dia nsala dui sɔ? Tayanga nsɛdingola ambola ahende asɔ.

Eelo, Yeso nangaka dia sho mbɔsa olambo ande ɔsɔ oko woshasha aso shoamɛ. Ngande wakokaso monga l’eshikikelo lo dikambo sɔ? Tonge oko anto wɛna awui wofundami lo Luka 23:39-43. Pami kɛmɔtshi ekɔ panema l’otamba w’asui suke la Yeso. Nde ambetawɔ dia nde akasale awui wa kɔlɔ lo nshi yakete. Awui asɔ waki kɔlɔ efula nɛ dia ɔsɔ aki dilanya dia wolo efula diashawɔ atshi wa kɔlɔ wa ngasɔ. Pami kɛsɔ akayakiyanya efula, diakɔ diakandasɛngasɛnga Yeso ate: “Kombohɔ lam’ayoyonga lo Diolelo diayɛ.”

Kakɔna kakasale Yeso? Ohokanyiya paa kaki la Yeso dia mengesola ɔtɛ dia menda otshi wa kɔlɔ ɔsɔ. Kaanga mbakinde suke la nkitshiya, Yeso akamɔnamɔna ndo akashikikɛ pami kɛsɔ ate: “Lo mɛtɛ kakotɛmi ɛlɔ nte: Wɛ ayoyala la mi lo Paradiso.” Yeso akakoke mbohola pami kɛsɔ tsho ɔnɛ “Ɔna onto akaye . . . dia ndjokambɛ anto akina olimu ndo nkimɔ lɔsɛnɔ lande oko oshinga w’etshungwelo dikambo di’anto efula.” (Mat. 20:28) Ko onde wɛ akashihodisha dia Yeso akake epole ɔsɛkɛ la ɔkɔmi tshɛ lo kɛnɛ kalembetshiya olambo ande? Nde akasale akambo la lɔngɛnyi ndo akakambe la okitɔ wa lokombo “wɛ” la “mi.” Ndo nde akɛnya dia olambo ɔsɔ mendanaka l’onto l’onto etena kakandatɛkɛta dikambo dia elongamelo ka pami kɛsɔ ka nsɛna lo paradiso ka la nkɛtɛ.

Aha la taamu, Yeso akalange dia pami kɛsɔ mbetawɔ olambo ande oko woshasha ande. Naka Yeso akayaoke woho ɔsɔ lo dikambo di’otshi wa kɔlɔ waki komonga kaanga la diaaso dia kambɛ Nzambi, kete nde mɛtɛ ayoleka ndjaoka ngasɔ lo dikambo dia Okristo wakabatizama wakambɛ Nzambi. Ko kakɔna kayotokimanyiya dia mbetawɔ ɔnɛ olambo wa Kristo wekɔ la wahɔ le so onto l’onto kaanga mbakatasale pɛkato lo nshi yakete?

Woho wakɔsaka Pɔɔlɔ olambo wa Yeso akonge la shɛngiya l’esambishelo kande. Lo ngande? Nde akalembetshiya ate: “Lekɔ la lowando le Kristo Yeso Nkumɛso lakambisha wolo, nɛ dia nde akambɔshi oko onto lele la kɔlamelo lo mbishami olimu, kaanga mbakimi ntondo ɔtɛnganyi, osoyanyi ndo ɔsɛndji.” (1 Tim. 1:12-14) Ɔkɛndɛ wakalongola Pɔɔlɔ wakooshikikɛka dia Yeso akawokaka kɛtshi, ngandji ndo akayaɛkɛka le nde. Woho akɔ waamɛ mbele Yeso akatosha onto l’onto olimu w’esambishelo. (Mat. 28:19, 20) Onde vɔ hawokoke monga la shɛngiya yakɔ yaamɛ le so?

Albert, laki oma la nkalola le Jehowa atete edja l’ɔkɔngɔ wa nde mbitshanyema suke l’ɛnɔnyi 34, mbitaka ate: “Pɛkato yami yekɔ wonya tshɛ la ntondo kami. Koko etena kemi l’esambishelo, dimi ndjaokaka oko ɔpɔtɔlɔ Pɔɔlɔ dia Yeso akambisha olimu ɔnɛ dimɛ. Dui sɔ mbishakami ɔngɛnɔngɛnɔ ndo dimi mɛnaka akambo la sso di’ɔlɔlɔ lo kɛnɛ kendana la mi, lɔsɛnɔ lami ndo nshi yami yayaye.”​—Os. 51:3.

Allan, laki otshi wa kɔlɔ ndo kanga ngala ntondo ka nde mbeka akambo wa mɛtɛ mbitaka ate: “Dimi tetemalaka nkanyiya lo dikambo dia kɔlɔ tshɛ yakamasalɛ anto. Lo tena dimɔtshi, dui sɔ kɔmɔlakami. Koko dimi mbishaka Jehowa losaka l’ɔtɛ wakandetawɔ di’otshi wa pɛkato oko dimi nsambisha anto akina lokumu l’ɔlɔlɔ. Etena kɛnami woho wetawɔ anto lokumu l’ɔlɔlɔ, dui sɔ mboholakami dia Jehowa ekɔ ɔlɔlɔ ndo ngandji. Dimi mbɔsaka dia nde ekɔ lo nkamba la mi dia nkimanyiya anto akina wakasale vɔ lawɔ awui wa kɔlɔ.”

Olimu aso w’esambishelo toshaka diaaso dia sho nkamba la wolo aso dia nsala awui w’ɛlɔlɔ. Dui sɔ tɛnyaka dia Yeso tokaka kɛtshi, ngandji ndo ndjaɛkɛka le so.

Polo lam’ayolanyema dikongɛ dia Satana dia kɔlɔ nɛ, ondo etema aso mbeyaka ntetemala tɛndja onongo l’ɔtɛ wa munga yakatasale lo nshi yakete. Kakɔna kayotokimanyiya dia ndɔshana la tokanyi tɔsɔ?

Jean, lakalɔshanaka mbala efula la tokanyi ta ndjaɛndja onongo l’ɔtɛ wakinde la lɔsɛnɔ la dungi pende etena kakinde osekaseka, mbutaka ate: “Lekɔ l’ɔngɛnɔngɛnɔ dia mbeya ɔnɛ ‘Nzambi ndeka etema aso woke.’” (1 Jni. 3:19, 20) Sho lawɔ koka nkondja ekeketshelo lo mbeya dia Jehowa ndo Yeso mbeyaka dimɛna dia tekɔ atshi wa pɛkato. Tohɔ dia, la ngandji tshɛ vɔ wakakimɔ oshinga w’etshungwelo, aha lo dikambo di’anto wa kokele, koko dikambo di’atshi wa pɛkato wayatshumoya.​—1 Tim. 1:15.

Sho mongaka l’eshikikelo ɔnɛ oshinga w’etshungwelo mendanaka la so onto l’onto etena kakanaso yimba lo woho wasalɛ Yeso anto wele bu kokele akambo ndo etena kasalaso la wolo dia nkotsha ɔkɛndɛ wakandatosha wa nsambisha. Naka wɛ nsala ngasɔ, oko Pɔɔlɔ, wɛ koka mbita ɔnɛ: Yeso “akamboke ngandji ndo akayakimɔ dikambo diami.”